1, 2. Panon kalaknab so kamaongan na Dios, tan antoy ibabaga na Biblia nipaakar ed satan a kualidad?

 LEGAN ya onsisinag ni so liwawa ed onseselek lan agew, wala ray pigaran abayag lan sankakaaro ya maliket ya mandurungo diad paway na abung. Maneelekan tan mantotongtong ira, legan dan pandinayewan so nanenengneng da. Diad arawi, makakaimis ya babantagen na sakey a dumaralos so daralusan to. Maliket ta say andeket a makapal ya lurem et nagmaliw lan uran tan sasalogen toy namamagaan lan tanem to. Diad sananey nin lugar, manliket so sanasawa ta anengneng day anak da ya onggagapo lan manakar.

² Balanglan amta da odino andi, saratan a totoo et nagugunggonaan ed kamaongan nen Jehova a Dios. Saray relihyoson totoo et mabetbet a mangibabaga ed balikas ya “maong so Dios.” Balet mas madanet so pangibabaga na Biblia ed saya, a kuan to: “Agaylay kabaleg na kamaongan to!” (Zacarias 9:17) Balet pigpigara labat natan so talagan makatalos ed no antoy labay ya ibaga na satan. Anto so talagan tutukoyen na kamaongan nen Jehova, tan antoy epekto na sayan kualidad na Dios ed sikatayo?

3, 4. Anto so kamaongan, tan akin a nayarin say kamaongan nen Jehova et sankaabigan a nadeskribe bilang pakapatnagan na panangaro to?

³ Diad dakel a modernon lenguahe, say “kamaongan” et singa ordinaryon salita labat. Balet base ed Biblia, say  kamaongan et kualidad ya manunan ontutukoy ed kaabigan ed moral. Kanian nibaga tayo sirin ya amin ya nipaakar ed si Jehova et sankaabigan. Amin ya kualidad to​—kaiba lay pakapanyari, inkahustisya, tan karunongan—​et talagan agaylay abig. Balet say kamaongan nen Jehova et sankaabigan a nadeskribe bilang pakapatnagan na panangaro to. Akin?

⁴ Say kamaongan et aktibo tan pakiwasen toy sakey ya manggawa na maong ed arum. Imbaga nen apostol Pablo ya satan et mas makapasagyat ed totoo nen say inkatunong. (Roma 5:7) Say matunong a too et nailaloan ya unoren to iray kakaukolanen na ganggan, balet say maong a too et mas ni so gagawaen to. Sikatoy onkiwas lan unona ya mananap na saray paraan pian natulongan so arum. Singa aralen tayo ed sayan kapitulo, si Jehova so sankamaongan no nipaakar ed satan. Malinew a say kamaongan nen Jehova et resulta na balbaleg ya panangaro to.

5-7. Akin ya aglabay nen Jesus so patawag ya “Maong a Managbangat,” tan anton importantin katuaan so imbangat to?

⁵ Anggapoy makapipara ed kamaongan nen Jehova. Ag-abayag antis na impatey nen Jesus, sakey a laki so inmasingger ed sikato pian mantepet, tan sikatoy tinawag ton “Maong a Managbangat.” Inmebat si Jesus: “Akin et tatawagen mo ak a maong? Anggapoy arum a maong, noag say Dios.” (Marcos 10:17, 18) Natan, ompan mankelaw ka no akin ya ontan so reaksion nen Jesus. Akin et impetek nen Jesus iman a laki? Agta tua ya si Jesus et “Maong a Managbangat”?

⁶ Malinew, inusar na saman a laki iray salitan “Maong a Managbangat” bilang panaglarog. Mapaabeban impaarap nen Jesus so ontan a gloria ed Ama tod tawen,  ya anggapoy makapipara ed kamaongan to. (Proverbio 11:2) Tan ibabangat met nen Jesus so sakey ya importantin katuaan. Si Jehova labat so makapangibaga no anto so maong. Bilang say Sankatagyan ya Manuley, si Jehova labat so walaan na kanepegan ya mandesisyon no anto so duga tan aliwa. Nen kinan nen Adan tan Eva so bunga na kiew a pakaamtaan na maong tan mauges, impanengneng da ya labay dan sikaran mismo so mandesisyon ed no anto so duga tan aliwa. Duma balet si Jesus ta mapaabeba ton impiya ed Ama to so pangiter ed saray estandarte ed moral.

⁷ Sakey ni, amta nen Jesus a si Jehova so Lapuan na amin ya kamaongan. Sikato so Mangiiter na ‘amin a maong tan sankaabigan a regalo a manlalapud tagey.’ (Santiago  1:17) Usisaen tayo no panon a napatnagan so kamaongan nen Jehova diad inkamaiter to.

8. Panon ya impanengneng nen Jehova so kamaongan to ed amin a totoo?

⁸ Amin a nambilay ed kapiganman so agunggonaan manlapud kamaongan nen Jehova. Ibabaga na Salmo 145:9: “Si Jehova et maomaong ed amin.” Panon ton impanengneng so kamaongan to ed amin ya totoo. Ibabaga na Biblia: “Sikatoy angiter na pantasi diad panamegley  na saray maong a ginawa to, ya iikdan to kayoy uran manlapud tawen tan mabunga iran panaon, a pepeneken to kayoy naakan tan paliliketen toy kapusoan yo.” (Gawa 14:17) Kasin asali yo lay aliketan a maong legan kayon mamangan na mananam ya naakan? Lapud kamaongan nen Jehova, ginawa to iyan dalin ya walay tuloytuloy ya sikulo na danum tan “mabunga iran panaon” pian walay dakel ya naakan. Impanengneng nen Jehova so ontan a kamaongan ed amin, aliwa labat ed saramay mangaaro ed sikato. Inkuan nen Jesus: “Papasinagen toy agew to ed saray mauges tan maong a totoo tan papepelagen toy uran ed saray matunong tan agmatunong.”—Mateo 5:45.

9. Panon ya iyiilustra na mansanas so kamaongan nen Jehova?

⁹ Dakel ya totoo so agmangaapresya ed tuloytuloy ya isisinag na agew, ipepelag na uran, tan mabunga iran panaon. Alimbawa, imanoen pa so mansanas. Diad dakel iran lugar et ordinaryo labat iyan prutas. Balet balibali itsura to, masamit a kanen, matabol, tan masustansia. Kasin amta yo ya diad interon mundo et wala so manga 7,500 a nanduruman klase na mansanas, ya nandurumay kolor da manlapud ambalanga ya anggad singa kolor balitok anggad duyaw ya anggad birdi tan say kabaleg na satan et manlapud singa kabaleg na cherry ya anggad singa ngalngali kabaleg na lukban? No egnaan mo so melanting a bukel na mansanas, singa anggapoy kakanaan na satan. Balet manlapud satan et ontubo iray marakdakep ya kiew. (Kansion nen Solomon 2:3) Kada spring, say kiew a mansanas et mamasyan manrosas; kada autumn et manbunga itan. Kada taon, diad manga 75 a taon, say kabkaabigan a kiew a mansanas et manbunga na manga 20 karton a manbelat na 19 a kilo so kada sakey!

10, 11. Panon a saray sentido tayo et pakapatnagan na kamaongan na Dios?

 ¹⁰ Lapud maomaong si Jehova, inikdan to itayo na laman a ‘makapakelkelaw so inkagawa’ to, ya wala ray sentido a denisinyo pian ontulong ed sikatayon natebek iray kimey to tan panliketan iratan. (Salmo 139:14) Isipen pa lamet iray alimbawa ya adeskribe diad gapo na sayan kapitulo. No wadman ka, anto ray nayarin nanengneng mo ya mamaliket ed sika? Kasin say ambalbalangan aping na manliket ya ugaw? Saray marakdakep ya uran diad kaumaan? Odino kasin saray ambalanga ya singa balitok tan lila iran kolor na onseselek ya agew? Say mata na too et adesinyo pian nanengneng so masulok a nilasus libo, o ompan minilyon ni ingen ya nanduruman kolor! Tan say sentido tayo parad pandengel et nibiig toy nanduruman tono na boses na inad-aro tayo, say siplog na dagem diad saray kakiewan, say elek na ugaw. Akin et nanenengneng tan narerengel tayo iratan? Ibabaga na Biblia: “Say layag ya ondedengel tan matan onnenengneng​—pareho irayan ginawa nen Jehova.” (Proverbio 20:12) Balet duara ni labat iratan ed saray sentido tayo.

¹¹ Say sentido na pakaangob et sananey nin paneknek na kamaongan nen Jehova. Base ed estimate, nibiig na eleng na too so nilibo anggad sakey trilyon ya nanduruman angob. Isipen pa labat so pigara: say paboritom a luto, saray rosas, saray naplag ya bulong, tan say daiset ya asewek manlapud dangdangan. Tan say sentido na pakalikna so ontulong ed sika pian nalikna so siplog na dagem ed lupam, say lakap na inad-arom, say makinkinis ya ubak na sakey a prutas a walad limam. No kusaben mo, say sentido na pakataway so onggana. Natawayan mo so nanduruman taway na satan ya prutas no  makasabi lad dilam so tabol na satan. On, walaan itayo na amin a rason pian iyabawag so nipaakar ed si Jehova: “Ontan lay kabaleg na kamaongan mo! Ingganam itan parad saramay ontatakot ed sika.” (Salmo 31:19) Balet, panon ya inggana nen Jehova so kamaongan parad saraman so walaan na takot ed sikato?

12. Anto ran probisyon nen Jehova so mas importante nen say pisikal ya probisyon, tan akin?

¹² Inkuan nen Jesus: “Walan nisulat: ‘Aliwan tinapay labat so pambilay na too, noagta say amin a salitan manlalapud sangi nen Jehova.’” (Mateo 4:4) On, saray espiritual a probisyon nen Jehova et mas maong ni nen say pisikal iran probisyon, lapud makatulong iratan pian naawat tayoy bilay ya andi-anggaan. Diad Kapitulo 8 na sayan libro, naimano tayo ya inusar nen Jehova so pakapanyari to a mangipawil legan na kaunoran iran agew pian niwala so espiritual a paraiso. Say manunan kabiangan na satan a paraiso et say dakel iran espiritual a naakan.

13, 14. (a) Anto so anengneng nen propeta Ezequiel ed pasingawey, tan anto so labay ya ibaga na satan ed sikatayo natan? (b) Anto ran espiritual ya probisyon so iiter nen Jehova parad matoor iran lingkor to?

¹³ Diad sakey ed saray propesiya na panangipawil ya walad Biblia, naikdan si propeta Ezequiel na pasingawey nipaakar ed nipawil ya marakdakep a templo. Manlapud satan a templo et walay ilog ya onaagus, ya onaawang tan onaaralem ya anggad nagmaliw a doble iray kabaleg na agus. Inerman so agusan na satan ya ilog et nabebendisyonan. Diad saray gilig na satan et binmuna iray tanem a kakiewan ya angiter na naakan tan tambal. Tan  say ilog so angiter ni ingen na bilay tan inkamabunga ed maasin tan andiay-bilay ya Inatey a Dayat! (Ezequiel 47:1-12) Balet anto so kabaliksan saratan ya amin?

¹⁴ Say labay ya ibaga na pasingawey nipaakar ed templo et tulongan nen Jehova iray totoo a makapandayew lamet ira ed sikato diad dugan paraan. Singa samay ilog ed pasingawey, onagus ed totoo nen Jehova so dakel a probisyon parad bilay. Ginawa iya nen Jehova manlapu la nen 1919, nen ginmapon nandayew lamet iray tuan Kristiano diad dugan paraan. Panon? Panamegley na Biblia, saray publikasyon, saray aral, tan kombension et nanaaralan na minilyon a totoo iray importantin katuaan. Uusaren met iratan nen Jehova pian nibangat ed totoo to so sankaimportantian ya probisyon to parad bilay, say dondon bagat nen Kristo, a mangiter na malinis a talindeg ed pakanengneng nen Jehova tan say ilalon bilay ya andi-anggaan ed amin ya tuan mangaaro tan ontatakot ed Dios. a Kanian diad sarayan kaunoran ya agew, legan ya nanaerasan ed espiritual iyan mundo, panliliketan na saray totoo nen Jehova so dakel ya espiritual ya naakan.—Isaias 65:13.

15. Panon ya ipanengneng nen Jehova so kamaongan to ed saray matoor a totoo legan na Sanlibon Taon ya Uley nen Kristo?

¹⁵ Balet say pasingawey nen Ezequiel nipaakar ed ilog so ag-ontundan onagus anggan mangangga la iyan daan a sistema na mundo. Mas lalo ni ingen ya onagus itan legan na Sanlibon Taon ya Uley nen Kristo. Insan diad panamegley na Mesianikon Panarian, iyaplika nen Jehova so kompleton balor na bagat nen Jesus tan kalkalnan  magmaliw ya perpekto iray totoo. Diad satan, seguradon agtayo nasabaan so liket tayo lapud kamaongan nen Jehova!

16. Panon ya ipapanengneng na Biblia ya wala ni ray arum a kualidad ya kaibad kamaongan nen Jehova, tan anto ray pigara ed saraya?

¹⁶ Aglabat ipapanengneng nen Jehova so kamaongan to diad inkamaiter to. Inkuan na Dios ed si Moises: “Ipanengneng kod sika so amin a kaabigan ko, tan iyabawag kod arapan mo so ngaran kon Jehova.” Onia ni ibabaga na salaysay: “Dinmalan si Jehova ed arapan to tan inyabawag to: ‘Jehova, Jehova, a Dios a mapangasi tan maabagey, matantan a manpasnok tan abalbaleg ed matoor a panangaro tan katuaan.’” (Exodo 33:19; 34:6) Kanian kaibad kamaongan nen Jehova so pigaran maabig a kualidad. Pantongtongan tayo so duara ed saraya.

17. Anto so labay ya ibaga na maabagey, tan panon itan ya ipapanengneng nen Jehova ed saray ag-ayadyarin totoo?

¹⁷ “Maabagey.” Dakel so ibabaga na sayan kualidad nipaakar ed pidedeneng nen Jehova ed saray pinalsa to. Imbes a magmaliw a misasanok, anggapoy malasakit, odino masebeg, a singa mabetbet a nanengneng ed saray walaan na autoridad, si Jehova et mauyamo tan maar-aro. Alimbawa, inkuan nen Jehova ed si Abram: “Tangwa ka, ipangasim, tan diad kawalaan mo et nengneng ka ed amianen tan abalaten, bukig tan sagur.” (Genesis 13:14) Dakel iran patalos so angekal ed salitan “ipangasim.” Balet ipapaimano na saray iskolar na Biblia a say inkisalita ed orihinal a Hebreo et aliwan ganggan noagta sakey a mapagalang a kerew. Wala ni ray arum ya alimbawa. (Genesis 31:12; Ezequiel 8:5) Isipen pa, say Soberano ed uniberso  et imbaga ton “ipangasim” anggan too labat so katongtong to! Diad sayan mundo ya dakdakel so totoon mauges, agresibo, tan aliwliway ugali da, agta balibalin isipen no panon kamaong so Dios tayo, si Jehova?

18. Antoy labay ya ibaga na balikas ya si Jehova so “abalbaleg ed . . . katuaan,” tan antoy ipapaseguro na satan ed sikatayo?

¹⁸ “Abalbaleg ed . . . katuaan.” Dakel ya totoo natan so agmatua. Balet ipapanonot ed sikatayo na Biblia: “Say Dios et aliwan singa sakey a too a makapantila.” (Numeros 23:19) Diad tua, ibabaga na Tito 1:2 a say “Dios . . . agto nayarian so mantila.” Agto nayarian so mantila lapud kamaongan to. Kanian talagan napanmatalkan iray sipan nen Jehova; saray salita to et seguradon nasumpal. Atawag ni ingen si Jehova a “Dios na katuaan.” (Salmo 31:5) Agto labat ipupulisay so katilaan noagta dakdakel a katuaan so ipapaamta to. Sikatoy aliwan walad maamot, guardiado, odino masekreto. Imbes, liliwawaan to iray matoor a lingkor to panamegley na dakel a karunongan to. b Ibabangat to ni ra ingen no panon so manbilay base ed saray katuaan ya iiter to ta pian sikaray ‘manakar ed katuaan.’ (3 Juan 3) Antoy epekto na kamaongan nen Jehova ed sikatayo bilang indibidual?

19, 20. (a) Antoy ginawa nen Satanas pian panduaruwaan nen Eva so kamaongan nen Jehova, tan antoy resulta? (b) Antoy nepeg ya epekto ed sikatayo na kamaongan nen Jehova, tan akin?

¹⁹ Sanen tinukso nen Satanas si Eva diad hardin na Eden, sikatoy ginmapo panamegley na masilib ya  impaneral tod panagmatalek nen Eva ed kamaongan nen Jehova. Inkuan nen Jehova ed si Adan: “Manlapud amin a kiew ed hardin et nayarian moy mangan na bunga anggad napesel ka.” Diad nilibon kakiewan ed satan a hardin, saksakey labat so insebel nen Jehova. Balet, imanoen pa no panon ya imbaga nen Satanas so unonan tepet to ed si Eva: “Talaga ta’n imbaga na Dios ya agkayo nepeg a mangay bunga na amin a kiew ed hardin?” (Genesis 2:9, 16; 3:1) Pinikewet nen Satanas iray salita nen Jehova pian panisipen si Eva a walay isisiblet nen Jehova a bengatlan maong. Makapaermen, anisia si Eva ed si Satanas. Ginmapon manduaruwa si Eva ed kamaongan na Dios, ya angiter ed amin a walad sikato. Manlapu lad saman, dakel ya lalaki tan bibii so angalig ed sikato, ya nanduaruwa met ira ed kamaongan na Dios.

²⁰ Amta tayo ya grabe so ermen tan kairapan ya resulta na ontan ya impanduaruwa. Kanian ipapuso tayo sirin iray salita ed Jeremias 31:12: “Onsinag ira lapud kaabigan [odino, kamaongan] nen Jehova.” Say kamaongan nen Jehova so nepeg a mamaliket ed sikatayo. Kaukolan ya agtayon balot panduaruwaan so motibo na Dios tayo ya maomaong. Komon ta sigpot itayon manmatalek ed sikato, ta kamaongan so labay to parad saramay mangaaro ed sikato.

21, 22. (a) Anto ray gawaen mo pian nipapanengneng moy pisasalamat ed kamaongan nen Jehova? (b) Anton kualidad so aralen tayo ed ontumbok a kapitulo, tan akin ya duma itan ed kamaongan?

²¹ Sakey ni, naliketan tayo no samboten tayoy pankanawnawan itongtong ed arum so nipaakar ed kamaongan na Dios. Nipaakar ed totoo nen Jehova, ibabaga na Salmo 145:7: “Saray ibabalikas dan panangirayew et onagus a singa subol sano nanonotan day kabaleg na kamaongan  mo.” Kada agew, nagugunggonaan itayo manlapud kamaongan nen Jehova. Anto kasi no kada agew et ipasal moy misalamat ed si Jehova lapud kamaongan tod sika tan espisipikom ya ibaga iratan ed sikato? Naalig tayoy kamaongan nen Jehova no dalepdepen tayo itan a kualidad, inagew-agew tayon pisalamatan lapud satan, tan ibaga ed arum so nipaakar ed satan. Tan legan tayon aanapen iray paraan a manggawa na maong, a singa gagawaen nen Jehova, mas onapit tayo ed sikato. Insulat na masiken lan apostol Juan: “Inad-arok ya agi, agmo aaligen so mauges, noagta say maong so alig mo. Samay manggagaway maong et manlalapud Dios.”​—3 Juan 11.

²² Say kamaongan nen Jehova et mikonektaan met ed arum ni ran kualidad. Alimbawa, say Dios et “abalbaleg ed matoor a panangaro.” (Exodo 34:6) Sayan kualidad et nikadkaduma, lapud ipapatnag labat itan nen Jehova ed saray matoor a lingkor to. Diad ontumbok a kapitulo, aralen tayo no panon ton ipapatnag itan.