Ukom 2:1-23
2 Insan say anghel nen Jehova+ et linmad Bokim manlapud Gilgal+ tan inkuan to: “Impaway ta kayo ed Ehipto pian iyakar ed dalin ya insipan kod saray inmuunan atateng yo.+ Ontan met, inkuan kon, ‘Agkon balot deralen so impisipanan kod sikayo.+
2 Tan diad biang yo, agkayo misisipanan ed saray manaayam ed sayan dalin+ tan nepeg yon igeba iray altar da.’+ Balet agyo ak tinulok.+ Akin et ginawa yo iya?
3 Kanian oniay inkuan ko met, ‘Agko ra pataynanen ed arapan yo,+ tan patitan da kayo,+ tan iyarawi kayo na saray dirios da.’”+
4 Sanen imbaga iraya na anghel nen Jehova ed amin ya Israelita, inmakis na maksil iray totoo.
5 Kanian inngaran dan Bokim* iman a pasen, tan nambagat ira diman ed si Jehova.
6 Sanen imbaki la nen Josue iray totoo, amaarap so kada sakey ed saray Israelita ed tawir to, pian kayarianen da so dalin.+
7 Tan nantultuloy a nanlingkor iray totoo ed si Jehova diad amin ya agew nen Josue tan ed amin ya agew na saray mamatatken a nambilay ni kayari na impatey nen Josue. Anengneng na sarayan mamatatken so amin a makapadinayew a ginawa nen Jehova parad Israel.+
8 Insan si Josue ya anak nen Nun, say lingkor nen Jehova, et inatey ed edad a 110.+
9 Kanian sikatoy imponpon dad dalin a nasasakopan na tawir to diad Timnat-heres,+ diad mapalandey a rehyon na Efraim, diad amianen na Palandey Gaas.+
10 Amin ed satan a henerasyon et nitipon ed saray inmuunan atateng da,* tan sinmublay ed sikara so sananey a henerasyon ya agmikabat ed si Jehova odino ed saray ginawa to parad Israel.
11 Diad saman et ginawa na saray Israelita so mauges ed pakanengneng nen Jehova tan nanlingkor* irad saray Baal.+
12 Kanian tinaynan day Jehova a Dios na saray kaamaan da, a sikatoy angipaway ed sikara ed dalin na Ehipto.+ Tan tinmumbok irad arum a dirios, saray dirios na totoon walad kaliberliber da,+ tan dinmakmomo rad saratan tan pinasanok day Jehova.+
13 Tinaynan day Jehova tan nanlingkor irad Baal tan ed saray imahen nen Astoret.+
14 Diad saman et dinmalang so sanok nen Jehova ed Israel, kanian inyawat to rad lima na saray managsamsam tan sinamsaman da ra.+ Inlako to rad saray kalaban a walad kaliberliber da,+ tan agda la natalo iray kalaban da.+
15 Inerman so laen da et sumpad sikara si Jehova tan indapo tod sikara so kadederal,+ unong a sinalita nen Jehova tan unong ya insamba nen Jehova ed sikara,+ tan agonigon iran maong.+
16 Kanian anuro si Jehova na saray ukom a mangiliktar ed sikara ed lima na saray managsamsam.+
17 Balet agda labay a dengelen so anggan saray ukom, tan nandayew ira* ed arum a dirios tan dinmakmomo rad saratan. Tampol iran sinmian ed dalan a tinumbok na saray inmuunan atateng da a tinmulok ed saray ganggan nen Jehova.+ Agda itan ginawa.
18 Sano manuro si Jehova na saray ukom parad sikara,+ si Jehova et walad samay ukom tan iliktar to rad lima na saray kalaban da diad amin ya agew na samay ukom; ta akasian ira nen* Jehova+ lapud panakis da nisengeg ed saramay mamapairap+ tan nanmaltrato ed sikara.
19 Balet sano ompatey so ukom, manggawa ira lamet na mas mauges nen saray kaamaan da diad itumbok dad arum a dirios, tan manlingkor tan ondakmomo irad saratan.+ Agda intunda iray kagagawa ra tan say inkabenger da.
20 Diad kaunoran et dinmalang so sanok nen Jehova ed Israel,+ tan inkuan to: “Lapud agsinumpal na sayan nasyon so sipanan ko+ ya ingganggan kod saray inmuunan atateng da tan agda ak tinulok,+
21 agko la pataynanen ed arapan da so anggan sakey ed saray nasyon ya akera sanen inatey si Josue.+
22 Gawaen ko iya pian nasubok so Israel no kasin tumboken day dalan nen Jehova+ diad panumpal ed satan a singa ginawa na saray kaamaan da.”
23 Kanian inabuloyan nen Jehova a mansiansia irayan nasyon. Agto ra pinataynan a tampol, tan agto ra inyawat ed lima nen Josue.
Paimanod leksab
^ Kabaliksan toy “Saray Onaakis.”
^ Sakey iyan maanlong a balikas parad ipapatey.
^ Odino “nandayew.”
^ Odino “akilawanan ira.”
^ Odino “nagbabawi si.”