Мукәммәл инсан сүпитидә, һәзрити Әйса көплигән адәмләр дуч кәлгән ағриқларни вә қийинчилиқларни баштин кәчүрмигән. Амма у адәмләрниң дәрдигә дәрман болған. У инсанлар үчүн өзини айимай, зөрүр болған иштин көпирәк ишларни қилишқа тәйяр болған еди. Дәрһәқиқәт, рәһим-шәпқәт Әйса пәйғәмбәрни башқиларға ярдәм беришкә үндигән. 32, 37, 57 вә 99-бапларни оқуп, бу һәққидә чоңқур ойлиниң.

Қери-яш, чоң-кичик һәммиси Әйса Мәсиһтин бемалал ярдәм соралиған. Сәвәви у өзини интайин бәнт яки муһим адәм қилип көрсәтмигән. Һәзрити Әйса кишиләрниң һәрбиригә сәмимий қизиқиш көрсәткәч, улар униң алдида өзини әркин һис қилған. 25, 27 вә 95-бапларни оқуп, буниңға диққәт қилип көрүң.

Әйса Мәсиһ Атисиға әстаидил дуа қилған. Бәзидә ялғуз, бәзидә болса, Худаниң башқа садиқ хизмәтчилириниң арисида туруп, дуа қилған. У пәқәт тамақ йейишниң алдида дуа қилипла қоймай, бәлки нурғун башқа вәзийәтләрдиму дуа қилған. Һәзрити Әйса Атисиға миннәтдарлиқ билдүрүш, Уни мәдһийиләш яки муһим қарарни чиқириштин бурун йол-йоруқ елиш үчүн дуа қилған еди. 24, 34, 91, 122 вә 123-бапларда кәлтүрүлгән мисалларни көрүп чиқиң.

Гайида һәзрити Әйса қаттиқ чарчап, дәм елишқа муһтаҗ болған болсиму, башқилар үчүн өз истәклирини қурбан қилған. У башқиларни өзидин үстүн қойған. Әйса пәйғәмбәр пидакарлиқ көрситиштә бизгә әҗайип үлгә қалдурған. Уни қандақ үлгә қилалайдиғанлиғимиз һәққидә 19, 41 вә 52-баплардин биливелиң.

Әйса Мәсиһ пәқәт башқиларға кәчүрүш керәклигини үгитипла қоймай, бәлки өзиму шагиртлирини вә башқа кишиләрни кәчүргән. 26, 40, 64, 85 вә 131-бапларни оқуп, бу һәққидә ойлинип көрүң.

Йәһудийларниң көпинчиси Мәсиһни қобул қилмайдиғанлиғи вә дүшмәнлири уни өлтүридиғанлиғи тоғрилиқ бәшарәт қилинған еди. Шуңа, Әйса өзини аяп, қизғинлиқ билән хизмәт қилмаслиғи мүмкин еди. Лекин у пак ибадәтни қизғинлиқ билән қоллап-қувәтлигән. Пәрвасизлиққа, һәтта зиянкәшликкә учриған барлиқ әгәшкүчилири үчүн һәзрити Әйса қизғинлиқниң үлгисини қалдурған. Бу һәққидә 16, 72 вә 103-бапларда оқуң.

Әйса пәйғәмбәр намукәммәл инсанлардин нурғун җәһәтләрдә, мәсилән билим вә даналиқта үстүн туратти. У мукәммәл болғач, униң җисманий вә әқлий қабилийәтлири һәрқандақ кишиниңкидин артуқ болған. Шундақ болсиму, у кәмтәрлик билән башқиларға хизмәт қилған еди. 10, 62, 66, 94 вә 116-бапларда бу һәққидики мисалларни биләләйсиз.

Шагиртлири вә башқа кишиләр Әйса пәйғәмбәрни үлгә қилмиғанда яки униң үгәткәнлиригә мас иш-һәрикәт қилмиғанда, у дайим уларға сәвирчанлиқ көрсәткән. Һәзрити Әйса сәвир-тақәт билән уларни Йәһва Худаға йеқинлаштуруш үчүн зөрүр болған тәлимләрни тәкрар-тәкрар үгәткән. 74, 98, 118 вә 135-баплардин Әйсаниң сәвирчанлиғи һәққидә биливелиң.