1-3. (a) Anton ambelbelat ya awit so sinakbat nen salmistan David, tan antoy akaligliwa ed nagogonigon a puso to? (b) No mankasalanan itayo, antoy nalikna tayo, balet antoy ipapaseguro nen Jehova ed sikatayo?

 “SARAY lingok et onsasakbong ed ulok,” so insulat na salmistan si David. “Singa iratan ambelbelat ya awit ya agko sarag a sakbaten. Nakal so pakaliknak tan adanel ak a maong.” (Salmo 38:4, 8) Amta nen David ya ambelbelat ed liknaan so nakonsiensia. Balet walay akaligliwa ed nagogonigon ya puso to. Atalosan to ya anggan kabusol nen Jehova so kasalanan, agto busolen so nankasalanan no sikatoy talagan magbabawi tan agto la uliten so kasalanan to. Lapud segurado si David ya kasian nen Jehova iray magbabawi, oniay inkuan to: “O Jehova, . . . akaparaan kan mamerdona.”—Salmo 86:5.

² No mankasalanan itayo, nayarin nabelatan so liknaan tayo lapud pakakakonsiensia. Balet makagunggona itan ya liknaan ta napakiwas itayon gawaey anggaay nayarian tayon ipetek iray lingo tayo. Balet mapeligro met no alablabas so pakakonsiensia tayo. Nayarin isipen tayo ya agto tayo lan balot naperdona nen Jehova anggan magbabawi tayo. No ‘nadaeg itayo na alablabas ya ermen’ lapud kasalanan tayo, nayarin atan so usaren nen Satanas pian onsuko tayo tan liknaen tayon anggapoy kana tayod si Jehova tan agtayo manepeg a manlingkor ed sikato.​—2 Corinto 2:5-11.

³ Kasin ontan so pangipapasen nen Jehova ed sikatayo? Andin balot! Say panamerdona et sakey ya paraan  pian ipanengneng nen Jehova so abalbaleg ya panangaro to. Ipapaseguro na Salita to ya no tuan magbabawi tayo, sikatoy mabulos ya mamerdona. (Proverbio 28:13) Pian naseguro tayon perdonaen itayo nen Jehova, usisaen tayo no akin tan panon a sikatoy mameperdona.

4. Antoy amta nen Jehova nipaakar ed inkapalsa tayo, tan antoy epekto na satan ed paraan na pantratrato to ed sikatayo?

⁴ Amta nen Jehova iray limitasyon tayo. Ibabaga na Salmo 103:14: “Amta to so inkagawa tayo, a sankanonot ton dabok itayo.” Agto lilingwanan ya gawa itayod dabok, ya walay tendensia tayon manggawa na aliwa ta agtayo ayadyari. Say balikas ya amta toy “inkagawa tayo” et mangipanonot ed sikatayo ya inkompara na Biblia si Jehova ed sakey a managdamili tan sikatayo so pitek a popormaen to. (Jeremias 18:2-6) Iyaadapta na Sankamaongan a Managdamili so paraan na panagtrato tod sikatayo ta amta to ya makapuy tayo tan agtayo ayadyari. Tan amta to met ya nayarin onunor tayo odino andi ed saray panangigiya to.

5. Panon a dedeskribien na libro na Roma so kabiskeg na kasalanan?

⁵ Amta nen Jehova no panon kabiskeg so kasalanan. Dedeskribien na Salita to so kasalanan bilang mabiskeg a puersa ya mangokontrol ed amin ya totoo tan manresulta ed patey. Panon kabiskeg so kasalanan? Diad libro na Roma, oniay impaliwawa nen apostol Pablo: Sikatayo so “walad pakauley na kasalanan,” a singa saray sundalo a walad pakauley na komander da (Roma 3:9); say kasalanan so “nan-ari” ed amin a totoo a singa ari (Roma 5:21); satan so “manaayam” ed sikatayo (Roma 7:17, 20);  wala tayod silong na “ganggan” to, a singa to kokontrolen so amin ya gagawaen tayo. (Roma 7:23, 25) Talagan mabisbiskeg so kasalanan ed ag-ayadyarin too!—Roma 7:21, 24.

6, 7. (a) Antoy pangipapasen nen Jehova ed saramay manaanap na panangasi to tan tuan magbabawi? (b) Akin ya agtayo nepeg ya abusoen so panangasi na Dios?

⁶ Kanian amta nen Jehova ya imposible ya naunor tayon amin iray ganggan to, anggan panon lay panlabay tayon gawaen itan. Maaro ton ipapaseguro ed sikatayo ya no kerewen tayoy panangasi to tan tuan magbabawi tayo, perdonaen to tayo. Ibabaga na Salmo 51:17: “Say bagat a makapaliket ed Dios et say nagogonigon ya espiritu; agmo ipulisay, O Dios.” Agbalot ipulisay odino ibeneg nen Jehova so puso ya “asugatan tan maer-ermen” lapud belat na pakakakonsiensia.

⁷ Balet, kasin kabaliksan na saya ya abusoen tayo lay panangasi na Dios, ya ibaraan tayon agtayo ayadyari kanian mankakasalanan tayo? Siempre andi! Agkonsintien nen Jehova so kasalanan. Walay limitasyon na panangasi to. Agto perdonaen iramay gagagalaen day mankasalanan tan agmagbabawi. (Hebreo 10:26) Balet, no nanengneng to ya tuan magbabawi so sakey, sikatoy mabulos ton perdonaen. Imanoen tayo natan so pigaran ilustrasyon ya inusar ed Biblia pian deskribien iyan balibalin paraan nen Jehova pian ipanengneng so panangaro to.

8. Anto so gagawaen nen Jehova sano peperdonaen to iray kasalanan tayo, tan antoy ipapaseguro na satan ed sikatayo?

⁸ Oniay inkuan nen David kayari ton nagbabawi: “Diad kaunoran et impatuak ed sika so kasalanan ko. Agko sinakbongan so lingok. . . . Tan pinerdonam iray kasalanan  ko.” (Salmo 32:5) Say terminon “pinerdonam” so mangipapatalos ed Hebreon salita a manunan mankabaliksan ya “alsaen” odino “awiten.” Say usar to dia et mankabaliksan na pangekal ed “pakakakonsiensia, kasalanan, impakasumlang.” Kanian singa inekal nen Jehova iray kasalanan nen David tan inawit tod arawi. Seguradon linmemew so belat ya sasakbaten nen David. (Salmo 32:3) Makaseguro tayo met sirin ya awiten na Dios ed arawi iray kasalanan tayo no kerewen tayoy panamerdona to base ed pananisia tayo ed dondon bagat nen Jesus.—Mateo 20:28.

9. Panon kaarawi so pangiinan nen Jehova ed saray kasalanan tayo?

⁹ Inusar nen David so malinew a balikas pian deskribien so panamerdona nen Jehova: “No panoy kaarawi na bubutayan na agew manlapud seselekan to, ontan so impangiyarawi to ed sikatayo na saray kasalanan tayo.” (Salmo 103:12) Panon kaarawi so bukig manlapud sagur? Agtayo naisip so kaarawi na bukig manlapud sagur; ag-irayan balot makapanabetan. Ipapaimano na sakey ya iskolar a sayan balikas et mankabaliksan na “amay posiblin sankaarawian; say sankaarawian lan naisip tayo.” Saray apuyanan a salita nen David so mangibabaga ed sikatayo a sano mamerdona si Jehova, iiyan to ray kasalanan tayo ed sankaarawian lan naisip tayo.

10. Sano perdonaen nen Jehova iray kasalanan tayo, akin ya agtayo nepeg a liknaen ya awi-awit tayo ni so mantsa na saratan a kasalanan legay bilay tayo?

¹⁰ Kasin asalim lay angekal na mantsa ed amputin kawes? Anggan panon lay impansagpot mo, siansia nin napatnagan so mantsa. Imanoen pa no panon ya deneskribe nen Jehova so pakayari ton mamerdona: “Anggano saray kasalanan yo et ambalbalanga, napaputi iratan a  singa niebe; anggano singa iratan ambalbalangan abel, magmaliw iratan a singa bagoy karnero.” (Isaias 1:18) Agtayon balot naekal so mantsa na kasalanan ed dilin sagpot tayo. Balet nayarian nen Jehova ya paputien iray singa ambalbalangan kasalanan a pagmaliwen ton singa niebe odino amputin abel. Sano perdonaen nen Jehova iray kasalanan tayo, agtayo nepeg a liknaen ya awi-awit tayo ni so mantsa na saratan a kasalanan legay bilay tayo.

11. Diad anton pantalos ya ibabantak nen Jehova iray kasalanan tayo ed benegan to?

¹¹ Diad sakey a balibalin kansion na pisasalamat a kinompos nen Hezekias kayarin sikatoy inmabig ed makapatey ya sakit, inkuan to ed si Jehova: “Imbantak mod benegan mo so amin a kasalanan ko.” (Isaias 38:17) Deneskribe dia si Jehova bilang mangeekal ed saray kasalanan na magbabawin akagaway mauges tan ibabantak to iratan ed benegan To, ya agto la iratan lilingawen odino iimanoen. Unong ed sakey a reperensya, say ideyan nipasabi so nayarin nibalikas ya: “Pinagmaliw mon singa ag-agawa [iray kasalanan ko].” Agta makapaligliwa itan?

12. Panon ya impabitar nen propeta Miqueas a sano mamerdona si Jehova, permanente To lan ekalen iray kasalanan tayo?

¹² Diad sakey a sipan a panangipawil, imbalikas nen propeta Miqueas so kombiksion to a si Jehova so mamerdona ed magbabawin totoo to: “Siopay Dios a singa sika, a mameperdonay kasalanan tan lingo na saray akera ed tawir to? . . . Ibantak mod kaaralman na dayat so amin a kasalanan da.” (Miqueas 7:18, 19) Isipen pa no anto so kabaliksan na saratan a salita ed saramay nambilay ed panaon na Biblia. Nipawil ni kasi so bengatlan nibantak ed “kaaralman na dayat”? Ipapatnag na saray salita nen Miqueas a sano mamerdona si Jehova, permanente to lan ekalen iray kasalanan tayo.

13. Anto so kabaliksan na saray salita nen Jesus a “perdonam iray utang mi”?

 ¹³ Pian iyilustra so panamerdona nen Jehova, inusar nen Jesus bilang alimbawa so managpautang tan akautang. Papasesegen itayo nen Jesus a manpikasi: “Perdonam iray utang mi.” (Mateo 6:12) Inyaliling sirin nen Jesus iray kasalanan ed saray utang. (Lucas 11:4) Sano mankasalanan itayo, singa tayo “akautang” ed si Jehova. Nipaakar ed kabaliksan na Griegon verb a nipatalos a “perdonam,” sakey a reperensya so mangibabagan: “Palampasen o paulyan la so utang, agla itan sisingilen.” Diad sakey a pantalos, sano mamerdona si Jehova, kanselaen to so utang a singilen to komon ed sikatayo. Makaligliwa iya ed saray magbabawin nankasalanan. Agbalot ipipilit nen Jehova a pabayaran so utang a kinansela to la!​—Salmo 32:1, 2.

14. Panon a say balikas a “nabural iray kasalanan yo” so ontulong ed sikatayon natalosan so panamerdona nen Jehova?

 ¹⁴ Say panamerdona nen Jehova et adeskribe met diad Gawa 3:19, paimanod leksab: “Magbabawi kayo sirin, tan manguman kayo pian nabural iray kasalanan yo.” Say balikas a “nabural” so mangipapatalos ed Griegon verb a mankabaliksan ya “punasen, . . . kanselaen o deralen.” Unong ed pigaran iskolar, say alimbawan inusar dia et ontutukoy ed pambural ed sulat na lima. Panon a posible iya? Say tinta a kaslakan ya uusaren nensaman et gawa ed impanlalaok a karbon, yaket, tan danum. Kayari na pansulat panamegley na satan a tinta, say sakey et nayarin mangusar na ambasan espongha pian buralen so insulat. Nanengneng ed satan so marakdakep ya ilustrasyon ed panangasi nen Jehova. Sano sikatoy mamerdona ed saray kasalanan tayo, singano sikatoy mangaala na espongha tan punasen iratan.

15. Anto so labay nen Jehova ya naamtaan tayo nipaakar ed sikato?

¹⁵ Sano dalepdepen tayo irayan nanduruman ilustrasyon, agta malinew a labay nen Jehova ya ipaamta ed sikatayo ya sikatoy talagan akaparaan a mamerdona ed saray kasalanan tayo basta tuan magbabawi tayo? Agtayo nepeg ya ontakot ya ompan dusaen to tayo lapud saray kasalanan tayo. Nanengneng tayo itan ed sananey nin ibabaga na Biblia nipaakar ed sankabalgan ya panangasi nen Jehova: No sikatoy mamerdona, lingwanan to la iratan.

16, 17. No ibabaga na Biblia ya lilingwanan nen Jehova iray kasalanan tayo, anto so kabaliksan na satan, tan akin ya ontan so ebat mo?

¹⁶ Oniay insipan nen Jehova nipaakar ed saramay kabiangan ed balon sipanan: “Perdonaen koy lingo ra, tan lingwanan ko lay kasalanan da.” (Jeremias 31:34) Kasin  kabaliksan na saya a sano mamerdona si Jehova et agto la nayarian a nonoten iray kasalanan? Aliwan ontan so labay ton ibaga. Nabasa tayod Biblia so nipaakar ed saray kasalanan na dakel ya indibidual a pinerdona nen Jehova, kaiba lay David. (2 Samuel 11:1-17; 12:13) Mapatnag ya amta nin siansia nen Jehova iray kasalanan da. Impaisulat to iraya ed Biblia pian nabasa tayo iray ginawa dan kasalanan, no panon iran nagbabawi, tan no panon iran pinerdona na Dios pian nagunggonaan itayo. (Roma 15:4) Anto sirin so labay ya ibaga na Biblia sanen imbaga ton “lingwanan” la nen Jehova iray kasalanan na saramay pinerdona to?

¹⁷ Base ed sakey ya diksionaryo na Biblia, say salitan Hebreo ya nipatalos ya ‘lingwanan ko la’ et mankabaliksan na mas ni nen say basta agla pannonot ed apalabas. Kaibad satan so ‘agla panggawa na kaaruman ya aksion.’ Sirin no imbagan lingwanan la o agla nonoten so kasalanan, anggapo lay gawaen pian dusaen so nankasalanan. (Oseas 9:9) Kanian nen imbaga na Dios ya “lingwanan ko lay kasalanan da,” ipapaseguro to ya no pinerdona to la ray magbabawin nankasalanan, agla manggawa na aksion sumpad sikara. (Ezequiel 18:21, 22) Si Jehova et agto la pawil-pawilen ya nonoten iray kasalanan tayo pian akusaan odino dusaen itayo ya paulit-ulit. Talagan makaligliwan naamtaan ya no mamerdona so Dios et lilingwanan to met la iratan!

18. Akin a say panamerdona et agmankabaliksan a say magbabawin nankasalanan et nipuera la manlapud amin ya epekto na lingon ginawa to?

¹⁸ Labay to kasin ibaga ya lapud akaparaan ya mamerdona si Jehova et nipuera la so nankasalan ed amin ya  epekto na ginawa ton lingo? Andi. Anien tayon anien so resulta na ginawa tayon kasalanan. Insulat nen Pablo: “Antokaman so itatanem na sakey a too, saya met so anien to.” (Galacia 6:7) Nayarin nipaarap itayo ed nanduruman problema lapud saray ginawa tayon kasalanan. Pero agto labay ya ibaga ya kayari itayon perdonaen nen Jehova et sikatoy manggawa na panirapan tayo. No onlesa iray problema, agnepeg ya isipen na sakey a Kristiano ya, ‘Seguro dudusaen ak nen Jehova lapud saray apalabas a kasalanan ko.’ (Santiago 1:13) Balet kaukolan tayo met ya nonoten ya ag-itayo ipapaliis nen Jehova manlapud amin ya epekto na saray lingo tayo. Say  diborsyo, ag-iilaloan ya panlukon, makaalis a sakit ed sekso, pakaandi na talek odino respeto​—amin iraya et nayarin makapaermen tan agnapaliisan a resulta na kasalanan. Tandaan ya anggan pinerdona la nen Jehova si David lapud impankasalanan da nen Bat-sheba tan impamatey tod si Urias, agprinotektaan nen Jehova si David manlapud aliwliwa iran resulta na satan.​—2 Samuel 12:9-12.

19-21. (a) Panon ya agunggonaan so biktima tan say nankasalanan ed ganggan a walad Levitico 6:1-7? (b) No asakitan so arum lapud saray kasalanan tayo, antoy gawaen tayo pian naliketan si Jehova?

¹⁹ Saray kasalanan tayo et nayarin walaan na kaaruman iran epekto, lalo la no asakitan so arum lapud saray lingo tayo. Alimbawa, konsideraen so salaysay diad Levitico kapitulo 6. Imbaga dia na Mosaikon Ganggan so nipaakar ed toon akagawa na seryoson kasalanan diad impangala to ed saray kayarian na kapara ton Israelita panamegley na impantakew, impankatkat, odino impansaol. Insan intila na nankasalanan ya agto ginawa itan, tan nansamba ni ingen. Anggapoy mantestigo kanian agnadusa imay nankasalanan. Anggaman ontan, no bilang ta nakonsiensia imay nankasalanan tan ipatua toy ginawa to pian nagamoran toy panamerdona na Dios, kaukolan a sikatoy manggawa na taloran bengatla: ipawil to so inala to, bayaran so biktima to na anggad 20 porsiento na kantidad na tinakew to, tan mangitarya na kalakian a karnero bilang bagat ed impankasalanan to. Insan, ibabaga na ganggan: “Manggawa na pananakbong so saserdote parad sikato diad arapan nen Jehova, tan sikatoy naperdona.”—Levitico 6:1-7.

²⁰ Sayan ganggan et mapangasin probisyon manlapud  Dios. Agunggonaan so biktima ta say kayarian to et nipawil tan seguradon nainawaan nen binidbir a siansia na nankasalanan so lingo to. Ontan met, agunggonaan met ed ganggan imay nankasalanan ta nagbabawi tan nipetek toy lingo to. On, ta no agto gawaen itan, sikatoy agperdonaen na Dios.

²¹ Anggaman agtayo la sakop na Mosaikon Ganggan, satan a Ganggan so mangiiter ed sikatayo na aralem a pakatalos ed kanonotan nen Jehova, pati ed panmoria to nipaakar ed panamerdona. (Colosas 2:13, 14) No asakitan so arum lapud saray kasalanan tayo, naliketan so Dios no gawaen tayo so anggaan na nayarian tayo pian ipetek so lingo tayo. (Mateo 5:23, 24) Nayarin kaibad saya so pamidbir ed kasalanan tayo tan ikerew na perdona ed biktima. Diad ontan et makaasingger tayo ed si Jehova base ed dondon bagat nen Jesus tan naeksperiensya so panamaseguro a sikatayo la et pinerdona na Dios.—Hebreo 10:21, 22.

22. Anto so nayarin kaibad panamerdona nen Jehova?

²² Singa ed sakey ya maaron ateng, no perdonaen itayo nen Jehova, nayarin walay kaiba ton disiplina. (Proverbio 3:11, 12) Say magbabawin Kristiano so nayarin kaukolan ya ikbanan toy pribilehyo ton manlingkor bilang matatken, ministeryal a lingkor, odino sigpot-panaon ya ebanghelisador. Nayarin naermenan a maong no naandi so papablien ton pribilehyo diad loob na pigaran taon. Balet agto labay ya ibaga ya no dinisiplina ka nen Jehova et agto ka la perdonaen. Nepeg tayon tandaan a say disiplina ya manlalapud si Jehova et paneknek na panangaro to ed sikatayo. Say pangawat tan pangiyaplika ed satan et parad pankaabigan tayo.—Hebreo 12:5-11.

23. Akin ya agtayon balot iisipen ya ag-itayo la kasian nen Jehova, tan akin a nepeg tayon aligen so panamerdona to?

 ²³ Agaylan makaparepresko ya naamtaan a say Dios et ‘akaparaan a mamerdona’! Anggaman ed saray lingon agawaan tayo, agtayon balot iisipen ya ag-itayo la kasian nen Jehova. No talagan magbabawi itayo, manggawa tayoy paraan pian ipetek iray lingo tayo, tan masimoon a manpikasi parad panamerdona base ed nipaagus a dala nen Jesus, nawalaan itayo na sigpot a kompiyansa a perdonaen itayo nen Jehova. (1 Juan 1:9) Aligen tayo sirin si Jehova tan perdonaen tayo so arum. No si Jehova ya agmankakasalanan et maaro to tayon peperdonaen, agta nepeg labat a sikatayo ran makasalanan a totoo et gawaen tayoy anggaay nayarian tayo pian perdonaen so sakey tan sakey?