Woo kjenn wie Jesus nodoonen?
HEE WIA METLIEDENT
Jesus wia een volkomna Mensch un doawäajen haud hee met väl Sachen nich Trubbel, waut de aundre Menschen hauden. Oba hee wees doawäajen Metjefeel fa de Menschen. Ut Metleet holp hee aundre Menschen un deed mau rajcht mea fa dee, aus dee velangden. Denkj mol äwa de Jeschichten no en Kapitel 32, 37, 57, 99.
HEE WIA EMMA REED, TOOTOHORCHEN
Aule Menschen, endoont aus dee junk ooda ella wieren, feelden sikj frie, no am to komen. Jesus tald sikj kjeenmol doafäa, daut hee too besonda wia toom dee toohorchen. De Menschen kunnen daut späaren, daut Jesus om an bekjemmat wia un doawäajen wieren dee wellich met am toop. Om dit to seenen, see Kapitel 25, 27, 95.
HEE NEEM DAUT BÄDEN SEA IERNST
Jesus bäd foaken to sienen Voda, wan hee auleen wia un uk wan hee met aundre toop wia. Hee bäd pinkjlich un nich bloos verem äten. Hee bäd toom sienen Voda danken, toom dän preisen un toom no Rot froagen, wan hee must eene wichtje Entscheidunk moaken. See mol een poa Biespels en Kapitel 24, 34, 91, 122, 123.
HEE DOCHT NICH BLOOS AUN SIKJ SELFST
Wan Jesus eenjemol uk leewa wudd haben wult een bät vereiwen, wia hee doch doa fa aundre. Hee docht emma ea aun aundre aus aun sikj selfst. En dit wia hee een goodet Väabilt, waut wie kjennen nodoonen. Lia noch mea doaräwa en Kapitel 19, 41, 52.
JESUS WIA WELLICH REED TO VEJÄWEN
Jesus lieed aundre nich bloos, daut eena vejäwen sull, oba hee deed daut uk selfst; hee vejeef siene Jinja un aundre. Denkj biejlikj äwa daut no, waut en Kapitel 26, 40, 64, 85, 131 es.
HEE DEED SEA VÄL FA JEHOVA
Jesus wist daut, daut de mieeschte Juden am nich wudden aunnämen un daut eenje von dee am mau rajcht wudden dootmoaken. Oba hee deed aules, waut hee kunn toom dee halpen. Hee proowd soo väl aus mäajlich, aundre de Woarheit to lieren. Jesus haft siene Nofolja een goodet Väabilt jeloten, daut dee kjennen flietich Jehova deenen, wan de Menschen uk endoontich sent ooda an mau rajcht vefoljen. See Kapitel 16, 72, 103.
HEE WIA DEEMOOTICH
Jesus wia de onvolkomne Menschen wiet äwaläajen. Hee wist väl mea un haud väl mea Weisheit aus dee. Jesus wia väl jesunda un kjlieekja aus de Menschen rom am. Un doch deend hee aundre deemootich. Du kaust noch mea doavon lieren en Kapitel 10, 62, 66, 94, 116.
HEE WIA JEDULDICH
Jesus wia emma jeduldich met siene Apostel un met aundre Menschen. Mau rajcht wan dee daut uk nich nokjeemen, waut hee säd un deed. Wan dee mol waut nich vestunden, dan läd hee dee daut emma wada fresch ut, om daut dee kunnen Jehova noda komen. Toom seenen, woo jeduldich hee wia, see Kapitel 74, 98, 118, 135.
