1, 2. Anton “sagradon sekreto” so labalabay tayon naamtaan, tan akin?

 SEKRETO! No walay naamtaan na totoo ya sekreto, ngalngali agda napigilay sarili da ya ipaamta itan. Akin ey? On ta makapaintriga, makapainteres, tan balibalin pantongtongan. Pero, oniay ibabaga na Biblia: “Kigloriaan na Dios so pangisekreto ed sakey a bengatla.” (Proverbio 25:2) Lapud si Jehova so Soberanon Manuley tan Manamalsa, karapatan to ya isekreto so arum a bengatla ed saray totoo anggad agni asabi so dugan panaon ya ipaamta to iratan.

² Wala balet so makapabilib tan makapainteres ya sekreto ya impaamta nen Jehova diad Salita to. Say tawag ed satan et “sagradon sekreto na linawa to.” (Efeso 1:9) Seguradon labalabay tayon naamtaan itan. Pero aliwan satan labat, ta no naamtaan tayo iyan sekreto, nayarin niliktar tayo tan anggan panon et walay ideya tayo ed agnasukat ya karunongan nen Jehova.

3, 4. Antoy ilalon iiter na propesiyan walad Genesis 3:15, tan diad saman et anto ni so agda amta ed satan ya propesiya?

³ Nen nankasalanan si Adan tan Eva, singa aglan balot nagawa so panlabayan na Dios ya magmaliw ya paraiso so interon dalin ya panayaman na perpekton totoo. Balet sinolusyonan ya tampol na Dios so problema. Oniay imbaga to: “Mangiyan ak na busolan ed baetan mo [say uleg] tan say bii tan ed baetan na ilalak mo tan ilalak to.  Mekmeken to ka ed ulo, tan sikatoy sakitan mo ed mukor.”​—Genesis 3:15.

⁴ Anto kasi labay ya ibaga na sayan propesiya? Siopa yay bii? Siopa yay uleg? Siopa yay “ilalak” ya manmekmek ed ulo na uleg? Anggapoy kaam-amta nen Adan tan Eva ed saya. Pero, ayan imbaga na Dios et angiter nin siansia na ilalo ed saray magmaliw ya matoor ya ananak da. Seguradon panganggaen nen Jehova so amin ya kaugsan, kasalanan, tan patey. Tan nagawan-nagawa so panlabayan to. Pero panon ey? Diad saman, sekreto ni itan. Tinawag itan na Biblia ya “karunongan na Dios diad panamegley na sakey a sagradon sekreto, say niyamot a karunongan.”​—1 Corinto 2:7.

5. Mangiter na alimbawa no akin ya kalkalnan ipapaamta nen Jehova so sekreto to.

⁵ Lapud si Jehova so “Manangiparungtal ed saray sekreto,” ibaga to lanlamang iray importantin detalye tungkol ed satan ya sekreto. (Daniel 2:28) Pero kalkalna ton ipaamta itan. Say alimbawa to tan et no walay sakey ya maaron ama ya nantepet so melag nin anak to, say kuan to, “Tay, iner ak nanlapu?” Lapud marunong so Ama, say ibaga to labat amay natalosan na anak to. Legan ya ombabaleg imay anak to, mas ipaliwawa to imay impormasyon ya natalosan la na ugaw. Ontan met si Jehova. Amta to no kapigan so sankaabigan ya panaon ya ipaamta ed saray totoo to so panlabayan to.​—Proverbio 4:18; Daniel 12:4.

6. (a) Parad anto so sipanan odino kontrata? (b) Akin et makapadinayew ya si Jehova ni so akisipanan ed saray totoo?

⁶ Panon ya impaamta nen Jehova iyan sekreto? Sikatoy angusar na nantutumbokan ya sipanan o kontrata. Seguro asalim lay nampirma o nanggaway kontrata, anganko nen angaliw kay abung, odino nen inmutang ka,  o nampautang ka. Atan ya kontrata et legal ya garantiya ya sumpalen yon sumpalen ya dua so apampaknaan yo. Pero akin et manggawa ni si Jehova na pormal ya kontrata odino sipanan ed saray totoo, ta di ba amay mismon imbaga to et garantiya la man? On tua ’tan, pero siansia ni ya aminpigan nanggawa na legal ya kontrata si Jehova pian suportaan imay imbaga to. Lapud saratan ya sipanan, lalo tayon akombinse ya tooren nen Jehova iray impromisa to.​—Hebreo 6:16-18.

7, 8. (a) Antoy insipan nen Jehova ed si Abraham? Anton detalye so ipapaamta na satan tungkol ed sagradon sekreto? (b) Panon ya kalkalnan impaamta nen Jehova so lahi ya panlapuan na insipan ya ilalak?

⁷ Masulok ya duan libon taon ni so linmabas, kayarin pinapaway nen Jehova si Adan tan Eva ed hardin na Eden, insan to imbaga iya ed matoor ya lingkor ton si Abraham: “Seguradon parakelen koy ilalak mo a singa saray bitewen ed tawen . . . Tan diad panamegley na ilalak mo, amin a nasyon ed dalin et onggamor na bendisyon lapud dinengel moy boses ko.” (Genesis 22:17, 18) Aglabat itan impromisa nen Jehova; nanggawa ni ingen na legal ya kontrata insan to sinambaan itan. (Genesis 17:1, 2; Hebreo 6:13-15) Talagan makapabilib ya say Sankatagyan ya Dios ni so akikontrata pian nabendisyonan iray totoo!

⁸ Nen akisipanan si Jehova ed si Abraham, impaamta To ya say insipan ya ilalak et sakey ya too tan manlapu ed poli to. Pero siopa kasi? Impaamta lanlamang nen Jehova ya diad ananak nen Abraham, say panlapuan na insipan ya ilalak et si Isaac. Tan diad saray duaran ananak  nen Isaac et si Jacob. (Genesis 21:12; 28:13, 14) Linmabas so panaon, angibaga si Jacob na propesiya tungkol ed sakey ed saray 12 anak to: “Say setro et ag-ontaynan ed si Juda, ontan met ed say baston na manuley manlapud nanleetan na saray sali to, anggad isabi na Silo, [odino, “Sikato a Makankanepegan ed Satan,” paimanod leksab] tan ontulok ed sikato iray totoo.” (Genesis 49:10) Naamtaan ed saman ya say ilalak et magmaliw ya ari tan manlapud lahi nen Juda!

9, 10. (a) Anton sipanan so ginawa nen Jehova ed bansan Israel, tan panon iran aprotektaan na satan? (b) Panon ya impanengneng na Ganggan ya kakkaukolan na totoo so dondon?

⁹ Nen taon 1513 B.C.E., kalkalnan impaamta nen Jehova so arum nin detalye tungkol ed sagradon sekreto nen akisipanan ed saray ilalak nen Abraham, say bansan Israel. Inusar nen Jehova so Mosaikon Ganggan pian misipanan ed sikara. Agti la tutumboken itan ya Ganggan natan, pero akatulong itan nensaman pian napawala imay insipan ya ilalak. Panon ya akatulong ey? Diad taloran paraan. Unona, satan ya Ganggan et nagmaliw ya proteksion ya singa padir. (Efeso 2:14) Akatulong itan pian agnaimpluensyaan iray Judio na arum a bansa. Lapud satan, aprotektaan na Ganggan so bansan Israel ya panlapuan na insipan ya ilalak. Kanian nen asabi lay panaon na Dios, wala nin siansia so bansan Israel ya panlapuan na Mesias tan niyanak diad tribu na Juda.

¹⁰ Komadua, lapud satan ya Ganggan, anengneng ya kakkaukolan na totoo so dondon. Perpekto so Ganggan, kanian atalosan na saray Israelita ya agdan talaga naunor so amin ya ganggan ta aliwa ran perpekto. Lapud satan, apatnagan ya makasalanan so too tan kakkaukolan  to so insipan ya ilalak. (Galacia 3:19) Tua, ingganggan iray Israelita ya mangibagat na ayayep pian nasakbongan iray kasalanan da, pero agan talaga kompleton nabayaran na saratan so kasalanan da. Oniay insulat nen Pablo, “say dala na saray kalakian a baka tan kanding et agmakapangekal na saray kasalanan.” (Hebreo 10:1-4) Saraman ya bagat et akatulong ed saray totoo ya natalosan ya kakkaukolan da so dondon, say perpekton bagat na Kristo ya makapangekal ed amin na kasalanan. Kanian parad saray matoor ya Judio, satan ya sipanan et nagmaliw ya pinagkagiya da ‘pian nitonton irad Kristo.’—Galacia 3:24.

11. Lapud Ganggan a sipanan, antoy balibalin ilalo na bansan Israel? Akin et asayang na halos amin ya Israelita itan ya balibalin ilalo?

¹¹ Komatlo, lapud satan ya sipanan, awalaan na balibalin ilalo so bansan Israel. Imbaga nen Jehova ed sikara ya no unoren da so sipanan, magmaliw iran “sakey a panarian na saray saserdote tan sakey a masanton nasyon.” (Exodo 19:5, 6) Wala met iray Israelita ya apilin magmaliw ya kabiangan na saray saserdote na panarian diad tawen. Pero halos amin ya Israelita et agda inunor so Ganggan. Agda inawat so Mesias kanian asayang may balibalin ilalo da. Iner sirin so pangalaan nen Jehova na magmaliw a kaaruman ya saserdote? Tan antoy koneksion na sarayan saserdote ed samay impromisan ilalak? Ipaamta na Dios so ebat ed saratan diad dugan panaon to.

12. Antoy insipan nen Jehova ed si David? Anton detalye so ipapaamta na saya tungkol ed sagradon sekreto na Dios?

¹² Diad panaon nen David, angiter ni na kaaruman ya detalye si Jehova tungkol ed sagradon sekreto. Ginawa to  itan nen akisipanan ed si David. Oniay impromisa to ed sayan matoor ya ari: “Turoen ko so ilalak mo, . . . tan iletneg kon malet so panarian to. . . . Iletneg kon malet so trono na panarian to ya anggad angga.” (2 Samuel 7:12, 13; Salmo 89:3) Alinewan ed saman ya say panlapuan na insipan ya ilalak et diad lahi nen David. Pero say tepet, sarag kasi na ordinaryon too so manuley ya anggad angga? (Salmo 89:20, 29, 34-36) Tan sarag kasi na toon ari ya ekalen so kasalanan tan patey?

13, 14. (a) Base ed Salmo 110, antoy impromisa nen Jehova ed pinili ton magmaliw ya Ari? (b) Anto ni ran impormasyon so impaamta na saray propeta nen Jehova tungkol ed insipan ya ilalak?

¹³ Oniay impaisulat nen Jehova ed si David: “Imbaga nen Jehova ed Katawan ko: ‘Yurong ka ed nikawanan ko anggad iyan ko ray kakabusol mo a toonan na saray salim.’ Si Jehova et nansamba, tan agmanguman so nonot to: ‘Sakey kan saserdote ed andi-anggaan a mipadpara ed si Melquisedec!’” (Salmo 110:1, 4) Say tutukoyen dia nen David et say mismon insipan ya ilalak o say Mesias. (Gawa 2:35, 36) Sayan ari et agmanuley ed Jerusalem, noagta diad tawen, diad “nikawanan” nen Jehova. Kanian aliwa labat ya say bansan Israel so uleyan to noagta say interon mundo. (Salmo 2:6-8) Pero wala ni naamtaan tayon detalye ed saya. Imanoen ya sinambaan nen Jehova ya say Mesias et magmaliw ya “saserdote . . . a mipadpara ed si Melquisedec.” Si Melquisedec et nanlingkor ya ari tan saserdote diad panaon nen Abraham. Mipadpara, say onsabin ilalak ya tinuro mismo na Dios et manlingkor met bilang Ari tan Saserdote!​—Genesis 14:17-20.

¹⁴ Diad inlabas na saray taon, inusar nen Jehova iray propeta to pian mangiter na kaaruman ni ran impormasyon tungkol ed sagradon sekreto. Singa bilang, impaamta nen Isaias ya say ilalak et iter toy bilay to bilang bagat.  (Isaias 53:3-12) Impasakbay nen Miqueas no iner niyanak so Mesias. (Miqueas 5:2) Tan impropesiya ni ingen nen Daniel so eksakton panaon no kapigan so igapo na kimey na Mesias tan no kapigay ipatey to.​—Daniel 9:24-27.

15, 16. (a) Panon ya say Anak nen Jehova et “inyanak na sakey a bii”? (b) Antoy atawir nen Jesus ed toon atateng to? Kapigan sinmabi si Jesus bilang insipan ya ilalak?

¹⁵ Saratan ya propesiya et sekreto ni anggad agni sinmabi so insipan ya ilalak. Oniay ibabaga na Galacia 4:4: “Sanen asumpal lay niganan panaon, imbaki na Dios so Anak to, ya inyanak na sakey a bii.” Diad taon 2 B.C.E., imbaga na anghel ed sakey ya Judion birhen ya si Maria: “Manlukon ka tan mangiyanak kay sakey a laki, tan sikatoy ngaranan mo na Jesus. Sikatoy magmaliw ya importante tan natawag ya Anak na Sankatagyan, tan iter nen Jehova a Dios ed sikato so trono nen David ya ama to . . . Niwalad sika so masanton espiritu, tan tarongan kay pakayari na Sankatagyan. Tan lapud satan, samay niyanak et natawag a masanto, Anak na Dios.”​—Lucas 1:31, 32, 35.

¹⁶ Ag-abayag, manlapud tawen et inyalis nen Jehova so bilay na Anak to ed panag-anakan nen Maria. Kanian inyanak na aliwan perpekton bii si Jesus. Pero, aga atawir nen Jesus so ag-inkaperpekto nen Maria ta sikatoy “Anak na Dios.” Wala balet so atawir nen Jesus ed totoon atateng to. Lapud parehon nanlapud lahi nen Arin David si Jose tan Maria, walay kanepegan nen Jesus ya natawir so trono nen David tan magmaliw ya ari. (Gawa 13:22, 23) Nen abautismoan si Jesus nen 29 C.E., sikatoy nilanaan nen Jehova na masanton espiritu tan imbaga to: “Saya so  Ana’ko, say inad-arok.” (Mateo 3:16, 17) Sinmabin siansia so ilalak! (Galacia 3:16) Panaon la man pian mangipaamta si Jehova na kaaruman ni ran detalye tungkol ed sagradon sekreto.​—2 Timoteo 1:10.

17. Anto ray impaamta tungkol ed saramay abitlan karakter diad Genesis 3:15?

¹⁷ Legan na ministeryo nen Jesus, impaamta to ya samay uleg ya abitla ed Genesis 3:15 et si Satanas tan say ilalak na uleg et saray alipores nen Satanas. (Mateo 23:33; Juan 8:44) Asabi panaon, naamtaan ya amin da et namekmek odino permanente lan naandi. (Apocalipsis 20:1-3, 10, 15) Naamtaan met ya amay bii et “say Jerusalem ed tagey,” odino pinagka-asawa na Dios​—saya imay kabiangan na organisasyon nen Jehova ya walad tawen ya bubuoen na saray espiritun pinalsa. a​—Galacia 4:26; Apocalipsis 12:1-6.

18. Parad anto so “balon sipanan”?

¹⁸ Diad amin ya detalye na sagradon sekreto, anganko say makapasurprisa ed amin et amay tungkol ed “balon sipanan” ya imbaga nen Jesus ed saramay matoor ya disipulo to antis ya ompatey. (Lucas 22:20) Singa samay inmunan sipanan, say Mosaikon Ganggan, say gagala na sayan sipanan et mamawala na “sakey a panarian na saray saserdote.” (Exodo 19:6; 1 Pedro 2:9) Balet, say iletneg diad sayan sipanan et aliwan literal ya bansa noagta say espiritual ya bansa, saray matoor ya alanaan ya papatumbok  nen Kristo. Say tawag ed satan et “say Israel na Dios.” (Galacia 6:16) Nakaiba ira nen Jesus ya mangiter na bendisyon ed saray matoor ya totoo!

19. (a) Akin et nasarag na balon sipanan so mamawala na “sakey a panarian na saray saserdote”? (b) Akin et tinawag ya balon pinalsa iray alanaan ya Kristiano? Pigaray nakaiba na Kristo ya manuley diad tawen?

¹⁹ Natan akin et nasarag na balon sipanan so mamawala na “sakey a panarian na saray saserdote” a mamendisyon ed saray totoo? Ta anggano makasalanan iray disipulo nen Kristo, intarya na satan ya sipanan so dondon pian naperdona iray kasalanan da. (Jeremias 31:31-34) Lapud satan, ipasen ira nen Jehova ya matunong tan malinis. Sikaray tinagibi to pian magmaliw a kabiangan na pamilya to diad tawen tan lanaan to ra na masanton espiritu. (Roma 8:15-17; 2 Corinto 1:21) Kanian ‘niyanak ira lamet diad sakey ya agmanganggan ilalo ya niparaan ed tawen.’ (1 Pedro 1:3, 4) Balo itan ya ideya ed sikatayo, ta amta tayo ya pinalsa so too ya manayam diad dalin. Say tawag ed saray alanaan ya Kristiano et “sakey a balon pinalsa.” (2 Corinto 5:17) Ipapaamta na Biblia ya 144,000 so nakaiba nen Jesus diad tawen pian uleyan so dalin.​—Apocalipsis 5:9, 10; 14:1-4.

20. (a) Nen 36 C.E., antoy impaamta tungkol ed sagradon sekreto? (b) Siopa ray minabang ed saray bendisyon ya impromisa ed si Abraham?

²⁰ Si Jesus tan sarayan alanaan et magmaliw ya “ilalak nen Abraham.” b (Galacia 3:29) Saramay unonan apili et nanlapud saray Israelita odino Judio. Pero nen 36 C.E.,  wala lamet so kaaruman ya detalye ya impaamta tungkol ed sagradon sekreto: Saray Gentil, odino aliwan Judio, et napili met ya manuley kaiba nen Jesus diad tawen. (Roma 9:6-8; 11:25, 26; Efeso 3:5, 6) Saray alanaan ya Kristiano labat kasi so makaawat ed bendisyon ya impromisa ed si Abraham? Andi, ta minabang so interon mundo ed bagat nen Jesus. (1 Juan 2:2) Asabi panaon, impaamta nen Jehova ya walay agnabilang ya “baleg ya ulop” ya makaliktar no panampoten to la so sistema nen Satanas. (Apocalipsis 7:9, 14) Dakdakel met so paolien tan walay ilalo da ya manbilay ya anggapoy anggaan diad Paraiso!​—Lucas 23:43; Juan 5:28, 29; Apocalipsis 20:11-15; 21:3, 4.

21, 22. Panon ya nanengneng so karunongan nen Jehova diad sagradon sekreto?

²¹ Talagan makapabilib so sagradon sekreto ta apatnagan ed saya ‘so karunongan na Dios diad dakel tan nanduruman paraan.’ (Efeso 3:8-10) Grabe so karunongan nen Jehova diad impanggawa to ed sayan sekreto tan no panon ton kalkalnan impaamta iya ed sikatayo! Marundunong ton inkonsideray limitasyon tayo tan iikdan to tayoy pankanawnawa ya ipanengneng no anton talagay walad puso tayo.—Salmo 103:14.

²² Impanengneng met nen Jehova so agnaparaan ya karunongan to diad impanpili to ed si Jesus bilang Ari. Diad amin ya pinalsa nen Jehova diad interon uniberso, say Anak to so sankanapantiwalaan. Akin ey? On ta nen nambilay si Jesus bilang too, asali toy nanduruman irap tan problema kanian amta to tan natatalosan to ray dadalanen tayo. (Hebreo 5:7-9) Saray kaiba nen Jesus ya  manuley ey? Diad nilasus ya taon, nampili si Jehova na lalaki tan bibii manlapud nanduruman lahi, lenguahe, tan bansa. Tan asali day nanduruman problema tan asarag da iratan. (Efeso 4:22-24) Agta balibali manpasakop ed sarayan arari tan saserdote ya natatalosan da itayo?

23. Antoy baleg ya pribilehyo na saray Kristiano? Antoy determinado tayon gawaen?

²³ Oniay insulat nen apostol Pablo: “Say sagradon sekreto a niyamot diad apalabas iran panaon tan diad apalabas iran henerasyon . . . et nipaparungtal la . . . ed saray masanton lingkor to.” (Colosas 1:26) On, dakdakel lay atalosan na saray nilanaan ya masanton lingkor nen Jehova tungkol ed sagradon sekreto tan ipapaamta da met itan ed minilyon ya totoo, kanian baleg itan ya pribilehyo tayon amin. ‘Impaamta nen Jehova ed sikatayo so sagradon sekreto na linawa to.’ (Efeso 1:9) Komon ta ipaamta tayo met ed arum iyan balibalin sekreto tan tulongan tayo ran naaralan so agnasukat ya karunongan nen Jehova a Dios!