1, 2. Panon ya indeskribe na Biblia so situasyon na totoo, tan antoy saksakey ya paraan pian makaligtas itayo ed satan?

 “AMIN a pinalsa et saniiban oneey-ey tan nasasakitan.” (Roma 8:22) Ontan so impandeskribe nen apostol Pablo ed pakaskasin situasyon tayo. Iisipen na dakel ya singa agti la natakasan so irap, kasalanan, tan ipapatey. Pero si Jehova et aliwan singa too ya walay limitasyon to. (Numeros 23:19) Say Dios na hustisya et nanggaway paraan pian niligtas itayo ed makapaermen ya situasyon tayo. Say tawag ed satan et dondon.

² Say dondon so sankarakepan ya regalo nen Jehova ed totoo. Lapud satan, posiblin nibulos itayod kasalanan tan patey. (Efeso 1:7) Tan naikdan itayo na pagkakataon ya manbilay ya anggapoy anggaan, balanglan diad tawen odino diad paraison dalin. (Lucas 23:43; Juan 3:16; 1 Pedro 1:4) Pero anton talaga so dondon? Tan antoy naaralan tayo ed satan tungkol ed makapadinayew ya hustisya nen Jehova?

3. (a) Akin et kailangan so dondon? (b) Akin et agnayarin basta palemewen na Dios so sentensia ed saray anak nen Adan?

³ Kailangan so dondon ta nankasalanan si Adan. Lapud agto inunor so Dios, nipatawir tod ananak to so  sakit, ermen, irap, tan patey. (Genesis 2:17; Roma 8:20) Agnayarin basta labat palagpasen na Dios so agawa tan palemewen so sentensia pian ag-ira ompatey. Ta no ontan, nakontra toy mismon ganggan to ya “say bayar na kasalanan et patey.” (Roma 6:23) Tan no ag-unoren nen Jehova so sarili ton estandarte ed hustisya, agmet la unoren na saray anghel tan totoo so ganggan to, kanian magmaliw lan magulogulo so interon uniberso!

4, 5. (a) Panon ya dineralan nen Satanas so Dios, tan akin ya kailangan ya ebatan nen Jehova irayan akusasyon? (b) Anto ray akusasyon nen Satanas ed saray matoor ya lingkor nen Jehova?

⁴ Singa naaralan tayo ed Kapitulo 12, wala ni ray mas baleg ya isyu lapud samay impanrebelde ed Eden. Dineral nen Satanas so maong ya reputasyon na Dios. Inakusaan to si Jehova ya matila, mauges ya manuley, tan sisibletan To kuno iray pinalsa To. (Genesis 3:1-5) Lapud singa agla nasumpal so gagala na Dios ya napano na matunong ya totoo so dalin, papapawayen nen Satanas ya palpak so Dios. (Genesis 1:28; Isaias 55:10, 11) No anggapoy gawaen nen Jehova pian ebatan irayan akusasyon, ompan naekal so tiwala na saray anghel tan totoo ed pananguley to.

⁵ Dineralan met nen Satanas iray matoor ya lingkor nen Jehova. Inakusaan to ran manlilingkor labat ira ta nabebendisyonan ira. Pero no nasubok la ra, ibeneg da la kunoy Jehova. (Job 1:9-11) Mas importante ni irayan isyu nen saray probleman dadalanen na totoo. Kanian duga labat ya ebatan nen Jehova irayan akusasyon nen Satanas. Pero panon ya solusyonan na Dios irayan isyu tan iligtas met iray totoo?

6. Anto ray arum ya salitan inusar ed Biblia ya mangidedeskribe ed paraan na Dios pian iligtas so totoo?

⁶ Say solusyon nen Jehova et talagan mapangasi tan patas. Anggapoy toon makaisip na ontan kasimpli pero “the best” ya solusyon. Diad Biblia, tinawag itan ya impanaliw, pikakareenan, pipulangan, tan sakbong. (Daniel 9:24; Galacia 3:13; Colosas 1:20; Hebreo 2:17) Pero say sankarakepan ya salitan impandeskribe ed satan et amay imbagan mismo nen Jesus. Kuan to: “Say Anak na too a linma dia aliwan pian panlingkoran, noagta pian manlingkor tan iter toy bilay to a panondon [Greek, lyʹtron] ed amayamay.”​—Mateo 20:28.

7, 8. (a) Diad Biblia, antoy labay ya ibaga na salitan “dondon”? (b) Antoy mangipapanengneng ya say dondon et kaukolan ya walay kasimbangan to?

⁷ Anto so dondon? Say Griegon salita ya inusar ed saya et mankabaliksay “ukbaran, ibulos.” Ontutukoy met iya ed kuarta ya imbayar pian nibulos so sakey ya abihag ed guerra. Kanian say dondon et nayarin mankabaliksan na bayar pian nabawi imay abalang. Diad Hebreon Kasulatan, say salitan inusar parad “dondon” (koʹpher) et mankabaliksay “sakbongan.” Natalosan tayo ed saya ya say labay ya ibaga met na dondon et sakbongan to iray kasalanan.​—Salmo 65:3.

⁸ Imbaga na Theological Dictionary of the New Testament ya say salitan (koʹpher) et “lanang ton ipapasabi so ideyan kasimbangan,” odino kapetekan. Kanian pian nadondon o nasakbongan so kasalanan, kaukolan ya say bayar et eksakton kasimbangan na samay abalang. Oniay ibabaga na Ganggan na Dios ed Israel:  “Bilay parad bilay, mata parad mata, ngipen parad ngipen, lima parad lima, sali parad sali.”​—Deuteronomio 19:21.

9. Akin ya mangibabagat na ayayep iray matoor ya totoo nensaman, tan antoy impangipasen nen Jehova ed saratan ya bagat?

⁹ Manlapu lad panaon nen Abel, saray matoor ya lingkor et mangiyaapay ed Dios na bagat ya ayayep. Ipapanengneng na satan ya bibidbiren dan makasalanan ira tan kailangan day panamerdona na Dios. Ipapanengneng da met ya manisia ran ibulos ira na Dios ed kasalanan panamegley na “ilalak” to. (Genesis 3:15; 4:1-4; Levitico 17:11; Hebreo 11:4) Aliketan si Jehova ed saratan ya bagat tan inawat to ra ya lingkor to. Pero agnabayaran na saratan ya bagat so kasalanan ta mas abeba iray ayayep nen say totoo. (Salmo 8:4-8) Kanian oniay ibabaga na Biblia: “Say dala na saray kalakian a baka tan kanding et agmakapangekal na saray kasalanan.” (Hebreo 10:1-4) Saratan ya bagat et simbolo labat na tuan dondon ya diad saman ya panaon et ibagat ni labat.

10. (a) Siopa dapat so kapetekan na samay dondon, tan akin? (b) Akin et sakey labat a too so kailangan ya manondon?

¹⁰ “Ompapatey so amin lapud si Adan,” so imbaga nen apostol Pablo. (1 Corinto 15:22) Kanian kailangan ya walay sakey ya ompatey bilang dondon. Pero dapat, amay eksakton kapetekan nen Adan—perpekton too. (Roma 5:14) Anggapo lay arum ya klase na pinalsa ya misimbangan ed satan. Sakey labat ya perpekton too,  ya ag-akatawir ed si Adan na sentensian patey, so makapangiter na “kasimbangan a dondon parad amin”​—say eksakton mipetekan ed si Adan. (1 Timoteo 2:6) Agla kailangan ya ibagat so minilyon ya perpekton totoo pian nadondon so kada sakey ed saray aliwan perpekton anak nen Adan. Akin ey? Oniay impaliwawa nen apostol Pablo: “Panamegley na sakey a too [si Adan] et linmoob ed mundo so kasalanan, tan say patey ed panamegley na kasalanan.” (Roma 5:12) Tan “no panon a say ipapatey et niwala diad panamegley na sakey a too,” angiter so Dios na dondon parad totoo “panamegley met na sakey a too.” (1 Corinto 15:21) Panon ey?

11. (a) Panon ya “natawayan” na samay manondon so “ipapatey parad kada too”? (b) Akin et aga kaiba si Adan tan Eva ed saray nadondon? (Nengnengen so paimanod leksab.)

¹¹ Inyuksoy nen Jehova ya boluntaryon ibagat na sakey ya perpekton too so bilay to. Base ed Roma 6:23, “say bayar na kasalanan et patey.” No samay manondon et ibagat toy bilay to, “natawayan toy ipapatey parad kada too.” Labay ton ibaga, bayaran toy kasalanan nen Adan. (Hebreo 2:9; 2 Corinto 5:21; 1 Pedro 2:24) Baleg so epekto na satan tan balibali resulta ta naabsuelto ed sentensian patey iray anak nen Adan, tan ekalen na dondon so mismon panlalapuan na kasalanan. a​—Roma 5:16.

12. Mangiter na ilustrasyon no panon ya say pambayar ed sakey ya utang et nagunggonaan so amayamay.

 ¹² Niay sakey ya ilustrasyon: Imadyin mon manaayam ka ed baley ya maslak na taga ditan et mantratrabaho ed sakey a baleg ya pabrika. Baleg so sueldo tan mainawa so bilay yo. Pero biglan nankapot so pabrika ta walay manager ya nankurakot kanian a-bankrupt so kompanya. Abalangan kayoy trabaho tan anggapo lay nagastos yo ed inagew-agew. Dakel so nanirap kaiba lay kaasawaan, ananak, tan anggan saray arum nin negosyante. Wala kasi solusyon? On! Walay sakey ya mayaman tan maomaong ya too ya tinmulong. Amta to ya baleg so nitulong na samay pabrika. Tan nakakasian to met iray empleyado tan saray pamilya da. Kanian binayaran toy amin ya utang na kompanya tan nilukasan to lamet so pabrika. Lapud impanbayar ed sakey ya utang, nainawaan so amayamay ya empleyado, saray pamilya da, tan saray arum nin negosyante. Mipadpara, agunggonaan so minilyon ya totoo nen binayaran nen Jesus so utang nen Adan.

13, 14. (a) Panon ya inter nen Jehova so dondon parad totoo? (b) Siopa so pambayaran na dondon, tan akin ya kailangan itan ya bayaran?

¹³ Si Jehova labat so makapangiter na “Kordero . . . a mangekal ed kasalanan na mundo.” (Juan 1:29) Pero, aglabat basta angibaki so Dios na anggan siopan anghel ya mangiligtas ed totoo. Imbes, say imbaki To et samay pinsanan tan sankaabigan ya makapangebat ed akusasyon nen Satanas ed saray lingkor To. Balbaleg so insakripisyo nen Jehova nen imbaki toy alenleneg ya  Anak to, samay “panliliketan to ed kada agew.” (Proverbio 8:30) Mabulbulos met so Anak na Dios ya ‘taynan so amin a walad sikato’ diad tawen. (Filipos 2:7) Mamilagron inyalis nen Jehova so bilay na panguloan ton Anak ed panag-anakan na Judion birhen ya si Maria. (Lucas 1:27, 35) Bilang too, sikatoy atawag ya Jesus. Pero no legal so pantotongtongan, nayari met ya natawag ya komaduan Adan ta eksakton kapetekan to si Adan. (1 Corinto 15:45, 47) Kanian sarag nen Jesus ya iter so perpekton bilay to bilang panondon ed makasalanan ya totoo.

¹⁴ Siopa so pambayaran na dondon? Espisipikon imbaga na Salmo 49:7 ya ibayar so dondon “ed Dios.” Pero di ba si Jehova so angiyuksoy na dondon? On, pero aliwa ’tan ya singa ka angalay kuarta ed bulsam insan mo inkarga ed biek ya bulsam. Tandaan tayo ya say dondon et aliwan pansalatan labat na duaran bagay, noagta legal iyan transaksion. Nen inter nen Jehova so dondon, anggano grabe so impansakripisyo to, pinatunayan to ya anggan sikato et uunoren toy perpekton hustisya to.​—Genesis 22:7, 8, 11-13; Hebreo 11:17; Santiago 1:17.

15. Akin et kailangan nin manirap tan ompatey si Jesus?

¹⁵ Diad bandad gapo na 33 C.E., pinmayag si Jesu-Kristo ya manirap pian nabayaran to may dondon. Sikatoy inaresto lapud palson akusasyon, hinusgaan dan nankasalanan, impasen dan kriminal, tan impasak dad panamairapan ya poste. Kailangan ni kasin manirap ya maong si Jesus? On, pian naebatan to may akusasyon nen Satanas tungkol ed katooran na saray lingkor na Dios. Makapainteres ta ag-inabuloyan na Dios so ugaw  nin si Jesus ya napatey nen Herodes. (Mateo 2:13-18) Pero nen baleg la, sarag to la ray graben panangataki nen Satanas ta malinew lad sikato tan natatalosan to la ray isyu. b Lapud nansiansian “matoor, andiay kasalanan, ag-arutakan, biig ed saray makasalanan” si Jesus, anggano grabe so impanmaltrato dad sikato, pinsanan ton pinatunayan ya wala ray lingkor nen Jehova ya manmatoor anggan nasubok. (Hebreo 7:26) Kanian manaya oniay inyeyag nen Jesus antis na impatey to: “Asumpal la!”​—Juan 19:30.

16, 17. (a) Panon ya sinumpal nen Jesus so kimey to ya manondon? (b) Akin ya kailangan ya ‘onarap si Jesus ed Dios parad sikatayo’?

¹⁶ Kailangan ya sumpalen nen Jesus so kimey ton manondon. Diad samay komatlon agew na impatey nen Jesus, sikatoy binilay nen Jehova. (Gawa 3:15; 10:40) Lapud sayan makapadinayew ya agawa, aglabat benendisyonan nen Jehova so impanmatoor na Anak to, noagta inikdan to met na pagkakataon ya nasumpal so kimey ton manondon bilang Atagey ya Saserdote na  Dios. (Roma 1:4; 1 Corinto 15:3-8) Oniay impaliwawa nen apostol Pablo: “Sanen sinmabi si Kristo bilang atagey a saserdote . . . , sikatoy pinsanan a linmoob ed masanton pasen, a say awit to et aliwan dala na saray kanding tan kilaw a kalakian a baka noagta say mismon dala to, tan diad panamegley to et agamoran tayoy andi-anggaan a kililiktar. Ta si Kristo et linmoob diad mismon tawen, aliwan diad sakey a masanton pasen a ginawa na too, a mangirerepresenta labat ed samay tua, kanian sikatoy onaarap la natan ed Dios parad sikatayo.”​—Hebreo 9:11, 12, 24.

¹⁷ Agsarag ya awiten nen Kristo so literal ya dala to ed tawen. (1 Corinto 15:50) Imbes, inawit to so isisimbolo na dala to: say legal ya bili na insakripisyo ton perpekton bilay to bilang too. Insan, nen inmarap ed Dios, pormal ton impresenta so bili na bilay to bilang dondon parad makasalanan ya totoo. Kasin inawat nen Jehova itan ya bagat? On, tan napatnagan itan nen Pentecostes 33 C.E., nen nikalbo so masanton espiritu ed manga 120 ya disipulo diad Jerusalem. (Gawa 2:1-4) Talagan makapalikliket itan, pero gapo ni labat itan na saray balibalin bendisyon ya naawat na saray lingkor na Dios lapud dondon.

18, 19. (a) Anton duaran grupo so nabendisyonan lapud pikakareenan, ya nagmaliw a posible panamegley na dala nen Kristo? (b) Lapud dondon, anto ran bendisyon so naaawat natan tan diad arapen na “baleg ya ulop”?

¹⁸ Diad samay sulat nen apostol Pablo ed saray taga-Colosas, impaliwawa to ya labay na Dios a “makapikareenan ed Sikato so amin ni ran bengatla.” Nagmaliw  iyan posible panamegley na dala nen Jesus ya impaagus ed panamairapan ya poste. Impaliwawa to met ya walay duaran grupo ya mikareenan ed Dios, “saray bengatlan walad tawen” tan “saray bengatlan walad dalin.” (Colosas 1:19, 20; Efeso 1:10) Say unonan grupo et say 144,000 a Kristiano ya naikdan na ilalon manlingkor ed tawen bilang saserdote tan arari, tan uleyan day dalin kaibay Kristo Jesus. (Apocalipsis 5:9, 10; 7:4; 14:1-3) Panamegley da, diad loob na sanlibon taon et kalkalnan nalikna na saray maunor ya totoo diad dalin iray bendisyon na dondon.​—1 Corinto 15:24-26; Apocalipsis 20:6; 21:3, 4.

¹⁹ “Saray bengatlan walad dalin” et saray totoon panliketan day perpekton bilay diad Paraison dalin. Sikara may tinawag ed Apocalipsis 7:9-17 ya “baleg ya ulop” ya makaligtas ed onsasabin “baleg a kairapan.” Pero agda la kailangan so manalagar pian na-enjoy da ray bendisyon na dondon. “Nilinisan da [la] ray kawes da tan pinaputi da iratan ed dala na Kordero.” Lapud pananisia dad dondon, natan ni labat et makakaawat la ra na espiritual iran bendisyon na satan ya maaron probisyon. Tan sikaray impasen ya matunong bilang kakaaro na Dios! (Santiago 2:23) Lapud sakripisyo nen Jesus, sarag da lay “onasingger . . . ed trono na agnaparaan a kaabigan na Dios tekep na bulos a panagsalita.” (Hebreo 4:14-16) No mankasalanan ira, perdonaen ira na Dios. (Efeso 1:7) Anggano aliwa ran perpekto, sarag day nawalaan na malinis a konsiensia. (Hebreo 9:9; 10:22; 1 Pedro 3:21) Kanian agtayo la kailangan so manalagar pian makapikareenan ed Dios, ta natan ni labat et sarag to la! (2 Corinto 5:19, 20) Legan na Sanlibon Taon, kalkalna iran ‘nibulos ed impakaaripen ed kabubulok’ anggad nawalaan ira na “maglorian kawayangan bilang ananak na Dios.”​—Roma 8:21.

20. Antoy epekto ed sika no iisipen moy dondon?

²⁰ “Salamat ed Dios diad panamegley nen Jesu-Kristo” lapud dondon! (Roma 7:25) Makapabilib so inkasimpli to, balet makapadinayew met so karakep to. (Roma 11:33) No isipen tayon maong so dondon, seguradon na-touch tayo, tan mas onapit tayo ed Dios na hustisya. Singa say salmista, dakel so rason tayon idayew si Jehova, say Dios ya ‘inaro toy inkatunong tan hustisya.’—Salmo 33:5.