Inyanak tan binmaleg ak diad arawin parte na Rome, tan dakel dia so mairap bilay. Agkon balot anengneng so nanay ko, tan arawi liknaan kod si tatay ko. Ayaman koy karsada kanian amtak so bilay ditan.

Nen samploy taon ko, naaralan ko lay mantakew. Nen 12 ko la, first time ya tinmaynan ak ed abung. Aminpigan impatawag si tatay ko diad istasyon na pulis tan isesempet to ak. Lanang ak ya mikokolkol ed arum, mipepetang so ulok tan kabusol koy anggan siopa. Nen 14 ko la, linmayas ak lad sikami tan agak la pinmawil. Ginmapo ak lan nan-drugs tan diad karsada ak la manaayam. Anggapoy naugipan ko kanian piliten kon lukasan iray kotse tan diman ak onugip anggad palbangon. Insan mananap ak na water fountain pian makapan-dilamos ak.

Nagmaliw ak ya eksperton mantakew. Mani-snatch ak na bag, lolooban ko ray apartment tan angkakabaleg ya kaabungan. Balitado ed lugar mi ya aliwliway reputasyon ko tan walay sakey ya gang ya impila da ak ed grupo da. Kanian “inmasenso” ak ta bangko lay tatakewan mi. Lapud siga tan agresibo ak, tatakotan ak na saray kaibak ed gang. Agak onaalis ya agko awit so paltog ko, tan no onuugip ak, ikakargak ni ingen ed dalem na danganan ko. Parte la na bilay ko so panggulo, pan-drugs, pantakew, panayew tan imoralidad. Lanang ak ya mamanmanan na saray pulis. Aminpiga ak ya naaresto tan pigay taon ak ya labas-pasok ed prisoan.

Aminsan, nen nibulos ak lad prisoan, pinasyar koy sakey ya auntie’k. Agko amta ya Tasi nen Jehova la manayay auntie’k tan duaran kapinsan ko. Intagar da ak ya onlad aral na saray Tasi. Labay koy man-usyoso kanian akila ak. Kasabi mid Kingdom Hall, say niyurongan ko et diad beneg pian nanengneng ko no siopa ray onloloob tan ompapaway. Siempre, awit koy paltog ko.

Inuman na saman ya aral so bilay ko. Singa ak walad duman planeta. Maimis tan makaaro ray totoo tan ibabano da ak. Agko nalingwanan man ta maomaong ira tan ag-ira mankunkunwari. Arawin dalin ed apasalan ko!

Nampaiyaral ak na Biblia ed saray Tasi. Nen ondadakel lay nanaaralan ko, mas natatalosan ko ya kailangan kon umanen so kabibilay ko. Inunor ko so bilin na Proverbio 13:20: “Samay miuulop ed marunong et magmaliw a marunong, balet samay mililimog ed makulangkulang et aliwliway pansumpalan to.” Naisip ko ya kailangan ko lay onekal ed gang ya aki-membroan ko. Aliwan mainomay, pero diad tulong nen Jehova, asarag ko.

Inayos koy sarilik tan intundak iray bisyok. Mairap, pero intundak lay mansigarilyo tan man-drugs. Nampakatli ak, inekal koy ikaw ko tan agak la manaayew. First time ya akontrol koy sarilik.

Agko hilig so manaral tan manbasa, kanian nanairapan ak ya manpokus tan manaral na Biblia. Pero, nen inanosan ko, kalkalnak ya naaro si Jehova tan naliliknak ya walay manguuman ed loob ko ta onggagana lay konsiensiak. No maminsan, iisipen ko ya grabe iramay ginawak kanian singa agak naperdona nen Jehova. No onman lay naliliknak, babasaen ko may agawad si Arin David ya pinerdona nen Jehova anggano akagaway seryoson kasalanan.—2 Samuel 11:1–12:13.

Say sakey nin nairapan ak ya gawaen et say pampulong ed kaabungan. (Mateo 28:19, 20) Natatakot ak ompan say nakatongtong ko et amay inagrabiadok nensaman! Pero kalkalnan nakal so takot ko. Natan, nae-enjoy ko lay ontulong ed arum ya nakabat so makasi tan mainomay ya mamerdonan Ama tayo.

Nen akabat koy Jehova, aligtas so bilay ko! Dakel so datin barkadak ya inaatey la odino akapriso, balet siak maliket lay bilay ko tan walay pag-asak. Naaralan koy manpaabeba, onunor tan kontroley petang na ulok. Kanian, makaaro ak la tan marakep lay pitotook ed arum. Natan wala lay asawak, si Carmen ya maganggana, tan balibali ulopan mi. Nae-enjoy mi ya ibangat so Biblia ed arum.

Insan wala lay balibalin trabahok. No maminsan diad saray bangko, balet agko la tatakewan, imbes lilinisan ko!