Binmaleg ak ed Warialda ya sakey ya melag a baley diad New South Wales. Wala ray taew dia, saray totoo et manaalaga na karnero tan baka, say arum balet et mandadalus. Malinis so baley mi, tan ngalngali anggapoy krimen ya nagagawa dia.

Samplora kamin sanaagi tan siak so panguloan. Nen 13 so taon ko, mantratrabaho ak la pian makatulong ak ed pamilya mi. Lapud agko asumpal so panaaral ko, nantrabaho ak ed taew. Tan nen 15 so taon ko, nagmaliw ak ya manag-alaga tan trainer na kabayo.

Walay maong tan makapuy ya resulta na pantratrabahok ed farm. Singa bilang, nai-enjoy koy trabahok tan say balibalin kaliberliber. No labi, manparlang ak na bonfire. Onyurong ak insan ak ontangay ed tawen, nanengneng koy maliwliwawan bulan tan amungkog ya bitewen, legan ya onsisiplog so preskon dagem. Diad saman, atalosan ko ya talagan walay amalsa ed amin ya pambiliban ko. Pero nen wala ak ed farm, diman ak met akaaral ya man-ayew tan mansigarilyo, ta maayew tan masigarilyo iramay kaibak. Kanian nagmaliw lan parte na bilay ko iratan.

Nen 18 lay taon ko, nanayam ak ed Sydney. Sinalik diman so mansundalo, pero agda ak inawat ta abeba kunoy aral ko. Balet akalmo ak lanlamang na trabaho tan nanayam ak diman na sakey taon. Legan ya wala ak ed Sydney, first time koy akapitongtong ed Saray Tasi nen Jehova. Inimbitaan da ak ya miaral, tan linma ak. Diad saman, akombinse ak ya talagan ibabangat da so katuaan.

Balet ag-abayag, nandesisyon ak ya ompawil ed farm. Pero nakar koy Goondiwindi, Queensland. Ditan ak akalmoy trabaho, akaasawa, tan akaaral ya oninum.

Awalaan kami na duaran anak. Tan manlapu lad saman, ninonot ko no anto kasi pansumpalan na bilay ko. Anonotan ko iramay nadngel kod aral na Saray Tasi diad Sydney. Kanian nandesisyon ak ya manguman.

Walay nalmok ya daan ya isyu na Say Panag-bantayan. Wadman so address na branch office na saray Tasi nen Jehova diad Australia. Angipawit ak na sulat ed sikara pian manpatulong. Angibaki ra na maomaong tan maar-aron Tasi ya ombisita ed siak. Ag-abayag, inyaralan to ak na Biblia.

Diad panaaral koy Biblia, atalosan ko ya wala ray kaukolan kon umanen ed bilay ko. Sinmabid pusok imay walad 2 Corinto 7:1. Ipapaseseg na satan ya “linisan tayoy sarili tayo ed amin a karutakan na laman.”

Desidido ak lan talaga ya itunday pansisigarilyok tan sobran kakainum koy alak. Diad tua, aliwa pan mainomay ya itunda iratan, ta linmamot lad siak iratan ya kagagawa. Pero labay kon talaga ya napaliket so Dios. Akatulong ya maong ed siak imay walad Roma 12:2. Kuan to: “Agkayo la manpapaimpluensya ed sayan sistema na mundo, noagta manpasimbalo kayo diad panguman yo ed panagnonot yo.” Atalosan ko ya pian nitundak so makapuy ya kagagawak, kaukolan kon umanen so panagnonot ko tan aligen koy panagnonot nen Jehova, ya ipasen ko iratan ya mauges. Diad tulong nen Jehova, asarag kon itunda so pansisigarilyok tan sobran kakainum koy alak.

Balet aminen ko, alay irap kon intunda so panaayew ko. Amtak imay bilin na Biblia ya walad Efeso 4:29 ya “agkomon ompaway ed sangi yo so abulok a salita.” Pero agko nakal ya tampol so marutak ya panagsalitak. Akatulong ed siak so impandalepdep kod Isaias 40:26. Oniay nabasa tayo ditan nipaakar ed saray bitewen ed tawen: “Tangay kayo pad tawen tan nengneng yo. Siopay amalsa ed sarayan bengatla? Samay mangidadaulo ed armada na saray bibitewen unong ed bilang da; tatawagen to ran amin ed kangaranan da. Lapud mabisbiskeg ya enerhiya to tan makapadinayew a pakayari to, anggapo ed saratan so nababalang.” Pandinayewan ko ray nanenengneng kod tawen. Kanian naisip ko, no walay pakayari na Dios ya palsaen irayan amin, di sarasarag to ak met ya tulongan ya makapanguman pian sikatoy napaliket ko. Lapud impapuson pikakasik tan impansagpot ko, kalkalna ya akontrol koy panagsalitak.

Nen mantratrabaho ak nid farm, aramay katrabahok labat so nakakatongtong ko, kanian agak apasal ya mitongtong ed arum. Balet lapud training ya nanaawat ko diad aral na Saray Tasi nen Jehova, naaralan ko no panon so mitongtong ed arum. Nagkalalo la, nausar ko iratan ya naaralan ko diad pangipupulong ko na maong a balita na Panarian na Dios.—Mateo 6:9, 10; 24:14.

Pribilehyo parad siak so panlingkor bilang elder diad kongregasyon ed pigapigaran taon. Lapud satan, napapakiwas ak ya gawaey anggaay nayarian ko ya tulongan iray agagi. Pero amay makapanlingkor ed si Jehova kaibay matoor tan maar-aron asawak tan saray ananak mi, atan so sankaabigan ya bendisyon ed siak.

Misalsalamat ak ed si Jehova ta anggano agak akasumpal ed panaaral ko, sikato so angibangat ed siak. (Isaias 54:13) Talagan apruebaan ko ya tua may walad Proverbio 10:22 ya “say bendisyon nen Jehova so mamapayaman ed sakey.” Tatalaranan ko, tan na pamilyak so panaon ya mas nakabat tan napanlingkoran mi si Jehova diad andi-anggaan.