1, 2. Akin et akapasnok si Jesus?

 SANKAPATNAGAN ya makakapasnok si Jesus tan walay makatunongan ya rason. Seguro, agmo naimadyin ya si Jesus ya mauy-uyamon too et mamasnok. (Mateo 21:5) Pero perpekton akontrol nen Jesus so emosyon to ta say sanok to et akabase ed inkatunong. a Pero akin kasi et akapasnok si Jesus anta aliwa met ya misasanok? Lapud graben ag-inkahustisya.

² Inar-aro nen Jesus so templo diad Jerusalem. Diad interon mundo, atan labat so sagradon pasen ya indedika parad panagdayew ed Ama to ed tawen. Saray Judio ya nanlalapud nanduruman lugar et arawi biabiahien da pian mandayew ditan. Anggan saray aliwan Judio ya mandadayew ed si Jehova et oonlad sular na templo​—say lugar ya sarag da labat ya laen. Balet diad gapo na ministeryo nen Jesus, sikatoy linma ed templo tan walay anengneng ton makapabigla. Singa tindaan so templo, aliwan pasen a panagdayewan! Dakdakel so manlalakoy ayep tan managsalat na kuarta. Pero dinan diman so ag-inkahustisya ey? Amay gagawaen dan panagsaol ed saray totoo, ya singa da la ra tatakewan diad mismon templo na Dios! Panon ey?​—Juan 2:14.

3, 4. Anton panagsaol so agawa diad abung nen Jehova, tan panon itan ya impetek nen Jesus?

 ³ Nanggaway batas iray lider na relihyon ya saksakey labat ya klase na barya so nayarin nausar ya pambayar na buis ed templo. Kailangan nin isalat na saray bisita, ya nanlapud ararawin lugar, so kuarta ra pian nawalaan na ontan ya barya. Kanian saray managsalat na kuarta et angipuesto la na saray lamisaan da diad templo. Tan kada transaksion et walay patong. Maksil met so kita na saray managlakoy ayayep. Sarag komon na saray bisita so mangaliw na bagat ed anggan siopan negosyante diad syudad. Pero kasabi dad templo, ag-itan awaten na saray opisyal na templo ta wala kunoy depekto to. Balet no diad templo so pangaliwan, seguradon awaten da. Lapud saya, napipilitan iray totoo ya mangaliw na bagat diad templo ya agaylay bili. b Aliwa labat itan ya graben panagsaol. Imbes, panagtakew la itan!

⁴ Agnitepel nen Jesus iman ya ag-inkahustisya ta say templo et abung ya mismo nen Ama to! Kanian sikatoy nanggawa na panagsiplat iran lubir tan pinapaway tod templo iray baka tan karnero. Insan to imbabalintuag iray lamisaan na saray managsalat na kuarta. Imadyin mo pa ray nitaytayak ya barya. Oniay ingganggan to ed saramay manlalako na malapati: “Ekal yo iraya dia!” (Juan 2:15, 16) Anggapoy nampakpel ya kinmontrad sikato.

5-7. (a) Nen walad tawen si Jesus, panon ton naaralan so hustisya nen Jehova, tan antoy naaralan tayod alimbawa to? (b) Panon ya pinatunayan nen Jesus ya aliwa iray akusasyon nen Satanas, tan antoy gawaen to diad arapen?

⁵ Ag-abayag, pinmawil iramay negosyante. Kayari manga taloy taon, inasikaso lamet nen Jesus iyan ag-inkahustisya. Diad sayan pagkakataon, inulit to imay imbagan mismo nen Jehova ya ginawa dan “ungib na matatakew” so abung To. (Jeremias 7:11; Mateo 21:13) Nen anengneng nen Jesus so pansasaol dad saray totoo tan panudutak dad templo na Dios, alikna to imay alikna nen Ama to. Agti la ’tan pankelawan ta minilyon a taon ya sankaiba ira nen Ama to ed tawen. Kanian perpekto ton naalig so panmoria nen Jehova ed hustisya. Dugaruga labat sirin ed sikato imay panangibaga ya, “Like father, like son.” Kanian no labay tayon natalosan so hustisya nen Jehova, say sankaabigan ya paraan et aralen tayoy alimbawa nen Jesu-Kristo.​—Juan 14:9, 10.

⁶ Wadman so saksakey ya Anak nen Jehova nen inakusaan nen Satanas si Jehova ya matila tan kinuestion toy paraan na panuuley To. Graben panagderal iman! Arengel met nen Jesus imay akusasyon nen Satanas ya anggapo kunoy manlingkor ed si Jehova lapud panangaro. Seguradon asakisakitan si Jesus ed saratan ya akusasyon ed Ama to. Kanian nen naamtaan nen Jesus ya sikato so usaren nen Ama to pian patunayan ya saratan ya akusasyon et aliwa, seguradon agaylay liket to! (2 Corinto 1:20) Antoy gawaen to ey?

⁷ Singa naaralan tayo lad Kapitulo 14, angiter si Jesu-Kristo na pinsanan tan sankaabigan ya ebat ed akusasyon nen Satanas tungkol ed katooran na saray lingkor nen Jehova. Kanian angiletneg si Jesus na basiyan pian  nalinisan so reputasyon na masanton ngaran na Dios ya Jehova ed amin ya panagderal, kaiba lay katilaan ya palpak kunoy paraan na pananguley To. Bilang Manunan Manangitonton, seguroen nen Jesus ya niwalay hustisya diad tawen tan dalin. (Gawa 5:31) Diad amin ya ginawa tan imbangat to nen wadiad dalin, inalig to so hustisya na Dios. Oniay imbaga nen Jehova tungkol ed sikato: “Iyan kod sikato so espirituk, tan ipalinew tod saray nasyon no anto so hustisya.” (Mateo 12:18) Panon iyan sinumpal nen Jesus?

8-10. (a) Panon ya imbangat na batas na saray Judion lider na relihyon ya busolen iray aliwan Judio tan bibii? (b) Lapud sarayan batas, akin et nairapan laingen iray totoo ya unoren so ganggan nen Jehova tungkol ed Sabaton?

⁸ Inar-aro nen Jesus so Ganggan nen Jehova tan impanengneng to itan ed impanbilay to. Pero pinikewet na saray lider na relihyon so Ganggan tan aliway impangiyaplika dad satan. Imbaga nen Jesus ed sikara: “Pakaskasi kayo la, sikayo ran eskriba tan Fariseo a mansimpisimpitan! . . . Ibabaliwala yo so mas ambelat iran pamaakaran na Ganggan, salanti, say inkahustisya tan panangasi tan katooran.” (Mateo 23:23) Ginagala na saraman ya managbangat na Ganggan na Dios ya pikeweten so hustisya pian ag-itan natalosan na totoo. Antoy ginawa da? Nia ray pigaran alimbawa.

⁹ Ingganggan nen Jehova iray totoo to ya ag-ira miuulop ed saray kakaabay dan paganon bansa. (1 Arari 11:1, 2) Pero imbangat na arum ya panatikon lider na relihyon ya busolen so amin ya aliwan Judio. Onia  ni ingen so ganggan ya nabasad Mishnah: “Agmo ititilak so baka ed pundoan na saray aliwan Judio ta ompan mi-sex irad satan.” Say ontan ya diskriminasyon ed amin ya aliwan Judio et agmakatarungan tan kontra ed Mosaikon Ganggan. (Levitico 19:34) Ibabangat met na saray batas da ya ipasen ya abeba iray bibii. Igaganggan da ya agdapat mibansag ya manakar so asawan laki ed asawa to. Imbes, dapat et walad benegan to. Binagaan met iray lalaki ya ag-ira mitotongtong ed saray bibii diad publiko, anggano asawa da ni. Singa saray aripen, agmet pinayagan iray bibii ya mantestigo ed korte. Wala ni ingen so pikakasi na saray lider na relihyon ya pisasalamatan day Dios ta aliwa ran bii.

¹⁰ Lapud karakel na saray batas ya ginawa na saray lider na relihyon, agla ingen natatalosan na totoo so Ganggan na Dios. Singa bilang, diad samay Ganggan tungkol ed Sabaton, simpli labat imay imbawal ed saray Israelita. Ag-ira naabuloyan ya mantrabaho no Sabaton pian walay panaon da ya mandayew ed Dios, onapit ed sikato, tan manpainawa. Balet ginawa na saray Fariseo ya mair-irap itan ya unoren. Impasen da ya karapatan dan ibaga no antoy kaiba ed “trabaho.” Imbaga da ya walay 39 ya nanduruman trabaho, singa say pan-ani odino pan-hunting na ayep. Lapud sarayan kaaruman ya batas, naguguloan la ingen iray totoo no antoy sarag tan agda sarag ya gawaen no Sabaton. No amatey so sakey na garapata diad agew na Sabaton, nibaga la kasin panag-hunting na ayep iman? No nan-arurot na sankaakop ya trigo so sakey pian walay kanen to legan ya manaakar, panag-ani la kasi iman? No pinaabig toy sakey ya mansasakit, nibaga la kasin mantratrabaho ed saman? Amayamay so ginawa dan istrikto tan mas komplikadon batas pian naebatan iratan.

11, 12. Panon ya imbangat nen Jesus ya aliwan base ed Kasulatan iray tradisyon na saray Fariseo?

 ¹¹ Panon ya tinulongan nen Jesus iray totoo ya natalosan no anton talaga so hustisya? Diad impanbangat tan impanbilay to, makpel ton pinatunayan ya alingo-lingo iray lider na relihyon. Pantongtongan tayon unona iray bangat to. Oniay imbaga to tungkol ed amayamay tan kaaruman ya batas ya ginawa na saray lider na relihyon: “Gagawaen yon andi-kakanaan so salita na Dios lapud tradisyon ya impatawir yo.”​—Marcos 7:13.

¹² Malinlinew ya imbangat nen Jesus ya aliwan duga so pangipapasen na saray Fariseo ed ganggan ya Sabaton. Diad tua, agda atalosan no antoy gagala na satan ya ganggan. Impaliwawa nen Jesus, say Mesias, ya sikato so “Katawan na Sabaton.” Kanian walay karapatan ton manpaabig diad agew na Sabaton. (Mateo 12:8) Pian nidanet iyan punto, sikatoy mamilagron amaabig ed agew na Sabaton diad arap na dakel a totoo. (Lucas 6:7-10) Sample ni labat itan na pamaabig to diad interon mundo legan na Sanlibon Taon ya Uley to. Atan ya panaon so sankarakepan ya Sabaton ta amin ya matoor ya totoo et makapanpainawa la ed abaybayag lan impakaaripen dad kasalanan tan patey.

13. Anton ganggan so inggapo nen Kristo parad saray papatumbok to, tan antoy pidumaan na satan ed Mosaikon Ganggan?

¹³ Impalinew met nen Jesus no anton talaga so hustisya diad impangiter to na balon ganggan ya tinawag ya, “ganggan na Kristo.” (Galacia 6:2) Ginmapo itan nen asumpal toy ministeryo to diad dalin. Sayan balon ganggan et aliwan singa samay Mosaikon Ganggan ta aliwa iyan akabase ed saray dakel ya akasulat a ganggan, noagta diad saray prinsipyo o manunan katuaan. Pero wala met so kaibad satan ya direkta iran ganggan. Say  sakey ed saratan et tinawag nen Jesus ya “balon ganggan.” Imbangat to ray papatumbok to ya manaaroan ira ya singa impangaro tod sikara. (Juan 13:34, 35) Kanian say pakabidbiran ed amin ya manguunor ed “ganggan na Kristo” et say agmakasarilin panangaro.

14, 15. Panon ya impanengneng nen Jesus ya amta toy limitasyon na autoridad to, tan akin et makapaliket iyan naamtaan?

¹⁴ Aglabat imbangat nen Jesus so tungkol ed panangaro. Impanengneng to met so “ganggan na Kristo” diad paraan na impanbilay to. Pantongtongan tayo so taloran paraan no panon ya impalinew nen Jesus so hustisya panamegley na alimbawa to.

¹⁵ Unona, maal-alwar si Jesus pian anggapoy naagrabiado to. Seguro napapansin mo ya aliwa lan patas so trato na saray agperpekton totoo no atagtagey lay pakanengneng dad sarili ra tan no aabusoen da lay autoridad da. Ag-itan ginawa nen Jesus. Aminsan walay inmasingger ya laki ed si Jesus. Inkuan to: “Managbangat, ibagam pad agik ya iyapag to ak na tawir.” Antoy imbaga nen Jesus ey? “Siopay anuro ed siak bilang ukom odino manamegley ed sikayo?” (Lucas 12:13, 14) Antoy naaralan tayod sikato? Mas matalino tan marunong si Jesus nen say anggan siopa diad dalin. Tan anggapoy makapipara ed inter na Dios ya autoridad to. Pero ag-akibabali si Jesus ya nandesisyon parad satan ya too ta sikatoy ag-inikdan na Dios na ontan ya autoridad. Lanang ya mapaabeba si Jesus anggano nen wala ni ed tawen. (Judas 9) Nanengneng ed satan so balibalin personalidad nen Jesus. Mapaabeban nantiwala ya gawaen nen Jehova so duga.

16, 17. (a) Panon ya impanengneng nen Jesus so hustisya diad impangipulong to na maong a balita na Panarian na Dios? (b) Panon ya impanengneng nen Jesus ya kaibad hustisya to so panangasi?

 ¹⁶ Komadua, impanengneng nen Jesus so hustisya diad impangipulong to ed maong a balita na Panarian na Dios. Anggapoy pipilien to, makulikuli ton pinulongan so amin ya klase na totoo, mayaman man o mairap. Duma balet iray Fariseo ta impasen dan anggapoy kana na saray mairap tan ordinaryon totoo. Tinawag da ni ra ingen ya ʽam-ha·ʼaʹrets odino “totoo na dalin.” Makpel ya impetek nen Jesus itan ya ag-inkahustisya. Nen imbangat tod totoo so maong a balita, odino nen akirungo ed sikara, nen pinakan to ra, nen pinaabig to ra, o anggan nen pinaoli to ra, inalig to so Dios na hustisya ya say linawa To et niliktar so “amin a klase na totoo.” c​—1 Timoteo 2:4.

¹⁷ Komatlo, say hustisya nen Jesus et talagan mapangasi. Tinulongan to ray makasalanan. (Mateo 9:11-13) Tinulongan to ray totoon agda sarag ya protektaay sarili da. Singa bilang, ag-inabobonan nen Jesus iray lider na relihyon ed ibabangat dan agdapat pantiwalaan iray aliwan Judio. Diad tua, tinulongan tan imbangat toy arum ed sikara anggano say manunan angibakian ed sikato et saray Judio. Pinmayag ni ingen ya mamilagron paabigen so aripen na opisyal na armada na Roma. Say kuanto: “Anggapoy aromog kod Israel  a walaan na onian kabiskeg na pananisia.”​—Mateo 8:5-13.

18, 19. (a) Panon ya pinagalangan nen Jesus iray bibii? (b) Panon ya impanengneng nen Jesus ya mankonektaan so pakpel tan hustisya?

¹⁸ Sakey ni, ag-inalig nen Jesus imay pangituturing na totoo ed saray bibii. Imbes, makpel ton ginawa no antoy duga. Diad saman, ituturing iray Samaritana ya agmalinis ya singa met saramay arum nin aliwan Judio. Pero siansia nin agnan-alangan si Jesus ya pulongan imay Samaritana diad abay na bobon ed Sicar. Diad tua, ayan bii so sankaunaan ya direktan angibagaan nen Jesus ya sikato so impromisan Mesias. (Juan 4:6, 25, 26) Ibabaga na saray Fariseo ya agdapat ibangat ed bibii so Ganggan na Dios. Balet inusar nen Jesus so dakel ya oras tan biskeg to pian ibangat iray bibii. (Lucas 10:38-42) Tan anggano ibabangat na saray lider na relihyon ya agdapat mantestigo iray bibii ta ag-ira napantiwalaan, pinagalangan nen Jesus iray pigaran bibii na pribilehyo ya sankaunaan ya makanengneng ed sikato kayari inkioli to. Imbaga to ni ingen ed sikara ya ibaga da ed saray lalakin disipulo to iyan sankaimportantian ya agawa!​—Mateo 28:1-10.

¹⁹ On, impalinew nen Jesus ed saray totoo no anton talaga so hustisya. Aminpiga ton ginawa itan anggano delikado. Nanengneng tayod alimbawa nen Jesus ya kailangan so pakpel pian nidepensa so tuan hustisya. Dugaruga may impanawag ed sikato ya “say Leon a nanlapud tribu nen Juda.” (Apocalipsis 5:5) Tandaan, say leon et isisimbolo toy hustisya tan pakpel. Pero diad arapen, mas nipanengneng nen Jesus itan ta iletneg to so “inkahustisya diad dalin.”​—Isaias 42:4.

20, 21. Diad panaon tayo, panon ya sineguro na Mesianikon Ari ya niwalay hustisya diad interon dalin tan diad loob na Kristianon kongregasyon?

²⁰ Nen nagmaliw ya Ari na Panarian na Dios si Jesus nen 1914, wala ray ginawa to pian niwalay hustisya diad dalin. Anto iratan? Singa bilang, sineguro to ya nasumpal imay propesiya ya walad Mateo 24:14. Imbangat na saray papatumbok nen Jesus ed amin ya bansa so katuaan tungkol ed Panarian nen Jehova. Singa si Jesus, patas ira tan anggapoy pipilien da ya pulongan. Iikdan day pagkakataon so amin​—balanglan ugaw o maedad, mayaman o mairap, laki o bii—​pian nakabat si Jehova, say Dios na hustisya.

²¹ Bilang Ulo na Kongregasyon, seseguroen met nen Jesus ya niwala ditan so hustisya. Singa nipropesiya la, sikatoy angiter na “regalo a lalaki,” saray matoor ya Kristianon elder ya mangidaulo ed kongregasyon. (Efeso 4:8-12) No papastolan na sarayan lalaki so mablin pulok na Dios, aaligen day alimbawa nen Jesu-Kristo. Seseguradoen da ya niwalay hustisya. Agda lilingwanan ya say labay nen Jesus et patas ya tratoen iray karnero to​—anggano anto ni posisyon da, prominente man ira o andi, mayaman man o mairap ira.

22. Antoy nalilikna nen Jehova ed graben ag-inkahustisya na mundo natan, tan antoy pagawa tod Anak to?

²² Agmanbayag, iletneg la nen Jesus so hustisya diad interon dalin. Diad panaon tayo, anggan iner et grabe so ag-inkahustisya. Kada walay ugaw ya ompapatey ed eras, sikatoy biktima na graben ag-inkahustisya. Lalo la no nababalitaan tayoy gagastosen ya kuarta tan  sasayangen ya oras parad panggawa na mabmabli iran armas ed guerra, makasarilin panliliket, tan maluhon panagbilay. Minilyon so ag-iilaloan ya ompapatey kada taon. Tan satan ya ag-inkahustisya et kabkabusol nen Jehova. Tinuro to so Anak to ya miguerra ed sayan mauges ya mundo pian permanentin ekalen so amin ya ag-inkahustisya.​—Apocalipsis 16:14, 16; 19:11-15.

23. Kayari Armagedon, antoy gawaen nen Kristo pian permanente lan niwala so hustisya?

²³ Pero, aglabat kaiba ed hustisya nen Jehova so paneral ed saray mauges. Tinuro to met so Anak to ya manuley bilang “Prinsipe na Kareenan.” Kayari Armagedon, gawaen nen Jesus ya mareen so interon dalin, tan sikatoy manuley “lapud inkahustisya.” (Isaias 9:6, 7) Insan ekalen nen Jesus so amin ya ag-inkahustisya ya mamapaermen tan mamapairap ed interon dalin. Diad andi-anggaan, matoor ton suportaan so perpekton hustisya nen Jehova. Importante sirin ya aligen tayo la natan so hustisya nen Jehova. Nengnengen tayo no panon tayon nagawaan itan.