Jesusca jucha illaj cashcamantami achca llaquicunata, preocupacioncunataca mana charirca. Pero gentecunamantami sustarij carca. Jesusca gentecunata ayudangapajmi achca esfuerzota rurarca. Paicuna minishtishcacunallataca mana curcachu. Ashtahuanpish tucuita rurashpami ayudarca. Jesusca cꞌuyaj cashcamantami shujtajcunata ayudarca. Paica llaquij cashcata ashtahuan yachangapajca capítulos 32, 37, 57, 99-tami ricui tucunchij.

Jesusca shujtajcunata yalli cashcataca mana crircachu. Chaimantami jovencunapish, mayor gentecunapish tucui laya gentecunapish paipajman cꞌuchuyasha nircacuna. Jesús shujtajcunamanta preocuparishcata ricushpaca gentecunaca allimi sintirircacuna. Paica shujtajcunamanta sustarij cashcata ashtahuan yachangapajca capítulos 25, 27, 95-tami ricui tucunchij.

Jesusca cutin cutin shungumantami Yaya Diosta mañaj carca. Pailla cashpapish, shujtajcunahuan Diosta adorangapajpishmi mañaj carca. Jesusca mana micungapajllachu Diosta mañaj carca. Ashtahuanpish Yaya Diosta pagui ningapaj, paita jatunyachingapaj, ima decisionta agllangapajpish Diostami mañaj carca. Paica ima horas mañaj cashcata ashtahuan yachangapajca capítulos 24, 34, 91, 122, 123-tami ricui tucunchij.

Huaquinpica Jesusca shaicushca cashpa, samarinata minishtishpapish shujtajcunatami ayudarca. Paica mana paillapichu yuyaj carca. Ashtahuanpish ima shina shujtajcunata ayudana cashcatami ricuchirca. Paica shujtajcunapi yuyaj cashcata ashtahuan yachangapajca capítulos 19, 41, 52-tami ricui tucunchij.

Jesusca shujtajcunata perdonana valishca cashcallataca mana yachachircachu. Ashtahuanpish paipaj causaihuanmi shujtajcunata cꞌuyaihuan tratana cashcata ricuchirca. Paica shujtajcunata ima shina perdonaj cashcata ashtahuan yachangapajca capítulos 26, 40, 64, 85, 131-tami ricui tucunchij.

Bibliapica judiocunaca Jesusta mana chasquishpa huañuchinatami huillarca. Jesusca paita huañuchinata yachashpaca esfuerzota mana rurashpami ashallata ruranman carca. Ashtahuanpish gentecuna Yaya Diosta adorachun ayudangapajca tucuitami rurarca. Ñucanchijpish jarcaicunata charishpa shujtajcuna llaquichijpipish shujtajcuna Yaya Diosta adorachunmi tucuita rurana canchij. Caimanta ashtahuan yachangapajca capítulos 16, 72, 103-tami ricui tucunchij.

Jesusca jucha illaj cashcamantami tucui runacunamanta yalli yachaj carca. Paica cuerpopipish, yuyaipipish jucha illaj cashcamantami pai layaca ni pi mana tiyarca. Chashna cashpapish paica shujtajcunata sirvishpami humilde carca. Jesús humilde cashcata ashtahuan yachangapajca capítulos 10, 62, 66, 94, 116-tami ricui tucunchij.

Jesusta catijcuna, shujtaj gentecunapish Jesús yachachishcata paicunapaj causaipi mana pajtachijpica paicunahuanca mana pꞌiñarircachu. Chaipaj randica gentecuna Diospajman cꞌuchuyachunca mana pꞌiñarishpami cutin cutin yachachij carca. Jesús mana utca pꞌiñarij cashcata ashtahuan yachangapajca capítulos 74, 98, 118, 135-tami ricui tucunchij.