1-3. (a) Akin et akautang tayo ed si Jehova? (b) Antoy kekerewen na maaron Nanligtas ed sikatayo?

 IMADYIN mon agka makaalis ed onlulubog ya barko. Say antam, anggapo lay pag-asam. Pero walay angagwat ed sika tan inligtas to ka. Seguradon akaingas ka nen wala ka lad life boat tan imbaga tod sika: “Ligtas ka la”! Di ba misatsalamat ka ta utang moy bilay mod sikato?

² Singa ontan so ginawa nen Jehova parad sikatayo. Utang tayoy bilay tayo ed sikato ta inter to so dondon pian niligtas tayo ed kasalanan tan patey. No ipanengneng tayoy pananisia ed satan ya mablin bagat, naperdona iray kasalanan tayo tan nawalaan tayoy bilay ya anggapoy anggaan. (1 Juan 1:7; 4:9) Singa naaralan tayod Kapitulo 14, say dondon so sankabiskegan ya ebidensya na panangaro tan hustisya nen Jehova. Kanian antoy ibales tayo ey?

³ Duga labat ya samay maaron Nanligtas ed sikatayo so mangibaga no antoy kekerewen to. Oniay imbaga nen Jehova panamegley nen propeta Miqueas: “Imbaga to lad sika, O too, no antoy maabig. Tan anto so kakaukolanen nen Jehova ed sika? Say pangipatnag mo labat na inkahustisya, pangarom ed katooran, tan say mapaabeban panakar mo a kaibay Dios mo!” (Miqueas 6:8) Imanoen ya say sakey ed saray kekerewen nen Jehova ed sikatayo et say ‘pangipatnag na inkahustisya.’ Antoy gawaen tayo?

4. Panon tayon amta ya iilaloan nen Jehova ya manbilay tayo base ed matunong iran estandarte to?

⁴ Iilaloan nen Jehova ya manbilay tayo base ed saray estandarte to ed no antoy duga tan aliwa. Lapud patas tan matunong iray estandarte to, ipapanengneng tayoy hustisya tan inkatunong no uunoren tayo iratan. “Aral yoy manggawa na maabig, ikana yoy inkahustisya,” so kuan na Isaias 1:17. Onia ni bilin na Salita na Dios, “anap yoy inkatunong.” (Sofonias 2:3) Papasesegen to itayo met ya ‘isulong so balon personalidad a pinalsa unong ed linawa na Dios tan mitunosan ed saray kakaukolanen na tuan inkatunong.’ (Efeso 4:24) Say tuan inkatunong odino tuan inkahustisya et aarawian toy inkaruksa, karutakan, tan imoralidad, ta saraya et kabaliktaran na inkasanto.​—Salmo 11:5; Efeso 5:3-5.

5, 6. (a) Akin et aliwan makapabelat iray estandarte nen Jehova? (b) Panon ya ipapanengneng na Biblia ya tuloytuloy ya proseso so panggaway inkatunong?

⁵ Kasin makapabelat iray matunong ya estandarte nen Jehova? Andi. No maapit tayo ed si Jehova, agtayo isipen ya mairap iray pagagawa to. Lapud inaro tayoy Dios tan amin ya kualidad to, sikatoy labay tayon napaliket. (1 Juan 5:3) Tandaan ya ‘aaroen nen Jehova iray gawan matunong.’ (Salmo 11:7) No talagan labay tayon aligen so hustisya odino inkatunong na Dios, kailangan tayon aroen iray aaroen to tan busolen iray bubusolen to.​—Salmo 97:10.

⁶ Aliwan mainomay parad agperpekton totoo so manggaway inkatunong. Kailangan tayon lakseben so daan ya personalidad pati saray mauges ya kagagawa na satan tan isulong tayo so balo. Ibabaga na Biblia ya  say balon personalidad et “napapasimbalo” panamegley na suston kakabatan. (Colosas 3:9, 10) Ipapanengneng na salitan “napapasimbalo” ya tuloytuloy ya proseso so pangisulong na balon personalidad tan kaukolan so pansagpot. Lapud agtayo perpekto, no maminsan nayarin makanonot, makapangibaga, odino makagawa tayo na aliwa.​—Roma 7:14-20; Santiago 3:2.

7. Antoy dapat ya pangipasen tayo no makapankasalanan tayo anggano nansagpotan tayo lan gawaen so duga?

⁷ Antoy dapat ya pangipasen tayo no makapankasalanan tayo anggano nansagpotan tayo lan gawaen so duga? Siempre agtayo manbaraan ya aliwan masyadon seryoso may agawaan tayon kasalanan. Pero agtayo met onsusuko tan isipen ya agtayo la karapatdapat ya manlingkor ed si Jehova. Nanggaway paraan so maar-aron Dios tayo pian naperdona iramay talagan magbabawi. Oniay makapaseseg ya imbaga nen apostol Juan: “Insulat kod sikayo irayan bengatla pian agkayo makapankasalanan.” Pero oniay realistikon inyarum to: “Balet, no walay mankasalanan [lapud atawir tayon ag-inkaperpekto], walay sakey a mananulong tayo a kaiba na Ama, salanti, si Jesu-Kristo.” (1 Juan 2:1) On, inter nen Jehova so dondon bagat nen Jesus pian makapanlingkor tayo nid sikato anggano makasalanan tayo. Lapud satan, seguradon labay tayon iter so ‘the best’ tayo ed si Jehova pian napaliket tayo.

8, 9. Panon ya nipapanengneng na panangipulong na maong a balita so inkahustisya nen Jehova?

⁸ Say sakey a paraan pian nipanengneng tayoy hustisya tan naalig tayoy Dios et no makuli tayon ipulong  so maong a balita na Panarian. Antoy koneksion na inkahustisya nen Jehova tan maong a balita?

⁹ Segurado ya agderalen nen Jehova iyan mauges ya sistema anggad agto ni angiter na pasakbay. Oniay impropesiya nen Jesus ya nagawa legan na panaon na anggaan: “Kaukolan a nipulong nin unona so maong a balita diad amin a nasyon.” (Marcos 13:10; Mateo 24:3) Ipapanengneng na salitan “unona” ya wala ray onsublay ya nagawa no nipulong lay maong a balita ed interon mundo. Kaiba ed saray nagawa so impasakbay ya baleg a kairapan. Labay ton ibaga, naderal iray mauges tan onggapo lay matunong a balon mundo. (Mateo 24:14, 21, 22) Segurado ya anggapo lay anggan siopa ya mangakusa ed si Jehova ya aliwan patas so impantrato to ed saray mauges. Panamegley na panagpulong a kimey, papasakbayan to ni ra tan iikdan to ray pagkakataon ya manguman pian ag-ira komon naderal.​—Jonas 3:1-10.

10, 11. Panon tayon naaalig so hustisya nen Jehova no ipupulong tayoy maong a balita?

¹⁰ Panon tayon naaalig so inkahustisya nen Jehova no ipupulong tayoy maong a balita? Unona, duga labat ya tulongan tayoy arum ya naligtas. Pawilen tayo pa may ilustrasyon ya niligtas ka ed onlulubog ya barko. Nen wala ka lad life boat, segurado ya labay mon tulongan so arum ya wala nid danum. Mipadpara, obligasyon tayon tulongan iramay nalelener ed “danum” na sayan mauges ya mundo. Tua, dakel so agmangawat ed mensahe tayo. Pero legan ya manaanos ni si Jehova, responsibilidad tayo ya ‘ikday pankanawnawan magbabawi’ iray totoo pian niligtas ira.​—2 Pedro 3:9.

¹¹ No ipupulong tayoy maong a balita ed amin, aaligen  tayoy hustisya nen Jehova ta anggapoy lalabien tayo. Tandaan, “anggapoy lalabien na Dios, noagta diad balang nasyon et makapaliket ed sikato so toon ontatakot ed sikato tan manggagaway duga.” (Gawa 10:34, 35) No labay tayon aligen so hustisya To, agtayo dapat huhusgaan iray totoo. Imbes, ipulong tayoy maong a balita ed amin, antokaman so lahi da, kipapasen dad bilay, mairap man o mayaman. Kanian ikdan tayoy pagkakataon so amin ya malabay ya ondengel tan mangawat na maong a balita.​—Roma 10:11-13.

12, 13. (a) Akin et agtayo basta-basta huhusgaan so arum? (b) Antoy labay ya ibaga nen Jesus ed samay bilin ton “agkayo la manguukom” tan “agkayo la mangaakusa”? (Nengnengen met so paimanod leksab.)

¹² Nipapanengneng tayo met so inkahustisya no tratratoen tayoy arum ya singa ed pantratrato nen Jehova ed sikatayo. Matmainomay tayon husgaan so arum, balawen ira lapud lingo da, tan kuestionen so motibo da. Labay tayo kasi ya pandudaan nen Jehova so motibo tayo, odino balawen to itayo lapud alingo tayo? Siempre andi! Aliwan ontan so panagtrato nen Jehova ed sikatayo. Oniay intepet na salmista: “No saray lingo so babantayan mo, O Jah, siopa kasi so makaalagey, O Jehova?” (Salmo 130:3) Seguradon misatsalamat tayo ed si Jehova ta patas tan mapangasi, tan agto manpopokus ed saray lingo tayo. (Salmo 103:8-10) Panon sirin so pantrato tayo ed arum?

¹³ No nalingo ra, naalig tayoy hustisya tan panangasi nen Jehova no agtayo ra basta-basta huhusgaan, lalo la no ag-itayo met nalalanor odino agmet masyadon  seryoso so agawaan da. Diad samay Sermon nen Jesus ed Palandey, oniay impasakbay to: “Agkayo la manguukom ta pian agkayo naukom.” (Mateo 7:1) Base ed salaysay nen Lucas, oniay inyarum nen Jesus: “Agkayo la mangaakusa, pian agkayon balot naakusaan.” a (Lucas 6:37) Amta nen Jesus ya walay tendensia na saray aliwan perpekton totoo ya magmaliw ya mapanghusga. Kanian no wala ed saray ondedengel ed sikato so niyugali to lay manhusga, kailangan ton tundaan itan.

14. Anto ray rason akin et ‘agtayo la dapat uukomen’ so arum?

¹⁴ Akin et ‘agtayo la dapat uukomen’ so arum? Say sakey ya rason et anggapoy karapatan tayon gawaen itan. Oniay panonot nen disipulon si Santiago: “Saksakey so Manangiter na Ganggan tan Ukom”​—si Jehova. Insan oniay intepet to: “Siopa ka a mangukom ed kaparam a too?” (Santiago 4:12; Roma 14:1-4) Niarum ni, lapud agtayo perpekto, nayarin aliwan patas so pangukom tayod arum. Ompan agtayo nanengneng iray balibalin kualidad da ta walay agtayo nagugustoan ed sikara, pakalikna tayo et aliway impantrato dad sikatayo, naiinggit tayod sikara, odino iisipen tayon mas maong tayo nen say sikara. Wala met iray kakulangan tayo, tan no isipen tayo iratan, agtayo husgaan so arum. Agtayo makabasay puso tan agtayo amtay amin ya dadalanen  na arum. Kanian, wala kasi karapatan tayo ya ibaga ya ag-iiter na saray agagi tayo so ‘the best’ da diad panlilingkor dad si Jehova odino aliway motibo da? Siempre anggapo! Balibali sirin no aligen tayoy Jehova. Agtayo manpopokus ed saray lingon nagagawaan na saray agagi tayo, imbes manpokus tayo ed saray maabig ya nagagawaan da.

15. Anto ran panagsalita tan panagtrato so agnayari ed saray manlilingkor ed Dios, tan akin?

¹⁵ Diad saray kapamilya tayo balet ey? Makapaermen ta diad sayan mundo natan, nagagawa so sankagrabian ya panaghusga diad lugar ya ditan komon nalikna so kareenan​—diad abung. Dakel so nababalitaan tayo ya maruksan asawan laki, asawan bii, odino atateng ya  singa ra ukom ya “sesentensiaan” da ray kapamilya da panamegley na ansasakit iran salita odino bubugbogen da ra. Pero diad saray lingkor nen Jehova, ag-ira dapat manbalaw, mangibagay ansasakit iran salita, tan agda met dapat maltratoen so arum. (Efeso 4:29, 31; 5:33; 6:4) Agto labay ya ibaga ya no wala ka lad abung et ontunda la imay bilin nen Jesus ya “agkayo la manguukom” tan “agkayo la mangaakusa.” Tandaan ya say labay ya ibaga na pangipanengneng na hustisya et dapat tayon tratoen so arum ya singa ed pantratrato nen Jehova ed sikatayo. Anggan kapigan et agnagmaliw ya maruksa si Jehova ed sikatayo. Imbes, sikatoy “maar-aro” ed saramay mangaaro ed sikato. (Santiago 5:11) Balibalin aligen so alimbawa to!

16, 17. (a) Antoy iilaloan nen Jehova ed saray elder? (b) Antoy gawaen no agan talaga mangipanengneng na tuan panagbabawi imay nankasalanan, tan akin?

¹⁶ Responsabilidad tayon amin ya ipanengneng so hustisya, pero nagkalalo la na saray elder ed kongregasyon. Imanoen so propesiya tan deskripsion nen Isaias tungkol ed “saray prinsipe” odino elder: “Sakey ya ari so manuley parad inkatunong, tan saray prinsipe so manuley parad inkahustisya.” (Isaias 32:1) On, iilaloan nen Jehova ya aligen na saray elder so inkahustisya to. Antoy gawaen da?

¹⁷ Amta na sarayan maespiritual tan kualipikadon lalaki ya kaibad hustisya odino inkatunong so pansiansian malinis na kongregasyon. No maminsan, kailangan ya mangukom iray elder ed kaso na saray  akagaway seryoson kasalanan. Pero tatandaan da ya say hustisya na Dios et mangipapanengneng na panangasi anggad posible. Kanian tulongan da may nankasalanan ya magbabawi. Pero panon to no agan talaga mangipapanengneng na tuan panagbabawi anggano mansasagpot iran sikatoy tulongan da? No ontan, kailangan ya ipanengneng na saray elder so perpekton hustisya nen Jehova tan unoren imay bilin ed Salita to: “Ekal yo ed limog yo so mauges a too.” Labay ton ibaga, sikatoy agla kabiangan na kongregasyon. (1 Corinto 5:11-13; 2 Juan 9-11) Naeermenan iray elder no gawaen da itan, pero amta da ya kailangan itan pian napansiansia so moral tan espiritual ya kalinisan na kongregasyon. Pero ag-ira naeekalay pag-asa ya diad arapen et magbabawi tan ompawil ed kongregasyon imay nankasalanan.​—Lucas 15:17, 18.

18. Antoy aglilingwanan na saray elder, no mangiiter iray base ed Biblian simbawa?

¹⁸ Kaiba met ed hustisya nen Jehova so pangiter na saray elder na base ed Biblian simbawa, no nakaukolan. Siempre, aliwan say lingo na arum so nenengnengen na saray elder tan agmet ira basta-basta manisimbawa. Pero no walay sakey ya agi ya agto amta ya aliwa la manayay aarapen to, tatandaan na saray elder ya say hustisya na Dios et aliwan maruksa odino anggapoy pibabali to. Kanian sikatoy ‘ipetek da diad espiritu na inkaulimek.’ (Galacia 6:1) Agda pantatamian odino pansasalitaan na ansakit imay akagawa na lingo. Imbes, maaro dan simbawaen tan pasesegen. Anggano mangiter na direktan panangipetek iray elder, ya prangka dan ibaga no antoy pansumpalan na makapuy a kagagawa, agda lilingwanan ya karnero nin siansia nen Jehova  iman ya agi. b (Lucas 15:7) No say bilin odino panangipetek et inter lapud panangaro, baleg so posibilidad ya nipetek imay akagawa na lingo.

19. Anto ray dedesisyonan na saray elder, tan iner da dapat ibase iratan?

¹⁹ Mabetbet ya manggagaway desisyon iray elder tan walan walay epekto na saratan ed agagi. Singa bilang, panapanaon et manmimiting iray elder pian amtaen  no kasin kualipikadon irekomenda iray arum ya brother ya magmaliw ya elder odino ministeryal ya lingkor. Amta na saray elder ya dapat patas ira kanian say rekomendasyon da et ibabase da ed Biblia aliwan diad personal ya opinyon da. “Anggapon balot so papaboran odino lalabien” da.​—1 Timoteo 5:21.

20, 21. (a) Antoy pansasagpotan na saray elder tan akin? (b) Antoy gawaen na saray elder pian natulongan iray maer-ermen o nadi-depress?

²⁰ Ipapanengneng na saray elder so hustisya nen Jehova diad arum ni ran paraan. Kayarin impasakbay nen Isaias ya saray elder et manlingkor “parad inkahustisya,” onia ni inyarum to: “Balang sakey ed sikara et magmaliw a singa amotan ed dagem, sakey a pansaniban no bagyo, singa agus na danum ed dalin ya anggapoy danum, singa anino na sakey a baleg a bato ed amagaan a dalin.” (Isaias 32:1, 2) Kanian pansasagpotan na saray elder ya pasesegen tan ligliwaen iray agagi.

²¹ Diad karakel na makapa-stress ya problema natan, kakkaukolan tayo so panamaseseg. Sikayo ran elder panon yon tulongan iray naeermenan odino nadi-depress? (1 Tesalonica 5:14) Dengel yo ra, tan ipasen yoy sarili yo ed situasyon da. (Santiago 1:19) Ompan kakkaukolan dan ibagay panaaburidoan da ed sakey ya pantitiwalaan da. (Proverbio 12:25) Ipaseguro yod sikara ya kailangan, pabpablien, tan inar-aro ira nen Jehova tan saray agagi. (1 Pedro 1:22; 5:6, 7) Niarum ni, sarag yo ran ipikasi tan kaiban manpikasi. Seguradon napaseseg ira no say sakey ya elder et narengel dan impapuson manpikasi parad sikara. (Santiago 5:14, 15) On, naiimano na Dios na hustisya so panangaro tan sagpot yon tulongan iray nadi-depress.

22. Panon tayon naalig so inkahustisya nen Jehova tan antoy resulta?

 ²² Talagan napaapit tayo ed si Jehova no aligen tayoy inkahustisya to, no uunoren tayo iray matunong ya estandarte to, no ipupulong tayoy manangiliktar bilay ya maong a balita, tan manpopokus tayod kamaongan na arum imbes ya diad saray lingo ra, ipapanengneng tayoy inkahustisya na Dios. Sikayo ran elder, no proprotektaan yoy kalinisan na kongregasyon, no mangiiter kayoy makapaseseg ya simbawa, no patas iray desisyon yo, tan no papasesegen yo ray maer-ermen, nipapanengneng yoy inkahustisya na Dios. Seguradon naliliketan si Jehova no nanenengneng to ray totoo to ya gagawaen day anggaay nayarian da ya ipatnag so inkahustisya!