1-3. (a) Anto so amakiwas ed si Jesus ya aligen so Ama to? (b) Anto ran aspekto na aro nen Jesus so aralen tayo?

 AKANENGNENG ka lay ugaw ya sasalien ton aligen so ama to? Nayarin aligen to so kakaakar, panagsalita, odino kakikiwas na ama to. Legan na ibabaleg na ugaw, nayarin naalig to so moral tan espiritual a panmoria na ama to. On, say aro tan respeto a nalilikna na ugaw parad maaron ama to so mamapakiwas ed sikaton aligen so ama to.

² Say relasyon nen Jesus tan na Ama tod tawen ey? Aminsan, oniay imbaga nen Jesus: “Inarok so Ama.” (Juan 14:31) Anggapoy makapipara ed panangaro nen Jehova ed Anak to, ya abayag to lan kaiba antis nin napalsa so arum a bengatla. Satan ya aro so amakiwas ed matoor ya Anak ya aligen so Ama to.—Juan 14:9.

³ Diad akauna la ran kapitulo na sayan libro, naaralan tayo no panon ya perpekton inalig nen Jesus so pakapanyari, hustisya, tan karunongan nen Jehova. Balet, panon ya impanengneng nen Jesus so aro na Ama to? Aralen tayo so taloran aspekto na aro nen Jesus​—say inkamasakripisyo, panangabagey, tan inkamabulos ton mamerdona.

4. Panon ya impanengneng nen Jesus so sankaabigan ya alimbawa na masakripisyon aro?

⁴ Impanengneng nen Jesus so sankaabigan ya alimbawa na masakripisyon aro. Kaibad saya so pangiyuna ed  saray pankaukolan tan pampapagaan na arum nen say sikatayo. Panon ya impanengneng nen Jesus so ontan ya panangaro? Impaliwawa ton mismo: “Anggapo lay walaan na mas baleg a panangaro nen saya, a say sakey et iter toy bilay to parad kakaaro to.” (Juan 15:13) Mabulos ya inter nen Jesus so perpekton bilay to parad sikatayo. Satan la so sankaabigan a panangaro ya impanengneng na sakey a too. Balet wala ni arum a paraan ya impanengneng nen Jesus so masakripisyon aro.

5. Akin ya pakapatnagan na masakripisyon aro so inyakar na Anak na Dios diad dalin?

⁵ Antis ya linmad dalin so bogbogtong ya Anak na Dios, sikatoy walaan la na nikadkaduma tan atagey a posisyon diad tawen. Maapit so relasyon tod si Jehova tan ed saray dakerakel ya anghel. Balet anggano balibali lay bilay to ed tawen, sayan inad-aron Anak et “tinaynan to so amin a walad sikato tan inawat toy kipapasen na sakey ya aripen tan nagmaliw a too.” (Filipos 2:7) Sikatoy mabulos a nambilay kaiba iray makasalanan a totoo diad mundo a “walad pakayari na samay mauges.” (1 Juan 5:19) On, impanengneng na Anak na Dios so masakripisyon aro.

6, 7. (a) Panon ya impanengneng nen Jesus so masakripisyon aro to legan na ministeryo to diad dalin? (b) Anton alimbawa na agmakasarilin aro so nabasa ed Juan 19:25-27?

⁶ Diad interon ministeryo nen Jesus diad dalin, impanengneng to so masakripisyon aro ed nanduruman paraan. Agbalot nagmaliw ya makasarili. Inusar toy oras tan biskeg to ed ministeryo tan nambilay ya simpli. Inkuan to: “Saray kuyangen et walay panaayaman da, tan saray manok et walay ubong da, balet say Anak na too et anggapoy anggan napangidanganan toy ulo to.” (Mateo 8:20) Bilang eksperton karpentero, sarag pa komon  nen Jesus so mangigana na panaon pian mangipaalagey na komportablen panayaman to odino manggawa na marakep a muebles ya ilako to pian nawalaay malaem a kuarta. Balet agto inusar iray dunong to pian makalmo na materyal iran bengatla.

⁷ Say talagan balibalin alimbawa na masakripisyon aro nen Jesus et amay nabasad Juan 19:25-27. Nayarin dakel iray pampagaan komon nen Jesus diad samay ngarem na ipatey to. Legan ya maniirap diad panamairapan a kiew, sankanonot to ray babangatan to, say panagpulong a kimey, no panon ya makapanmatoor, tan no panon ya mangapekta itan ed ngaran nen Ama to. Akadepende ed sikato so interon arapen na totoo! Balet antis na impatey to, impanengneng met nen Jesus ya sikatoy mapaga ed ina ton si Maria, a mapatnag ya abalo la ed saman. Kinerew nen Jesus ed si apostol Juan ya asikasoen toy Maria, ya ituring ton singa to ina, tan diad saman et impila nen apostol Juan si Maria ed abung to. Sinegurado nen Jesus ya walay mangasikaso ed pisikal tan espiritual ya pankaukolan nen ina to. Talagan impanengneng nen Jesus so masakripisyon aro!

8. Anto so kabaliksan na Griegon salita ya uusaren na Biblia pian deskribien so panangasi nen Jesus?

⁸ Si Jesus et mapangasi ya singa si Ama to. Ibabaga na Kasulatan ya akasian nen Jesus iramay naiirapan tan nanggaway paraan pian tulongan ira. Pian deskribien so panangabagey nen Jesus, uusaren na Biblia so Griegon salita a nipatalos ya “akasian to ra.” Oniay imbaga na sakey ya iskolar: “Dedeskribien na satan . . . so mabiskeg ya liknaan ya pakiwasen toy puso na sakey. Satan so sankabiskegan a salita ed Griego parad panangabagey.”  Konsideraen so pigaran alimbawa ya apakiwas si Jesus na panangasi to pian tulongan so arum.

9, 10. (a) Akin ya nananap si Jesus tan saray apostol to na mareen a pasen? (b) Nen ag-ira akapampainawa lapud dakel a totoo, antoy reaksion nen Jesus, tan akin?

⁹ Apakiwas ya itarya so espiritual iran pankaukolan. Nanengneng ed Marcos 6:30-34 no antoy manunan amakiwas ed si Jesus pian ipatnag toy panangasi. Imadyin yo pa yan eksena. Manliket iray apostol ta kakkayari dan nampulong ed dakel ya lugar. Pinmawil irad si Jesus tan maliket dan imbalita so amin ya anengneng tan arengel da. Balet wala ray dakel a totoon nantitipon, kanian anggapoy panaon nen Jesus tan saray apostol to ya mangan. Lapud maobserba si Jesus, naimano to ya naksawan la iray apostol to. Kanian imbaga tod sikara: “Ti’la, ta onla itayo ed sakey a nisulinek a pasen pian makapanpainawa itayon magano.” Linmugan irad sakey a baluto, pian beltangen so amianen a sampot na Dayat na Galilea pian onla ed sakey a mareen a pasen. Balet anengneng na dakel a totoo a sikaray onaalis. Arengel met na arum itan. Amin da so binmatik ed mamaamianen a gilig na dayat tan naunaan day baluto ya akasabi ed biek!

¹⁰ Kasin asyodotan si Jesus lapud ag-ira akapampainawa? Andin balot! Atenyeg so puso to nen anengneng to irayan nilibon totoo a manaalagar ed sikato. Insulat nen Marcos: “Anengneng toy dakel a totoo, tan akasian to ra lapud singa ra karnero ya andiay managpastol. Tan imbangat to ira na dakel a bengatla.” Anengneng nen Jesus ya kada sakey ed sarayan totoo et walaan na pankaukolan ed espiritual. Singa ra karnero ya abalang, ya anggapoy pastol ya mangigiya odino manprotekta ed sikara. Kabat nen Jesus a saray ordinaryon totoo et ibabaliwala na saray anggapoy panangasin lider na relihyon,  a mangasikaso komon ed sikara. (Juan 7:47-49) Akasian to iray totoo, kanian ginapoan to ran imbangat “nipaakar ed Panarian na Dios.” (Lucas 9:11) Imanoen ya akasian nen Jesus iray totoo anggan agto ni anengneng so reaksion da ed ibangat to. Labay ton ibaga, say panangasi to et aliwan lapud resulta na bangat to, noagta say motibo ya amakiwas ed sikato pian gawaen itan.

11, 12. (a) Diad panaon na Biblia, panon so impantrato ed saray akating, balet antoy ginawa nen Jesus nen sikatoy inasinggeran na sakey a laki ya “napno na kating”? (b) Antoy alikna na akating nen diniwit nen Jesus, tan panon iyan niyilustra ed eksperiensya na sakey a doktor?

¹¹ Apakiwas a tulongan iray maniirap. Amta na saray totoon walaan na sakit ya maabagey si Jesus, kanian inmasingger irad sikato. Sankapatnagan iya nen si Jesus et inasinggeran na sakey a lakin “napno na kating” legan ya ontutumbok so dakel ya totoo ed sikato. (Lucas 5:12) Diad panaon na Biblia, saray akating et ibibiig pian agnaalisan so arum. (Numeros 5:1-4) Balet ag-abayag, imbangat na saray lider na relihyon ya agnepeg a kasian iray akating tan nanggawa ray maruksan ganggan. a Balet, imanoen no panon so impantrato nen Jesus ed akating: “Wala met so sakey ya akating ya inmasingger ed sikato, tan tinmalimukor ya akikasi ed sikato, ya inkuan to: ‘No labay mo, sarag mo ak a linisan.’ Diad saman et akasian  to, kanian inyunat toy lima to tan diniwit to, tan inkuan to: ‘Labay ko! Nalinisan ka.’ Et tampol a naandi so kating to, tan alinisan.” (Marcos 1:40-42) Amta nen Jesus ya ibabawal ed ganggan so pilimog na akating ed arum. Balet imbes ya paalisen nen Jesus, akasian to tan nanggawa na ag-iilaloan. Diniwit nen Jesus so akating!

¹² Kasin naimadyin mo so alikna na akating nen sikatoy diniwit nen Jesus? Pian iyilustra, imanoen iyan eksperiensya nen Dr. Paul Brand, sakey ya espisyalista ed kating, nen walay tinambal ton akating diad India. Legan na eksaminasyon, intapew na doktor so lima to ed takeb na akating tan impaliwawa to, panamegley na managpatalos, so pantambal a gawaen ed saman a laki. Biglan inmakis so akating. Intepet na doktor: “Wala tay nibagak ya aliwa?” Tinepetan na managpatalos imay laki diad lenguahe to tan inmebat: “Anggapo, doktor. Inkuan to a sikatoy akaakis lapud intapew moy limam ed takeb to. Ta manlapud insabi to dia et anggapo nin balot so aniwit ed sikato diad dakel lan taon.” Seguradon ontan met so alikna na samay akating ya diniwit nen Jesus. Aminpinsan labat ya diniwit nen Jesus, balet inmabig la ed sakit to ya rason no akin ya sikatoy aarawian na totoo!

13, 14. (a) Anton tulor so nabet nen Jesus sanen asingger la ed syudad na Nain, tan akin ya makapaermen iya? (b) Lapud panangabagey nen Jesus antoy ginawa to parad samay balo a taga Nain?

¹³ Apakiwas ya tulongan iray maneermen. Apakiwas si Jesus ya tulongan iray maneermen lapud inateyan ira. Alimbawa, imanoen imay nabasa ed Lucas 7:11-15. Agawa itan ed kapegleyan na ministeryo nen Jesus nen sikatoy asingger lad syudad na Nain diad Galilea. Sanen akaasingger lay Jesus ed looban na syudad, sikatoy akaabet na tulor. Talagan makapaermen iman ya situasyon.  Inatey so sakey a kabataan ya laki ya alenleneg ya anak na sakey ya balon bii. Naeksperiensya to la so ontan a tulor​—sanen inatey si asawa to. Natan et say anak ton laki, ya alenleneg a manlegpet komon ed sikato. Nayarin kaiba ed saray akitulor iray mieermen a mantagleey tan saray musikero a mantotogtog na kansion parad paneermen. (Jeremias 9:17, 18; Mateo 9:23) Balet say inimano nen Jesus et samay ina ya grabe paneermen to, ya nayarin manaakar ya kaabay na samay angiparukolan ed bangkay na anak to.

¹⁴ “Naabagey” nen Jesus so ina lapud paneermen to. Diad mauyamon boses, inkuan to ed bii: “Agka la onaakis.” Insan sikatoy inmasingger tan binembenan toy angiparukolan ed bangkay. Kanian tinmunda iramay mangaalsa tan nayarin pati saray mitutulor. Tan tekep na boses ya walay autoridad, oniay imbaga nen Jesus ed bangkay: “Balolaki, ibagak ed sika, bangon ka!” Anto so tinmumbok ya agawa? “Samay lakin inatey et yinmurong tan ginmapon nansalita” a singa binmangon manlapud aralem ya ugip! Insan oniay ibabaga na Biblia: “Sikatoy inter nen Jesus ed ina to.”

15. (a) Panon ya ipapanengneng na saray salaysay ed Biblia nipaakar ed panangabagey nen Jesus so koneksion na panangabagey tan kiwas? (b) Panon tayon naalig so alimbawa nen Jesus?

¹⁵ Anto so naaralan tayo ed sarayan salaysay? Diad kada inkagawa, naimano tayo ya walay koneksion na panangabagey tan kiwas. No nanenengneng nen Jesus ya maniirap iray totoo, nakakasian to ra, tan onkiwas pian tulongan ira. Panon tayon naalig so alimbawa to? Bilang Kristiano, walaan itayo na obligasyon a mangipulong ed maong a balita tan manggawa na babangatan. Say manunan rason no akin ya gagawaen tayo iya et  lapud inaro tayo so Dios. Balet tandaan tayo ya say sakey nin rason et lapud nakakasian tayo ray totoo. No naabagey tayo ray totoo a singa si Jesus, pakiwasen itayo na puso tayon gawaey anggaay nayarian tayo pian ipulong so maong a balita ed sikara. (Mateo 22:37-39) Say pangipanengneng na panangabagey ed saray agagi tayon maniirap odino inateyan ey? Agtayo sarag a mamilagron paabigen so sakit odino paolien so inaatey. Balet nipanengneng tayo so panangabagey tayod sikara no tulongan tayo rad saray pankaukolan da tan ibaga tayon inaro tayo ra.—Efeso 4:32.

16. Panon ya napatnagan so inkamabulos nen Jesus a mamerdona anggan sanen sikatoy walad panamairapan a kiew?

¹⁶ Perpekton impanengneng nen Jesus so aro na Ama to diad sananey nin importantin paraan​—sikatoy ‘akaparaan a mamerdona.’ (Salmo 86:5) Tua iya, anggan sanen sikatoy walad panamairapan a kiew. Nen ngalngali la ompatey si Jesus ed makapabaing ya paraan, legan ya akapasak iray lima tan sali to, antoy kinerew to ed Ama to? Kasin kinerew tod si Jehova ya dusaen iray mamapairap ed sikato? Andi, noagta say imbaga to: “Ama, perdonam ira, ta agda amtay gagawaen da.”—Lucas 23:34. b

17-19. Diad anto ran paraan ya impanengneng nen Jesus a pinerdona toy apostol Pedro ed amitlon impangiburi to ed Sikato?

 ¹⁷ Nayarin say sakey nin balibalin alimbawa na panamerdona nen Jesus et diad samay impantrato to ed si apostol Pedro. Pinablin maong nen Pedro si Jesus. Nen Nisan 14, diad unor lan labi na bilay nen Jesus diad dalin, inkuan nen Pedro ed sikato: “Katawan, akaparaan ak a napriso tan ompatey a kaibam.” Balet pigaran oras labat so apalabas, amitlon imburi nen Pedro ya kabat to si Jesus! Ibabaga na Biblia ed sikatayo no anto so agawa diad komatlon impangiburi nen Pedro ed si Jesus: “Linmingaw so Katawan tan ninengneng toy Pedro.” Nen atebek nen Pedro so kabelat na kasalanan to, “pinmaway tan inmaki-akis.” Nen inatey si Jesus kayari na saman ya agew, nayarin inisip a maong na apostol, ‘Kasin pinerdona ak na Katawan ko?’—Lucas 22:33, 61, 62.

¹⁸ Agla nanalagar na abayag si Pedro parad ebat. Si Jesus so apaoli diad kabuasan na Nisan 16, tan diad saman lanlamang ya agew, binisita toy Pedro. (Lucas 24:34; 1 Corinto 15:4-8) Akin et inikdan nen Jesus na ontan lan espisyal ya imano so apostol ya angiburi ed sikato? Nayarin labay ya ipaseguro nen Jesus ed magbabawin si Pedro ya sikatoy siansia nin inad-aro tan pinabli na Katawan to. Balet wala ni ginawa nen Jesus pian ipaseguro ed si Pedro ya sikatoy pinerdona to la.

¹⁹ Kayari na pigaran agew, nampanengneng si Jesus ed saray babangatan to diad Dayat na Galilea. Diad sayan inkagawa, amitlon tinepetan nen Jesus si Pedro (ya amitlon angiburi ed Katawan to) no kasin sikatoy inaro to. Kayari na mikatlo, inmebat si Pedro: “Katawan, amtam so amin a bengatla; amtam a papablien ta ka.”  Siempre amta nen Jesus so walad puso nen Pedro tan amta ton sikatoy inar-aro nen Pedro. Balet inikdan toy Pedro na pankanawnawa pian paneknekan so panangaro to. Sakey ni, ingganggan toy Pedro ya ‘pakanen’ tan ‘pastolan iray angkekelag a karnero’ to. (Juan 21:15-17) Antis na satan, naawat nen Pedro so asainmin a manpulong. (Lucas 5:10) Balet natan sikatoy inikdan nen Jesus na importantin responsibilidad ya asikasoen iray magmaliw a papatumbok na Kristo. Ag-abayag kayari na satan, inikdan nen Jesus si Pedro na baleg ya responsibilidad diad kimey na saray babangatan. (Gawa 2:1-41) Seguradon nainawaan si Pedro ya naamtaan ya sikatoy pinerdona la nen Jesus tan siansia nin manmamatalek ed sikato!

20, 21. Panon tayon sigpot ya ‘naamtaan so aro na Kristo’?

²⁰ Balibali so impandeskribe na Salita nen Jehova ed aro na Kristo. Balet panon so nepeg tayon ikiwas ed aro nen Jesus? Papasesegen itayo na Biblia ya ‘amtaen so aro na Kristo, a napapalumbasan toy kakabatan.’ (Efeso 3:19) Singa anengneng tayo, dakel so naamtaan tayo ed saray salaysay na Ebanghelyo ed bilay tan ministeryo nen Jesus nipaakar ed aro na Kristo. Balet pian sigpot tayon ‘naamtaan so aro na Kristo,’ agtayo labat basta aralen so ibabaga na Biblia nipaakar ed sikato.

²¹ Say Griegon termino a nipatalos ya ‘amtaen’ et kabaliksan toy pangamta “ed praktikal a paraan, panamegley na eksperiensya.” No ipanengneng tayoy panangaro a singa ginawa nen Jesus​—say pansakripisyo parad arum, pangabagey ed saray mankaukolan, tan  mamerdona manlapud puso—​diad ontan et talagan natalosan tayo so liknaan na Kristo. No ontan so gawaen tayo, panamegley na eksperiensya et ‘naamtaan tayo so aro na Kristo a napapalumbasan toy kakabatan.’ Tan agtayo lilingwanan ya no lalo tayon aaligen so Kristo, lalo tayon napaapit ed samay sakey ya perpekton inalig nen Jesus, say maaron Dios tayo, si Jehova.