1, 2. Уотӕ кӕсун нӕмӕ цӕмӕн райдайуй, ӕма нин Йеговӕ нӕ кувдтитӕбӕл нӕ дзуапп кӕнуй?

 «ЙЕГОВӔ уӕд де ’стур цийнӕ, ӕма дин дӕ зӕрди фӕндтӕ исӕнхӕст кӕндзӕй» (Пс. 37:4). Дессаги зӕрдӕвӕрд! Фал е уобӕл дзорӕг ӕй, ӕма Йеговӕй ци корӕн, уой нин еци фӕдбӕл ратдзӕй? Уӕхӕн фарста цӕмӕн ӕвзуруй? Гъӕйдӕ ӕркӕсӕн цалдӕр уавӕремӕ. Ӕнӕцуд хуӕрӕ ковуй, цӕмӕй ӕй фӕххононцӕ Хуцауи Паддзахадӕ игъосунгӕнгути скъоламӕ. Фал ӕнзтӕ цӕунцӕ, еци скъоламӕ ба ’й нӕ хонунцӕ. Ӕригон ӕнсувӕр ковуй, цӕмӕй ӕ уӕззау незӕй фӕййервӕза ӕма ӕмбурди фулдӕр архайа, фал е ’нӕнездзийнадӕ нӕ хуӕздӕр кӕнуй. Ниййергутӕ ковунцӕ, цӕмӕй сӕ сувӕллон Йеговӕн лӕггадӕ кӕна, фал е ба унаффӕ рахаста, Йеговӕн ке нӕ лӕггадӕ кӕндзӕй.

² Ӕвӕдзи ду дӕр Йеговӕн цӕй дӕр туххӕй лигъстӕ кодтай, фал дӕу куд фӕндадтӕй, уотӕ дин не ’сдзуапп кодта. Уомӕ гӕсгӕ дӕмӕ, ка ’й зонуй, уотӕ фӕккӕсдзӕй, ӕма Йеговӕ дӕу кувдтитӕй уӕлдай ӕгасей кувдтитӕ дӕр игъосуй. Кенӕ ба дӕмӕ уотӕ кӕсун райдайдзӕй, цума кӕмидӕр фӕррӕдудтӕ. Уотӕ адтӕй Джаниси b хабар дӕр. Ӕ сӕрихецауи хӕццӕ ’й хъӕбӕр фӕндадтӕй Вефили лӕггадӕ кӕнун, ӕма уой туххӕй кувтонцӕ. Е зӕгъуй: «Уотӕ мӕмӕ кастӕй, ӕма нӕмӕ Вефилмӕ еци фӕдбӕл фӕдздзордзӕнцӕ. Фал ӕнзтӕ цудӕнцӕ, Вефилмӕ ба нӕ нӕ худтонцӕ». Джанис идарддӕр зӕгъуй: «Уой туххӕй мин хъӕбӕр зин адтӕй. Нӕй лӕдӕрдтӕн, уотӕ цӕмӕн ӕй. Уотӕ мӕмӕ кастӕй, ӕма Йегови зӕрдихудти бацудтӕн. Цӕмӕй Вефили лӕггадӕ кодтайнӕ, уой туххӕй Йеговӕмӕ берӕ кувтон. Мӕ кувдӕн мин цӕмӕннӕ исдзуапп кодта?»

3. Аци статьяй цӕмӕ ӕркӕсдзиан?

 ³ Гӕнӕн ес, ӕма нӕмӕ рӕстӕгӕй-рӕстӕгмӕ уотӕ кӕсдзӕй, ӕма нин Йеговӕ нӕ кувдтитӕбӕл нӕ дзуапп кӕнуй. Уӕхӕн сагъӕстӕ адтӕй рагидзаманти Йегови еузӕрдон лӕггадгӕнгутӕмӕ дӕр (Иов 30:20; Пс. 22:2; Ав. 1:2). Фал ибӕл ма гурусхӕ кӕнӕ: Йеговӕ дин дӕ кувдтитӕбӕл исдзуапп кӕндзӕй (Пс. 65:2). Цӕмӕй уобӕл федарӕй ӕууӕндӕн, уой туххӕй ӕркӕсӕн ӕртӕ фарстайемӕ: 1) Йеговӕмӕ цӕмӕ ӕнгъӕлмӕ кӕсӕн? 2) Йеговӕ махмӕ цӕмӕ ӕнгъӕлмӕ кӕсуй? 3) Еуӕй-еухӕттити Йеговӕй ци корӕн, уомӕ нӕуӕгӕй ӕркӕсун цӕмӕн гъӕудзӕй?

4. Йеремий 29:12 финст дзурдтӕмӕ гӕсгӕ нин Йеговӕ зӕрдӕ цӕмӕй ӕвӕруй?

⁴ Йеговӕ нин зӕрдӕ ӕвӕруй, нӕ кувдтитӕмӕ нин ке игъосдзӕй. (Бакӕсӕ Йеремий 29:12.) Хуцау ӕ еузӕрдон лӕггадгӕнгути берӕ уарзуй (Пс. 10:17; 37:28). Уомӕ гӕсгӕ син сӕ кувдтитӕмӕ хъӕбӕр лӕмбунӕг фегъосуй. Фал е уобӕл дзорӕг нӕй, ӕма си цидӕриддӕр корӕн, уой нин дӕтдзӕй. Гӕнӕн ес, ӕма нин нӕ кӕцидӕр кувдтитӕбӕл ӕрмӕстдӕр нӕуӕг дуйней исдзуапп кӕндзӕй.

5. Йеговӕ нӕ кувдтитӕмӕ ку фегъосуй, уӕд ӕ гъос цӕмӕ фӕддаруй? Ба ’й лӕдӕрун кӕнӕ.

⁵ Йеговӕ кӕсуй, нӕ кувдтитӕ ӕ фӕндони хӕццӕ куд баст ӕнцӕ, уомӕ (Ис. 55:8, 9). Йегови фӕндадтӕй, цӕмӕй зӕнхӕ байдзаг адтайдӕ, амондгунӕй ӕма цийнӕгӕнгӕй ка лӕггадӕ кӕнуй, уӕхӕн адӕнӕй. Фал Сайтан загъта, ӕнӕ Хуцауӕй адӕн амондгундӕр ке уодзӕнцӕ (Райд. 3:1–5). Сайтан мӕнгӕттӕ ке дзоруй, уой исбӕрӕг кӕнунмӕ син Йеговӕ барӕ равардта, цӕмӕй адӕн сӕхуӕдтӕ сӕхецӕн хецау уонцӕ. Ӕма бартӕ зӕнхон хецауӕдти къохти ке ’нцӕ, уой туххӕй абони зӕнхӕбӕл хъӕбӕр берӕ зиндзийнӕдтӕ ес (Еккл. 8:9). Мах ӕй лӕдӕрӕн, ӕгас еци зиндзийнӕдтӕ Йеговӕ гъе нуртӕккӕ ке нӕ фендӕ кӕндзӕй. Уотӕ ку кодтайдӕ, уӕд кӕмӕ дӕр уотӕ фӕккастайдӕ, ӕма адӕни Хуцауи ӕнхус нӕ гъӕуй, уомӕн ӕма сӕхецӕн дӕр хуарз уайуй хецауеуӕг кӕнун.

6. Йеговӕ нӕ ке уарзуй ӕма алкӕддӕр рӕстӕй ке фӕййархайуй, уобӕл ӕууӕндун ӕхсидзгӕ цӕмӕн ӕй?

⁶ Йеговӕ ӕмхузӕн кувдтитӕбӕл алкӕд ӕмхузӕн не ’сдзуапп кӕнуй. Зӕгъӕн, паддзах Езеки уӕззау сӕйгӕ ку фӕцӕй, уӕд Йеговӕн лигъстӕ кодта, цӕмӕй ӕй исдзӕбӕх кодтайдӕ. Ӕма ин Хуцау ӕ кувд исӕнхӕст кодта (2 Пад. 20:1–6). Фал апостол Павел Йеговӕн ку лигъстӕ кодта, цӕмӕй ӕй ӕ бауӕри нахст ка ӕрцудӕй, еци «синдзӕй» фӕййервӕзун кӕна,– ӕвӕдзи, цӕхуӕндӕр незӕй тухстӕй,– уӕд ӕй Йеговӕ дессаги хузи нӕ фӕййервӕзун кодта (2 Кор. 12:7–9). Нӕ зӕрдӕбӕл ма ӕрлӕуун кӕнӕн, апостолтӕ Иаков ӕма Петурбӕл ци ’рцудӕй, уой дӕр. Ироди сӕ дууей дӕр рамарун фӕндадтӕй. Мах ӕй зонӕн, ӕгас ӕмбурд дӕр Петури туххӕй зӕрдиагӕй ке кувта. Ӕвӕдзи, хуӕртӕ ӕма ӕнсувӕртӕ Иакови туххӕй дӕр гъе уотӕ зӕрдиагӕй кувтонцӕ. Фал изӕд Петури фӕййервӕзун кодта, Иакови ба уӕддӕр рамардтонцӕ. Кадӕр, гӕнӕн ес, уотӕ расагъӕс кӕндзӕй: «Цума Йеговӕ Петури цӕмӕн фӕййервӕзун кодта, Иакови ба – нӕ». Кӕд Библий уой туххӕй неци финст ес, уӕддӕр ӕй мах федарӕй зонӕн: Хуцаумӕ «хӕранӕй неци ес» c (Дук. з. 32:4). Уомӕй уӕлдай ма ’й зонӕн, Йеговӕ сӕ дууей дӕр ке уарзта ӕма си арази ке адтӕй (Рарг. 21:14). Хуцау нин нӕ кувдтитӕбӕл алкӕд мах куд фӕффӕндуй, уотӕ не ’сдзуапп кӕнуй. Фал ибӕл федарӕй ӕууӕндӕн, ке нӕ уарзуй ӕма алкӕддӕр рӕстӕй ке фӕййархайуй. Уомӕ гӕсгӕ нӕ фӕгъгъаст кӕнӕн, мах куд фӕндадтӕй, уотӕ нин ку не ’сдзуапп кӕнуй, уӕд (Иов 33:13).

7. Нӕхе цӕмӕй гъӕуама гъӕуай кӕнӕн ӕма цӕмӕн?

⁷ Мах архайӕн, цӕмӕй нӕ уавӕр иннети уавӕрти хӕццӕ ма барӕн. Зӕгъӕн, Йеговӕй  комкоммӕ цидӕр корӕн, фал нин е ба нӕ дзуапп кӕнуй. Фӕстӕдӕр ӕй базудтан, ӕндӕр кадӕр дӕр имӕ гъе уотӕ ке кувта, ӕма ин ке ’сдзуапп кодта. Уӕхӕн хабар ӕрцудӕй, еу хуӕрӕ Аннӕбӕл. Ӕ сӕрихецау Мэтью раккӕй ку фӕссӕйгӕ ’й, уӕд Йеговӕй курдта, цӕмӕй ӕй исдзӕбӕх кодтайдӕ. Еци рӕстӕг се ’мбурдӕй дууӕ каргун хуӕри дӕр еци незӕй фӕссӕйгӕ ’нцӕ, ӕма Аннӕ ӕ сӕрихецауи туххӕй дӕр ӕма еци дууӕ хуӕрей туххӕй дӕр кувта. Еци хуӕртӕ исдзӕбӕх ӕнцӕ, Мэтью ба, гъигагӕн, рамардӕй. Фиццӕгти Аннӕ сагъӕс кодта: «Цума еци хуӕртӕн исдзӕбӕх унмӕ Йеговӕ банхус кодта? Кӕд ӕцӕгӕйдӕр уотӕ ’й, уӕд ин ӕ лӕги цӕмӕннӕ исдзӕбӕх кодта?» Мах ӕй бӕлвурдӕй нӕ зонӕн, еци хуӕртӕ цӕй фӕрци исдзӕбӕх ӕнцӕ, уой. Фал ӕй ӕнӕмӕнгӕй зонӕн, Йеговӕ не ’гас гъезӕмӕрттӕн дӕр кӕрон ке искӕндзӕй. Е хъӕбӕр ӕнгъӕлмӕ кӕсуй, ӕ еузӕрдон ӕмбӕлтти кӕд райгас кӕндзӕй, еци рӕстӕгмӕ (Иов 14:15).

8. а) Исаййи 43:2 финст дзурдтӕмӕ гӕсгӕ нин Йеговӕ куд ӕнхус кӕндзӕй? б) Зиндзийнӕдти рӕстӕг нин кувд куд банхус кӕндзӕй? (Кӕсӕ видеороликмӕ «Молитва помогает не сдаваться».)

⁸ Йеговӕ нин алкӕддӕр ӕнхус кӕндзӕй. Нӕ уӕларвон Фидӕн зин фӕууй, куд гъезӕмарӕ кӕнӕн, уомӕ кӕсун (Ис. 63:9). Фал нин уӕд дӕр алли хатт нӕ надӕй нӕ райеуварс кӕнуй, цӕугӕдӕнтти кенӕ арти хузӕн ка ӕй, уӕхӕн зиндзийнӕдтӕ. (Бакӕсӕ Исаййи 43:2.) Е нин зӕрдӕ ӕвӕруй, еци фӕлварӕнти ку цӕуӕн, уӕд нӕ фарсмӕ ке уодзӕй. Йеговӕ некӕмӕн ӕма нецӕмӕн ратдзӕй уой барӕ, цӕмӕй си райеуварс уӕн. Уомӕй уӕлдай ма Йеговӕ ӕ сугъдӕг хъаурӕ дӕтдзӕй, цӕмӕй нӕ бон исуа алцидӕр исфӕразун (Лук. 11:13; Фил. 4:13). Е ба уобӕл дзорӕг ӕй, ӕма нин цийфӕнди зиндзийнӕдтӕ исфӕразунмӕ ӕма Йеговӕбӕл еузӕрдонӕй байзайунмӕ алцидӕр уодзӕй d.

9. Йеговӕбӕл нӕ зӕрдӕ цӕмӕн гъӕуама дарӕн ӕма нин ке банхус кӕндзӕй, уобӕл федарӕй цӕмӕн гъӕуама ӕууӕндӕн? (Иакови 1:6, 7).

⁹ Йегови фӕндуй, цӕмӕй ибӕл нӕ зӕрдӕ дарӕн. (Дзиуит. 11:6). Гӕнӕн ес, ӕма еуӕй-еухатт зиндзийнӕдтӕ нӕ рази хуӕнхти хузӕн фестонцӕ, ӕма уотӕ гъуди кӕнун райдайӕн: «Аци уавӕри ба мин Йеговӕ дӕр нӕ банхус кӕндзӕй». Фал нин Библи зӕрдӕ ӕвӕруй, Хуцауи фӕрци нӕ бон алцидӕр ке исуодзӕй (Пс. 18:29). Мадта дузӕрдуг кӕнуни бӕсти Йеговӕмӕ ковӕ ӕма ибӕл федарӕй ӕууӕндӕ: е дин ӕнӕмӕнгӕй исдзуапп кӕндзӕй. (Бакӕсӕ Иакови 1:6, 7.)

10. Нӕ бон куд ӕй нӕ кувдтитӕмӕ гӕсгӕ архайун? Ӕрхӕссӕ цӕветтон.

¹⁰ Йегови фӕндуй, цӕмӕй нӕ кувдтитӕмӕ гӕсгӕ архайӕн. Зӕгъӕн, ӕнсувӕри фӕндуй ӕхе кустӕй ракорун, цӕмӕй регионалон конгресмӕ бахауа, ӕма уой туххӕй Йеговӕй ӕнхус коруй. Цума Йеговӕ ӕ лӕггадгӕнӕги кувдбӕл куд исдзуапп кӕндзӕй? Гӕнӕн ес, ӕма ин Йеговӕ хъауритӕ ратдзӕй, цӕмӕй ӕ бон уа нифсхастӕй кусти хецауи хӕццӕ радзорун. Фал ӕнсувӕри ӕхе гъӕудзӕй хецаумӕ бацӕун ӕма ӕ хӕццӕ радзорун. Гӕнӕн ес, ӕма ’й фиццаг хаттӕй нӕ рауадздзӕй ӕма ӕнсувӕри багъӕудзӕй цалдӕр хатти бацӕун. Ка ’й зонуй, ӕма ’й багъӕудзӕй иннӕ косгутӕй еске хӕццӕ косгӕ бӕнттӕй феййевун кенӕ ӕхе харзӕй отпуски рацӕун.

11. Ци нӕ тухсун кӕнуй, уобӕл арӕх цӕмӕн гъӕуама ковӕн?

¹¹ Йегови фӕндуй, цӕмӕй нӕ ци тухсун кӕнуй, уобӕл арӕх ковӕн. (1 Фес. 5:17). Киристей дзурдтӕй зиннуй, Йеговӕ не ’гас кувдтитӕбӕл уайтагъд ке не ’сдзуапп кӕнуй (Лук. 11:9). Уомӕ гӕсгӕ дӕ къохтӕ ма уадзӕ. Йеговӕмӕ нӕуӕгӕй ӕма нӕуӕгӕй ковӕ (Лук. 18:1–7). Уотемӕй ин бавдесдзӕнӕ, ци си корис, е дин ӕхсидзгӕ ке ӕй ӕма дӕ ӕцӕгӕйдӕр ке гъӕуй. Удта ма ’й Йеговӕ уиндзӕй, ӕ бон дин банхус  кӕнун ке ӕй, уобӕл федарӕй ке ӕууӕндис.

12. а) Цӕхуӕн фарстабӕл хуарз адтайдӕ расагъӕс кӕнун ӕма цӕмӕн? б) Йегови ке нимайӕн, е нӕ кувдтитӕй ке зиннуй, уой нӕ бон куд ӕй базонун? (Кӕсӕ рамкӕ « Мӕ кувдтитӕй бӕрӕг ӕй, Йегови ке нимайун?».)

¹² Йеговӕ нин нӕ кувдбӕл ку нӕ дзуапп кӕна, уӕд нӕ бон ӕй нӕхемӕ ӕртӕ фарстай раттун. Фиццаг: «Цӕй туххӕй ковун е раст ӕй?» Арӕх нӕмӕ уотӕ фӕккӕсуй, ӕма ’й фӕззонӕн, хуӕздӕр нин ци уодзӕй, уой. Фал ци фӕккорӕн, е алли хатт нӕ пайдайӕн нӕ фӕууй. Ка ’й зонуй, зин уавӕри Йеговӕй ӕнхус фӕккорӕн ӕма ин фӕззӕгъӕн, мӕнӕ мин атӕ фенхус кӕнӕ, зӕгъгӕ. Фал ӕй Йеговӕ ба хуӕздӕр фӕззонуй, банхус кӕнун нин ӕ бон куд ӕй, уой. Еуӕй-еухатт ба уотӕ дӕр фӕууй, ӕма си ци фӕккорӕн, е ӕ фӕндонмӕ гӕсгӕ нӕ фӕууй (1 Иоан. 5:14). Нӕуӕгӕй ӕркӕсӕн, фиццаг абзацци ци ниййергути кой кодтан, уони хабармӕ. Етӕ Йеговӕй корунцӕ, цӕмӕй сӕ сувӕллон рӕстдзийнади надбӕл байзайа. Ӕма еци кувди лӕгъузӕй неци ес. Фал Йеговӕ ӕхецӕн туххӕй некӕмӕн лӕггадӕ кӕнун кӕнуй. Уой фӕндуй, цӕмӕй ин еугурӕйдӕр лӕггадӕ кӕнонцӕ, сӕхе ке фӕндуй, уой туххӕй, ӕма е сувӕллӕнттӕмӕ дӕр хауй (Дук. з. 10:12, 13; 30:19, 20). Уомӕ гӕсгӕ хуӕздӕр уайдӕ, ниййергутӕ Йеговӕй ку кориуонцӕ, цӕмӕй син сӕ сувӕллони зӕрдӕмӕ над иссерунмӕ банхус кӕна. Уотемӕй сӕ бон уодзӕй сӕ бӕдолӕн банхус кӕнун Йегови бауарзун ӕма е ’мбал исун (Ӕмб. 22:6; Еф. 6:4).

13. Дзиуиттӕгтӕмӕ 4:16 финст дзурдтӕмӕ гӕсгӕ нин Йеговӕ кӕд банхус кӕндзӕй? Ба ’й лӕдӕрун кӕнӕ.

¹³ Дуккаг фарста уӕхӕн ӕй: «Нур уой рӕстӕг ӕй, цӕмӕй мин Йеговӕ мӕ кувд исӕнхӕст кӕна?» Ӕвӕдзи нӕ фӕффӕндуй, цӕмӕй нин Йеговӕ нӕ кувдбӕл уайтагъд исдзуапп кӕна. Фал ӕй е хуӕздӕр фӕззонуй,  нӕ кувдбӕл исдзуапп кӕнунмӕ тӕккӕ хуӕздӕр рӕстӕг кӕд уодзӕй, уой. (Бакӕсӕ Дзиуиттӕгтӕмӕ 4:16.) Нӕ кувдбӕл еци фӕдбӕл дзуапп ку нӕ фӕууинӕн, уӕд нӕмӕ, ка ’й зонуй, уотӕ кӕсун райдайа, ӕма нин Йеговӕ «нӕъ» загъта. Фал Йеговӕ ба, ка ’й зонуй, зӕгъуй уой рӕстӕг нӕма ’й, зӕгъгӕ. Нӕ зӕрдӕбӕл ӕрлӕуун кӕнӕн, райдайӕни ци ӕригон ӕнсувӕри туххӕй дзурдтан, уой. Хъӕбӕр ӕй фӕндадтӕй, цӕмӕй ӕй Йеговӕ дессаги хузи ӕ незӕй исдзӕбӕх кодтайдӕ. Йеговӕ уотӕ ку бакодтайдӕ, уӕд ин Сайтан бауайдзӕф кодтайдӕ ӕма загътайдӕ, ӕнсувӕр Йеговӕн ке лӕггадӕ кӕнуй, ӕ незӕй ӕй ке фӕййервӕзун кодта, ӕрмӕстдӕр уой туххӕй (Иов 1:9–11; 2:4). Уомӕй уӕлдай ма Йеговӕ иснисан кодта, ӕгас незтӕ кӕд фесафдзӕй, еци рӕстӕг (Ис. 33:24; Рарг. 21:3, 4). Уӕди уӕнгӕ ба раст н’ адтайдӕ, дессаги хузи ке исдзӕбӕх уодзиан, уомӕ ӕнгъӕлмӕ кӕсун. Уомӕ гӕсгӕ ба ӕнсувӕри бон ӕй Йеговӕй хъауритӕ ӕма фарнӕ корун, цӕмӕй ӕ къохтӕ ма ’руадза ӕма ӕ нези хӕццӕ тох кӕнгӕй идарддӕр дӕр еузӕрдонӕй лӕггадӕ кӕна (Пс. 29:11).

14. Джаниси хабарӕй цӕбӕл ахур кӕнис?

¹⁴ Нӕ зӕрдӕбӕл ӕрлӕуун кӕнӕн, Вефили лӕггадӕ кӕнун ке фӕндадтӕй ӕма уой туххӕй Йеговӕмӕ ка кувта, еци хуӕрӕ Джаниси. Ӕрмӕстдӕр ӕй фондз анзей фӕсте балӕдӕрдтӕй, Йеговӕ ин ӕ кувдбӕл куд исдзуапп кодта, уой. Е зӕгъуй: «Ӕгас еци рӕстӕг мӕ Йеговӕ ахур кодта ӕма мӕ ӕййивта. Гъӕуама исахур адтайнӕ Йеговӕбӕл мӕ зӕрдӕ никки хъӕбӕрдӕр дарун. Уомӕй уӕлдай ма ’й балӕдӕрдтӕн, хуарз ке адтайдӕ Библи никки лӕмбунӕг дӕр ӕртасун. Удта ма ӕхсидзгӕ адтӕй, цӕмӕй исахур адтайнӕ уотӕ цӕрун, цӕмӕй мӕ цийнӕ мӕ уавӕртӕй кӕнгӕ ма адтайдӕ». Фӕстӕдӕр Джанис ӕма ӕ сӕрихецауи иснисан кодтонцӕ районон лӕггадӕмӕ. Фӕстӕмӕ ракӕсгӕй Джанис зӕгъуй: «Йеговӕ мин мӕ кувдтитӕбӕл исдзуапп кодта, кӕд, куд ӕнгъӕл адтӕн, уотӕ нӕ, уӕддӕр. Йеговӕ мин  мӕ кувдтитӕбӕл куд рӕсугъд исдзуапп кодта, уой уайтагъд нӕ балӕдӕрдтӕн. Фал си нур хъӕбӕр боз дӕн, куд берӕ мӕ уарзуй ӕма мӕмӕ куд фӕлмӕнзӕрдӕ ’й, уой туххӕй».

15. Бӕлвурд естӕбӕл ковун алкӕд хуарз цӕмӕннӕ фӕууй? (Кӕсӕ ма хузӕмӕ.)

¹⁵ Ӕртиккаг фарста ба уӕхӕн ӕй: «Хуӕздӕр нӕ уайдӕ ӕндӕр естӕбӕл ковун?» Дзубанди дӕр ибӕл нӕййес, бӕлвурд естӕбӕл ковун хуарз ӕй. Фал еуӕй-еухӕттити хуӕздӕр уодзӕй Йеговӕн, куд архайгӕ ’й, уой ку нӕ дзорианӕ, уӕд. Уотемӕй нин ӕнцондӕр уодзӕй фӕууинун, Йеговӕ нӕ ци ’рдӕмӕ аразуй, уой. Радзубанди кӕнӕн, Хуцауи Паддзахадӕ игъосунгӕнгути скъолай ахур кӕнун ке фӕндуй, еци хуӕри туххӕй. Ӕ бӕллец ӕй еци скъолай ахур кӕнун ӕма, игъосунгӕнгутӕ кӕми нӕ фагӕ кӕнунцӕ, уоми лӕггадӕ кӕнун. Уомӕ гӕсгӕ ӕ бон адтайдӕ идарддӕр дӕр скъолай туххӕй ковун, фал ма Йеговӕй корун, цӕмӕй ин нур бавдеса, ӕ хъауритӕ ци ’рдӕмӕ исараза, уой (Гъуд. 16:9, 10). Уой фӕсте ба ӕхсидзгӕ ’й, цӕмӕй ӕ кувдмӕ гӕсгӕ архайа. Зӕгъӕн, ӕ бон ӕй районон цӕстӕдарӕги бафӕрсун, пионертӕ кӕми нӕ фагӕ кӕнуй, уӕхӕн ӕмбурдтӕ сӕ райони нӕййес. Кенӕ ба ӕ бон ӕй филиалмӕ ниффинсун, цӕмӕй игъосунгӕнгутӕ кӕми нӕ фагӕ кӕнуй, уой базона e.

16. Аци статьяйӕй ци базудтан?

¹⁶ Куд ӕй фӕууидтан, уотемӕй нӕ кувдтитӕбӕл дзуапп кӕнгӕй Йеговӕ алкӕддӕр уарзгӕй ӕма рӕстӕй фӕййархайуй (Пс. 4:3; Ис. 30:18). Фӕууй уотӕ, ӕма мах куд ӕнгъӕл фӕууӕн, уотӕ нин не ’сдзуапп кӕнуй. Фал нин не ’гас кувдтитӕмӕ дӕр хъӕбӕр лӕмбунӕг фегъосуй. Йеговӕ нӕ берӕ уарзуй ӕма нӕ некӕд ниууадздзӕй (Пс. 9:10). Гъе уомӕ гӕсгӕ ба ибӕл алкӕддӕр уӕ нифс даретӕ ӕма уӕ зӕрдити ци ес, уой ин ӕргом кӕнтӕ (Пс. 62:8).