•  Mää te ma gä pädihu̱ 2

•  Yä tesoro de rä Noya Äjuä 3-5

  •  Rä discurso 3

  •  Hyoni hanja dä maxꞌäꞌi rä Noya Äjuä 4

  •  Hñeti rä Mäkä Tꞌofo 5

•  Ma gä udihu̱ mänꞌa xä ñho 6-14

  •  Fu̱di gi ñäui yä jäꞌi 7

  •  Tso̱ni mänꞌaki yä jäꞌi 8

  •  Fatsꞌi yä jäꞌi dä me̱päbi Äjuä 9

  •  Esplika näꞌä gi kamfri 10

  •  Rä discurso 11

  •  Näꞌä imformäsio dä za drä usa 12

  •  Yä forma de dä tꞌungä ntꞌo̱de 13

  •  Yä bideo ꞌne yä he̱ꞌmi 14

•  Mä mꞌu̱ihu̱ ngu yä kristianu 15, 16

  •  Ntꞌudi de rä Mäkä Tꞌofo ha rä Mhuntsꞌi 16

•  Yä noya pa dä uadi 17

•  Felisita ꞌne uni yä tsꞌofo 18

•  Rä tiempo 19

•  Rä semänä de rä visita rä superintendente de gä circuito 20

•  Rä semänä de rä däta mhuntsꞌi 21

•  Rä semänä de rä Fenäte de rä du rä Hesu 22

•  Rä superintendente de rä mhuntsꞌi Rä Mꞌu̱i ꞌne yä ꞌMe̱fi yä Kristianu 23

•  Rä presidente de rä mhuntsꞌi Rä Mꞌu̱i ꞌne yä ꞌMe̱fi yä Kristianu 24

•  Rä consejero auxiliar 25

•  Yä sala auxiliar 26

•  Yä bideo 27

1. Ha nunä he̱ꞌmi ehe yä instrucción pa nuꞌu̱ toꞌo ma dä uni nꞌa rä asignación ha rä mhuntsꞌi Rä Mꞌu̱i ꞌne yä ꞌMe̱fi yä Kristianu. Änte de toꞌo dä uni nꞌa rä asignación, mꞌe̱tꞌo debe dä hyandi nuꞌu̱ yä instrucción ehe pa näꞌä asignaciónꞌä ha rä Programä pa yä mhuntsꞌi Rä Mꞌu̱i ꞌne yä ꞌMe̱fi yä Kristianu. Mähyoni drä mbitabi gatꞌho nuꞌu̱ yä publicador pa dä thogi dä hñeti rä Mäkä Tꞌofo o dä uni yä demostrasion. Gatꞌho nuꞌu̱ di ntini ha yä mhuntsꞌi ꞌne ꞌmu̱i ja ngu udi rä Mäkä Tꞌofo, dä za dä uni ꞌnehe nuya yä asignación. Mu̱ toꞌo ne dä thogi dä hñeti rä Mäkä Tꞌofo o dä uni nꞌa rä demostrasion änte de dä mpublicador, rä superintendente de rä mhuntsꞌi Rä Mꞌu̱i ꞌne yä ꞌMe̱fi yä Kristianu ma dä repasa kongeꞌä nuꞌu̱ yä rekisito ꞌne mꞌe̱fa dä xipäbi mu̱ dä za dä partisipa o hinä. Ha näꞌä rä platika di debe dä ꞌmu̱hni toꞌo umbäbi rä curso de rä Mäkä Tꞌofo (pe̱ mu̱ nꞌa rä bätsi, debe dä ꞌmu̱hni ꞌnehe nꞌa de nuꞌu̱ yä dada mu̱ yä testigo rä Jeoba). Nuꞌu̱ yä rekisito tꞌadi, getꞌätho pa nuꞌu̱ toꞌo ne dä mpublicador ꞌne hinxä nxixtehetho (od-S rä ntheke 8, rä parr. 8).

2. Nꞌa minuto. Mꞌe̱fa de rä jähñä ꞌne rä sadi, rä presidente de rä mhuntsꞌi Rä Mꞌu̱i ꞌne yä ꞌMe̱fi yä Kristianu, ma dä no̱ni rꞌa de nuꞌu̱ yä punto mänꞌa ma dä matsꞌi nuꞌu̱ toꞌo xä ntini.

 3. Rä discurso (10 minuto). Ha rä Programä pa yä mhuntsꞌi ehe ndaꞌä rä tema ꞌne yoho o hñuu yä ntꞌudi. Nunä discurso go ma dä uni nꞌa rä anciano o nꞌa rä siervo ministerial näꞌä xa pädi dä ꞌñudi xä ñho. Xti mu̱di nꞌa rä rꞌayꞌo mfistꞌofo de rä Mäkä Tꞌofo, ma dä tꞌe̱ntsꞌi nꞌa rä bideo näꞌä udi te hutsꞌi ha näꞌä mfistꞌofoꞌä. Toꞌo ma dä uni nunä discurso, dä za dä ꞌñudi hanja di nthe̱ näꞌä no̱ni ha rä bideo ko rä tema näꞌä discurso. Pe mähyoni dä zoogi rä tiempo pa dä esplika nuꞌu̱ yä punto ehe ha rä Programä pa yä mhuntsꞌi. Nuꞌu̱ yä kꞌoi xä thoki pa dä matsꞌi nuꞌu̱ toꞌo xä ntini pa mänꞌa dä ntiende xä ñho rä imformäsio. Po rängeꞌä, toꞌo di tokabi nunä discurso, debe dä usa xä ñho yä kꞌoi asta habu̱ dä zu̱di rä tiempo. Dä za dä usa mä nꞌa rä imformäsio, pe se̱he̱ mu̱ di nthe̱ ko rä tema ꞌne ma dä matsꞌi pa dä esplika nuꞌu̱ yä ntꞌudi ehe ha nunä parte.

 4. Hyoni hanja dä maxꞌäꞌi rä Noya Äjuä (10 minuto). Toꞌo ma dä uni nunä asignación, hingi debe dä usa nꞌa rä introducción nixi dä jamäsu näꞌä ma dä mää pa dä uadi, se̱he̱ ri ꞌñehe dä yꞌo̱tꞌe nuꞌu̱ yä ntꞌani ehe ha nunä parte. Nunä parte go ma dä uni nꞌa rä anciano o nꞌa rä siervo ministerial näꞌä xa pädi dä ꞌñudi xä ñho. Toꞌo ma dä uni nunä parte, debe dä yꞌo̱tꞌe nuꞌu̱ yoho yä ntꞌani ehebu̱. Pe go ma dä desidi mu̱ dä theti nuꞌu̱ yä testo ehe o hinä. Nuꞌu̱ xä ntini ma dä uni yä komentario de gä 30 yä segundo o menu.

 5. Hñeti rä Mäkä Tꞌofo (4 minuto). Nunä asignación go ma dä uni nꞌa rä ñꞌo̱ho̱. Toꞌo ma dä hñeti, hindi debe dä usa nꞌa rä introducción nixi dä jamäsu näꞌä ma dä mää pa dä uadi, ho̱nse̱ di debe dä hñeti nuꞌu̱ yä testo xä thani de rä Mäkä Tꞌofo. Rä presidente ma dä matsꞌi nuꞌu̱ toꞌo tokabi dä uni nunä asignación pa dä hñeti ja ngu xä tꞌofo, hindä paati yä noya, pa dä ꞌñudi ge di ntiende näꞌä heti ꞌne pa hindä nkꞌu̱ne. Ora rä superintendente de rä mhuntsꞌi Rä Mꞌu̱i ꞌne yä ꞌMe̱fi yä Kristianu hoki rä programä, ri ꞌñehe dä yꞌo̱tꞌe ngue̱nda ge rꞌabu̱ ma dä ꞌñehe mä ndunthi yä testo, hänge mähyoni dä huahni xä ñho toꞌo ma dä umbäbi nunä asignación pa hindä thogi de nuꞌu̱ goho yä minuto.

6. Rꞌe̱tꞌa mä ku̱tꞌa yä minuto. Nunä sección de rä mhuntsꞌi xä thoki pa gatꞌho dä bädi dä mplatikaui yä jäꞌi, dä predika ꞌne dä ꞌñudi mänꞌa xä ñho rä Noya Äjuä. Mu̱ dä ja mꞌe̱di, yä anciano ꞌnehe dä za dä uni nꞌa de nuya yä asignación. Nuꞌu̱ toꞌo di tokabi nꞌa rä asignación ha nunä sección, debe dä jamäsu rä foyeto ꞌÑudi mänꞌa xä ñho o rä foyeto Mädi yä jäꞌi. Ha rä Programä pa yä mhuntsꞌi ja mämbu̱ entre paréntesis te mä ntheke o lección di tokabi. Ha rꞌa yä semänä, ma dä ꞌñehe nꞌa rä asignación habu̱ ma dä tꞌapäbi rä mfatsꞌi nuꞌu̱ xä ntini ꞌne go ma dä uni nꞌa rä anciano o nꞌa rä siervo ministerial näꞌä xa pädi dä ꞌñudi (ha  rä parrafo 15 dä za gi hyandi hanja di debe dä tꞌuni nunä asignación).

 7. Fu̱di gi ñäui yä jäꞌi. Nunä parte go dä za dä uni gatꞌho toꞌo ya thogi dä uni yä asignación, ya sea yoho yä ñꞌo̱ho̱ o yoho yä ꞌme̱hñä. ꞌNehe go dä za dä uni nꞌa rä ñꞌo̱ho̱ ko nꞌa rä ꞌme̱hñä, pe ho̱nse̱ mu̱ de rä familia. Nuꞌu̱ dä za dä hñudi o dä mꞌai. (Pa gi pädi hanja di debe dä tꞌuni nunä rä asignación, hyandi  yä parrafo 12 ꞌne  13).

 8. Tso̱ni mänꞌaki yä jäꞌi. Nunä parte go dä za dä uni gatꞌho toꞌo ya thogi dä uni yä asignación, ya sea yoho yä ñꞌo̱ho̱ o yoho yä ꞌme̱hñä. Pe hindä za go dä uni nꞌa rä ñꞌo̱ho̱ ko nꞌa ꞌme̱hñä, nixi nꞌa rä ꞌme̱hñä ko nꞌa rä ñꞌo̱ho̱ (km-S 5/97 rä nxii 2). Nuꞌu̱ dä za dä hñudi o dä mꞌai. Näꞌä toꞌo di tokabi nunä asignación, pe̱ꞌtsi te dä ꞌñudi hanja tso̱ni mänꞌaki nꞌa rä jäꞌi näꞌä ya xä ñäui änte. (Pa gi pädi hanja di debe dä tꞌuni nunä rä asignación, hyandi  yä parrafo 12 ꞌne  13).

 9. Fatsꞌi yä jäꞌi dä me̱päbi Äjuä. Nunä parte go dä za dä uni gatꞌho toꞌo ya thogi dä uni yä asignación, ya sea yoho yä ñꞌo̱ho̱ o yoho yä ꞌme̱hñä. Pe hindä za go dä uni nꞌa rä ñꞌo̱ho̱ ko nꞌa ꞌme̱hñä, nixi nꞌa rä ꞌme̱hñä ko nꞌa rä ñꞌo̱ho̱ (km-S 5/97 rä nxii 2). Nuꞌu̱ dä za dä hñudi o dä mꞌai. Nunä asignación ho̱nse̱ nꞌa zi xe̱ni de nꞌa rä curso de rä Mäkä Tꞌofo näꞌä ya xä mu̱di. Hindi ja ꞌme̱di dä usa nꞌa rä introducción nixi dä jamäsu näꞌä ma dä mää pa dä uadi, ho̱nse̱ mu̱ di tokabi dä mpe̱fi ha nꞌa de nuya yä lección. Nixi ja ꞌme̱di dä theti gatꞌho rä imformäsio, pe mu̱ toꞌo dä ne, dä za dä hñeti.

 10. Esplika näꞌä gi kamfri. Mu̱ nꞌa rä discurso, nunä parte go ma dä uni nꞌa rä ñꞌo̱ho̱. Pe mu̱ nꞌa rä demostrasion, nuꞌmu̱ go ma dä uni yoho yä ñꞌo̱ho̱ o yoho yä ꞌme̱hñä o nꞌa rä ñꞌo̱ho̱ ko nꞌa rä ꞌme̱hñä, pe ho̱nse̱ mu̱ de rä familia. Näꞌä toꞌo di tokabi nunä rä demostrasion, debe dä dädi claro ꞌne ko rä tꞌekꞌei näꞌä rä ntꞌani ehe ha rä titulo nunä asignación. Pa geꞌä debe dä usa näꞌä rä referencia di ñꞌoui. ꞌNehe ya go dä nubu̱ mu̱ dä no̱ni habu̱ bi gu̱ki nunä imformäsio o hinä.

 11. Rä discurso. Nunä asignación go ma dä uni nꞌa rä ñꞌo̱ho̱ dende ha rä atril. Ora dä thäi rä imformäsio de rä mfatsꞌi A de rä foyeto Mädi yä jäꞌi, näꞌä toꞌo di tokabi nunä asignación di debe dä ꞌñudi hanja dä za dä usa nuꞌu̱ yä testo ha rä predicación. Por ejemplo, dä za dä esplika te signifika nꞌa rä testo, hämꞌu̱ o hanja dä za drä usa pa drä esplikabi nꞌa rä jäꞌi nꞌa rä ntꞌudi de rä Mäkä Tꞌofo. Pe mu̱ rä imformäsio xä thäi ha nꞌa de nuꞌu̱ yä lección de rä foyeto Mädi yä jäꞌi, näꞌä toꞌo di tokabi nunä asignación, debe dä ꞌñudi hanja dä za drä usa ha rä predicación. Mu̱ ne, dä za dä usa de gä ejemplo rä punto 1 o nꞌa de nuꞌu̱ yä testo ehe habu̱ enä «Hyandi ꞌnehe» de näꞌä lecciónꞌä.

   12. Näꞌä imformäsio dä za drä usa. Nuꞌu̱ yä instrucción ehe ha nunä parrafo ꞌne de näꞌä di sigi, di abarca rä asignación «Fu̱di gi ñäui yä jäꞌi» ꞌne «Tso̱ni mänꞌaki yä jäꞌi». Nuꞌu̱ toꞌo di tokabi nuya yä asignación, debe dä yꞌo̱tꞌe ntsꞌe̱di po dä usa nꞌa rä tema näꞌä handi ge ma dä ho yä jäꞌi ꞌne dä hyoni rä modo pa dä sigi dä ñä kongeꞌu̱ mꞌe̱fa. Pe mu̱ ha rä programä pa yä mhuntsꞌi ehe mä nꞌa rä instrucción, nuꞌmu̱ debe dä jamäsu näꞌä instrucciónꞌä. Toꞌo ma dä uni nuya yä asignación, dä za dä usa nꞌa rä he̱ꞌmi o nꞌa rä bideo de yä erramienta pa gä udihu̱. Pe hindi debe dä yꞌofo o dä mepye̱ nꞌa rä demostrasion, sino debe dä mplatikaui nꞌa rä jäꞌi ko rä tꞌekꞌei.

   13. Yä forma de dä tꞌungä ntꞌo̱de. Näꞌä toꞌo di tokabi nuya yä asignación, di debe dä adapta rä demostrasion segun dä ja ꞌme̱di. Jaua rꞌa yä ejemplo:

1.  1) Predika ha yä nguu. Di abarca rä predicación ha yä nguu (ya sea gi tso̱ni nꞌa rä jäꞌi ha rä nguu, gi zofo po rä telefono o gi yꞌopäbi nꞌa rä karta) pa dä za gi sigi gi ñäui nꞌa rä jäꞌi näꞌä ya xki predikabi ha rä nguu.

2.  2) Predika habu̱ gatꞌho gi yꞌo. Di abarca gatꞌho nuꞌu̱ yä oportunida gi pe̱ꞌtsi de gi umbäbi ntꞌo̱de nꞌa rä jäꞌi. Por ejemplo, ora gi utuäbi nꞌa rä imformäsio de rä Mäkä Tꞌofo nꞌa ri kompa de rä ꞌme̱fi o de rä skuela, nꞌa ri besinu, ha rä kombi o habu̱ gatꞌho gi yꞌo.

3.  3) Predika ko rä exhibidor. Di abarca ora gi ungä ntꞌo̱de ko yä exhibidor ꞌne ora gi ungä ntꞌo̱de ha yä negosio, ha yä calle, ha yä parke, ha yä estacionamiento o ha märꞌa yä luga habu̱ yꞌo yä jäꞌi.

 14. Yä bideo ꞌne yä he̱ꞌmi. Nuꞌu̱ toꞌo di tokabi nuya yä asignación, dä za dä desidise̱ mu̱ dä usa nꞌa rä bideo o nꞌa rä he̱ꞌmi. Mu̱ dä desidi dä usa nꞌa rä bideo o rä asignación ya di ñꞌoui nꞌaa, hindi debe dä yꞌe̱ntsꞌi, pe hää di debe dä ñä de geꞌä.

15. Nunä sección ma dä mu̱di ko nꞌa rä jähñä ꞌne ma dä dura 15 yä minuto. Durante nuya yä minuto, ma dä nja nꞌaa o yoho yä thoꞌtsi nuꞌu̱ ma dä matsꞌi nuꞌu̱ xä ntini pa dä hyandi hanja dä me̱fi nuꞌu̱ yä tsꞌofo de rä Mäkä Tꞌofo ha yä mꞌu̱i. Nuya yä thoꞌtsi go ma dä uni nꞌa rä anciano o nꞌa rä siervo ministerial näꞌä xa pädi dä ꞌñudi xä ñho. Pe näꞌä rä thoꞌtsi «Habu̱ di japä mꞌe̱di dä mpe̱fi rä mhuntsꞌi», go di debe dä uni nꞌa rä anciano. Mu̱ ha nꞌa rä thoꞌtsi enä ge di debe dä tꞌapäbi rä mfatsꞌi nuꞌu̱ xä ntini, dä za dä tꞌo̱tꞌe märꞌa yä ntꞌani. Nunä thoꞌtsi di debe dä mu̱di ko nꞌa rä tꞌu̱kä introducción. Toꞌo ma dä uni nunä thoꞌtsi, di debe dä no̱ni nuꞌu̱ yä punto mänꞌa xa mähyoni ꞌne dä nupäbi yä mfeni nuꞌu̱ xä ntini pa dä uni yä komentario.

  16. Ntꞌudi de rä Mäkä Tꞌofo ha rä Mhuntsꞌi (30 minuto). Go ma dä uni nꞌa rä anciano näꞌä xa pädi dä ꞌñudi xä ñho (pe mu̱ ha rä mhuntsꞌi hingi ꞌmu̱i ndunthi yä anciano, nuꞌmu̱ go dä za dä uni nuꞌu̱ yä siervo ministerial xa pädi dä ꞌñudi xä ñho). Yä anciano de rä mhuntsꞌi go ma dä huahni toꞌo dä za dä uni nunä asignación. Nuꞌu̱ yä ku dä thahni, debe dä ꞌñudi xä ñho, hindä thogi de rä tiempo, dä huahni xä ñho nuꞌu̱ yä testo ma dä theti ꞌne dä matsꞌi gatꞌho nuꞌu̱ xä ntini pa dä hyandi hanja dä aplika ha yä mꞌu̱i näꞌä rä imformäsio. Pa dä bädi hanja dä japi, dä za dä jamäsu nuꞌu̱ yä tsꞌofo xä uni rä hnini Äjuä de hanja ri ꞌñehe dä tꞌo̱tꞌe rä Ntꞌudi de rä revista Yꞌo̱dehu̱ (w23.04 rä nxii 24, rä rekuadro). Mu̱ näꞌä rä ku uni nunä parte ya bi abarca gatꞌho rä imformäsio, dä za dä uadi änte, hingi ja mꞌe̱di dä gu̱ nuꞌu̱ 30 yä minuto. Mu̱ dä za, dä hogi ge tatꞌä semänä dä mpadi toꞌo heti yä parrafo ꞌne toꞌo di gu̱hni nunä ntꞌudi. Mu̱ rä presidente dä yꞌadi dä tsꞌokuäbi rꞌa yä minuto, näꞌä toꞌo di gu̱hni nunä ntꞌudi, go ma dä nubu̱ hanja dä japi pa dä uadi änte. Por ejemplo, dä za dä desidi te mä parrafo hindä theti.

17. Hñuu minuto. Rä presidente ma dä bembäbi nuꞌu̱ xä ntini rꞌa de nuꞌu̱ yä punto bi mhää ha rä mhuntsꞌi ꞌne handi ge ma dä benefisiabi nuꞌu̱ xä ntini. Mꞌe̱fa, ma dä mää te ma dä thandi näꞌä mä nꞌa semänä di sigi. Mu̱ dä bongi rä tiempo, dä za dä mää toꞌo di tokabi dä hñeti rä Mäkä Tꞌofo ꞌne toꞌo ma dä uni yä demostrasion näꞌä semänä di sigi. Mu̱ mähyoni dä tꞌuni nꞌa rä anunsio o dä theti nꞌa rä karta, rä presidente ma dä usa nuya hñuu yä minuto. Nuꞌu̱ yä programä pa rä tꞌungä ntꞌo̱de o pa rä limpiesa, hindi debe dä theti dende ha rä plataforma, sino di debe dä thutsꞌi ha rä tablero de yä anunsio. Mu̱ otho rä tiempo pa dä theti yä karta o dä tꞌuni yä anunsio, rä presidente dä za dä yꞌapäbi nuꞌu̱ yä ku di tokabi dä uni yä thoꞌtsi de rä sección «Mä Mꞌu̱ihu̱ ngu yä Kristianu» pa dä zokuäbi rꞌa yä minuto (hyandi  yä parrafo 16 ꞌne  19). Rä mhuntsꞌi debe dä uadi ko rä jähñä ꞌne rä sadi.

18. Xti uadi dä theti rä Mäkä Tꞌofo o dä tꞌuni nꞌa rä demostrasion, rä presidente ma dä usa nꞌa minuto pa dä felisita kada nꞌa de nuꞌu̱ yä ku bi uni nuya yä asignación. Ma dä xipäbi por hanja bi hogi rä asignación ꞌne ko rä tꞌekꞌei dä za dä xipäbi habu̱ di ja ꞌme̱di dä mpe̱fi mä nꞌa tu̱i ꞌne hanja dä za dä logra. Pa geꞌä, dä za dä usa näꞌä rä imformäsio ehe ha näꞌä lección bi tokabi dä mpe̱fi. Rä presidente ꞌnehe dä za dä no̱ni rꞌa yä punto nuꞌu̱ handi ge ma dä benefisiabi näꞌä toꞌo bi uni rä asignación o nuꞌu̱ toꞌo xä ntini. Mꞌe̱fa de rä mhuntsꞌi o mä nꞌa rä pa, rä presidente dä za dä usa rä foyeto Mädi yä jäꞌi ꞌne ꞌÑudi mänꞌa xä ñho o de rä mfistꞌofo Benefíciese pa dä umbäbi yä tsꞌofo o yä sugerencia näꞌä rä ku bi hñeti rä Mäkä Tꞌofo ꞌne nuꞌu̱ bi uni yä demostrasion (ha  yä parrafo 19,  24 ꞌne  25 ma gi tini mätsꞌu̱ rä imformäsio de näꞌä debe dä me̱fi rä presidente de rä mhuntsꞌi Rä Mꞌu̱i ꞌne yä ꞌMe̱fi yä Kristianu ꞌne de rä consejero auxiliar).

19. Ninꞌa rä asignación debe dä thogi de näꞌä rä tiempo xä thutsꞌi. Rä presidente debe dä jamäsu näꞌä mää pa hindä thogi de rä tiempo. Mäske ha rä Programä pa yä mhuntsꞌi ya mää hängu di dura kada nꞌa rä asignación, mu̱ ya bri abarca gatꞌho rä imformäsio, dä za dä uadi änte mäske tobe pongi rä tiempo. Mu̱ toꞌo dä thogi de rä tiempo, rä presidente o rä consejero auxiliar ma dä umbäbi yä tsꞌofo nꞌambu̱se̱ (hyandi  yä parrafo 24 ꞌne  25). Gatꞌho rä mhuntsꞌi hindi debe dä thogi de 1 ora ꞌne 45 yä minuto, dende rä mu̱di jähñä asta rä gäxä sadi.

20. Ha näꞌä rä semänä di toka rä visita, rä mhuntsꞌi ma dä tꞌo̱tꞌe ja ngu ehe ha rä Programä pa yä mhuntsꞌi. Pe en lugar de rä «Ntꞌudi de rä Mäkä Tꞌofo ha rä Mhuntsꞌi», rä superintendente de gä circuito ma dä uni nꞌa rä discurso de gä 30 yä minuto. Pe änte de geꞌä, rä presidente ma dä mää te dä pädihu̱ ꞌne te ma gä nxadihu̱ näꞌä semänä di sigi. Mu̱ ja ꞌme̱di, ꞌnehe ma dä hñeti yä karta o ma dä uni yä anunsio. ꞌNepu̱, ma dä presenta rä superintendente de gä circuito. Xti uadi rä discurso, rä superintendente de gä circuito ma dä huati rä mhuntsꞌi ko näꞌä rä jähñä xä huahni. Rä superintendente dä za dä mbitabi nꞌa rä ku pa dä ja rä gäxä sadi. Ha näꞌä semänä de rä visita hingä ma dä tꞌuni yä asignación ha yä sala auxiliar. Nuꞌu̱ yä mhuntsꞌi pe̱ꞌtsi nꞌa rä grupo de mä nꞌa rä idioma, hää dä za dä me̱ꞌtsi yä mhuntsꞌi ha rä sala auxiliar. Pe xti mu̱di rä discurso rä superintendente de gä circuito, nuꞌu̱ ꞌnehe ma dä yꞌo̱de näꞌä discursoꞌä.

21. Ha näꞌä rä semänä di toka nꞌa rä däta mhuntsꞌi, hingä ma dä tꞌo̱tꞌe nixi nꞌa rä mhuntsꞌi. Yä anciano ma dä bembäbi gatꞌho nuꞌu̱ di ntini ha rä mhuntsꞌi ge debe dä nxadise̱ o ko yä familia näꞌä imformäsio di toka näꞌä semänäꞌä.

22. Mu̱ rä Fenäte de rä du rä Hesu dä dagi entre semänä, hingä ma dä tꞌo̱tꞌe rä mhuntsꞌi Rä Mꞌu̱i ꞌne yä ꞌMe̱fi yä Kristianu.

23. Yä anciano go ma dä desidi toꞌo dä thutsꞌi ngu rä superintendente de rä mhuntsꞌi. Rä superintendente mähyoni dä jamäsu ge nunä mhuntsꞌi di ꞌmu̱i organisado ꞌne dä tꞌo̱tꞌe ja ngu mää nuꞌu̱ yä instrucción ehe ha nunä he̱ꞌmi. Mähyoni dä mpe̱fi mähye̱gi ko rä consejero auxiliar. Ngu dä bo̱ni rä Programä pa yä mhuntsꞌi, rä superintendente ma dä hyoki nꞌa rä programä pa yo nzänä ꞌne go ma dä asigna gatꞌho nuꞌu̱ toꞌo ma dä partisipa ha nunä rä mhuntsꞌi. Yä anciano go ma dä aprueba toꞌo dä za dä uni yä thoꞌtsi ꞌne toꞌo ma dä mpresidente tatꞌä semänä (hyandi  yä parrafo 3-16 ꞌne  24). Änte de drä thahni toꞌo dä uni nꞌa rä asignación o nꞌa rä thoꞌtsi, di debe dä tꞌo̱tꞌe ngue̱nda hängu nje̱ya pe̱ꞌtsi näꞌä rä ku, hängu rä esperiensia ꞌne rä mfädi pe̱ꞌtsi pa dä esplika näꞌä rä temaꞌä. Gatꞌho yä asignación de rä mhuntsꞌi di debe dä tꞌuni por lo menu hñu semänä änte. Pa nuꞌu̱ toꞌo di tokabi dä hñeti rä Mäkä Tꞌofo o dä uni nꞌa rä demostrasion, mähyoni dä tꞌumbäbi rä he̱ꞌmi Asignación pa rä mhuntsꞌi Rä Mꞌu̱i ꞌne yä ꞌMe̱fi yä Kristianu (S-89). Rä superintendente go ma dä hñutsꞌi rä programä ha rä tablero de yä anunsio. Yä anciano dä za dä huahni mä nꞌa rä anciano o siervo ministerial pa dä matsꞌi rä superintendente dä hyoki yä programä. Pe nꞌa rä siervo ministerial hindä za dä desidi toꞌo ma dä uni nuꞌu̱ yä parte o yä thoꞌtsi de rä mhuntsꞌi, se̱he̱ dä za dä asigna toꞌo ma dä hñeti rä Mäkä Tꞌofo o toꞌo ma dä uni yä demostrasion.

24. Tatꞌä semänä, nꞌa rä anciano go ma dä mpresidente ha rä mhuntsꞌi Rä Mꞌu̱i ꞌne yä ꞌMe̱fi yä Kristianu (ha nuꞌu̱ yä mhuntsꞌi habu̱ hingi ꞌmu̱i ndunthi yä anciano, dä za dä thahni nuꞌu̱ yä siervo ministerial xa pädi dä ꞌñudi xä ñho pa dä mpresidente). Rä presidente go ma dä mu̱ti rä mhuntsꞌi, go ma dä presenta gatꞌho nuꞌu̱ yä ku ma dä uni yä asignación ꞌne go ma dä mängä nuꞌu̱ yä gäxä noya pa dä uadi rä mhuntsꞌi. Mu̱ ha rä mhuntsꞌi hingi ꞌmu̱i ndunthi yä anciano, rä presidente dä za dä uni ꞌnehe nꞌa rä asignación, por ejemplo habu̱ ehe ho̱nse̱ nꞌa rä bideo. Änte o mꞌe̱fa de kada nꞌa rä asignación, rä presidente hindi debe dä ñä ndunthi. Yä anciano go ma dä huahni de entre geꞌu̱ nuꞌu̱ mänꞌa pädi dä ꞌñudi xä ñho pa dä mpresidente. Tatꞌä semänä dä za dä mpadi de gä presidente. Rꞌabu̱, rä superintendente de rä mhuntsꞌi Rä Mꞌu̱i ꞌne yä ꞌMe̱fi yä Kristianu go ma dä tokabi njatꞌä dä mpresidente ke nuꞌu̱ märꞌa yä anciano xä thahni. Mu̱ nꞌa rä anciano pädi dä diriji xä ñho rä «Ntꞌudi de rä Mäkä Tꞌofo ha rä Mhuntsꞌi», ꞌnehe dä za dä mpresidente. Rä presidente debe dä bädi hanja dä umbäbi yä tsꞌofo nuꞌu̱ yä ku ma dä uni yä asignación ꞌne dä nupäbi yä mfeni. ꞌNehe pe̱ꞌtsi rä responsabilida de dä hyandi ge rä mhuntsꞌi dä uadi a tiempo (hyandi  yä parrafo 17 ꞌne  19). Pa drä orra rä tiempo ꞌne mu̱ ja rä luga ha rä plataforma, dä za dä thutsꞌi nꞌa rä micrófono ko rä pedestal pa dä usa rä presidente. Njabu̱ mientra mää te mä asignación di sigi, näꞌä toꞌo di tokabi dä uni nꞌa rä asignación ya debe di ꞌmai ha rä atril. ꞌNehe dä za dä thutsꞌi nꞌa rä mexa ꞌne nꞌa rä silla pa dä hñudi rä presidente mientra di theti rä Mäkä Tꞌofo o di tꞌuni nuꞌu̱ yä demostrasion ehe ha rä sección «Mä mꞌu̱ihu̱ ngu yä kristianu».

25. Mu̱ dä za, nunä kargo go ma dä me̱ꞌtsi nꞌa rä anciano näꞌä xa pädi dä ꞌñudi xä ñho. Mu̱ ja mꞌe̱di, rä consejero auxiliar ma dä umbäbi yä tsꞌofo nꞌambu̱se̱ nuꞌu̱ yä anciano ꞌne yä siervo ministerial uni yä asignación ha rä mhuntsꞌi Rä Mꞌu̱i ꞌne yä ꞌMe̱fi yä Kristianu, nuꞌu̱ uni yä discurso de gä 30 yä minuto, nuꞌu̱ diriji rä Ntꞌudi de rä revista Yꞌo̱dehu̱, nuꞌu̱ diriji rä «Ntꞌudi de rä Mäkä Tꞌofo ha rä Mhuntsꞌi» o nuꞌu̱ heti yä he̱ꞌmi ha rä mhuntsꞌi (hyandi  rä parrafo 19). Mu̱ ha rä mhuntsꞌi ꞌmu̱i ndunthi yä anciano nuꞌu̱ xa pädi dä ꞌñudi xä ñho ꞌne dä uni yä discurso, dä za dä thutsꞌi nꞌa de geꞌu̱ tatꞌä je̱ya de gä consejero auxiliar. Hindi ja mꞌe̱di ge kada dä uadi nꞌa rä mhuntsꞌi, rä consejero auxiliar dä umbäbi yä tsꞌofo nuꞌu̱ toꞌo bi partisipa.

26. Mu̱ ha rä mhuntsꞌi ꞌmu̱pu̱ ndunthi yä ku pa dä uni yä asignación, dä za dä ñꞌusa yä sala auxiliar. Ha kada nꞌa rä sala auxiliar pe̱ꞌtsi te dä thutsꞌi de gä consejero nꞌa de nuꞌu̱ yä anciano xa pädi dä ꞌñudi xä ñho. Pe mu̱ hingi ꞌmu̱i ndunthi yä anciano, nuꞌmu̱ dä za dä thutsꞌi nꞌa rä siervo ministerial näꞌä xa pädi dä ꞌñudi xä ñho. Yä anciano de rä mhuntsꞌi ma dä huahni toꞌo dä za dä thutsꞌi de gä consejero ꞌne kada hängu tiempo dä mpadi. Rä consejero pe̱ꞌtsi te dä jamäsu nuꞌu̱ yä tsꞌofo ehe ha  rä parrafo 18. Xti uadi rä parte «Hyoni hanja dä maxꞌäꞌi rä Noya Äjuä», ma dä sipäbi nuꞌu̱ toꞌo di tokabi dä uni yä asignación ha yä sala auxiliar ge ya dä za dä thogi ha nuya yä sala. Xti uadi rä sección «Ma gä udihu̱ mänꞌa xä ñho» nuꞌu̱ ma dä mengi ha rä sala principal.

27. Nuꞌu̱ yä bideo ma dä ñꞌusa ha rä mhuntsꞌi de gä semänä ma dä za gi hyandi dende ha rä aplicación JW Library®.

© 2023 Watch Tower Bible and Tract Society of Pennsylvania

S-38-OTM 11/23