1-3. (a) Anto so naaralan tayo nipaakar ed too no obserbaan tayoy ulopan na atateng tan na anak da? (b) Anto so natural ya reaksion tayo no ipanengneng na sakey so panangaro tod sikatayo, tan antoy importantin nitepet tayod sarili tayo?

 LABALABAY na atateng a nanengneng so oniimis a kapangiyanak ya anak da. Mabetbet dan iyasingger so lupa ra ed lupa to, maar-aro dan pitongtongan tan imisan. Labay dan nanengneng so reaksion to. Nagunoyan, onimis lay ugaw tan ompaway so dimple ed aping to. Lapud satan ya imis, nipapanengneng met na ugaw ya inar-aro to ray atateng to.

² Ipapanonot ed sikatayo na imis na ugaw so importantin bengatla nipaakar ed too. Natural ed sikatayon balesen na panangaro so nipapanengneng ed sikatayon panangaro. Ontan a talaga so inkagawa tayo. (Salmo 22:9) Legan na ibabaleg tayo, nanaaralan tayo ray dakel nin paraan no panon tayon balesen so panangaro ya ipapanengneng ed sikatayo. Seguro nanonotan mo no panon ya impatnag na atateng, kakanayon, odino na kakaarom so panangaro dad sika. Apaapit kad sikara tan mas naar-arom ira, kanian labay mo met ya ipanengneng so panangarod sikara. Kasin ontan met so nagagawa ed relasyon mod si Jehova a Dios?

³ Ibabaga na Biblia: “Mangaaro itayo, lapud say Dios so inmunan angaro ed sikatayo.” (1 Juan 4:19) Diad Seksion 1 ya anggad 3 na sayan libro, naaralan mo ya ipapanengneng  nen Jehova so pakapanyari, hustisya, tan karunongan to diad maaro iran paraan pian nagunggonaan ka. Tan diad Seksion 4, anengneng mo ya direkta ton imbaga so panangaro tod totoo tan ed sika diad nikadkaduman paraan. Natan say importantin nitepet mod sarilim: ‘Antoy gawaen ko pian nipanengneng kon inarok si Jehova?’

4. Antoy iisipen na dakel ed kabaliksan na panangaro ed Dios?

⁴ Si Jehova so Lapuan na aro, kanian amta to ya say pangipanengneng na panangaro so sankaabigan ya paraan pian nipanengneng da ray balibalin kualidad da. Kanian anggano dakel so agmanguunor ed si Jehova, sikatoy matalek ya wala ray totoon ombales ed panangaron ipapanengneng to. Tan minilyon la so nanggawa ed satan. Makapaermen balet ta dakel ya relihyon ed sayan mauges ya mundo et aliway ibabangat da nipaakar ed kabaliksan na panangaro ed Dios. Dakel so manisian say aro et liknaan labat a kaukolan ya ibesngaw. Nayarin onggapo ed ontan a paraan so panangaro ed Dios, a singa say aro na ugaw ed atateng to ya nayarin unonan napatnagan panamegley na imis. Balet diad saray wala lad edad, dakel ni so kaukolan tayon gawaen pian nipanengneng so aro.

5. Antoy kabaliksan na panangaro ed Dios, tan akin et makagunggona itan ed sikatayo?

⁵ Imbaga nen Jehova no anto so kabaliksan na panangaro ed sikato. Ibabaga na Salita to: “Saya so kabaliksan na panangaro ed Dios, ya unoren tayo ray ganggan to.” Kanian kaukolan tayon ipanengneng ya inaro tayo so Dios diad iyunor ed sikato. Tua, dakel a totoo et agda  labay so onunor. Balet inyarum na satan lanlamang a bersikulo: “Saray ganggan [na Dios] et aliwan makapabelat.” (1 Juan 5:3) Saray ganggan tan prinsipyo nen Jehova et makagunggona, aliwan mamairap, ed sikatayo. (Isaias 48:17, 18) Walad Salita na Dios iray prinsipyo ya makatulong pian mas napaapit tayod sikato. Panon? Repasoen tayo so taloran paraan pian mas onapit tayo ed Dios. Kaukolan tayoy mitongtong, dayewen, tan aligen so Dios.

6-8. (a) Antoy sakey ya paraan pian narengel moy Jehova? (b) Panon ya magmaliw ya mabilabilay so Kasulatan no babasaen tayo iratan?

⁶ Ginmapo so Kapitulo 1 ed tepet ya, “Anto kasi naliknam no sarag mon nakatongtong so Dios?” Naamtaan tayo ya aliwan imahinasyon labat itan. Diad tua, akitongtong si Moises ed Dios panamegley na anghel. Sikatayo ey? Natan et agla mangibabaki na anghel si Jehova pian mitongtong ed totoo. Balet walay balibalin paraan nen Jehova pian makapitongtong ed sikatayo. Panon tayon dengelen si Jehova?

⁷ Lapud “say interon Kasulatan et impuyan na Dios,” dedengelen tayoy Jehova no babasaen tayoy Salita to, say Biblia. (2 Timoteo 3:16) Kanian pinaseseg na salmista iray lingkor nen Jehova a gawaen so ontan a panagbasa diad “agew tan labi.” (Salmo 1:1, 2) Kaukolan tayoy mansagpot tan seguradon nagunggonaan tayo no gawaen tayo itan. Singa naimano tayo ed Kapitulo 18, say Biblia et singa maaron sulat manlapud Ama tayod tawen. Kanian say pambasa ed satan et aliwan makapabelat. Kaukolan tayon gawaen ya mabilabilay so Kasulatan no babasaen tayo. Panon?

 ⁸ Legan mon babasaen so Biblia, salim ya imadyinen iray nagagawad bilay na saray karakter. Salim ya talosan no anton klase iran totoo, antoy kipapasen na bilay da, tan akin ya ontan so ginawa da. Insan isip mon maong so babasaen mo, tan tepetan moy sarilim: ‘Antoy ibabangat na sayan salaysay nipaakar ed si Jehova? Anton kualidad to so anengneng ko? Anton prinsipyo so labay nen Jehova a naaralan ko, tan panon kon niyaplika itan ed bilay ko?’ No basaen, dalepdepen, tan iyaplikam iray nanaaralan mo ed Salita na Dios, magmaliw ya mabilabilay iratan ed sika.—Salmo 77:12; Santiago 1:23-25.

9. Siopa so “matoor tan makabat ya aripen,” tan akin ya importantin ondengel tayon maong ed satan ya “aripen”?

⁹ Mitotongtong met si Jehova ed sikatayo panamegley na “matoor tan makabat ya aripen.” Singa impasakbay nen Jesus, tinuro so melag a grupo na alanaan iran Kristianon lalaki ya mangitarya na espiritual a ‘naakan diad dugan panaon’ legan na sarayan mairap a kaunoran ya agew. (Mateo 24:45-47) No basaen tayo ray publikasyon ya niparaan pian ontulong ed sikatayon nawalaan na suston kakabatan ed Biblia tan no onatendi itayo ed Kristiano iran pantitipon tan saray kombension, sikatayoy napapakan na satan ya aripen ed espiritual a paraan. Ingganggan nen Jesus iray disipulo to: “Imano yoy pandedengel yo.” (Lucas 8:18) Kanian importante ya ondengel tayon maong ed tinuro nen Kristo ya matoor a lingkor to ta uusaren nen Jehova itan ya aripen pian mitongtong ed sikatayo.

10-12. (a) Akin et makapakelkelaw ya regalo a manlalapud si Jehova so pikakasi? (b) Panon itayon makapanpikasi ed paraan a makapaliket ed si Jehova, tan akin a makapanmatalek itayon dedengelen to iray pikakasi tayo?

¹⁰ Naaralan tayo no panon ya mitotongtong si Jehova  ed sikatayo, balet panon tayon makapitongtong ed sikato? No isipen tayo iya, singa makapataktakot. Ta no salien mon itongtong ed sankamakapanyarian a manuley ed bansa yo so nipaakar ed saray pampapagaan mo, kasin mitongtong ed sika? Nayarin say mismon panali ni labat et mapeligro la! Diad panaon nen Ester tan Mardokeo, nayarin napapatey so sakey a too no onasingger ed manuley na Persia ya ag-inimbitaan na ari. (Ester 4:10, 11) Natan isip mo pay iyasingger ed arap na Soberanon Katawan na uniberso, ya no ikompara so anggan siopan sankamakapanyarian ya too et “singa labat duron.” (Isaias 40:22) Kasin antakot tayoy mitongtong ed sikato? Andin balot!

¹¹ Iimbitaan itayo nen Jehova ya mitongtong ed sikato, tan ginawa to itan ya mainomay panamegley na pikakasi. Anggan say melag nin ugaw et makapanpikasi ed si Jehova ya walaan na pananisia, ya gawaen to itan diad ngaran nen Jesus. (Juan 14:6; Hebreo 11:6) Panamegley na pikakasi, sarag tayon ibaga ed si Jehova iray iisipen tan nalilikna tayo, anggan saray ngalngali agtayo nibaga. (Roma 8:26) Aliwan maabig no salien tayon pandinayewen si Jehova diad pangusar na mararakep iran salita odino andukey iran pikakasi. (Mateo 6:7, 8) Pero agmet lilimitaan nen Jehova so karukey tan kabetbet na pitongtong tayo ed sikato. Iimbitaan itayo ni ingen na Salita to ya ‘naynay a manpikasi.’​—1 Tesalonica 5:17.

¹² Tandaan ya si Jehova labat so atawag ya “Dumerengel na pikakasi,” tan sikatoy ondedengel tan talagan mililikna. (Salmo 65:2) Kasin napapasootan labat ya dengelen so pikakasi na saray matoor a lingkor to? Andi, seguradon panliliketan to iratan. Ikokompara na Salita  to so pikakasi ed insenso, ya say asewek na satan et ambalbalingit ya ipipila na dagem patagey. (Salmo 141:2; Apocalipsis 5:8; 8:4) Agta makapaseseg ya naamtaan ya inkompara iray masimoon ya pikakasi tayo ed insenso ya mamapaliket ed Soberanon Katawan? Kanian no labay moy onapit ed si Jehova, manpikasi kan naynay ed sikato ya inagew-agew. Ibagam ya amin so naliliknam. (Salmo 62:8) Ibagam iray kapagaan, panliliketan, pisasalamatan, tan panangirayew mo ed Ama tayod tawen. No ontan so gawaen mo, mas ombiskeg tan onelet so relasyon mo ed sikato.

13, 14. Anto so kabaliksan na pandayew ed si Jehova, tan akin a kanepegan to itan?

¹³ No mitotongtong tayo ed si Jehova a Dios, agtayo labat ondedengel tan mansasalita a singa gagawaen tayod sakey a kaaro odino kanayon. Imbes sakey iyan paraan pian nipanengneng tayoy aralem ya respeto tan interon-kamarerwan panangaro ed si Jehova, tan iiter tayod sikato so galang a kanepegan to. Kabiangan la na interon bilay tayo so dugan panagdayew. Tan pankakasakeyen na satan so amin a matoor a pinalsa nen Jehova, balanglan diad tawen odino diad dalin. Diad sakey a pasingawey, arengel nen apostol Juan so sakey ya anghel a mangiyaabawag ed sayan ganggan: “Mandayew kayo ed samay nanggawa ed tawen tan dalin tan dayat tan saray subol na danum.”​—Apocalipsis 14:7.

¹⁴ Akin et nepeg tayon idayew si Jehova? Isip mo pa iramay kualidad ya apantongtongan tayo ed sayan libro, a singa say inkasanto, pakapanyari, kontrol ed sarili, hustisya, pakpel, panangasi, karunongan,  kapaabebaan, aro, panangabagey, katooran, tan kamaongan. Naaralan tayo ya impanengneng nen Jehova so kada sakey ed saratan ya balibalin kualidad ed superyor ya paraan. No salien tayon talosan iray dakel ya paraan no panon ton impanengneng so amin ya kualidad to, nanengneng tayo ya sikatoy aliwa labat a sakey ya Persona a pandinayewan. Sikatoy abalbaleg ed gloria tan atagtagey ya maong nen say sikatayo. (Isaias 55:9) Kanian duga labat ya si Jehova so makanepegan ya manuley ed sikatayo. Panon tayo balet ya dayewen si Jehova?

15. Panon tayon idayew si Jehova ed “espiritu tan katuaan,” tan anton pankanawnawa so iiter ed sikatayo na saray Kristianon pantitipon?

¹⁵ Inkuan nen Jesus: “Say Dios et Espiritu, tan saramay mandadayew ed sikato et nepeg a mandayew diad espiritu tan katuaan.” (Juan 4:24) Pian nigalang odino nidayew tayoy Dios “diad espiritu,” kaukolan ya walad sikatayoy espiritu to tan paigiya tayo ed satan. Kaukolan met a say panagdayew tayo et mitunosan ed katuaan, say suston kakabatan a naromog ed Salita na Dios. Walaan itayo na balibalin pankanawnawan idayew si Jehova ed “espiritu tan katuaan” no mantitipon tayo kaiba iray agagi. (Hebreo 10:24, 25) No mangakansion tayo na panangidayew, saniiba tayon manpipikasi, ondedengel, tan mankokomento tayo ed saray aral, sikatoy idadayew tayo ed paraan ya labay to.

16. Anto so sakey ed saray manunan ganggan ed saray tuan Kristiano, tan akin ya labalabay tayon gawaen itan?

¹⁶ Idadayew tayo met si Jehova no itongtong tayo ed arum so nipaakar ed sikato. (Hebreo 13:15) On, say pangipulong ed maong a balita na Panarian nen Jehova et sakey ed saray manunan ganggan ed saray tuan Kristiano. (Mateo 24:14) Labalabay tayon unoren itan lapud  inaro tayo si Jehova. No isipen tayo no panon ya ‘bubulagen’ nen Satanas a Diablo, say “dios na sayan sistema na mundo” so “kanonotan na saray agmananisia,” a mangikakayat na katilaan nipaakar ed si Jehova, agta napapakiwas tayon tasian so Dios tayo pian nipetek itan a panagpauges? (2 Corinto 4:4; Isaias 43:10-12) Tan no dalepdepen tayo iray makapakelkelaw ya kualidad nen Jehova, agta labalabay tayon ibaga ed arum so nipaakar ed sikato? Talagan balbaleg ya pribilehyo ya tulongan so arum pian nakabat tan naaro da so Ama tayod tawen a singa gagawaen tayo la.

17. Anto ni kaiba ed panagdayew tayod si Jehova, tan akin a nepeg tayoy mandayew ed sikato ya “interon puso”?

¹⁷ Wala ni kaiba ed panagdayew tayod si Jehova.  Aapektoan na satan so interon bilay tayo. (Colosas 3:23) No talagan aawaten tayo si Jehova bilang Soberanon Katawan tayo, pansagpotan tayon gawaen so linawa to diad pamilya, trabaho, pidedeneng ed arum, tan panagrelaks tayo. Pansagpotan tayoy manlingkor ed si Jehova panamegley na “interon puso,” tekep na integridad. (1 Awaran 28:9) No ontan so panagdayew tayo, napaliisan tayoy nawalaan na naapag ya puso odino doblin kabibilay​—ya manlilingkor tayo, balet manggagawa tayoy seryoson kasalanan. Lapud interon puso tayon manlilingkor ed si Jehova, agtayon balot itan gawaen. Makatulong met ed sikatayo so takot ed Dios. Ibabaga na Biblia ya saramay walaan labat na aralem ya respeto ed si Jehova so nayarin magmaliw a maapit ya kaaro to.​—Salmo 25:14.

18, 19. Akin ya nibaga tayon sarag na ag-ayadyarin totoo ya aligen si Jehova a Dios?

¹⁸ Diad sampot na kada seksion na sayan libro, walay sakey a kapitulo nipaakar ed no panon ya ‘aligen so Dios, bilang inad-aro ton ananak.’ (Efeso 5:1) Importantin tandaan ya anggan ag-itayo ayadyari, sarag tayon aligen so perpekton paraan nen Jehova ed panguusar toy pakapanyari, hustisya, karunongan, tan say pangipapanengneng toy aro. Panon tayon naseguro ya sarag tayon aligen so Makapanyarin-amin? Tandaan ya say kabaliksan na ngaran nen Jehova so mangibabangat ed sikatayo a pagmamaliwen toy inkasikato ed antokaman a labay to pian nasumpal iray gagala to. Duga labat a pandinayewan tayon maong itan ya abilidad, balet kasin sikatoy agtayon balot naalig? Andi.

 ¹⁹ Apalsa itayo ed indengan na Dios. (Genesis 1:26) Kanian, saray totoo et aliwan singa arum a pinalsa diad dalin. Agtayo labat onkikiwas ed nisipor lan abilidad tayo, atawir iran ugali, odino arum ni ran makaimpluensya ed kaliberliber tayo. Inikdan itayo nen Jehova na mablin regalo​—say kalayaan ya mandesisyon. Anggan walay limitasyon tan agtayo ayadyari, bulos itayon manpili no anto so labay tayon pagmaliwan. Kasin labay moy magmaliw ya maaro, marunong, tan nausar so pakayarim ed dugan paraan? Diad tulong na espiritu nen Jehova, nayarian moy magmaliw ya ontan! Isip mo pa iray maong a nagawaan mo.

20. Antoy nagawaan tayo no aligen tayoy Jehova?

²⁰ Sarag mon paliketen so puso na Ama tayod tawen. (Proverbio 27:11) Nayarian mo ni ingen ya ‘napaliket ya maong si Jehova,’ lapud natatalosan to iray limitasyon mo. (Colosas 1:9, 10) Tan legan mon itutultuloy a bayuboan iray balibalin kualidad bilang pangaalig ed inad-aron Ama tayo, sikay naikdan na nikadkaduman pribilehyo. Sarag mon ipaamta so liwawa na katuaan ed saray totoon walad kabilungetan, iramay agda kabat so Dios. (Mateo 5:1, 2, 14) Sarag mon ipatnag iray mararakep ya kualidad nen Jehova tan tulongan iran nakabat so maar-aron Dios tayo. Talagan baleg ya pribilehyo itan!

21, 22. Anton agmanganggan panagbiahe so tatalaranan na amin a mangaaro ed si Jehova?

²¹ Say simplin bilin diad Santiago 4:8 et aliwa labat a kalat. Singa itan sakey a panagbiahe. Basta mansiansia itayon matoor, ag-itan manampot a panagbiahe.  Ag-itayon balot ontundan onapit ed si Jehova. Diad tua, dakdakel ni so naaralan tayo nipaakar ed sikato. Agtayon balot iisipen ya naaralan tayo lan amin ed sayan libro so nipaakar ed si Jehova. Akin? Ta gapoan ni labat iya na pangamta tayo ed amin ya ibabaga na Biblia nipaakar ed Dios tayo! Tan anggan say Biblia a mismo et agto ibabaga so amin ya kaukolan tayon nakabatan nipaakar ed si Jehova. Inkuan nen apostol Juan a no nisulat ya amin so bengatlan ginawa nen Jesus legan na ministeryo to diad dalin, “agnakargay mundo iray lukot a pansulatan.” (Juan 21:25) No tua itan ed Anak, di lalo lan tua itan ed Ama!

²² Anggan manbilay tayo na andi-anggaan, ag-itayo naupotan na aralen nipaakar ed si Jehova. (Eclesiastes 3:11) Kanian isip mo pa so ilalon tatalaranan tayo diad arapen. Anggan manbilay tayo na nilasus, nilibo, minilyon, binilyon ni ingen iran taon, dakdakel ni so naamtaan tayo nipaakar ed si Jehova a Dios. Balet siansian nalikna  tayo ya dakel ni ray makapakelkelaw a bengatlan kaukolan tayon aralen. Seguradon labalabay tayoy makaaral ni na dakel ya singa alikna na salmista: “Say iyasingger ed Dios et pankaabigan ko.” (Salmo 73:28) Agtayo anggan naimadyin no panon karakep so bilay diad paraiso. Tan say sankarakepan ed amin, lalo tayon onapit ed si Jehova.

23. Antoy nepeg mon gawaen?

²³ Komon ta napakiwas ka na panangaro nen Jehova ya sikatoy aroen diad interon pusom, kamarerwam, nonot, tan biskeg mo. (Marcos 12:29, 30) Komon ta matoor tan agmangangga so panangarom. Komon ta amin ya desisyon ya gawaen mo kada agew, balanglan baleg o melag, et makatulong pian onelet so panangarom ed Ama tayod tawen. Tan say sankaimportantian ed amin, komon ta lalo kan onapit ed si Jehova, tan sikatoy lalon onapit ed sika​—diad andi-angga!