Kingdom News No. 37

Mensahe a Parad Interon Mundo

Magano lay Panampot Na Palson Relihyon!

▪ Anto so palson relihyon?

▪ Panon itan a manampot?

▪ Panon kan naapektoan?

 Anto so Palson Relihyon?

Kasin nagogonigon ka ed saray nagagawan krimen nisesengeg ed relihyon? Kasin nadidismaya ka ed saray guerra, terorismo, tan inkakurakot na saramay mankuan a manseserbi ed Dios, lapud amtam a mauges iratan? Akin ya ompatnag a relihyon so sengegan na dakel iran problema? Say natetel et aliwan say amin a relihyon, noagta say palson relihyon. Si Jesu-Kristo, a dederlengen ed inkalapagan bilang relihyoson persona, so angipaamta a say palson relihyon so mamapawala odino manbubunga na makapuy iran gawa, no panon a say “aderal a kiew [et] mangiter na aliwan maong a bunga.” (Mateo 7:15-17) Anto so bunga na palson relihyon?

Say Palson Relihyon so . . .

■ MIBABALI ED GUERRA TAN POLITIKA: “Diad Asia tan arum niran pasen,” kuan na dyurnal ya Asiaweek, “mapalikdon kokontrolen na saray maagum ed pakayari a lider so relihyoso iran opinyon na totoo parad dili ran pankaukolan.” Bilang resulta, oniay impasakbay na dyurnal: “Ngalngali la naambagel so mundo.” Oniay indeklara na sakey a prominente a relihyoson lider diad Estados Unidos: “Kaukolan mon pateyen iray terorista pian napatunda so pateyan.” Antoy inrekomenda ton solusyon? “Patey yo ran amin diad ngaran na Katawan.” Balet midumaan so inkuan na Biblia: “No wala so mankuan, Aroen ko so Dios, tan busolen to so agi to, sikato so matila.” (1 Juan 4:20) Inkuan ni ingen nen Jesus: “Aroen yo ray kabusol yo.” (Mateo 5:44) Kaunongan karakel a relihyon so nabitlam a saray membro ra et mibibiang ed guerra?

■ MANGIKAKAYAT NA PALSON DOKTRINA: Ibabangat na maslak a relihyon a say kamarerwa odino espiritu et agnanengneng a kabiangan na too a mansiansian mabilay sano ompatey so pisikal a laman. Lapud sayan bangat, dakel ed sarayan relihyon so mangaanamot ed saray membro ra, a pankuakuartaan day pangidasal ed saray sinmian a kakamarerwa. Balet, duma so doktrina ya ibabangat na Biblia. “Say kamarerwa a mankasalanan ompatey.” (Ezequiel 18:4) “Saray mabilay amta ra a sikara so ompatey ira: balet saray inatey agda amta so bengatla.” (Eclesiastes 9:5) Imbangat nen Jesus a saray inatey so napaoli—et no walay imortal a kamarerwa na totoo, agla iya nakaukolan. (Juan 11:11-25) Kasin ibabangat na relihyon mo ya ag-ompatey so kamarerwa?

■ MANGOKONSENTE ED IMORAL A SEKSO: Diad Mamasagur iran bansa, aabuloyan na saray relihyoson grupo iray membro ran bakla tan tomboy a magmaliw a pari tan papasesegen da ray gobierno ya awatey pankasal na parehon laki odino parehon bii. Anggan saray simbaan a mangokondena ed imoralidad so angonsente ed relihyoso iran lider a seksual ya angabuso ed ugugaw. Anto, balet, so ibabangat na Biblia? Malinlinew ya inkuan na satan: “Agki patitilaan: anggan saray managlawan, anggan saray manangigalang ed talintao, anggan saray managsinger ed agda asawa, anggan saray binabai, anggan saray milawanan ed kapara ra a laki, . . . agda natawir so panariay Dios.” (1 Corinto 6:9, 10) Kasin walaray amtam a relihyon a mangokonsente ed imoral a sekso?

 Antoy nagawa ed arapen ed saray relihyon a manbubunga na abulok? Oniay impasakbay nen Jesus: “Balang kiew ya agmanbunga na maong a bunga sikato so nabatang tan ibuntok ed apoy.” (Mateo 7:19) On, say palson relihyon so nabatang a singa kiew tan naderal! Balet panon tan kapigan iya nagawa? Iter na mapropetikon pasingawey ya akarekord ed libro na Biblia ya Apocalipsis, kapitulo 17 tan 18, so ebat.

Panon a Manampot so Palson Relihyon?

Ilitrato pa’d nonot iyan eksena. Sakey a balangkantis odino paabang a bii so akakabayo ed makapataktakot ya ayep. Samay ayep et pitoray ulo to tan samploray saklor to. (Apocalipsis 17:1-4) Siopa kasi so irerepresenta na paabang a bii? Sikato so maimpluensya “ed saray arari ed dalin.” Kolor purpura odino ube so kawes to, manguusar na insenso, tan pirmi inkayaman to. Niarum ni, lapud espiritistikon kagagawa to, “amin a nasyones [et] apalingo.” (Apocalipsis 17:18; 18:12, 13, 23) Tutulongan itayo na Biblia a natalosan a sayan paabang a bii et say sankamundoan a relihyoson organisasyon. Aliwan saksakey a relihyon so irerepresenta to, noag say amin a relihyon a manbubunga na abulok.

Say ayep ya akakabayoan na sayan paabang a bii so mangililitrato ed saray mapolitikan pakayari na mundo. * (Apocalipsis 17:10-13) Say palson relihyon so akakabayo ed sayan mapolitikal ya ayep, a getma ton impluensyaan iray desisyon na satan tan kontrolen so panangidirehi na satan.

Balet, agmanbayag et nagawa so pankelkelawan ya ebento. “Saray samploran saklor ya anengneng mo, tan say ayep, busolen da so balangkantis [odino paabang a bii], tan sikato so gawaen da a maermen tan labos-lakseb, tan kanen da so laman to, tan sikato so lablabasen dan poolan ed apoy.” (Apocalipsis 17:16) Bigla tan makapakigtot ya atakien na saray mapolitikal a pakayari na mundo so palson relihyon tan sikatoy sigpot dan deralen! Antoy managdag ed saya? Oniay ebat na libro na Biblia ya Apocalipsis: “Say Dios inyan to ed saray kapusoan da so panggawa ed kinaliktan to.” (Apocalipsis 17:17) On, mikuentaan ed Dios so palson relihyon lapud amin a makapadimlan ginawa na satan diad ngaran to. Diad panamegley na nagnap ya inkahustisya, usaren to so mapolitikal iran kaalyansa na satan bilang instrumento ed paneral to.

Antoy kaukolan mon gawaen pian agka nalanor ed pansumpalan na palson relihyon? “Ompaway kayo ed sikato, baley ko,” so ipapaseseg na mensahero na Dios. (Apocalipsis 18:4) On, natan la so panaon a taynan so palson relihyon! Balet, iner so batikan mo? Aliwan diad ateismo, lapud anggapo met so ilalo na satan. (2 Tesalonica 1:6-9) Say alenleneg a napansalimbengan et diad loob na tuan relihyon. Panon mon nibiig so tuan relihyon?

 No Panon a Nibiig so Tuan Relihyon

Anton maong a bunga so nepeg a pawalaen na tuan relihyon?—Mateo 7:17.

Say Tuan Relihyon so . . .

■ MANGIPAPANENGNENG NA ARO: Saray tuan managdayew so ‘agtaga mundo,’ agnaapag-apag na rasa odino kultura, tan mangipapanengneng na ‘aro ed sakey tan sakey.’ (Juan 13:35; 17:16; Gawa 10:34, 35) Imbes a manpapateyan, akaparaan iran ompatey parad sakey tan sakey, no nakaukolan.—1 Juan 3:16.

■ MANMAMATALEK ED SALITA NA DIOS: Imbes ya ibangat to so ‘niyugali’ odino tradisyon tan “bilibilin na saray totoo,” ibabase na tuan relihyon so doktrina to ed Salita na Dios, say Biblia. (Mateo 15:6-9) Akin? Lapud “amin a sulat ya impuyan na Dios sikato met so maabig a pakaaralan, pakasumalan, pakasimbawaan.”—2 Timoteo 3:16.

■ MAMAPABISKEG ED SARAY PAMILYA TAN MANGIPAPASESEG ED ATAGEY IRAN ESTANDARTE ED MORAL: Say tuan relihyon so mangipapasal ed saray kaasawaan a lalaki a ‘mangaro ed kaasawaan dan bibii,’ ontutulong ed kaasawaan a bibii a napaaralem so ‘takot [odino respeto] ed asawa ra,’ tan mangibabangat ed ananak a magmaliw a ‘matulok ed kaatengan da.’ (Efeso 5:28, 33; 6:1) Niarum ni, saramay angipudiran na responsablin posisyon so nepeg a walaan na napanuliranan a moral.—1 Timoteo 3:1-10.

Wala kasi relihyon a makakagawa ed sarayan estandarte? Say libron Holocaust Politics, ya impalapag nen 2001, so angikuan: “No dakel a totoo so nanggawa ed ipupulong tan gagawaen na saray Tasi nen Jehova, apaliisan komon so Holocaust tan agla pairapen na palanit a panamatey so mundo.”

On, diad 235 iran bansa, aglambengat ipupulong na saray Tasi nen Jehova so moral iran estandarte na Biblia—iyaaplika da itan ed bilay da. Papasesegen mi kan patulongan ed saray Tasi nen Jehova ya amtaen no anto so kakaukolanen na Dios ed sika pian sikatoy nadayew mo diad paraan ya aabobonan to. Natan la so panaon pian onkiwas. Agmo ipalpaleen. Magano lay panampot na palson relihyon!—Sofonias 2:2, 3.

No labay mo so kaaruman ya impormasyon nipaakar ed base’d Biblia a mensahe ya ipupulong na saray Tasi nen Jehova, kontak mo labat ira ed address a walad leksab.

□ Onkerew ak pa na kopya na anggapoy bayar a brosyur a Mantultuloy a Manbantay!

□ Ipangasin laen yo ak parad libren panagaral na Biblia diad abung.

Isulat no dinan a lenguahe.

[Paimano ed leksab]

[Blurb ed pahina 3]

Say palson relihyon so maimpluensya “ed saray arari ed dalin”

[Blurb ed pahina 3]

“Ompaway kayo ed sikato, baley ko”