•  Introduksion 2

•  Kayamanan ed Salita na Dios 3-5

  •  Paliwawa 3

  •  Saray Espiritual a Kayamanan 4

  •  Panagbasa na Biblia 5

•  Magmaliw ya Epektibo ed Ministeryo 6-14

  •  Pangigapo na Tongtongan 7

  •  Panagpawil 8

  •  Panaggaway Disipulo 9

  •  Ipaliwawa Iray Papanisiaan Mo 10

  •  Paliwawa 11

  •  Detalye 12

  •  Setting 13

  •  Pangusar na Video tan Literatura 14

•  Bilay na Kristiano 15-16

  •  Panag-aral na Kongregasyon ed Biblia 16

•  Konklusyon 17

•  Pangiter na Komendasyon tan Panonot 18

•  Oras 19

•  Bisita na Manangasikaso na Sirkito 20

•  Simba na Asemblea o Kombension 21

•  Simba na Memoryal 22

•  Manangasikaso na Aral Parad Ministeryo tan Bilay na Kristiano 23

•  Chairman ed Aral Parad Ministeryo tan Bilay na Kristiano 24

•  Katulongan a Managkonseho 25

•  Kaaruman Iran Klase 26

•  Saray Video 27

1. Makatulong iray instruksion ya wadia parad amin ya walay parte ed midweek, say Aral Parad Ministeryo tan Bilay na Kristiano. Antis iran manparaan, kailangan dan repasoen iray instruksion ya nabasa dia parad parte da. Amin ya manangipalapag et nepeg ya pasesegen ya mangawat na asainmin. Saray iyaaralan na Biblia ya regular lan mimiaral et nayari lan ikdan na asainmin no aawaten da la iray bangat na Biblia tan iyaaplika da la ed bilay da iray prinsipyon tutumboken na saray Kristiano. No walay labay toy manpa-enroll pero aliwa nin manangipalapag, sikatoy katongtongen na manangasikaso na Aral Parad Ministeryo tan Bilay na Kristiano tungkol ed saray kailangan ton gawaen pian magmaliw ya kualipikado. No sikatoy katongtongen, nepeg ya ipila so akan-Bible study odino say Tasin ateng to. Kayari to, ipaamta ed sikato no sikatoy kualipikado. Parehas so requirement parad saramay labay day manpa-enroll tan saramay labay day magmaliw ya agbautismadon manangipalapag.—od kap. 8 par. 8.

2. Sakey minuto. Diad sinimban aral, kayari na panlukas a kansion tan pikakasi, say chairman ed Aral Parad Ministeryo tan Bilay na Kristiano et mangiter na introduksion pian talaranan na saray inmatendi so interon programa. Say chairman et nepeg ya manpokus ed saray punton pakagunggonaan a maong na kongregasyon.

 3. Paliwawa: Samploran minuto. Say tema tan outline na duara o taloran manunan punto et walad Workbook ed Aral. Iyasain iyan paliwawa ed sakey ya elder o kualipikadon ministeryal a lingkor. No balon libro na Biblia so aka-eskedyul ed sinimban babasaen ed Biblia, walay video ya ipabantay bilang introduksion. Nayarin ikonekta na akanbetang so video ed tema. Balet, seguroen to met ya nakonsidera to ray punto ya walad workbook. Ontan met, no wala ni oras, nepeg ton ikonsidera so litrato, ta talagan ginawa itan pian mas natalosan na saray inmatendi so tema. Sarag toy mangusar na arum ya reperensya basta seguradoen to ya makatulong itan pian mas nidanet iray punto.

 4. Saray Espiritual a Kayamanan: Samploran minuto. Saya et tepet tan ebat ya anggapoy introduksion odino konklusyon. Betang iya na sakey ya elder o kualipikadon ministeryal a lingkor. Nepeg ya itepet na espiker ed saray inmatendi so duaran tepet. Ontan met, sikatoy akauley no kasin basaen o andi so teksto. Kaukolan ya 30 segundo o mas antikey ni so komento na saray onebat.

 5. Panagbasa na Biblia: Apatiran minuto. Sayan asainmin et ipresenta na sakey ya estudyanten laki. Nepeg ya basaen na estudyante so materyal ya anggapo lay introduksion o konklusyon. Say chairman ed aral et manpokus ed no panon ton tulongan iray estudyante ya dugay pambasa da, mainomay ya natalosan, marlas, duga iray salitan idanet da tan no iner ira ontunda, umanen day boses da no kaukolan, tan natural so pambasa da. Nandurumay karukey na saray bersikulon basaen, kanian kaukolan ya ikonsidera na manangasikaso na Aral Parad Ministeryo tan Bilay na Kristiano so abilidad na saray estudyante ya pangiteran to ed sayan parte.

6. Labinliman minuto. Sayan seksion ed midweek ya aral et denesinyo pian ipasal tayon amin ed ministeryo, diad ontan et onaligwas so paraan na pitotongtong, panagpulong, tan panagbangat tayo. No posible, ikday asainmin iray elder. Pankimeyan na kada estudyante so punto ed leksion ya inala ed brosyur ya Panagbangat odino Aro Yoy Totoo. Aka-parenthesis itan ed samay mismon asainmin. No maminsan, say aka-eskedyul ya parte et talakayen na sakey ya elder o kualipikadon ministeryal a lingkor tan mankomento iray ondedengel.—Basaen so  parapo 15 no panon itan ya gawaen.

 7. Pangigapo na Tongtongan: Sayan asainmin et nayarin ipresenta na sakey ya estudyanten laki o bii. No say akanbetang et laki, dapat say assistant to et laki met o kapamilya to. No bii so akan-asainmin, dapat say assistant to et bii met o kapamilya to. Nayarin akayurong o akaalagey ira.—Parad kaaruman ya impormasyon tungkol ed detalye tan no anto ray setting ed sayan asainmin, basaen so  parapo 12 tan  13.

 8. Panagpawil: Sayan asainmin et nayarin ipresenta na sakey ya estudyanten laki o bii. Dapat say assistant to et kapareho ton laki o bii. (km 5/97-TG p. 2) Nayarin akayurong o akaalagey ira. Ipanengneng na estudyante no antoy ibaga to no pawilen to imay akatongtong to nen imbeneg.—Parad kaaruman ya impormasyon tungkol ed detalye tan no anto ray setting ed sayan asainmin, basaen so  parapo 12 tan  13.

 9. Panaggaway Disipulo: Sayan asainmin et nayarin ipresenta na sakey ya estudyanten laki o bii. Dapat say assistant to et kapareho ton laki o bii. (km 5/97-TG p. 2) Nayarin akayurong o akaalagey ira. Say eksena ed sayan parte et peles la ran manaaral na Biblia. Agla kaukolan so introduksion o konklusyon, likud labat no atan ya leksion so obserbaan ed estudyante. Agla kaukolan ya basaen ya maksil so amin ya materyal, pero nayari met itan ya gawaen.

 10. Ipaliwawa Iray Papanisiaan Mo: No sayan parte et paliwawa, iter iya ed estudyanten laki. Pero no demonstrasyon, say estudyante et nayarin laki o bii. Dapat say assistant to et kapareho ton laki o bii, odino kapamilya to. Dapat malinew tan mataktikan naipaliwawa na estudyante so ebat ed tema. Usaren to imay impormasyon ya walad reperensya. Akauley so estudyante no kasin bitlaen to o andi so reperensya diad parte to.

 11. Paliwawa: Betang iya na estudyanten laki tan ipresenta bilang paliwawa. No say paliwawa et akabase ed sakey ya punto ed apendise A na brosyur ya Aro Yoy Totoo, dapat ipaimano na estudyante no panon ya usaren ed ministeryo so sakey o pigaran teksto. Singa bilang, sarag ton ipaliwawa no kapigan usaren so sakey ya teksto, no antoy labay ton ibaga, tan no panon itan ya i-explain ed arum. Balet no say paliwawa et akasentro ed sakey ya punto ya walad seksion ed brosyur ya Aro Yoy Totoo, dapat manpokus so estudyante ed no panon itan ya onaplika ed ministeryo. Sarag ton i-discuss so punto 1 na leksion odino idanet so arum ni ran makatulong ya bersikulo ya walad leksion.

   12. Detalye: Say impormasyon ed sayan parapo tan ed ontumbok iran parapo et onaplika ed asainmin ya “Pangigapo na Tongtongan” tan “Panagpawil.” No anggapo met so kaaruman ya instruksion, say goal na estudyante et mangibaga na simplin katuaan ed Biblia ya ombagay ed katongtong to tan manggawa na paraan ya napawil to lamet pian ituloy so tongtongan. Akauley ya manpili so estudyante no anton topic so epektibo tan dugaruga ed teritorya. Akauley to met la no kasin mangiyopresi na sakey ya publikasyon o mangipabantay na video ya walad Uusaren ed Panagbangat (o Teaching Toolbox). Imbes ya man-memorize na presentasyon, say pansagpotan na estudyante et no panon ton paaligwasen so abilidad ton mitongtong, singa say pangipanengneng na personal ya interes tan pagmaliw ya natural.

   13. Setting: Dapat ibagay na estudyante so setting to no anton talagay nagagawa ed teritorya. Singa bilang:

1.  (1) Panagpulong ed Kaabungan: Say setting ya kaiba dia et panagpulong ed abung (nayarin face-to-face, diad cellphone o gadyet, odino letter writing). Tan kaiba met dia so panagpawil ed toon apulongan ed kabkaabungan.

2.  (2) Informal Witnessing: Diad sayan setting, salien na estudyante ya isalet so panagpulong ed sakey ya katongtong to. Nayarin mangi-share na sakey ya punto ed Biblia ed sakey ya katrabaho, kaeskuela, kapitbahay, akabansag ton manaalagar, odino diad arum ni ran situasyon ya walay akatongtong to.

3.  (3) Public Witnessing: Nayarin say setting dia et cart witnessing o street witnessing. Kaiba met dia so pampulong ed saray pasen na negosyo, pampulong ed plaza, paradaan, o diad arum ni ran matoon lugar.

 14. Pangusar na Video tan Literatura: Akauley so estudyante no kasin manpabantay na video o mangiyopresi na literatura. No kaiba ed instruksion o labay na estudyante so manpabantay na video, i-introduce to itan insan talakayen to. Pero agla itan ipi-play.

15. Kayari na kansion, say ontumbok ya 15 minuto na sayan seksion et walaan na sakey o duaran parte ya denesinyo pian ontulong ed saray inmatendi ya iyaplika so Biblia. No anggapoy abitlan espisipikon pangiteran na parte, sarayan parte et nayarin iyasain ed elder o kualipikadon ministeryal a lingkor. Pero no lokal iran pankaukolan, betang iya na elder. No say parte et panagtalakay, nayarin mangusar na kaaruman ya tepet so brother ya akan-parte likud ed saramay tepet ed workbook. Dapat antikey labat so introduksion pian mas akapokus ed saray manunan punto tan mas dakel so mankomento. No walay interbyuen, mas marakep no walad stage imbes ya walad yurongan, no posible.

  16. Panag-aral na Kongregasyon ed Biblia: Talomplon minuto. Sayan parte et nepeg ya iyasain ed sakey a kualipikadon elder. (No pigpigaray elder, nayarin iyasain iray kualipikadon ministeryal a lingkor, no nakaukolan.) Akauley so ulop na mamatatken no siopa ray pilien da ya kualipikadon mangikondukta na Panag-aral na Kongregasyon ed Biblia. Saramay naaprobaan et kaukolan ya marunong ya mangikondukta​—seguroen dan nasumpal itan ed dugan oras, nidanet iray importantin teksto ed Biblia, tan natalosan na amin no panon dan iyaplika iray punton aaralen. Maabig no saray naaprobaan et repasoen da iray instruksion no panon ya ikondukta iray parte ya walay tepet tan ebat. (w23.04 p. 24, kahon) No atalakay met lan maong so materyal, agla kaukolan ya parukeyen so panag-aral. No posible, nanduruma so mangikondukta tan manbasa na parapo kada simba. No ibaga na chairman ed Aral Parad Ministeryo tan Bilay na Kristiano ya patikeyen so panaral, akauley la so mangikondukta no panon to itan ya patikeyen. Nayarin agto la ipabasa so arum ya parapo.

17. Taloran minuto. Repasoen na chairman ed Aral Parad Ministeryo tan Bilay na Kristiano iray manunan punto ya nidanet diad aral. Ibaga to met no anto ray talaranan ed ontumbok ya simba. No wala ni oras, nayari ton ibaga iray kangaranan na estudyante ya walaan na asainmin ed ontumbok ya simba. Nepeg ya ibasa na chairman iray pakabat tan sulat ed kongregasyon, puera labat no walay duman instruksion. Saray naynay lan ipapaimano et agla iyanunsio noagta ipaskil lad information board (singa saray uksoyan ed panagpulong tan eskedyul ed panaglinis). No walay kaukolan ya basaen ya pakabat odino sulat pero onsobra lad niganan minuto parad konklusyon na chairman, kaukolan ton katongtongen iray brother ya akanbetang ed Bilay na Kristiano ya patikeyen day parte da, depende ed pankaukolan. (Nengnengen so  parapo 16 tan  19.) Say aral et sampotan ed kansion tan pikakasi.

18. Kayari na kada parte na estudyante, manga sakey minuto so usaren na chairman ed aral pian mangiter na komendasyon odino panonot ya paaligwasen na estudyante base ed leksion ya pangobserbaan ed sikato. No ipakabat na chairman so parte na estudyante, agto bitlaen so leksion ya pangobserbaan. Balet no asumpal lay parte tan angiter la na komendasyon so chairman, sarag ton bitlaen so leksion ya angobserbaan ed estudyante. Sarag ton ibaga no antoy balibalin akimeyan na estudyante ed saman ya leksion odino maaro ton ipaliwawa no akin ya kaukolan ton paaligwasen itan tan no panon to itan ya gawaen. Nayari met ya mangibaga so chairman na arum nin naobserbaan to ed demonstrasyon no isipen ton makatulong itan ed estudyante odino ed saray inmatendi. Sarag ton katongtongen so estudyante kayari na aral o diad arum a panaon pian mangiter na kaaruman ya panonot tungkol ed samay akaasain ya leksion odino arum nin paaligwasen to base ed brosyur ya Aro Yoy Totoo, brosyur ya Panagbangat, o libron Eskuelaan Parad Ministeryo.—Parad kaaruman ya impormasyon nipaakar ed betang na chairman ed Aral Parad Ministeryo tan Bilay na Kristiano tan ontan met ed betang na katulongan a managkonseho, nengnengen so  parapo 19,  24, tan  25.

19. Agdapat man-overtime so antokaman ya parte, pati say komento na chairman ed aral. Tua, akasulat lad workbook no pigaran minuto so sakey ya parte, pero agla kailangan so mangiyarum na impormasyon pian labat naupot so nakekeran minuto no atalakay met la ray manunan punto. No walay man-overtime ya parte, pribadon katongtongen na chairman ed aral odino say katulongan a managkonseho so akanparte tan ipanonot ed sikato so kaimportantian na timing. (Nengnengen so  parapo 24 tan  25.) Say interon aral, kaiba lay kansion tan pikakasi, et nepeg ya nasumpal ed 1 oras tan 45 minuto.

20. No ombisita ed kongregasyon so manangasikaso na sirkito, siansia nin tumboken so walad Workbook ed Aral puera labat ed saraya: Say parten Panag-aral na Kongregasyon ed Biblia ed seksion ya Bilay na Kristiano et salatan na 30 minuton service talk na manangasikaso na sirkito. Antis na service talk, say chairman ed aral et manrepaso, ibaga to ray talaranan ed ontumbok a simba, ibasa to ray pakabat odino sulat no wala, insan ipresenta toy manangasikaso na sirkito. Kayari na service talk, sampotan na manangasikaso na sirkito so aral panamegley na kansion ya pilien to. Nayarian toy manawag na sananey ya brother parad pansaran pikakasi. Anggapoy kaaruman ya klase (auxiliary class) ed lenguahe na kongregasyon diad bisita na manangasikaso na sirkito. Nayari nin siansia ya gawaen na grupo so aral da anggano bisita na manangasikaso na sirkito ed host congregation. Balet legan na service talk na manangasikaso na sirkito, nepeg ya miulop so grupo ed host congregation.

21. No walay asemblea odino kombension ed satan a simba, anggapoy aral ed kongregasyon. Ipanonot ed kongregasyon ya say aka-eskedyul ed satan a simba et aralen na kada indibidual odino bilang pamilya.

22. No ombana so Memoryal ed dinanman ya agew ed Lunes anggad Biernes, anggapo lay iyeskedyul ya aral ed midweek.

23. Manpili so ulop na mamatatken na sakey ya elder ya magmaliw ya manangasikaso na Aral Parad Ministeryo tan Bilay na Kristiano. Responsabilidad to ya seguroen ya organisado so aral tan nagawa base ed sarayan instruksion. Kaukolan ya walay maabig ya komunikasyon to ed katulongan a managkonseho. No wala lay sankabaloan ya Workbook ed Aral, iyasain lan tampol na manangasikaso na Aral Parad Ministeryo tan Bilay na Kristiano so amin ya parte ed aral ed midweek parad duaran bulan. Kaibad satan iray parte na saray aliwan estudyante tan saray chairman na aral ed midweek ya pinili ed saramay inaprobaan na ulop na mamatatken, ontan met ed saray parte na saray estudyante. Antis na petsa na mismon asainmin, iter la itan taloran simba o mas masakbay ni. (Nengnengen so  parapo 3-16 tan  24.) Antis ya mangiter na asainmin so manangasikaso na Aral Parad Ministeryo tan Bilay na Kristiano, kailangan ton ikonsidera so edad, eksperiensya, tan no kasin ag-ompugtal ed estudyante so topic ya ipresenta to. Ontan met so gawaen to antis ton iyasain so sakey ya parte parad sakey ya elder o ministeryal a lingkor. Nepeg ya usaren so form ya Our Christian Life and Ministry Meeting Assignment (S-89) parad saray asainmin na estudyante. Nepeg ton seguradoen ya ipaskil ed information board so eskedyul na amin ya asainmin ed aral. Nayarin mangiyasain so ulop na mamatatken na sakey nin elder o ministeryal a lingkor ya ontulong ed sikato. Pero saray elder labat so dapat ya mangiyasain ed saray parte ya aliwan parad saray estudyante.

24. Sinimba ya walay akaasain ya elder ya man-chairman ed Aral Parad Ministeryo tan Bilay na Kristiano. (Saray kongregasyon ya pigpigaray elder et nayarin mangusar na saray kualipikadon ministeryal a lingkor no nakaukolan.) Sikatoy mangiparaan na introduksion tan konklusyon. Ipakabat to met so amin ya parte, tan depende ed bilang na saray elder ed kongregasyon, sarag to met ya walay parte to ed aral, lalo la iray parte ya mangipabantay labat na video ya agla kaukolan ya ipaliwawa. Nepeg ya antikey labat iray komento to antis tan kayari na kada parte. Say ulop na mamatatken so manuro na saray elder ya kualipikado ed sayan betang. Saray kualipikadon elder so mansusublayan ya iyasain bilang chairman. Depende ed situasyon na kongregasyon, say manangasikaso na Aral Parad Ministeryo tan Bilay na Kristiano et nayarin mas mabetbet ya iyasain ya chairman nen saray arum ya kualipikadon elder. No say sakey ya elder et kualipikadon mangikondukta na Panag-aral na Kongregasyon ed Biblia, kualipikado met sirin ya chairman ed aral. Balet seguradoen ya say elder ya akaasain ya chairman et maong ya mankomenda tan sarag toy mangiter na maaron panonot no kaukolan. Responsabilidad met na chairman ya seguroen ya say aral et nasumpal ed dugan oras. (Nengnengen so  parapo 17 tan  19.) No labay na chairman tan no walay pangiliraan, nayari mangiyan na microphone stand ed stage pian nipakabat toy kada parte legan ya ompuepuesto ed podyum so brother ya akanbetang. Legan na parte ya panagbasa na Biblia tan legan na seksion ya Magmaliw ya Epektibo ed Ministeryo, nayari met ya akayurong so chairman diad stage tan walay lamisaan to. Makatipid iya na oras.

25. No posible, maabig no say pilien et elder ya eksperiensyadon manpaliwawa. Responsabilidad na katulongan a managkonseho so mangiter na pribadon konseho, no nakaukolan, ed saray elder tan ministeryal a lingkor ya inikdan na betang, a singa saray parte ed Aral Parad Ministeryo tan Bilay na Kristiano, publikon paliwawa, tan pangikondukta odino pambasa ed Panag-aral na Panag-bantayan odino Panag-aral na Kongregasyon ed Biblia. (Nengnengen so  parapo 19.) No dakel iray elder ed kongregasyon ya maong a manpaliwawa tan manbangat, nayarin mangiyasain na nanduruman kualipikadon elder kada taon bilang katulongan ya managkonseho. Agkaukolan ya kada kayari parte et mangiter na konseho so katulongan ya managkonseho.

26. Depende ed bilang na saray estudyante, nayarin nawalaay kaaruman iran klase so kongregasyon parad saray asainmin na estudyante. Kada kaaruman ya klase et nepeg ya walaan na kualipikadon managkonseho, no nayari et elder. Nayari met ya kualipikadon ministeryal a lingkor so iyasain, no nakaukolan. Say ulop na mamatatken so manpili no siopay iyasain ed saya tan no kasin mansusublayan odino andi so iyasain. Nepeg ya tumboken na managkonseho so instruksion ed  parapo 18. No walay kaaruman ya klase, kerewen ed saray estudyante ya onla rad hall parad kaaruman ya klase kayari na parten Saray Espiritual a Kayamanan. Insan la ra ompawil no asumpal lay sampot ya estudyante.

27. Wala ray espisipikon video ya usaren ed aral ed midweek. Sarayan video et walad JW Library^® app tan na-download ed nanduruman gadyet.

© 2023 Watch Tower Bible and Tract Society of Pennsylvania

S-38-PN 11/23