1, 2. Akin et nibaga ya aliwa lan balo ed si Arin David so ag-inkamatoor?

 ALIWA lan balo ed si Arin David so ag-inkamatoor. Walay panaon ya agulo so uley to lapud maamot a pakana, nansabwatan iray kanasyonan to sumpad sikato. Sakey ni, trinaidor si David na arum ed saray sankaapitan ed sikato. Sakey ed sikara et si Mical, say inmunan asawa to. Diad gapo, “inaro toy David” kanian seguradon sinuportaan to ed saray obligasyon to bilang ari. Balet diad saginonor, “sikatoy minudmora to ed puso to,” ya impasen to ni ingen si David a “singa sakey a toon anggapoy-isip.”​—1 Samuel 18:20; 2 Samuel 6:16, 20.

² Wadtan met so personal a mananimbawa nen David ya si Ahitofel. Say simbawa to et ipapasen a singa salita nen Jehova. (2 Samuel 16:23) Balet ag-abayag, nantraidor iyan panmamatalekan nen David tan akisabwatan ed panrebelde ed sikato. Tan siopa so angisugsog ed sayan sabwatan? Si Absalom ya anak a mismo nen David! Sayan maagum ya oportunista et ‘tatakewen toy puso na saray totoo ed Israel,’ pian nasamsam to so trono na ari. Dakel so sinmuportad impanrebelde nen Absalom kanian apilitan si Arin David ya ombatik parad bilay to.​—2 Samuel 15:1-6, 12-17.

3. Diad anto kombinsido si David?

³ Kasin anggapo lay nansiansian matoor ed si David? Diad amin a kairapan ya dinalan to, amta nen David ya walay sakey ya lanang ya matoor ed sikato. Siopa? Anggapoy arum noagta si Jehova a Dios. Oniay imbaga nen David ed si Jehova: “Diad samay matoor et onkikiwas  kan matoor.” (2 Samuel 22:26) Anto so katooran, tan panon ya angipanengneng si Jehova na sankaabigan ya alimbawa na sayan kualidad?

4, 5. (a) Anto so “katooran”? (b) Akin et duma so katooran ed pagmaliw a napanmatalekan?

⁴ Say salitan “katooran” a singa nausar ed Hebreon Kasulatan et dedeskribien to so sakey a naynay ton ipapatnag so kaabigan ed samay aaroen to tan tuloytuloy ton tutulongan tan susuportaan. Gagawaen to itan aliwan lapud obligasyon noagta lapud panangaro. a Kanian say sakey a matoor et aliwa labat ya basta napanmatalekan. Isipen pa iyan alimbawa: Tinawag na salmista so bulan ya “matoor a tasi ed tawen” ta kada labi et lanang ya wadtan. (Salmo 89:37) Nipaakar ed saya, say bulan et “matoor” diad pantalos ya napanmatalekan. Pero duma so katooran na bulan ed katooran na sakey a mabilay a  bengatla. Akin? Lapud agmakapangipanengneng na aro so bulan.

⁵ Singa deneskribe na Biblia, kaibad katooran so panangaro. Mapatnag sirin ya walay malet ya siglaotan ed baetan na samay mangipapanengneng na katooran tan samay pangipapanengnengan to ed satan. Say katooran to et tuloytuloy tan agmanguuman. Aliwa itan ya singa daluyon ed dayat ya manguman-uman so iyagus to depende ed siplog na dagem. Duma balet so katooran o matoor a panangaro ta ag-iya manguuman tan mansiasiansian mabiskeg anggano wala ray mair-irap ya problema.

6. (a) Akin et matalag la natan so katooran ed saray totoo, tan panon iyan impaimano ed Biblia? (b) Anto so sankaabigan a paraan pian naaralan tayo no anto so kaiba ed katooran, tan akin?

⁶ Tua, matalag la natan so ontan ya katooran. Mabetbet ya saray maapit a mankakaiba so “akaparaan a maneral ed sakey tan sakey.” Ondarakel so nababalitaan tayon sanasawa ya tataynanan da ray kapareha da. (Proverbio 18:24; Malaquias 2:14-16) Dakel la ray mapalikdon kagagawa ya naiimano tayo, kanian nayarin nibaga tayo met imay imbaga nen Miqueas diad panaon to: “Naandi lad dalin imay matoor.” (Miqueas 7:2) Anggaman mabetbet ya agnipapanengneng na totoo so katooran, satan ya balibalin kualidad et lanang ya ipapanengneng nen Jehova. Diad tua, say sankaabigan ya paraan pian naaralan tayo no anton talagay kaibad katooran et diad pangusisa tayo no panon ya ipapatnag nen Jehova iyan aspekto na aro to.

7, 8. Panon tayon nibaga ya si Jehova labat so matoor?

⁷ Onia so ibabaga na Biblia nipaakar ed si Jehova: “Sika labat so matoor.” (Apocalipsis 15:4) Panon? Agta no maminsan  et saray totoo tan anghel so mangipanengneng na makatantandan katooran? (Job 1:1; Apocalipsis 4:8) Si Jesu-Kristo ey? Agta sikatoy manunan “matoor” ed Dios? (Salmo 16:10) Panon sirin a nibagan si Jehova labat so matoor?

⁸ Manuna ed amin, tandaan a say katooran et aspekto na aro. “Say Dios et aro”​—kanian bilang personipikasyon na sayan kualidad—​wala ni kasi so mas perpekton makapangipanengneng na katooran nen say si Jehova? (1 Juan 4:8) Tua, saray anghel tan totoo et nayarin mangipatnag ed saray kualidad na Dios, balet si Jehova labat so sankamatooran. Bilang “Akauna nen Saray Panaon,” sikato so abayag lan mangipapatnag na katooran nen say dinanman ya pinalsa diad dalin odino diad tawen. (Daniel 7:9) Kanian, si Jehova so perpekton alimbawa na katooran. Ipapatnag to iyan kualidad diad paraan ya anggapoy makapipara. Konsideraen so pigaran alimbawa.

9. Panon a si Jehova et “matoor ed amin a kimey to”?

⁹ Si Jehova et “matoor ed amin a kimey to.” (Salmo 145:17) Diad anton paraan? Nanengneng tayo so ebat diad Salmo 136. Nabasa tayo ditan iray makapakelaw ya ginawa nen Jehova pian iliktar iray lingkor to. Singa bilang, nen inliktar to ray Israelita ed Ambalangan Dayat. Imanoen so nabasa ed sampot na kada bersikulo na sayan salmo: “Say matoor a panangaro to et mansiansia ya anggad angga.” Sayan salmo et kaiba ed “ Saray Tepet Parad Pandalepdep” diad pahina 347. Legan mon babasaen iratan a bersikulo, seguradon pandinayewan mo ray dakel a paraan ya ipapanengneng nen Jehova so matoor ya panangaro ed totoo to. On, ipapatnag nen Jehova so katooran to ed matoor iran lingkor to diad idedengel  to ed saray kerew da parad tulong tan diad ikikiwas to ed dugan panaon. (Salmo 34:6) Agmanguman so matoor ya panangaro nen Jehova parad saray lingkor to basta sikaray mansiansian matoor ed sikato.

10. Panon ya ipapanengneng nen Jehova ya sikatoy matoor ed saray estandarte to?

¹⁰ Niarum ni, ipapanengneng nen Jehova so katooran to ed saray lingkor to diad panguunor ton mismo ed saray estandarte to. Aliwan singa arum ya totoo a manguman-uman tan igigiya labat na bigla-biglan panagnonot tan liknaan, agmanguuman si Jehova ed panmoria to ed no anto so duga tan aliwa. Diad loob la na saray milenyo, say panmoria to ed saray bengatla a singa say espiritismo, idolatriya, tan panagpatey et ag-anguman. “Anggad itatken yo et agak manguman,” so inkuan to panamegley na propeta ton si Isaias. (Isaias 46:4) Kanian kombinsido tayo ya nagunggonaan tayo no unoren tayo ray malinew ya estandarte nen Jehova ed moral ya walad Salita to.​—Isaias 48:17-19.

11. Mangiter na saray alimbawa a mangipanengneng ya totooren nen Jehova so insipan to.

¹¹ Ipapanengneng met nen Jehova so katooran diad panusumpal to ed saray sipan to. No impasakbay to so sakey a bengatla, tooren to itan. Kanian inkuan nen Jehova: “Ontan met naani so salitan ompaway ed sangik. Ag-itan ompawil ed siak ya anggapoy resulta, noagta seguradon sumpalen na satan so panlabayan ko, tan seguradon ontalona ed pangibakian ko.” (Isaias 55:11) Diad panusumpal to ed salita to, ipapanengneng nen Jehova so katooran ed totoo to. Agto ira paasaen o pantalaranen na bengatlan agto met lanlamang sumpalen. Napanmatalekan si Jehova kanian imbaga na lingkor ton si Josue: “Anggapoy anggan sakey a sipan ya ag-asumpal ed amin  a maabig ya insipan nen Jehova ed sankaabungan na Israel; tinmua iratan ya amin.” (Josue 21:45) Makapanmatalek itayo sirin ya agtayon balot nadismaya lapud tooren nen Jehova iray sipan to.​—Isaias 49:23; Roma 5:5.

12, 13. Diad anto ran paraan a say matoor ya panangaro nen Jehova et “mansiansia ya anggad angga”?

¹² Singa naaralan tayo la, ibabaga ed sikatayo na Biblia ya say matoor ya panangaro nen Jehova et “mansiansia ya anggad angga.” (Salmo 136:1) Panon? Say sakey ya importantin paraan et no panon ya peperdonaen nen Jehova iray kasalanan tayo. Singa naaralan tayod Kapitulo 26, no pinerdona la nen Jehova iray kasalanan tayo, agto la ulit-uliten ya nonoten itan. Lapud “amin et nankasalanan tan [agtayo] sarag ya ipatnag so gloria na Dios,” nepeg tayoy misalamat ta say matoor a panangaro nen Jehova et mansiansia anggad angga.​—Roma 3:23.

¹³ Balet say matoor a panangaro nen Jehova et mansiansia ya anggad angga diad sakey nin paraan. Ibabaga na Salita to a say matunong et “magmaliw a singa kiew ya intanem ed abay na manag-agus iran danum, sakey a kiew a manbubunga no panaon to tan agnamamagaan iray bulong to. Tan amin a gawaen to et onaligwas.” (Salmo 1:3) Imadyin mo pay sakey ya mabunan kiew a saray bulong to et agbalot namamagaan! Ontan met no labalabay tayon basaen tan aralen so Salita na Dios, nawalaan tayoy andukey tan mareen ya bilay, tan makapanggawa tayoy maabig. Saray bendisyon nen Jehova ed saray matoor a lingkor to et agmangangga. Tua, diad matunong a balon mundo ya iter nen Jehova, naeksperiensya na matulok a totoo so matoor ya panangaro to diad anggad angga.​—Apocalipsis 21:3, 4.

14. Panon ya ipapanengneng nen Jehova so panamabli to ed katooran na saray lingkor to?

¹⁴ Lanang ya ipapanengneng nen Jehova so katooran to. Lapud si Jehova et agmanguuman, sikatoy ag-ontundan mangipanengneng na katooran ed saray matoor a lingkor to. Insulat na salmista: “Nensaman et ugaw ak ni tan natan et matatken ak la, balet anggapo ni anengneng kon matunong ya apaulyan, odino saray ananak to a mipapayabol na naakan. Ta aaroen nen Jehova so hustisya, tan agto paulyanan iray matoor ed sikato.” (Salmo 37:25, 28) Tua, bilang Manamalsa, kanepegan nen Jehova so panagdayew tayo. (Apocalipsis 4:11) Pero lapud sikatoy matoor, papablien nen Jehova so matoor iran gawa tayo.—Malaquias 3:16, 17.

15. Ipaliwawa no panon ya say impangiliktar nen Jehova ed Israel et paneknek na katooran to.

¹⁵ Lapud matoor ya panangaro nen Jehova, tutulongan to iray totoo to no nagogonigon ira. Ibabaga ed sikatayo na salmista: “Sasalimbengan toy bilay na saray matoor ed sikato; ililiktar to ra ed lima na mauges.” (Salmo 97:10) Isip mo pa no panon ton tinulongan so bansan Israel. Kayari mamilagron inkiliktar da ed Ambalangan Dayat, oniay inkansion dad si Jehova: “Lapud matoor a panangarom et inwanwan mo iray totoon dinondon mo.” (Exodo 15:13) Say impangiliktar nen Jehova ed saray Israelita diad Ambalangan Dayat et paneknek na matoor ya panangaro tod sikara. Kanian imbaga nen Moises ed saray Israelita: “Aliwan lapud sikayoy sankarakelan ed amin a totoo kanian pinabli kayo nen Jehova tan pinili to kayo, ta sikayoy sankaraisetan ed amin a totoo.  Noagta lapud panangaro nen Jehova ed sikayo tan lapud sinumpal to so insamba tod saray inmuunan atateng yo, kanian impaway kayo nen Jehova ed panamegley na mabiskeg a lima, pian ibulos to kayod abung ya akaaripenan yo, manlapud pakayari na Faraon ya ari na Ehipto.”​—Deuteronomio 7:7, 8.

16, 17. (a) Panon ya impanengneng na saray Israelita ya agda aapresyaen so matoor a panangaro nen Jehova, pero panon ton impanengneng so panangabagey tod sikara? (b) Panon ya impanengneng na dakel ed saray Israelita ya ‘anggapo lay ilalo dan onabig,’ tan antoy naaralan tayod satan?

¹⁶ Makapaermen ta dakel ed saray Israelita et ag-angapresya ed matoor a panangaro nen Jehova, ta kayari to ran inliktar et “nantultuloy iran nankasalanan ed Sankatagyan.” (Salmo 78:17) Diad dakel ya taon, paulit-ulit iran nanrebelde. Tinaynan day Jehova tan nandayew irad palson dirios, kanian aderal so relasyon dad sikato. Balet agnilingwanan nen Jehova so sipan to ed saray Israelita. Imbes, panamegley nen propeta Jeremias, kinerew nen Jehova ed totoo to: “Pawil ka, O rebelden Israel . . . Agak onusdong a walaay pasnok ed sika, ta matoor ak.” (Jeremias 3:12) Balet, singa nipaimano ed Kapitulo 25, dakel ed saray Israelita so ag-anguman. On, “inelek-elekan da ray mensahero na tuan Dios, tan nileglemew da ray salita to tan niludlurey da ray propeta to, anggad sinmanok si Jehova ed saray totoo to, anggad anggapo lay ilalo ya onabig ira.”​—2 Awaran 36:15, 16.

¹⁷ Anto so naaralan tayod saya? Agto labay ya ibaga ya lapud matoor si Jehova et ibaliwala to la iray mauges ya gagawaen na totoo odino mainomay dan naloko. Tua, si Jehova et “abalbaleg ed matoor a panangaro,” tan  ipanengneng toy panangasi no wala so basiyan parad satan. Balet anto so gawaen nen Jehova no agmanguman imay manggagawa na mauges? Si Jehova et manmatoor ed matunong ya estandarte to tan dusaen to so nanggaway mauges. Singa imbaga ed si Moises, si Jehova et “agton balot abuloyan ya agnadusa so nankasalanan.”​—Exodo 34:6, 7.

18, 19. (a) Panon a say panusa nen Jehova ed saray mauges et paneknek na katooran to? (b) Panon ya ipanengneng nen Jehova so katooran to ed saramay lingkor to ya apasegsegang anggad patey?

¹⁸ Diad tua, no dudusaen na Dios iray mauges ya totoo, paneknek itan ya sikatoy matoor. Panon? Impaliwawa iya diad libro na Apocalipsis. Oniay nabasa tayon ingganggan nen Jehova ed pitoran anghel: “La kayo tan ikalbo yo ed dalin so pitoran yaong na sanok na Dios.” Nen ikalbo na komatlon anghel so yaong to “diad saray ilog tan diad saray subol na danum,” nagmaliw iratan a dala. Insan ikuan na anghel ed si Jehova: “Sika so matoor a Dios, samay wala natan tan wala la nensaman. Sika so matunong, ta inter mo irayan panangukom, lapud inyibung da so dala na saray masanto tan dala na saray propeta, tan inikdan mo ra na dala ya inumen da; manepeg itan ed sikara.”​—Apocalipsis 16:1-6.

¹⁹ Imanoen a legan na pangipapasabi ed satan a mensahe na panangukom, tinukoy na anghel si Jehova bilang “matoor a Dios.” Akin? Lapud diad paneral ed saray mauges, ipapanengneng nen Jehova so katooran to ed saray lingkor to, a dakel ed sikara so apasegsegang anggad patey. Balet lapud matoor si Jehova, sikaray mansiasiansian mabilabilay ed memorya to. Pipirawaten ton nanengneng lamet irayan matoor ya lingkor to, tan ipapaseguro  na Biblia ya gawaen to itan panamegley na kioli. (Job 14:14, 15) Aglilingwanan nen Jehova iray matoor a lingkor to anggano inatey la ra. Imbes, “parad sikato et mabilay iran amin.” (Lucas 20:37, 38) Say gagala nen Jehova ya paolien iramay walad pakanodnonotan to et mabiskeg a paneknek na katooran to.

20. Siopa ray “banga na panangasi,” tan panon ya ipapanengneng nen Jehova so katooran to ed sikara?

²⁰ Lanang ya ipapanengneng nen Jehova so katooran to ed saray matoor a totoo. Diad tua, nilibo lan taon ya si Jehova et “mantetepel tan aanosan ton maong iray banga na sanok a makanepegan ed kadederal.” Akin? “Ginawa to iya pian nipaamta to ray kayamanan na gloria to ed saray banga na panangasi, ya akauna lan intarya to pian nigloria.” (Roma 9:22, 23) Sarayan “banga na  panangasi” et saray Kristiano ya alanaan na masanton espiritu ya nakaiba nen Kristo ya manuley ed Panarian to. (Mateo 19:28) Lapud inikdan ira nen Jehova na pankanawnawan niliktar, ipapanengneng ton sikatoy matoor ed si Abraham, ya akisipanan to: “Diad panamegley na ilalak mo, amin a nasyon ed dalin et onggamor na bendisyon lapud dinengel moy boses ko.”​—Genesis 22:18.

21. (a) Panon ya ipapanengneng nen Jehova so katooran to ed “baleg ya ulop” a walaan na ilalon makaliktar ed “baleg a kairapan”? (b) Papakiwasen ka na katooran nen Jehova a manggawa na anto?

²¹ Ipapanengneng met nen Jehova so katooran to ed “baleg ya ulop” a walaan na ilalon makaliktar ed “baleg  a kairapan” tan manbilay ya andi-anggaan ed paraison dalin. (Apocalipsis 7:9, 10, 14) Anggano ag-ayadyari iray lingkor nen Jehova, iikdan to ira na pankanawnawan manbilay ya andi-anggaan ed paraison dalin. Panon ton gagawaen iya? Panamegley na dondon​—say sankabalgan a paneknek na katooran nen Jehova. (Juan 3:16; Roma 5:8) Lapud satan, saramay tuan manaanap na inkatunong et labay day onapit ed sikato. (Jeremias 31:3) Agta lalo kan napapaapit ed si Jehova nen naamtaan moy katooran ya ipapanengneng to tan ipanengneng to ni? Kanian komon ta ipanengneng tayon misatsalamat tayo ed matoor ya panangaro to diad pamabiskeg tayod determinasyon tayo ya matoor a manlingkor ed sikato.