• INKIYANAK: 1963

• BANSA: BRITAIN

• APALABAS: MAKAKALMO NA BALEG ED TRABAHO TO

ISTORYAY BILAY KO:

Niyanak ak ed Croydon, South London. Siamera kamin sanaagi tan siak so komanem. Saray atateng ko et tagad Saint Vincent, sakey ya isla diad Caribbean. Si nanay ko et sakey ya Methodist. Anggapoy interes kon manaral tungkol ed Dios, pero labalabay koy makaaral ed arum iran bagay. No anggapoy loob mi, mabetbet ya oonla kamid lawa ya asingger ed lugar mi tan manbabasa ak na nanduruman libro ya binayes kod librarya.

Kalabas na pigaran taon kayarik ya nanaral, naisip kon tulongan iramay talagan mankaukolan. Kanian nantrabaho ak ed samay ontutulong ed saray anggapoy napanayaman da tan walaay sakit ed pisikal tan panagnonot. Insan linmoob ak ed university tan angala ak na kurson health sciences. Ka-graduate ko, tinmagey lan tinmagey so posisyon kod trabaho tan nagmaliw ya maluho so panagbilay ko. Sakey ak ya freelance management consultant tan social researcher, tan say kailangan ko labat ed trabahok et say laptop ko tan Internet. Oonla ak ed nanduruman bansa na pigaran simba. Tan legan ya wala ak ed paboritok ya hotel, panliliketan koy balibalin kaliberliber, manpapa-spa ak, tan manwo-work out ak ed gym pian maong so laman ko. Maong so bilay ko, balet nakakasian ko nin siansia iramay mairap so bilay da.

NO PANON YA INUMAN NA BIBLIA SO BILAY KO:

Abayag ko lan itetepet, ‘Akin et wadia tayo, tan parad iner so bilay tayo?’ Pero agkon balot sinalin anapen so ebat diad Biblia. Sakey ya agew nen 1999, binisita ak nen agik ya si Margaret ya sakey lan Tasi nen Jehova. Diad saman ya imbisita to et walay kaiba ton Tasi ya kaaro to, ya angipanengneng na personal ya interes ed siak. Mankelaw ak ed sarilik nen pinmayag ak ya manpaiyaral na Biblia ed samay kaaro na agik. Pero matantan so iyaaligwas ko ta busy ak ya maong ed trabahok tan ed klase na kabibilay ko.

Nen summer na 2002, inmalis ak ed southwest na England. Ditan et nanaral ak lamet na social research pian makala ak na doctorate degree. Insan mas regular ak lan onaatendi ed Kingdom Hall kaiba so ugaw nin ana’kon laki. Anggano atagey so aaralen ko, diad tua et mas natatalosan koy ibabaga na Biblia no akin et wala ray problema na totoo tan no anto ray solusyon ed saratan. Anengneng ko met ya tua may walad Mateo 6:24 ya agtayo nayarian so manpaaripen ed duaran katawan. Atalosan kon kailangan koy mandesisyon no antoy dapat kon iyuna ed bilay ko, no kasin say Dios o say kayamanan?

Diad imbeneg ya taon, mabetbet ya mimila ak ed grupo na saray Tasi ya manaaral na Biblia diad sakey ya abung. Uusaren da may libron Is There a Creator Who Cares About You? * Diad saman et akombinse ak ya si Jehova labat, say Amalsa ed sikatayo, so makasolusyon ed problema na amin ya totoo. Pero ibabangat dad sikami diad university ya agmo kailangan so manisia ed Dios pian magmaliw ya makabaliksan so bilay mo. Agko agustoan iman. Kanian kayari duay bulan, agak la linmoob ed university tan nandesisyon ak ya manpokus ed relasyon kod Dios.

Akatulong ed siak imay walad Proverbio 3:5, 6 pian nauman ko so klase na panagbilay ko. Say kuanto, “Manmatalek ka ed si Jehova diad interon pusom, tan agka mandedepende ed dilin pakatalos mo. Diad amin a dalan mo et sikatoy nonoten mo, tan gawaen ton maptek iray basbas mo.” Mas makagunggona iray naaralan ko tungkol ed maaron Dios tayo, nen say kayamanan odino estado ed panagbilay ya nayarin iter na doctorate degree. Nen naamtaan koy labay na Dios ya nagawa diad dalin tan say impansakripisyo nen Jesus ed bilay to parad sikatayo, mas binmiskeg so panlabay kon idedika so bilay ko ed Amalsa ed sikatayo. Kanian nen Abril 2003, abautismoan ak. Insan kalkalnak lan pinasimpli so bilay ko.

MARAKEP IRAN RESULTA:

Agkon balot isalat so pikakaarok ed si Jehova ed anggan anto. Maliket ak tan mareen so nonot ko manlapu la nen akabat ko. Mas maliket ak met natan ta nakakaibak iramay tuan mandadayew ed Dios.

Tuloytuloy ya nanaaruman so amtak diad pipiaral ko tan panaaral koy Biblia. Labalabay ko met ya ibagad arum so papanisiaan ko. Aya la so propesyon ko. Natutulongan ko ray totoon magmaliw ya maliket natan, tan nawalaan na balibalin pag-asa ya manbilay diad balon mundo diad arapen. Manlapu la nen Hunyo 2008, manlilingkor ak ya full-time diad ministeryo, tan mas maliket tan mas kontento ak la natan. Amtak met la no parad iner so bilay ko, tan misalsalamat ak ya maong ed si Jehova lapud satan.