¿NDAꞌÄ mäjuäni? Mäjuäni de nuꞌu̱ rꞌa yä ntꞌani xä yꞌo̱tꞌe rä mexiꞌmhai. Nuꞌäge zä nꞌa rä mꞌiki ꞌnehe xkä o̱tꞌe nuya yä ntꞌani:

• ¿Turämu̱i Äjuä po gekhu̱?

• ¿Dä uadi nꞌa rä pa yä dängä tuhni ꞌne yä dumu̱i?

• ¿Te thogi ko nuꞌu̱ yä jäꞌi xä du?

• ¿Te mä humu̱i ja pa nuꞌu̱ yä jäꞌi xä du?

• ¿Hanja ri ꞌñehe gä xatuäbihu̱ Äjuä pa njabu̱ dä yꞌo̱xkägihu̱?

• ¿Hanja dä za gä pe̱ꞌtsihu̱ nꞌa rä te ko rä johya?

¿Toꞌo dä za gi yꞌambäbi? Mu̱ gi yꞌambäbi märꞌa yä jäꞌi, mäske nuꞌu̱ enä ge pe̱ꞌtsi ndunthi rä mfädi, rꞌa nꞌañꞌo ma dä xiꞌi. Rꞌaa ꞌñenä xi mäjuäni dä xiꞌi rꞌa yä hogä noya, pe nuꞌu̱ di ntꞌo̱de xä ñho se̱he̱ nꞌa hängutho yä pa, ꞌne mꞌe̱fa ya nixi hinto beni nuꞌu̱ yä noya o dri paati ko märꞌaa.

Hingo rängeꞌä, ja nꞌa rä he̱ꞌmi o mfistꞌofo mängä näꞌä xa mäjuäni ha dä za gä kamfribihu̱. Nꞌa rä mꞌiki nuꞌmu̱ mi xadi rä Hesu bi ꞌñembäbi Äjuä: «Ri noya geꞌä mäjuäni» (Juan 17:17). Mäpaya näꞌä rä Noya tꞌembäbi rä Mäkä Tꞌofo. Nunä he̱ꞌmi ꞌmestho ma dä xiꞌi xä ñho te mängä rä Mäkä Tꞌofo pa nuya yä ntꞌani dä mäñhu̱ ri mu̱di.

¿POR HANJA DI O̱TꞌEHU̱ NUNÄ RÄ NTꞌANI? Ngeꞌä mäpaya nuua ha rä xiꞌmhai otho rä tsꞌu̱tꞌhui ꞌne xä ñutsꞌi ko ndunthi rä ntsꞌomꞌu̱i. Ndunthi yä relijion udi ge di thogihu̱ nuya yä dumu̱i ngeꞌä enä ge geꞌä rä bolunta Äjuä.

¿TE MÄNGÄ RÄ MÄKÄ TꞌOFO? Rä Zi Dada hingi o̱tꞌe rä ntsꞌomꞌu̱i. Rä Job 34:10 mää: «¡Näꞌä xa mäjuäni Äjuä nunka xä beni dä me̱fi rä ntsꞌomꞌu̱i, ꞌne Näꞌä pe̱ꞌtsi Gatꞌho rä tsꞌe̱di nunka xä beni dä me̱fi yä tsꞌo tꞌo̱tꞌe!». Ko rä mhäte, rä Zi Dada, xä beni dä ja nꞌa rä hogä tꞌo̱tꞌe pa yä mexiꞌmhai, hänge rä Hesu bi ꞌñutkägihu̱ gä apäbihu̱ Äjuä nuꞌmu̱ di xatuäbihu̱: «Mä Zi Dadaꞌihe gi ꞌmu̱i ha mähetsꞌi [...]. Guä ehe gi ndä, ꞌne dä tꞌo̱tꞌe ri paha nuua ha rä xiꞌmhai ngu bi tꞌo̱tꞌe nubu̱ mähetsꞌi» (Mateo 6:9, 10). Rä Zi Dada, xa mäjuäni turämu̱i po gekhu̱, hänge xä uni nꞌa rä dängä ntꞌuni pa njabu̱ rä mexiꞌmhai dä me̱ꞌtsi nꞌa rä te ja ngu mi ne Äjuä dende rä mu̱di (Juan 3:16).

Hyandi ꞌnehe rä Génesis 1:26-28; rä Santiago 1:13, ꞌne rä 1 Pedro 5:6, 7.

¿POR HANJA DI O̱TꞌEHU̱ NUNÄ RÄ NTꞌANI? Hindä za gä pedehu̱ nuꞌu̱ yä jäꞌi tu ha yä dängä tuhni. ꞌNe gatꞌho di thogihu̱ yä dumu̱i.

¿TE MÄNGÄ RÄ MÄKÄ TꞌOFO? Rä Zi Dada xä ñätkägihu̱ ge ma dä hä nꞌa rä hogä mꞌu̱i ha gatꞌho rä Xiꞌmhai. Xti mända rä Tsꞌu̱tꞌhui Äjuä ha rä Xiꞌmhai, yä jäꞌi ya hindä «bädi rä tuhni», ꞌne ko nuꞌu̱ yä däjuai «ma dä hyokä yä tꞌabi» (Isaías 2:4). Ha ꞌnehe, Äjuä ma dä hñäki yä dumu̱i ꞌne ma dä hñäki gatꞌho nuꞌu̱ hingi o̱tꞌe rä justisia. Pa ko yä mexiꞌmhai, rä Mäkä Tꞌofo mää: «Äjuä ma dä dukuäbi gatꞌho yä gidaꞌu̱. Ya hindä nja rä du, ni yä tsꞌoni, ni yä dumu̱i, nixi yä u̱gi, ngeꞌä nu yä tꞌo̱tꞌe mi ja mꞌe̱tꞌo, nubye̱ ya otho» (Apocalipsis 21:3, 4).

Hyandi ꞌnehe rä Salmo 37:10, 11; 46:9, ꞌne rä Miqueas 4:1-4.

¿POR HANJA DI O̱TꞌEHU̱ NUNÄ RÄ NTꞌANI? Ndunthi yä relijion udi ge nuꞌmu̱ tu nꞌa rä jäꞌi, ja nꞌa rä alma näꞌä po̱ni de rä ndoyꞌo. Rꞌaa mää ge nuꞌu̱ xä du dä za dä yꞌo̱tpäbi rä ntsꞌomꞌu̱i nuꞌu̱ yä jäꞌi te, o rꞌaa enä ge nuꞌmu̱ xti du nuꞌu̱ yä tsꞌomꞌu̱i jäꞌi, Äjuä ma dä yꞌe̱ntꞌi ha nꞌa rä nidu habu̱ bi faspi.

¿TE MÄNGÄ RÄ MÄKÄ TꞌOFO? Ha rä du ja gehni di mꞌe̱di gatꞌho rä te. Rä Eclesiastés 9:5 mää ge «nuꞌu̱ xä du, nuꞌu̱ hinte pädi». Hää, hinte pädi, hinte tsa, hingi tsa te dä me̱fi, hänge hingi tsa dä yꞌo̱tpäbi rä ntsꞌomꞌu̱i, ha nixi hingi tsa dä matsꞌi nuꞌu̱ yä jäꞌi te (Salmo 146:3, 4).

Hyandi ꞌnehe rä Génesis 3:19 ꞌne rä Eclesiastés 9:6, 10.

¿POR HANJA DI O̱TꞌEHU̱ NUNÄ RÄ NTꞌANI? Nuju̱ hindi ne gä tuhu̱, gatꞌho di ne gä pe̱ꞌtsihu̱ nꞌa rä te temäꞌentho ko nuꞌu̱ yä jäꞌi di mädihu̱. Hänge rängeꞌä, di ne gä yo handihu̱ mänꞌaki nuꞌu̱ mä jäꞌihu̱ xä du.

¿TE MÄNGÄ RÄ MÄKÄ TꞌOFO? Ndunthi nuꞌu̱ yä jäꞌi xä du ma dä yo me̱ꞌtsi rä te mänꞌaki. Rä Hesu bi mää ge «nu to gatꞌho xä du [...] ma dä nangi» (Juan 5:28, 29). Nuꞌu̱ yä jäꞌi ma drä ju̱tsꞌi de rä du, ma dä yo mꞌu̱i ꞌne ma dä hyandi hanja dä nja nꞌa rä uädri ha gatꞌho rä xiꞌmhai ja ngu mi ne Äjuä dende rä mu̱di. Nꞌa rä te pa nzäntho ꞌne nꞌa rä hogä nzaki geꞌä xä ñätkägihu̱ Äjuä. Pe, ¿habu̱ ma dä mꞌu̱i nuꞌu̱ yä jäꞌi o̱te Äjuä? Rä Mäkä Tꞌofo mää: «Nuꞌu̱ yä jäꞌi o̱tꞌe rä justisia ma dä mꞌu̱i ha rä xiꞌmhai, ꞌne ja ma dä mꞌu̱hni pa nzäntho» (Salmo 37:29).

Hyandi ꞌnehe rä Job 14:14, 15; rä Lucas 7:11-17, ꞌne rä Hechos 24:15.

¿POR HANJA DI O̱TꞌEHU̱ NUNÄ RÄ NTꞌANI? Ha gatꞌho yä relijion, yä jäꞌi di xatuäbi Äjuä. Pe ndunthi kamfri ge Äjuä hingi o̱de nuꞌu̱ yä sadi.

¿TE MÄNGÄ RÄ MÄKÄ TꞌOFO? Rä Hesu bi mää: Nuꞌmu̱ gi xatuäbihu̱ Äjuä «oxi xki yoptähu̱ yä noya» (Mateo 6:7). Mu̱ di ne dä yꞌo̱xkägihu̱ rä Zi Dada, mähyoni gä pädihu̱ ndaꞌä rä bolunta ꞌne pe̱ꞌtsi te gä xatuäbihu̱ ja ngu di ho. «Näꞌä gä ne gä aphu̱, ꞌne nuꞌmu̱ geꞌä rä pahaꞌä, nuꞌmu̱ dä yꞌo̱de», xikägihu̱ rä 1 Juan 5:14.

Hyandi ꞌnehe rä Salmo 65:2; rä Juan 14:6, 14, ꞌne rä 1 Juan 3:22.

¿POR HANJA DI O̱TꞌEHU̱ NUNÄ RÄ NTꞌANI? Rꞌaa kamfri ge rä bojä, rä nsu, nꞌa rä hogä hmi o nꞌa rä hogä ꞌmai geꞌä uni rä johya, hänge ndunthi yä jäꞌi honi dä me̱ꞌtsi nuya yä tꞌo̱tꞌe pe hingi tini rä johya.

¿TE MÄNGÄ RÄ MÄKÄ TꞌOFO? Rä Hesu bi ꞌñudi te di ja mꞌe̱di pa gä pe̱ꞌtsihu̱ rä johya nuꞌmu̱ bi mää: «¡Mänꞌa xä njäpi nuꞌu̱ toꞌo o̱tuäbi rä noya Äjuä ꞌne o̱tꞌe näꞌä mää!» (Lucas 11:28). Ma gä pe̱ꞌtsihu̱ näꞌä xa mäjuäni rä johya, mu̱ gä pe̱fihu̱ gatꞌho näꞌä di ja mꞌe̱di pa gä tinihu̱ näꞌä di honihu̱: gä pädihu̱ toꞌo rä Zi Dada ꞌne näꞌä beni dä me̱fi ko nuju̱. Näꞌä mäjuäni hutsꞌi ha rä Mäkä Tꞌofo, mu̱ gä pädihu̱ de geꞌä, ma dä maxkägihu̱ gä handihu̱ näꞌä xa mähyoni gä pe̱fihu̱ ꞌne näꞌä hinä. Mu̱ gä hopihu̱ ge rä Noya Äjuä dä gu̱nkägihu̱, gatꞌho näꞌä ma gä pe̱fihu̱ ma dä bo̱ni xä ñho ꞌne ma gä handihu̱ ge rä te, ja ndunthi rä muui.

Hyandi ꞌnehe rä Proverbios 3:5, 6, 13-18 ꞌne rä 1 Timoteo 6:9, 10.

 Dä handihu̱ nꞌa tu̱i te mää rä Mäkä Tꞌofo de nuya rꞌato yä ntꞌani. ¿Gi hohmä gi pädi mä nꞌa tu̱i? Mu̱ nuꞌäge ja ngu märꞌa yä jäꞌi «nuꞌu̱ toꞌo o̱tuäbi rä noya Äjuä» gi ne gi pädi toꞌo Äjuä ꞌne te beni dä me̱fi ko nuju̱, nuꞌmu̱ ma gi ne gi pädi mä nꞌa tu̱i. Pe zäi ge ꞌnehe xkä ñꞌanise̱: Mu̱ mäjuäni turämu̱i rä Zi Dada po gekhu̱, ¿por hanja xä hyopi dä nja ndunthi rä ntsꞌomꞌu̱i ꞌne rä sufrimiento? ¿Hanja dä za gä pe̱ꞌtsihu̱ nꞌa rä hogä mꞌu̱i ko mä dämehu̱, mä ꞌme̱hñähu̱ ꞌne mä bätsihu̱? Rä Mäkä Tꞌofo thädi nuya ꞌne märꞌa yä ntꞌani.

Pe ndunthi yä jäꞌi hindi ho dä hyoni te mää rä Mäkä Tꞌofo. Rꞌaa enä ge xa rä däta nunä rä mfistꞌofo ꞌne xä ñhei toꞌo dä ntiende. ¿Gi hohmä gi hñäni rä mfatsꞌi pa gi pädi te mängä rä Mäkä Tꞌofo pa nuꞌu̱ ri ntꞌani gi pe̱ꞌtsi? Yä testigo rä Jeoba pe̱ꞌtsi yoho yä mfatsꞌi nuꞌu̱ ma dä maxꞌäꞌi.

Rä mu̱di mfatsꞌi, geꞌä rä mfistꞌofo ¿Te xa mäjuäni udi rä Mäkä Tꞌofo? Nunä mfistꞌofo xä thoki pa dä matsꞌi nuꞌu̱ yä jäꞌi —ja ndunthi yä ꞌme̱fi ꞌne otho yä tiempo— pa dä bädi te mängä rä Mäkä Tꞌofo de nuꞌu̱ yä ntꞌani o̱tꞌe. Rä yoho rä mfatsꞌi, dä za gi hñäni nꞌa rä ntꞌudi ha ri nguu. Nꞌa rä testigo rä Jeoba ma dä me̱ꞌtsi rä johya dä ma ha ri nguu o habu̱ go gi mää pa dä ꞌñutäꞌi de rä Noya Äjuä tatꞌä semänä ꞌne hinte mä bojä ma gi jutꞌi. Po gatꞌho rä Xiꞌmhai, yä miyontho yä jäꞌi xä hñäni ndunthi rä ñho ko nuya yä ntꞌudi. Ndunthi de nuya yä jäꞌi xä mää ko rä johya: «¡Nubye̱ hää, nuga dä tini näꞌä mäjuäni!».

Nuꞌäge ma gi hyandi ge xi xä ñho näꞌä mängä rä Mäkä Tꞌofo. Hingä se̱he̱ ma dä ꞌuegägihu̱ de nuꞌu̱ yä jamfri hingä mäjuäni, ꞌnehe ma gä handihu̱ ge rä te ja ndunthi rä muui, ma gä pe̱ꞌtsihu̱ nꞌa rä hogä humu̱i ꞌne ma gä ꞌmu̱ihu̱ ko rä johya. Rä Hesu bi mää: «Ma gi pähu̱ nuꞌä mäjuäni, ha nuꞌmu̱ gi pähu̱ nuꞌä mäjuäni, ya hingä ma gi mꞌe̱gohu̱» (Juan 8:32).