1, 2. Абони мах уавӕртӕ ӕма, Йерусалиммӕ ка ӕрӕздахтӕй, еци дзиуиттӕгти уавӕртӕ ӕмхузӕн цӕмӕй ӕнцӕ? (Кӕсӕ схемӕмӕ « Аггей, Захари ӕма Ездри дзаман».)

 ИДАРДДӔР цард куд уодзӕй, уобӕл фӕттухсис? Кадӕртӕ ни ӕнӕ кустӕй байзайунцӕ ӕма фӕттухсунцӕ, сӕ бийнонти куд фӕддардзӕнцӕ, уобӕл. Кенӕ ба, ӕвӕдзи, нӕ хеуӕнттӕн тӕрсӕн, политики уавӕр ци ’рдӕмӕ фӕууодзӕй, е бӕрӕг ке нӕй, удта адӕн нӕ нихмӕ ке цӕунцӕ ӕма нин сӕребарӕй игъосун кӕнуни барӕ ке нӕййес, уой туххӕй. Кӕд уотӕ ’й, уӕд нин пайда уодзӕй ӕркӕсун, Йеговӕ рагидзаманти израилӕгтӕн куд банхус кӕнидӕ, етӕ дӕр уӕхӕн зиндзийнӕдтӕбӕл ку исӕмбӕлиуонцӕ, уӕд.

² Цӕргӕ-цӕрӕнбонти Вавилони ка фӕццардӕй ӕма Йерусалиммӕ раздӕхунмӕ ка исфӕндӕ кодта, еци дзиуиттӕгти федар ӕууӕндундзийнадӕ гъудӕй. Етӕ сӕ цӕттӕ цард ниууагътонцӕ, ӕма рандӕ ’нцӕ, зонгӕ дӕр ке нӕ кодтонцӕ, еци бӕстӕмӕ. Уордӕмӕ ку ӕрхъӕрдтӕнцӕ, уӕд берӕ рӕстӕг нӕ рацудӕй, ӕма зиндзийнӕдтӕбӕл исӕмбалдӕнцӕ. Сӕ бийнонтӕ фӕддарун син хъӕбӕр зин адтӕй, уомӕн ӕма Персий экономики ӕма политики уавӕр хуӕрзтӕй н’ адтӕй. Удта сӕ сӕ алливарс адӕн дӕр ӕфхуардтонцӕ. Уомӕ гӕсгӕ син хъӕбӕр зин адтӕй се ’ргом раздахун тӕккӕ сӕйрагдӕр кустмӕ – ковӕндонӕ исамайунмӕ. Гъема сӕмӕ Йеговӕ нӕ эри размӕ 520 анзи рарвиста дууӕ пахампарей, Аггей ӕма Захарий, цӕмӕй нӕуӕгӕй зингзӕрдӕй Йеговӕн лӕггадӕ кӕнун райдӕдтайуонцӕ (Аг. 1:1; Зах. 1:1). Еци пахампартӕн сӕ ихӕс сӕ къохи бафтудӕй. Фал еу 50 анзей бӕрцӕ ку рацудӕй, уӕд бабӕй син гъудӕй сӕ нифс бафедар кӕнун. Еци рӕстӕг сӕмӕ Вавилонӕй Йерусалиммӕ ӕрбацудӕй финсӕг Ездрӕ. Е израилӕгти нифс бауагъта ӕма син банхус кодта, цӕмӕй Йеговӕн лӕггадӕ кӕнун  сӕ царди фиццаг бунати ӕвӕронцӕ (Езд. 7:1, 6).

3. Цӕхуӕн фарстатӕмӕ ӕркӕсдзиан? (Ӕмбесӕндтӕ 22:19).

³ Аггей ӕма Захарий ӕнхуси фӕрци израилӕгтӕ идарддӕр дӕр сӕ нифс Йеговӕбӕл дардтонцӕ, кӕд сӕ алливарс цӕрӕг адӕн сӕ нихмӕ цудӕнцӕ, уӕддӕр. Еци пахампарти дзурдтӕ махӕн дӕр банхус кӕндзӕнцӕ, цийфӕнди зиндзийнӕдтӕбӕл ма исӕмбӕлӕн, уӕддӕр. (Бакӕсӕ Ӕмбесӕндтӕ 22:19.) Мах радзордзиан Аггей ӕма Захарий пахампарӕдтӕбӕл, удта ӕркӕсдзиан Ездри цӕветтонмӕ ӕма дзуапп ратдзиан уӕхӕн фарстатӕбӕл: Йерусалиммӕ ка ӕрӕздахтӕй, еци дзиуиттӕгтӕ цӕхуӕн зиндзийнӕдтӕбӕл исӕмбалдӕнцӕ? Зин уавӕрти дӕр нин Йегови фӕндон ӕнхӕст кӕнун фиццаг бунати цӕмӕн гъӕуама уа? Ӕма зин рӕстӕгути дӕр нӕ бон куд ӕй нӕ зӕрдӕ Йеговӕбӕл дарун?

4, 5. Ковӕндонӕ ка амадта, уонӕн сӕ нифс цӕмӕн басастӕй?

⁴ Дзиуиттӕгтӕ Йерусалиммӕ ку ӕрӕздахтӕнцӕ, уӕд сӕмӕ хъӕбӕр берӕ куст ӕнгъӕлмӕ кастӕй. Етӕ цубур рӕстӕгмӕ Йеговӕн нивондхӕссӕн искодтонцӕ ӕма ковӕндонӕн бундор ӕрӕвардтонцӕ (Езд. 3:1–3, 10). Уобӕл берӕ нӕ рацудӕй, ӕма сӕ нифс басастӕй. Цӕмӕн? Ковӕндонӕ амайунӕй уӕлдай ма сӕ гъудӕй сӕхецӕн хӕдзӕрттӕ кӕнун, будуртӕ итаун ӕма бийнонтӕ дарун (Езд. 2:68, 70). Уомӕй уӕлдай ма се знӕгтӕ сӕ нихмӕ цудӕнцӕ ӕма сӕ ковӕндонӕ амайунмӕ бахъор кӕнунмӕ гъавтонцӕ (Езд. 4:1–5).

⁵ Персий экономики ӕма политики уавӕр хуӕрзтӕй ке н’ адтӕй, уой туххӕй Йерусалиммӕ ка ӕрӕздахтӕй, еци дзиуиттӕгтӕн цардамӕлттӕ кӕнун дӕр зин адтӕй. Сӕ бӕстӕ Персий дӕлбарӕ иссӕй. Нӕ эри размӕ 530 анзи Кир ку рамардӕй, уӕд ӕ фӕсте паддзах иссӕй Камбиз Дуккаг. Е исфӕндӕ кодта Египет байахӕссун. Е ’фсӕддонтӕ Египетмӕ ку цудӕнцӕ, уӕд израилӕгти зӕнхитбӕл цудӕнцӕ, ӕма, ӕвӕдзи, адӕнӕй агурдтонцӕ, цӕмӕй син дон, хуӕруйнаг ӕма бахсӕвеуат кӕнунмӕ бунат лӕвардтайуонцӕ. Уой туххӕй израилӕгти уавӕр никки зиндӕр фӕцӕй. Камбиз Дуккаги фӕсте Персий паддзах иссӕй Дарий Фиццаг. Фал политики уавӕр хуӕздӕр нӕ фӕцӕй. Уӕд еу рауӕн, уӕд иннӕ рауӕн змӕнститӕ райдайиуонцӕ. Дзиуиттӕгтӕ уӕхӕн уавӕри ке равзурдӕнцӕ, уой туххӕй, ӕвӕдзи, тухстӕнцӕ, сӕ бийнонтӕ куд дардзӕнцӕ, уобӕл. Уӕхӕн уавӕрти туххӕй беретӕмӕ уотӕ кастайдӕ, ӕма нур Йегови ковӕндонӕ амайуни рӕстӕг нӕма ’й (Аг. 1:2).

6. Дзиуиттӕгтӕ цӕхуӕн зиндзийнӕдтӕбӕл исӕмбалдӕнцӕ ӕма син Захари сӕ нифс куд бафедар кодта? (Захари 4:6, 7).

⁶ Бакӕсӕ Захарий 4:6, 7. Дзиуиттӕгтӕн ма се знӕгтӕ дӕр сӕ нихмӕ цудӕнцӕ. Нӕ эри размӕ 522 анзи ковӕндонӕ амайуни куст ӕрлӕудтӕй. Фал Захари адӕни нифс бафедар кодта. Е загъта, Йеговӕ син ӕ сугъдӕг хъаури фӕрци сӕ разӕй ӕгас къахкъуӕрӕнтӕ дӕр ке рандӕ кӕндзӕй. Ӕма нӕ эри размӕ 520 анзи паддзах Дарий дзиуиттӕгтӕн барӕ равардта, цӕмӕй ковӕндонӕ нӕуӕгӕй амайун райдӕдтайуонцӕ. Е сӕмӕ ӕхцайӕй фӕккастӕй, удта ма бунӕттон хецӕуттӕн загъта, цӕмӕй син етӕ дӕр ӕнхус кодтайуонцӕ (Езд. 6:1, 6–10).

7. Йеговӕ дзиуиттӕгтӕн куд райарфӕ кодта, зингзӕрдӕй ковӕндонӕ амайунмӕ ку равналдтонцӕ, уӕд?

 ⁷ Аггей ӕма Захарий фӕрци Йеговӕ ӕ лӕггадгӕнгутӕн зӕрдӕ байвардта, ковӕндонӕ амайун ку райдайонцӕ, уӕд сӕ хӕццӕ ке уодзӕй (Аг. 1:8, 13, 14; Зах. 1:3, 16). Пахампартӕ адӕнӕн сӕ нифс ке бафедар кодтонцӕ, уой фӕрци нӕ эри размӕ 520 анзи ковӕндонӕ амайун нӕуӕгӕй райдӕдтонцӕ. Уобӕл фондз анзи дӕр нӕ рацудӕй, ӕма ковӕндонӕ амад фӕцӕй. Кӕд дзиуиттӕгтӕ берӕ зиндзийнӕдтӕбӕл ӕмбалдӕнцӕ, уӕддӕр гъуддагмӕ  зингзӕрдӕй равналдтонцӕ. Йеговӕ ба сӕ цох нецӕмӕй уагъта ӕма син сӕ нифс федар кодта. Гъема ин идарддӕр дӕр цийнӕгӕнгӕй лӕггадӕ кодтонцӕ (Езд. 6:14–16, 22).

8. Аггеййи 2:4 финст дзурдтӕ нин куд ӕнхус кӕнунцӕ, цӕмӕй Хуцауи фӕндон ӕнхӕст кӕнунмӕ не ’ргом исаразӕн? (Кӕсӕ ма феппайуйнаг.)

⁸ Устур бӕллӕх къӕсӕрбӕл ке ӕй, уомӕ гӕсгӕ хъӕбӕр ӕхсидзгӕ ’й, цӕмӕй адӕнӕн хуарз хабар игъосун кӕнӕн (Мар. 13:10). Фал нин еци гъуддаги зингзӕрдӕй архайун ӕнцон нӕ фӕууй, ӕхцайӕй ку нӕ фӕхъхъӕртӕн кенӕ нӕ нихмӕ ку фӕццӕунцӕ, уӕд. Ци нин банхус кӕндзӕй, цӕмӕй Хуцауи Паддзахадӕ фиццаг бунати ӕвӕрӕн? Гъӕуама ибӕл ма гурусхӕ кӕнӕн, «ӕфсӕдти хецау Йеговӕ» b нӕ фарсмӕ ке ӕй. Е нин алкӕддӕр ӕнхус кӕндзӕй, Паддзахади гъуддӕгтӕ нин нӕхе гъуддӕгтӕй ӕхсидзгӕдӕр ку уонцӕ, уӕд. Уомӕ гӕсгӕ нӕ тӕрсун нецӕмӕй гъӕуй.(Бакӕсӕ Аггеййи 2:4.)

9, 10. Еу бийнонтӕ сӕхебӕл куд бавзурстонцӕ, Матфеййи 6:33 финст дзурдтӕ раст ке ’нцӕ?

⁹ Ӕркӕсӕн Олег ӕма Ирини c хабармӕ. Етӕ лӕггадӕ кӕнунцӕ ӕнхӕстрӕстӕг пионертӕй, ӕма рандӕ ’нцӕ, ӕнхус кӕми гъудӕй, уӕхӕн рауӕнмӕ. Фал уоми экономики уавӕр ке фӕффуддӕр ӕй, уой туххӕй анзи бӕрцӕ сӕ бон н’ адтӕй куст иссерун. Еци уавӕри син ци ӕнхус кодта? Йеговӕ сӕ фарсмӕ ке адтӕй, уой лӕдӕрдтӕнцӕ. Удта ма син хуӕртӕ ӕма ӕнсувӕртӕ дӕр хъӕбӕр ӕнхус кодтонцӕ. Олеги фиццӕгти ӕ къохтӕ ӕруадзунмӕ берӕ нӕбал гъудӕй, фал фӕстӕдӕр загъта: «Мах архайдтан, цӕмӕй фулдӕр лӕггадӕ кодтайанӕ. Е нин ӕнхус кодта, цӕмӕй нӕ царди ӕхсидзгӕдӕр ци ӕй, уой ма иронх кӕнӕн». Етӕ хуарз хабар игъосун кодтонцӕ ӕма куст дӕр агурдтонцӕ.

 ¹⁰ Еу уӕхӕни Олег ӕма Иринӕ игъосун кӕнуни фӕсте хӕдзарӕмӕ ку ӕрбаздахтӕнцӕ, уӕд сӕ дуари рази фӕууидтонцӕ дууӕ пакетти хуӕруйнӕгти хӕццӕ. Еци лӕвар син искодта се ’мбал, ӕма уой туххӕй 160 километри фӕццудӕй. Олег зӕгъуй: «Еци бон ӕй нӕхебӕл балӕдӕрдтан, Йеговӕ дӕр, удта нӕ хуӕртӕ ӕма ӕнсувӕртӕ дӕр ци берӕ уарзунцӕ, уой. Мах ӕй нӕхецӕй зонӕн, уавӕр цийфӕнди зин ма уа, уӕддӕр Йеговӕ ӕ хеуӕнтти ке некӕд ниууаддзӕй» (Матф. 6:33).

11. Йегови фӕндон ку ӕнхӕст кӕнӕн, уӕд нин зӕрдӕ цӕмӕй ӕвӕруй?

¹¹ Йегови фӕндуй, цӕмӕй нӕ хъауритӕ сӕйрагидӕр исаразӕн ахуркӕнуйнӕгтӕ цӕттӕ кӕнуни гъуддагмӕ, уомӕн ӕма еци куст адӕни ервӕзун кӕнуй.  Ӕвдӕймаг абзацци куд загъд адтӕй, уотемӕй Аггей дзиуиттӕгти баразӕнгард кодта, цӕмӕй нӕуӕгӕй кустмӕ равналонцӕ, ӕма еци гъуддаги зингзӕрдӕ уонцӕ. Хуцау син зӕрдӕ байвардта, уотӕ ку бакӕнонцӕ, уӕд син ке арфӕ кӕндзӕй (Аг. 2:18, 19). Мах дӕр ибӕл нӕ гурусхӕ кӕнӕн, нӕ хъауритӕбӕл ку нӕ ауӕрдӕн ӕма нин Йеговӕ ци баихӕс кодта, уой ку ӕнхӕст кӕнӕн, уӕд нӕ ӕнӕ хуӕрзеуӕгӕй ке нӕ ниууадздзӕй.

12. Ездри ӕма иннӕ дзиуиттӕгти федар ӕууӕндундзийнадӕ цӕмӕн гъудӕй?

¹² Нӕ эри размӕ 468 анзи Ездрӕ дуккаг къуари хӕццӕ Вавилонӕй Йерусалиммӕ рандӕ ’й. Цӕмӕй еци балций рандӕ адтайуонцӕ, уой туххӕй сӕ федар ӕууӕндундзийнадӕ гъудӕй. Сӕ хӕццӕ райстонцӕ, ковӕндонӕн ке гъӕуама иснивонд кодтайуонцӕ, еци сугъзӕрийнӕ ӕма ӕвзестӕ. Уомӕ гӕсгӕ син надбӕл абӕргутӕй тӕссаг адтӕй (Езд. 7:12–16; 8:31). Уомӕй уӕлдай ма Йерусалиммӕ ку ӕрхъӕрдтӕнцӕ, уӕд ӕй фӕууидтонцӕ, уоми дӕр ӕдас ке нӕй. Цӕргутӕ си берӕ н’ адтӕй, горӕти фӕрстӕ ма колдуӕрттӕ ба пурхӕ адтӕнцӕ. Фал Ездрӕ ӕ зӕрдӕ Йеговӕбӕл дардта. Ӕ хабарӕй мах цӕбӕл ахур кӕнӕн?

13. Ездрӕн ци банхус кодта, цӕмӕй Йеговӕбӕл ӕ зӕрдӕ никки хъӕбӕрдӕр дардтайдӕ? (Кӕсӕ ма феппайуйнаг.)

¹³ Ездрӕ ма ’й раздӕр дӕр фӕууидта, Йеговӕ ӕ адӕни куд фӕййервӕзун кодта, уой. Нӕ эри размӕ 484 анзи паддзах Ахашверош бардзурд равардта, цӕмӕй Персий паддзахади ӕгас дзиуиттӕгтӕ дӕр исӕфт ӕрцӕуонцӕ. Уӕди рӕстӕг, ӕвӕдзи, Ездрӕ Вавилони цардӕй (Есф. 3:7, 13–15). Ӕма уой цардӕн дӕр тӕссаг адтӕй. Дзиуиттӕгтӕ паддзахи бардзурди туххӕй ку базудтонцӕ, уӕд дӕлбарӕ бӕститӕй алкӕмидӕр ком дардтонцӕ ӕма кудтӕнцӕ. Ӕвӕдзи, Йеговӕмӕ кувтонцӕ, цӕмӕй сӕ багъӕуай кодтайдӕ (Есф. 4:3). Ӕма уавӕр цӕхгӕрмӕ раййивта. Знӕгтӕ ци исфӕндӕ кодтонцӕ, уой сӕхе сӕр баййафта! (Есф. 9:1, 2). Дӕ цӕститӕбӕл рауайун кӕнӕ, Ездрӕ ӕма иннӕ дзиуиттӕгтӕ куд цийнӕ кодтайуонцӕ. Еци хабар Ездри бацӕттӕ кодта федӕни фӕлварӕнтӕмӕ. Удта ма уой фӕрци федарӕй ӕууӕндтӕй, Йегови бон ке ӕй ӕ адӕни багъӕуй кӕнун d.

14. Еу хуӕрӕн Йеговӕ зин рӕстӕгути ке банхус кодта, уомӕй цӕбӕл исахур ӕй?

¹⁴ Зиндзийнӕдтӕбӕл ку исӕмбӕлӕн ӕма нин Йеговӕ куд ӕнхус кӕнуй, уой ку фӕууинӕн, уӕд ибӕл нӕ зӕрдӕ хъӕбӕрдӕр дарун райдайӕн. Ӕркӕсӕн нӕ хуӕрӕ Анастасийи хабармӕ. Е цӕруй Искӕсӕн Европи. Ӕ куст ниууадзун ӕй багъудӕй, уомӕн ӕма ’й нӕ фӕндадтӕй политики хӕццӕ баст гъуддӕгти архайун. Анастасийӕ зӕгъуй: «Уой размӕ уӕхӕн уавӕри некӕдма адтӕн, цӕмӕй ӕнӕ къапек байзадайнӕ». Идарддӕр зӕгъуй: «Алцидӕр Йегови бӕрагӕ бакодтон ӕма ’й фӕууидтон, куд фӕлмӕнӕй мӕбӕл тухсуй, уой. Ескӕд ма ӕнӕ куст ку байзайон, уӕд  нӕбӕл фӕттӕрсдзӕн. Кӕд мӕбӕл абони мӕ уӕларвон Фидӕ тухсуй, уӕд мӕбӕл исон дӕр ӕнӕмӕнгӕй батухсдзӕй».

15. Ездрӕн ци банхус кодта, цӕмӕй Йеговӕбӕл ма гурусхӕ кодтайдӕ? (Ездрӕ 7:27, 28).

¹⁵ Ездрӕ ’й уидта, Йеговӕ ин ӕхецӕн куд ӕнхус кодта, уой. Ездрӕ сагъӕс кодта, Йеговӕ ин раздӕр куд ӕнхус кодта, уобӕл. Уомӕ гӕсгӕ ибӕл нӕ гурусхӕ кодта, ӕ Хуцау ӕ фарсмӕ ке ӕй. Дӕ гъос ӕрдарӕ дзурдбастмӕ «мӕ Хуцау Йеговӕ [мин] ке ӕнхус кодта» (комк. «ӕ къох дардта»). (Бакӕсӕ Ездрӕ 7:27, 28.) Аци дзурдтӕ Ездри киунуги ӕхсӕз хатти ӕмбӕлунцӕ (Езд. 7:6, 9; 8:18, 22, 31).

16. Йеговӕ нин ке ӕнхус кӕнуй, уой нӕ бон цӕхуӕн уавӕрти ӕй фӕууинун? (Кӕсӕ ма хузӕмӕ.)

¹⁶ Йеговӕ нин зин уавӕрти ӕнхус кӕндзӕй. Зӕгъӕн, гъӕуй нӕ нӕхе ракорун кусти хецауӕй, цӕмӕй конгресмӕ бахауӕн. Кенӕ ба си корӕн, цӕмӕй нин нӕ кусти график феййева, ӕма нӕ бон уа ӕмбурдтӕмӕ цӕун. Нӕхе бон ци ӕй, уой ку фӕккӕнӕн, уӕд Йеговӕн барӕ раттӕн, цӕмӕй нин ӕнхус кӕна. Гӕнӕн ес, ӕма ма уотӕ дӕр рауайа, ӕма гъуддаг, мах куд ӕнгъӕл адтан, уомӕй дзӕвгарӕ хуӕздӕр уодзӕй. Ӕма уӕд нӕ зӕрдӕ Йеговӕбӕл никки хъӕбӕрдӕр дардзиан.

17. Ездрӕ зин рӕстӕгути сӕрниллӕгдзийнадӕ куд бавдиста? (Кӕсӕ ма хузӕмӕ ӕндаг цъарӕбӕл.)

¹⁷ Ездрӕ сӕрниллӕгӕй Йеговӕй ӕнхус курдта. Ездрӕ ку фӕттухсидӕ, ӕ ихӕстӕ куд ӕнхӕст кӕндзӕй, уобӕл, уӕд аллихатт дӕр сӕрниллӕгӕй Йеговӕмӕ раковидӕ (Езд. 8:21–23; 9:3–5). Ездрӕ ӕ нифс Йеговӕбӕл ке дардта, уой иннетӕ ке уидтонцӕ, е сӕ баразӕнгард кодта, цӕмӕй ин ӕнхус кӕнонцӕ ӕма уой хузӕн архайонцӕ (Езд. 10:1–4). Кӕд ду дӕр хъӕбӕр тухсис дӕ бийнонти ӕдасдзийнадӕбӕл ӕма сӕ цӕмӕй дардзӕнӕ, уобӕл, уӕд ма ’фсӕрми кӕнӕ ӕма алцидӕр Йеговӕн дзорӕ, ӕма дин ке банхус кӕндзӕй, уобӕл ма гурусхӕ кӕнӕ.

18. Ци нин банхус кӕндзӕй, цӕмӕй нӕ зӕрдӕ Йеговӕбӕл никки хъӕбӕрдӕр дарӕн?

¹⁸ Йеговӕмӕ сӕрниллӕгӕй ку фӕкковӕн ӕма ӕ лӕггадгӕнгути ку бауадзӕн, цӕмӕй нин банхус кӕнонцӕ, уӕд ибӕл нӕ зӕрдӕ никки хъӕбӕрдӕр дарун райдайӕн. Ӕркӕсӕн Эрики хабармӕ. Ес ин ӕртӕ сувӕллони. Цубур рӕстӕгмӕ ибӕл цалдӕр зиани ӕрцудӕй. Фиццаг ин рамардӕй, ка нӕма райгурдӕй, еци сувӕллон, уой фӕсте ба – ӕ лӕг. Фал Йеговӕбӕл некӕд гурусхӕ кодта. Эрикӕ загъта: «Йеговӕ куд архайдзӕй, уой адӕймаг рагацау нӕ зонуй. Гӕнӕн ес, ӕма нин Йеговӕ банхус кӕндзӕй, ӕнгъӕл дӕр куд н’ адтан, уотӕ. Арӕх мин Йеговӕ мӕ кувдтитӕбӕл исдзуапп кӕнидӕ ӕмбурди хуӕрти ӕма ӕнсувӕрти фӕрци. Сӕ дзурдтӕ кенӕ сӕ гъуддӕгтӕ раст сӕ афони фӕууиуонцӕ. Де ’мбӕлттӕн  алцидӕр ӕргом ку дзорай, уӕд ӕй зондзӕнцӕ, сӕ бон дин куд ӕй банхус кӕнун».

19, 20. Вавилони ка байзадӕй, еци дзиуиттӕгтӕй цӕбӕл ахур кӕнӕн?

¹⁹ Йерусалиммӕ раздӕхун ӕ бон кӕмӕн не ’ссӕй, еци дзиуиттӕгтӕй дӕр нӕ бон берӕ цӕбӕлдӕрти ӕй исахур ун. Беретӕ си Вавилони байзадӕнцӕ сӕ карӕмӕ кенӕ се ’нӕнездзийнадӕмӕ гӕсгӕ, кенӕ сӕбӕл сӕ бийнонти рази ци ихӕстӕ адтӕй, уомӕ гӕсгӕ. Фал Ездрӕн ӕма, ӕ хӕццӕ ка адтӕй, уонӕн банхус кодтонцӕ, ӕма сӕ цидӕриддӕр гъудӕй уомӕй сӕмӕ фӕккастӕнцӕ (Езд. 1:5, 6). Ӕма уотӕ еу ӕма дууӕ хатти нӕ бакодтонцӕ. Куд ӕй зонӕн, уотемӕй, фиццаг къуар Йерусалиммӕ ку рандӕ ’й, уобӕл еу 19 анзи ку рацудӕй, уӕд Вавилони дзиуиттӕгтӕ Йерусалиммӕ нисайнӕгтӕ рарвистонцӕ (Зах. 6:10).

²⁰ Кӕд Йеговӕн дӕ бон нӕй, цӕйбӕрцӕ дӕ фӕндуй, уойбӕрцӕ лӕггадӕ кӕнун, уӕддӕр дӕ къохтӕ ма уадзӕ. Е дин дӕ хъиамӕтӕн хъӕбӕр устур аргъ кӕнуй. Уой кӕцӕй зонӕн? Захарий рӕстӕгути Йеговӕ пахампарӕн загъта, цӕмӕй «рӕсугъд кадиходӕ» искодтайдӕ, Вавилони ци дзиуиттӕгтӕ байзадӕй, етӕ ци сугъзӕрийнӕ ӕма ӕвзестӕ рарвистонцӕ, уомӕй (Зах. 6:11). Еци «рӕсугъд кадиходӕ» зӕрдӕбӕлдарӕн адтӕй, сӕ рӕдау нисайнӕгтӕ иронх ке нӕ ’нцӕ, уомӕн (Зах. 6:14). Йеговӕ ’й некӕд феронх кӕндзӕй, нӕ бон цидӕриддӕр ӕй, уой ке кӕнӕн, цӕмӕй ин тухст рӕстӕгути дӕр лӕггадӕ кӕнӕн (Дзиуит. 6:10).

21. Ци нин банхус кӕндзӕй, цӕмӕй нӕ зӕрдӕ Йеговӕбӕл дарӕн, цийфӕнди зиндзийнӕдтӕбӕл ма исӕмбӕлӕн, уӕддӕр?

²¹ Мах цӕрӕн фӕстаг бӕнтти рӕстӕг. Уомӕ гӕсгӕ гъӕуама нӕхе уӕхӕн фунтӕй ма сайӕн, цума цард фӕххуӕздӕр уодзӕй. Федӕни ма, гӕнӕн ес, гъуддаг никки фуддӕр фӕууодзӕй (2 Тим. 3:1, 13). Фал ӕгӕр мӕтӕ кӕнун нӕ гъӕуй. Дӕ зӕрдӕбӕл дарӕ, Хуцау Аггеййи рӕстӕгути ӕ адӕнӕн ци загъта: «Ӕз уӕ хӕццӕ дӕн... [...] Ма тӕрсетӕ» (Аг. 2:4, 5). Мадта не ’гас хъауритӕй ку архайӕн, цӕмӕй Хуцауи фӕндон ӕнхӕст кӕнӕн, уӕд Йеговӕ нӕ хӕццӕ уодзӕй. Аци статьяй ӕркастан Аггей ӕма Захарий пахампарӕдтӕмӕ, удта Ездри цӕветтонмӕ. Гъӕйдӕ, ци базудтан, уомӕй пайда кӕнӕн ӕма цийфӕнди зиндзийнӕдтӕбӕл ма исӕмбӕлӕн, уӕддӕр Йеговӕбӕл нӕ зӕрдӕ дарӕн.