Ӕз райгурдтӕн 1948 анзи Нигерий хонсар-нигулӕн ӕрдиги еу минкъий гъӕуи. Уӕди рӕстӕги мӕ фиди кӕстӕр ӕнсувӕр Мустафа ӕма мӕ хестӕр ӕнсувӕртӕй еу, Вахаби, иссӕнцӕ Йегови Ӕвдесӕнтӕ. 9 анзи мӕбӕл ку цудӕй, уӕд мӕ фидӕ рамардӕй. Еци рӕстӕг мин хъӕбӕр зин адтӕй. Фал мин Вахаби райгасдзийнади туххӕй радзурдта. Ӕма мӕ бафӕндадтӕй Библи ахур кӕнун. Донаргъуд райстон 1963 анзи. Минкъий фӕстӕдӕр ма ме ’нсувӕртӕй ӕртӕ иссӕнцӕ Йегови Ӕвдесӕнтӕ.

1965 анзи мӕ хестӕр ӕнсувӕр Уилсонмӕ рандӕ дӕн. Е цардӕй Лагоси. Уоми ӕмбурди «Игбоби» балимӕн дӕн ӕнхӕстрӕстӕг пионерти хӕццӕ. Куд зингзӕрдӕй ӕма цийнӕгӕнгӕй лӕггадӕ кодтонцӕ, е мӕн дӕр баразӕнгард кодта ӕнхӕстрӕстӕг лӕггадӕ райдайунмӕ. Гъема 1968 анзи ӕз дӕр пионер исдӕн.

Вефили ка лӕггадӕ кодта, еу уӕхӕн ӕнсувӕр, Альберт Олубейби, ӕригӕнттӕн сӕрмагонд фембӕлд бацӕттӕ кодта. Еци фембӕлди радзурдта, Нигерий цӕгаттаг ӕрдиги сӕрмагонд пионерти ӕнхус ке гъӕуй. Нур дӕр ма ’й гъуди кӕнун, ӕ дзурдти фӕсте нӕ зӕрдити зинг куд иссугъдӕй: «Сумах ӕригон айтӕ. Рӕстӕг ӕма уӕмӕ хъауритӕ ес. Йеговӕн сӕ ма ’вгъау кӕнтӕ. Берӕ куст уӕмӕ ӕнгъӕлмӕ кӕсуй!» Гъема ӕз дӕр Исаййи хузӕн цӕттӕ адтӕн, Хуцау мӕ кумӕ рарвета, уордӕмӕ рандӕ ун (Ис. 6:8). Уомӕ гӕсгӕ сӕрмагонд  пионерӕй лӕггадӕ кӕнунмӕ курдиадӕ балӕвардтон.

1968 анзи маййи мӕ иснисан кодтонцӕ сӕрмагонд пионерӕй хонсар Нигерий горӕт Каномӕ. Е адтӕй, Биафри тугъд ку цудӕй, еци рӕстӕг (1967 анзӕй 1970 анзмӕ). Фиццӕгти тугъд цудӕй Нигерий цӕгатӕрдиги, фал фӕстӕдӕр ба хорискӕсӕнӕрдӕмӕ рахизтӕй. Е берӕ гъезӕмӕрттӕ ӕрхаста ӕма берети цӕрд байста. Гъуди ма ’й кӕнун, еу ӕнсувӕр мин куд лигъстӕ кодта, цӕмӕй уордӕмӕ ма рандӕ уон. Фал ин ӕз загътон: «Ӕхцӕуӕн мин ӕй, ке мӕбӕл тухсис. Фал, кӕд Йегови фӕндуй, цӕмӕй уоми лӕггадӕ кӕнон, уӕд ибӕл ӕппундӕр нӕ гурусхӕ кӕнун, ке мӕбӕл батухсдзӕй».

Каной цитӕ цудӕй, уомӕ кӕсун хъӕбӕр зин адтӕй. Тугъди туххӕй еци устур горӕт, зӕгъӕн ес, ӕма ӕнӕ цӕрӕгӕй байзадӕй. Еуӕй-еухатт игъосун кӕнгӕй гъӕунгти мард адӕни фӕууинианӕ. Раздӕр горӕти цалдӕр ӕмбурди адтӕй, фал хуӕртӕ ӕма ӕнсувӕртӕй берети ледзун багъудӕй. 15 игъосунгӕнӕгемӕй ӕндӕр си нӕбал байзадӕй. Еци хуӕртӕ ӕма ӕнсувӕрти цийнӕн кӕрон дӕр н’ адтӕй, мах – ӕхсӕз сӕрмагонд пионери – ку иссудан, уӕд. Мах син банхус кодтан, цӕмӕй нӕуӕгӕй ӕмбурдтӕ уадзун ӕма игъосун кӕнун райдайуонцӕ. Сӕ нифс ке бафедар ӕй, уой фӕрци филиалмӕ нӕугӕй игъосун кӕнуни хигъдтӕ ӕма литератури закӕзтӕ ӕрветун райдӕдтонцӕ.

Мах райдӕдтан бунӕттон ӕвзаг хаусӕ ахур кӕнун. Адӕн ӕй ку уидтонцӕ, се ’взагбӕл ке дзорӕн, уӕд Паддзахади хабармӕ хуӕздӕр байгъосиуонцӕ. Фал уоми адӕнӕн сӕ фулдӕр бунӕттон динбӕл хуӕст адтӕнцӕ, ӕма хуарз хабар ке игъосун кодтан, е сӕ зӕрдӕмӕ нӕ цудӕй. Уомӕ гӕсгӕ арӕхстгунӕй архайдтан. Еухатт еу ӕнсувӕри хӕццӕ ку лӕггадӕ кодтан, уӕд нӕ еу лӕг расурдта, ӕ къохи кард адтӕй, уотемӕй. Хуарз ӕма мах уомӕй тагъддӕр лигъдан. Кӕд уӕхӕн зин уавӕртӕбӕл исӕмбӕлианӕ, уӕддӕр Йегови къох нӕхебӕл уидтан ӕма нецӕмӕй тарстан (Пс. 4:8). Йегови Ӕвдесӕнтӕ сабургай фулдӕрӕй-фулдӕр кодтонцӕ. Абони горӕт Каной ес 11 ӕмбурди ӕма си лӕггадӕ кӕнуй 500 игъосунгӕнӕгемӕй фулдӕр.

Каной ӕрмӕстдӕр цалдӕр мӕйи балӕггадӕ кодтон. 1968 анзи августи, мӕн ӕма ма дууӕ  сӕрмагонд пионерей иснисан кодтонцӕ республикӕ Нигери сӕйраг горӕт Ниамеймӕ. Хъӕбӕр тагъд ӕй нӕхебӕл балӕдӕрдтан, Нигер зӕнхӕбӕл тӕккӕ тӕвдӕдӕр бунӕттӕй сӕ еу ке ӕй. Фал нӕ айдагъ тӕвдӕн бухсун нӕ гъудӕй. Гъӕуама ма исахур кодтайанӕ французаг ӕвзаг. Е адтӕй еци бӕсти сӕйраг ӕвзаг. Кӕд ӕнцон н’ адтӕй, уӕддӕр нӕ нифс Йеговӕбӕл исӕвардтан ӕма игъосун кӕнун райдӕдтан бунӕттон игъосунгӕнгути минкъий къуари хӕццӕ. Уобӕл берӕ нӕ рацудӕй, ӕма, зӕгъӕн ес, ӕма горӕт Ниамеййи кӕсун кадӕриддӕр зудта, уонӕмӕ ӕгасемӕдӕр адтӕй киунугӕ «Истина, ведущая к вечной жизни». Адӕн ма нӕ сӕхуӕдтӕ дӕр агурдтонцӕ, цӕмӕй син еци киунугӕ равардтайанӕ.

Бунӕттон хецауадӕ нин хъӕбӕр тагъд балӕдӕрун кодта, Йегови Ӕвдесӕнтӕ сӕ зӕрдӕмӕ ке нӕ цӕунцӕ. 1969 анзи июли ӕрӕмбурд ан Нигери тӕккӕ фиццаг районон конгресмӕ. Адтан еу 20 адӕймагей бӕрцӕ. Еци конгресси дууӕ нӕуӕг ӕнсувӕри гъӕуама донаргъуд райстайуонцӕ. Фал фиццаг бон полиций косгутӕ ӕрбацудӕнцӕ ӕма программӕ кӕронмӕ рауадзун нӕ бауагътонцӕ. Мах – сӕрмагонд пионерти – ӕма районон цӕстӕдарӕги участокмӕ фӕккодтонцӕ, цӕмӕй нӕ уоми ӕрфӕрсонцӕ. Уой фӕсте нин карзӕй загътонцӕ, цӕмӕй иннӕ бон дӕр участокмӕ фӕззинӕн. Нӕ уавӕр хуӕрзтӕй ке нӕй, уой лӕдӕрдтан, ӕма уомӕ гӕсгӕ донаргъуди фӕдбӕл радзубанди кедӕр хӕдзари рауагътан ӕма еци дууӕ ӕнсувӕремӕн донаргъуд сосӕггай цӕугӕдони равардтан.

Цалдӕр къуӕрей фӕсте фӕсарӕйнаг гъуддӕгти министрадӕ унаффӕ рахаста, цӕмӕй ӕз ӕма иннӕ 5 сӕрмагонд пионери 48 сахаттемӕ сӕ бӕстӕй рандӕ уӕн. Куд нин загътонцӕ, уотӕ бакодтан ӕма Нигерий филиалмӕ рандӕ ан. Уордиги ба нӕ ӕндӕр рауӕнтӕмӕ иснисан кодтонцӕ.

Мӕн иснисан кодтонцӕ Нигерий минкъий гъӕу Орисунбаремӕ. Адтӕй си хуӕртӕ ӕма ӕнсувӕрти минкъий къуар, ӕма игъосун кӕнуни гъуддаг хъӕбӕр хуарз цудӕй. Фал мӕ ӕхсӕз мӕйей фӕсте филиал фӕстӕмӕ Нигермӕ рарвиста. Ӕз уобӕл хъӕбӕр бадес кодтон ӕма, раст зӕгъгӕй, еу минкъий истухстӕн. Фал мӕ уӕддӕр хъӕбӕр фӕндадтӕй Нигери хуӕртӕ ӕма ӕнсувӕрти нӕуӕгӕй фӕууинун.

Ӕз Ниамеймӕ ӕрӕздахтӕн. Дуккаг бон ӕй Нигерийӕй еу бизнесмен ку базудта, Йегови Ӕвдесӕн ке дӕн, уӕд мӕмӕ Библий туххӕй фарстатӕ дӕттун райдӕдта, ӕма ӕз дӕр ӕ хӕццӕ Библи ахур кӕнун райдӕдтон. Сабургай ӕ тамаку думун ниууагъта, фудниуӕзт нӕбал кодта ӕма донаргъуд райста. Мӕнӕн хъӕбӕр ӕхцӕуӕн адтӕй, Нигери алли рауӕнти хуӕртӕ ӕма ӕнсувӕрти хӕццӕ лӕггадӕ кӕнун ӕма адӕн сӕ зӕрдӕмӕ рӕстдзийнадӕ куд есунцӕ, уой уинун. Фиццаг хатт уордӕмӕ ку иссудтӕн, уӕд ӕнӕгъӕнӕ бӕсти адтӕй ӕдеугурӕй 31 Ӕвдесӕни. Цӕугӕ ку кодтон, уӕдта адтӕнцӕ 69.

1977 анзи декабри Нигеримӕ ӕрӕздахтӕн, цӕмӕй ӕртӕ къуӕрей дӕргъи ахур рацудайнӕ. Ахури фӕсте мин филиали комитети координатор  Малком Вайго Сьеррӕ-Леонейӕй финстӕг ӕрбалӕвардта. Ӕнсувӕртӕ агурдтонцӕ Гвинейи районон цӕстӕдарӕгӕй ка лӕггадӕ кодтайдӕ, уӕхӕн ӕнсувӕри. Гъудӕй сӕ, бийнонтӕ кӕмӕн нӕййес, е ’нӕнездзийнадӕ хуарз кӕмӕн ӕй, удта англисаг ӕма французаг ӕвзаг ка зонуй, уӕхӕн пионер. Ӕнсувӕр Вайго мин загъта, уоми лӕггадӕ кӕнунмӕ мӕ ке ахур кодтонцӕ. Е ӕй баханхӕ кодта, ӕнцон си ке нӕ уодзӕй. Уомӕ гӕсгӕ мин загъта, дзӕбӕх, дан, ибӕл расагъӕс кӕнӕ. Фал ин еци фӕдбӕл загътон: «Йеговӕ мӕ ке ӕрветуй, уомӕ гӕсгӕ арази дӕн».

Ӕз ӕртахтӕн Сьеррӕ-Леонемӕ ӕма фембалдтӕн филиали комитети ӕнсувӕрти хӕццӕ. Сӕ еу мин уотӕ бакодта: «Хуцауи Паддзахади гъуддаг Гвинейи куд цӕуй, уомӕн неци зонӕн». Сьеррӕ-Леоней филиал дзуапп лӕвардта, Паддзахади гъуддаг Гвинейи куд цӕуй, уомӕн. Фал си змӕнтститӕ ке адтӕй, уомӕ гӕсгӕ бунӕттон ӕнсувӕртӕ куд ӕнцӕ ӕма ци ’нцӕ, уомӕн неке неци зудта. Ӕнсувӕрти сӕмӕ цалдӕр хатти фӕндатдӕй еске рарветун, фал си неци рауайидӕ. Уомӕ гӕсгӕ мин ӕнсувӕртӕ загътонцӕ, цӕмӕй Гвинейи сӕйраг горӕт Конакримӕ рандӕ уон ӕма хецауадӕй уоми цӕрунмӕ барӕ ракорон.

Конакримӕ ку ӕрхъӕрдтӕн, уӕд рандӕ дӕн Нигерий посольствомӕ ӕма уоми минӕвари хӕццӕ фембалдтӕн. Загътон ин, Гвинейи мӕ игъосун кӕнун ке фӕндуй. Минӕвар мин загъта, е тӕссаг гъуддаг ке ӕй, уомӕн ӕма мӕ, гӕнӕн ес, ӕрахӕссонцӕ кенӕ ба уомӕй фуддӕр ести бакӕнонцӕ. Уой фӕсте мин уотӕ бакодта: «Нигеримӕ раздӕхӕ ӕма уоми игъосун кӕнӕ». Фал ин ӕз загъон: «Ами мӕ фӕндуй лӕггадӕ кӕнун». Уӕд медгъуддӕгти министрмӕ финстӕг ниффинста, цӕмӕй мин банхус кодтайдӕ, ӕма мӕмӕ е дӕр фӕккастӕй.

Минкъий фӕстӕдӕр Сьеррӕ-Леоней филиалмӕ раздахтӕн ӕма син радзурдтон, Йеговӕ мин куд райарфӕ кодта. Цӕрунмӕ мин барӕ ке равардтонцӕ, уой ӕнсувӕртӕ ку базудтонцӕ, уӕд хъӕбӕр бацийнӕ кодтонцӕ.

1978 анзӕй 1989 анзмӕ лӕггадӕ кодтон районон цӕстӕдарӕгӕй Гвинейи, Сьеррӕ-Леоней, удта районон цӕстӕдарӕги хуӕдевӕгӕй Либерий. Фиццӕгти арӕх сӕйинӕ. Хатгай е фӕууидӕ, нӕдӕр сӕйгӕдонӕ, нӕдӕр дохтир кӕми н’ адтӕй, уӕхӕн идард рауӕнти. Фал ӕнсувӕртӕ хъӕбӕр байархайиуонцӕ, цӕмӕй мӕ сӕйгӕдонӕмӕ исхъӕртун кодтайуонцӕ.

Еухатт тӕфсӕгӕй хъӕбӕр фӕссӕйгӕ дӕн, удта ма мӕмӕ фӕззиндтӕй губуни золкъитӕ дӕр. Ку радзӕбӕх дӕн, уӕд ӕй базудтон, ӕнсувӕртӕ хъӕбӕр ке фӕттарстӕнцӕ ӕма мӕ кӕми байвӕрдзӕнцӕ, уобӕл сагъӕс кӕнун ке райдӕдтонцӕ. Кӕд мин тӕссаг берӕ цӕмӕйдӕрти фӕууидӕ, уӕддӕр мӕ лӕггадӕ ниууадзунбӕл некӕд расагъӕс кодтон. Ӕз ӕй федарӕй зудтон, Йегови хӕццӕ мӕ тӕрсун ке нецӕмӕй гъӕуй, уомӕн ӕма ӕ бон ӕй сауӕнгӕ мӕрдти райгас кӕнун дӕр.

1988 анзи фембалдтӕн, сӕрниллӕг ӕма Йегови берӕ ка уарзта, уӕхӕн пионер-хуӕрӕ Доркӕсбӕл. Нӕ цард байеу кодтан ӕма районон лӕггади идарддӕр еумӕ архайдтан. Доркӕс мӕ хӕццӕ хъӕбӕр зингзӕрдӕй лӕггадӕ кодта ӕма Йегови туххӕй цӕттӕ адтӕй ӕхе берӕ цӕмӕйдӕрти фӕццох кӕнун. Хатгай нӕ ӕмбурд бабӕрӕг  кӕнунмӕ фестӕгӕй 25 километри цӕун багъӕуидӕ, нӕ дзаумӕттӕ нӕ рагъи хастан, уотемӕй. Идард рауӕнти ци ӕмбурдтӕ адтӕй, уонӕмӕ ба бахъӕртианӕ, цидӕриддӕр транспортбӕл фӕххуӕст уаййанӕ, уонӕбӕл, уомӕн ӕма гъудӕй лӕкъӕрдӕ ӕма къӕгъдтитӕ надбӕл цӕун.

Доркӕс хъӕбӕр нифсхаст ӕй. Еуӕй-еухатт нӕ фӕгъгъӕуидӕ крокодилтӕй идзаг цӕугӕдӕнтти сӕрти хезун. Еухатт фондз боней дӕргъи фӕццудан ӕма нӕ гъудӕй цӕугӕдони сӕрти хезун, гъӕдин хед ба саст адтӕй, ӕма нӕ уомӕ гӕсгӕ гъудӕй каноебӕл рабадун. Доркӕс ку исистадӕй, цӕмӕй каноейӕй рахеза, уӕд дони ниххаудтӕй. Фал нӕдӕр е, нӕдӕр ӕз накӕ кӕнун нӕ зудтан. Дон ба крокодилтӕй идзаг адтӕй. Хуарз ӕма цалдӕр лӕхъуӕни донмӕ ниггӕпп кодтонцӕ ӕма ’й билӕмӕ раластонцӕ. Еци хабари фӕсте цӕйбӕрцӕдӕр рӕстӕг ӕхсӕвӕ дзӕбӕх нӕбал фунӕй кодтан. Фал уӕддӕр нӕ лӕггадӕ нӕ уагътан.

1992 анзи райдайӕни хуарз хабар базудтан: тагъд рӕстӕги нин гъӕуама сувӕллон фӕззиндтайдӕ. Мах расагъӕс кодтан: «Цума уоййадӕбӕл не ’нхӕст рӕстӕг лӕггадӕ фӕцӕй?» Мах загътан: «Йеговӕ нин дессаги лӕвар искодта». Уомӕ гӕсгӕ нӕ кизгӕбӕл исӕвардтан ном Джагифт (нисан кӕнуй Йаги лӕвар). Цуппар анзей фӕсте Джагифтӕн фӕззиндтӕй ӕнсувӕр Эрик. Еци лӕвӕрттӕ нин нури уӕнгӕ дӕр цийнӕ хӕссунцӕ. Джагифт цӕйбӕрцӕдӕр рӕстӕг лӕггадӕ кодта Конакрий тӕлмацгӕнгути къуари, Эрик ба лӕггадӕ кӕнуй кӕстӕреуӕггӕнӕг ӕнсувӕрӕй.

Кӕд Доркӕси бон еци хузи лӕггадӕ кӕнун нӕбал адтӕй, уӕддӕр ӕнхӕстрӕстӕг пионерӕй лӕггадӕ кодта, цалинмӕ сувӕллӕнттӕмӕ кӕсун гъудӕй, уӕдмӕ. Ӕз ба идарддӕр дӕр сӕрмагонд пионерӕй лӕггадӕ кодтон. Сувӕллӕнттӕ ку исирӕзтӕнцӕ, уӕд Доркӕс нӕуӕгӕй сӕрмагонд пионерӕй лӕггадӕ кӕнун райдӕдта. Нур ба миссионертӕй лӕггадӕ кӕнӕн Конакрий.

Ӕз алкӕддӕр цудтӕн, Йеговӕ мӕ кумӕ рарветидӕ, уордӕмӕ. Мӕ бийнойнаги хӕццӕ ’й еу ӕма дууӕ хатти нӕ бавзурстан, Йеговӕ нӕ куд гъӕуай кӕнуй ӕма нин куд ӕнхус кӕнуй, уой. Мулкбӕл ӕ зӕрдӕ ка даруй, уонӕй уӕлдай мах нӕхе берӕ зиндзийнӕдтӕй багъӕуай кодтан, уомӕн ӕма нӕ зӕрдӕ Йеговӕбӕл дардтан. Доркӕси хӕццӕ ’й нӕхецӕй зонӕн, ӕрмӕстдӕр Йегови бон ке ӕй ӕцӕгӕй багъӕуай кӕнун, уомӕн ӕма е ӕй «ервӕзунгӕнӕг Хуцау» (1 Анз. 16:35). Ӕз ӕй федарӕй зонун, Йеговӕ «хъазар хӕзнай» хузӕн ке гъӕуай кӕндзӕй, ӕ зӕрдӕ ибӕл ка даруй, уони (1 Сам. 25:29).