РАДЖЫ заманты-иу лӕппу ус куы куырдта ӕмӕ-иу куы фидыдтой, уӕд-иу чызджы бинонтӕн ирӕд бафыста. Ирӕдӕн лӕвӕрдтой зынаргъ дзауматӕ, фос кӕнӕ ӕхца. Хатт та-иу лӕппуйы хъуыди чызджы бинонтӕн цавӕрдӕр куыст бакӕнын. Зӕгъӕм, Иаков сразы Рахилы тыххӕй Лаванӕн авд азы бакусыныл (Райд. 29:17, 18, 20). Цымӕ сӕм ахӕм ӕгъдау цӕмӕн уыд?

Библииртасӕг Кэрол Мейерс ныффыста: «Зӕхкусӕджы бинонтӕй алчидӕр фӕкӕсынхъом уыд. Ӕмӕ-иу чызг куы смой кодта, уӕд-иу йӕ бинонтӕ иу ӕххуысгӕнӕгӕй фӕцух сты. Ӕмӕ-иу лӕппуйы бинонтӕ ирӕд, ӕвӕццӕгӕн, уый тыххӕй бафыстой». Ӕвӕццӕгӕн ма-иу афтӕмӕй, чи бахӕстӕг, уыцы бинонтӕ равдыстой, ныр кӕрӕдзийӕн адджын хӕстӕджытӕ кӕй сты. Ӕмӕ-иу уӕдӕй фӕстӕмӕ сӕ цин дӕр ӕмӕ сӕ маст дӕр уыд иумӕйаг. Ирӕд-иу фыст кӕй ӕрцыд, уый ма ууыл дзурӕг дӕр уыд, ӕмӕ чызг фидыд у, ӕмӕ йӕ фыды бӕрны нал уыдзӕн, фӕлӕ йӕ сӕрыхицауы бӕрны.

Ирӕд кӕй фыстой, уый ууыл дзурӕг нӕ уыд, ӕмӕ-иу сылгоймаджы уыд ауӕй кӕнӕн кӕнӕ балхӕнӕн. Чиныджы «Рагон Израилы цард ӕмӕ ӕгъдӕуттӕ» фыст ис, зӕгъгӕ, израилӕгтӕм ирӕд фидыны ӕгъдау кӕй уыди, уый базонгӕйӕ, чи зоны, кӕмӕдӕр афтӕ фӕкӕса, ӕмӕ-иу чызджы ӕлхӕнгӕ бакодтой. Фӕлӕ, дам, куыд зыны, афтӕмӕй ирӕд уый тыххӕй нӕ фыстой. Фыстой-иу ӕй, сӕ чызджы сын кӕй акодтой, уый тыххӕй (Ancient Israel—Its Life and Institutions).

Ныртӕккӕ дӕр иуӕй-иу бӕстӕты ис ирӕд фидыны ӕгъдау. Чырыстон ныййарджытӕ сӕ сиахсагимӕ ирӕды тыххӕй куы ныхас кӕной, уӕд дзы хъуамӕ ӕгӕр бирӕ ма ’рдомой. Хъуамӕ архайой ацы ныхӕстӕм гӕсгӕ: «Уе ’мбаргӕдзинадӕй уӕ зонӕд алчидӕр» (Фил. 4:5; 1 Кор. 10:32, 33). Афтӕмӕй равдисдзысты, «ӕхцауарзаг», ома зыд ӕмӕ кӕрӕф, кӕй не сты (2 Тим. 3:2). Уымӕй уӕлдай ма, ӕгӕр стыр ирӕд дзы куы домой, уӕд ӕй хъӕудзӕн бирӕ кусын, цӕмӕй уыцы ӕхца ӕрӕмбырд кӕна. Ӕмӕ йӕ, чи зоны, бахъӕуа чындзӕхсӕв дӕр аиргъӕвын. Кӕнӕ кӕд пионер у, уӕд, гӕнӕн ис, дарддӕр йӕ бон ма уа пионерӕй лӕггад кӕнын, бирӕ кусын ӕй кӕй хъӕудзӕн, уый тыххӕй.

Иуӕй-иу бӕстӕты ирӕд фидыны фӕдыл ис хицауады закъӕттӕ. Ӕмӕ уыцы бӕстӕты цӕрӕг чырыстӕттӕ хъуамӕ уыцы закъӕттӕ ӕххӕст кӕной. Цӕмӕн? Уымӕн ӕмӕ Хуыцауы Ныхас чырыстӕттӕн фӕдзӕхсы, цӕмӕй «хицӕуттӕн коммӕгӕс» уой ӕмӕ, Хуыцауы закъӕттӕ чи нӕ халы, уыцы закъӕттӕ ӕххӕст кӕной (Ром. 13:1; Хъуыд. 5:29).