“Ine anibaka jakore ma dakobo ma sabajine ma yewerene tane jaja. Nokabukaya ine niborabakakore, marabai kuana ma isanamatae. Tai maraji isiko ine nebu monuka mabane ma isanae. Orinakitane obonobuaine” (Madhu, a India atamo).

 Organización Mundial de la Salud dibuya “ina kokotukanea eku tiratuma kuanawitu isanamataya”. Rakate dibuya: tiratuma eraja sanamataya, yewerea, nomajane isiko asirajawitu nonaya.

 Iji tane kuayabajame jawanatane kujuya ekijase jisiko asira nonatetai, tane. Ji nomajane, ji yewerene, jisiko asiraja nonane, tane obonobiaja. Tatutuma isiko kuana asiraja nonayame, iji obonobukuna tiratuma isia obonobuyaja ekira. Tiarone, Dio tatutuma isia obonobuyara?

 Biblia dibiakutai: “Nibora tira tane nonaeyama” (Awajiabara 1:27).

 Biblia dibiakutai sina ka inaminaya?: Dio nibora tira tane nonae, tai saba deko yakerajawitu. Rakate wakaya nibora jakutai “wite oriobonoyakutai taisi monuka oriatirasi obonokunarai”. Dio obononaja, saba asira, anibora jakutai atira sabajine, yewerene, dibu asiraja isia dibiaja (Efeso 5:33; Colosas 3:19). Tamaja ka emija Dio obonoya tiratuma jawana omi jamejerei.

 “Ine anibaka jakore ma oriwaraotuma kawanamo ma nomajane eratane atiramonuka ma abane asirajawitu maisiko nonae. Ma joira 17 jakore ma airamo ma yaota ekumo ma webotakitane dibunae ine tai isiko yajinaja jakore. Ine iramotakore ma nibora, ma rimatuma, mawere aubamotuma tane, ma isiko asiraja taubia, ma moara ekira monuka. Takore Jeoba, b ka nonatu, isia naminaine. Taisike tatutuma yatomanetea, tiame ine naminae tai kuanawitu maobonoya, tai saba ma moara taerajawitu” (María, Argentina atamo).

 Biblia dibiakutai: “Amuaraisawitu ja. Taisike waraoto amuaraisatane are iabanaja” (Proverbios 18:24).

 Biblia dibiakutai sina ka inaminaya?: Muaraisa yakerajawitu are ji sabasabamo jate. Ji kuayabajakutai isia dewarakitane obonokore, ji musabawitu jakutai saba dewarau.

 “Joira 20 kuayabakore warao jisakarakate isiko dewaranatanaeine ma isiko asirajawitu nonaubuajakutai isia. Ine aruanerajawitu jatanaine, oriwaka omi. Ma obonobu erajasi jatanae. Takore ine warao daisa saba dewarakore ma nokoae, ma obojona bajuka bajinae” (Elif, Turquía atamo).

 Biblia dibiakutai: “Dio yatu sanetayame yatu aobonobu erajasi Dio amojeku abakotu” (1 Pedro 5:7).

 Biblia dibiakutai sina ka inaminaya?: Iji Dio isiko dewarakore tai are ji ribu nokoya (Salmo 55:22; 65:2). Dio kuana ji obonoyawitu, tiame ji sanetakuna ijiwite mimejerei ji moara taerajawitu jakutai.

 “Ine Jeoba naminakore ma sanetae ma obonobu eraja tanaka jamejerei, ma isiko asira nonajakutai kuare. Ama ine isiko dewarakore ma obojona yakera bajia. Dio, muaraisa yakerajawitu, naminaya katukane ine bajia” (Ana, Belice atamo).

 Biblia dibiakutai: “Waraotuma aobojona aruaneratanewitu jakutai, dawanatuma arakate, saba dibu nomerajawitu eku abate, waraotuma jobaji arai ekijase ijawanatanaka jamejerei” (Salmo 10:18).

 Biblia dibiakutai sina ka inaminaya?: Jakewitu Jeoba nona nomerajena jakutai kokotuka ekorate. Tiame, tiratuma isia asirajawitu nonayakutai, nomajayakutai rakate, ekorate.

 “Ine naminakore ya utirajawituana Jeoba ekorate tiratuma anibakatuma tane asirajawitu kuayabayakutai, ma obojona bajuka sabuka iabaya. Ma obonobu yakerajawitu bajia” (Roberta, México atamo).

 Iji kuarika naminakitane obonoyakore, yawaka Biblia eku waraya jakutai, katukeme tamaja isia nome abakuna, arakate katukane oko Jeoba arewaramo Biblia isiko daisama sanetaya, isia ebu.

 Tamaja karata iarau Internet ekumo.