1, 2. Anton “sulat” so inter nen Jehova ed sikatayo, tan akin?

 ASALIM lay akaawat na sulat manlapud kapamilyam ya walad arawi? Seguradon aliketan ka ta labay mon naamtaan no kumusta la ra, antoy nagagawad sikara, tan no anto ray plano da. No mitotongtong tayod sikara, mas napaapit tayod sikara anggano wala rad arawi.

² Pero anggapo lay mas makapaliket nen say makaawat na sulat manlapud inar-aro tayon Dios. Nibaga tayo ya si Jehova et nanggaway “sulat” parad sikatayo​—say Salita to, say Biblia. Naamtaan tayo ditan so tungkol ed sikato, saray ginawa to, no anto ni ray gawaen to, tan arum ni. Inter toy Salita to ta labay to tayon naka-close. Lapud sankarunongan si Jehova, ‘the best’ so ginawa ton paraan pian mitongtong ed sikatayo. Nanengneng tayo so agnaparaan ya karunongan nen Jehova diad paraan na impangisulat ed Biblia tan ed karga na satan.

3. Panon ya impasabi nen Jehova so Ganggan ed si Moises?

³ Ompan isipen na arum, ‘Akin et ag-angusar si Jehova na mas makapabilib a paraan pian nakatongtong iray totoo?’ Singa bilang, sarag to met so mansalita manlapud tawen. Diad tua, ginawa pa la ’tan nen Jehova nensaman panamegley na saray anghel. Alimbawa, nen inter toy Ganggan ed Israel. (Galacia 3:19) Pero, nen arengel na saray Israelita so makapadinayew ya boses manlapud tawen, ataktakot ira. Kanian kinerew dad si Moises ya agla direktan mitongtong si Jehova ed sikara noagta diad si  Moises la insan to ipasabi so mensahe ed sikara. (Exodo 20:18-20) Kanian, say Ganggan ya bubuoen na manga 600 a batas et indikta ed si Moises, salita-por-salita.

4. Antoy nagawa no ag-impaisulat ed si Moises so ganggan na Dios?

⁴ Panon to balet no ag-impaisulat so Ganggan? Natandaan kasi nen Moises so eksakton imbagad sikato nen Jehova tungkol ed satan ya detalyadon batas? Tan agkasi nalingo no ipasabi to itan ed saray totoo? Panon to iray onsublay ya henerasyon ey? Segurado ra kasi ya susto so nipasabi ya mensahe ed sikara? Say ontan ya paraan et agnapantiwalaan ya mangipasabi ed ganggan na Dios. Imadyin mo pay nagawa no walay ipasam ya mensahe diad saray akapila ya totoo. Ibagam so mensahem ed samay walad arap insan to ibaga ed samay walad benegan to ya anggad makasabi so mensahe ed sampot. Seguradon duma lan maong imay mensahen nipasabi ed samay toon walad sampot. Ag-itan balot agawa ed ganggan na Dios. Akin ey?

5, 6. Antoy ingganggan nen Jehova ed si Moises ya gawaen to ed Salita to, tan akin et mablin regalo so Salita nen Jehova ya impaisulat to?

⁵ Marundunong si Jehova ta impaisulat toy Salita to. Oniay imbilin to ed si Moises: “Nepeg mon isulat irayan salita, ta misipanan ak ed sika tan ed Israel unong ed sarayan salita.” (Exodo 34:27) Aman so gapo na impansulat ed Biblia, nen 1513 B.C.E. Diad sinmublay a 1,610 a taon, “akitongtong [si Jehova] diad dakel a pankanawnawa tan dakel a paraan” ed manga 40 iran lalaki ya angisulat ed Salita to. (Hebreo 1:1) Diad inlabas na saray taon, maalwar ya kinopya na saray managkopya so Kasulatan pian nipreserba itan.​—Esdras 7:6; Salmo 45:1.

⁶ Talagan mablin regalo iyan sulat ed sikatayo nen  Jehova. Asalim lay akaawat na sulat ya agusgustoan mo kanian inyatol mo, tan uulit-uliten mon basaen ta naliligliwa ka? Ontan ya ontan so “sulat” nen Jehova ed sikatayo. Lapud impaisulat nen Jehova so Salita to, lanang tayon nababasa tan nadadalepdep. (Salmo 1:2) Lanang tayon makakaawat na “ligliwa a manlalapud Kasulatan” kada no kailangan tayo itan.​—Roma 15:4.

7. Akin et anengneng so karunongan nen Jehova diad impangusar to ed saray totoo ya mangisulat ed Salita to?

⁷ Lapud karunongan nen Jehova, inusar to ray totoo ya mangisulat ed Salita to. Isip mo pa ya: No saray anghel so inusar nen Jehova ya mangisulat ed Biblia, maka-relate tayo kasi? Tua, sarasarag na saray anghel ya ibaga so tungkol ed si Jehova. Segurado met ya balibali pangibalikas da na debosyon tan panangaro da, tan pangibaga dad agawaan na saray matoor ya lingkor na Dios. Pero natalosan tayo kasi so panag-isip na sarayan perpekton espiritun pinalsa, ya say kakabatan, eksperiensya, tan say biskeg da et mas superyor ed sikatayo?​—Hebreo 2:6, 7.

8. Antoy inabuloyan nen Jehova ya gawaen na saray nansulat ed Biblia? (Nengnengen met so paimanod leksab.)

⁸ Lapud inusar nen Jehova iray totoo ya mangisulat ed Biblia, inter to so talagan kailangan tayo​—say libro ya “impuyan na Dios” pero walay kaiba ton liknaan tan kualidad na too. (2 Timoteo 3:16) Panon ton agawaan iya? No maminsan, aabuloyan to ray managsulat na Biblia ya usaren day abilidad dan mannonot pian manpili na makapaliket iran salita tan isulat so “suston . . . salita na katuaan.” (Eclesiastes 12:10, 11) Atan so rason no  akin ya nandurumay estilo na impangisulat ed saray libro na Biblia. Nanengneng ed sarayan sulat so nanlapuan tan ugali na saray nansulat. a Pero, “saray sinalita na [sarayan] totoo et nanlapud Dios legan iran igigiya na masanton espiritu.” (2 Pedro 1:21) Kanian say Biblia et talagan “salita na Dios.”​—1 Tesalonica 2:13.

9, 10. Akin et onsasabi ed puso tayo so mensahe na Biblia?

⁹ Lapud inusar nen Jehova iray totoo ya mangisulat ed Biblia, nasasabi na mensahe na satan so puso tayo. Aramay nansulat ed satan et walay liknaan da ya singa sikatayo. Lapud aliwa ran perpekto, dinmalan met irad subok tan problema ya singa sikatayo. No maminsan ingen, igiya ira na espiritu nen Jehova ya isulat so nalilikna tan pakakairapan da. (2 Corinto 12:7-10) Kanian lapud personal ya eksperiensya ra so insulat da, ag-itan nagawaan na saray anghel.

¹⁰ Say balibalin alimbawa ed saya et si Arin David na Israel. Nen akagawa na saray seryoson kasalanan, nankompos na salmo tan imbalikas to so amin ya walad puso to, akikasi ed Dios ya sikatoy perdonaen to. Insulat to: “Urasan mo ak pa ed kalilingoan ko, tan linisan mo ak ed kasalanan ko. Ta amtak iray impakasumlang ko, tan say kasalanan ko et naynay a walad arapan ko. Inyanak ak a walay kalilingoan, tan innginew ak nen inak ed kasalanan. Agmo ak komon ipupulisay ed arapan mo; tan agmo eekalen ed siak so masanton espiritum. Say bagat a makapaliket ed Dios et say nagogonigon ya espiritu;  agmo ipulisay, O Dios, so sakey a puson asugatan tan maer-ermen.” (Salmo 51:2, 3, 5, 11, 17) Kasin aliknam so ermen na nansulat? Siopa ni makapangibaga na ontan ya liknaan noag say aliwan perpekton too labat?

11. Anto ran tuan istorya so nabasa ed Biblia “pian nibangat itayo”?

¹¹ Wala ni sakey a rason no akin et onsasabi ed puso tayo so mensahe na Biblia. Maslak ed saray akasulat ditan et tungkol ed totoo​—tuan totoo—​saramay manlilingkor tan agmanlilingkor ed Dios. Nabasa tayo ditan iray personal ya eksperiensya, irap, tan liket ya alikna ra. Naamtaan tayo iray resulta na lingon desisyon da. Insulat iratan “pian nibangat itayo.” (Roma 15:4) Lapud sarayan tuan istorya, ibabangat itayo nen Jehova diad paraan ya nasabi so puso tayo. Nia ray pigaran alimbawa.

12. Antoy nitulong ed sikatayo na saray istorya ed Biblia tungkol ed saray agmatoor ya totoo?

¹² Nabasa tayo ed Biblia iray agmatoor tan mauges ya totoo, tan no antoy nansumpalan da. Diad saratan ya istorya, natalosan tayon tampol no akin ya aliwliwa imay ginawa da. Singa bilang, sarag pa met ya ibaga na Biblia ya makapuy so pantraidor ed kaaro. Pero agta mas mainomay ya talosan no nabasa tayo so tungkol ed impantraidor nen Judas ed si Jesus? (Mateo 26:14-16, 46-50; 27:3-10) Mas onsabi ed puso tayo iray ontan ya istorya, tan makatulong pian nibiig tan nipulisay tayo iray aliwliwan kagagawa.

13. Panon itayon tutulongan na Biblia ya natalosan tan nipanengneng iray balibalin kualidad?

¹³ Binitla met ed Biblia so dakel ya matoor a lingkor na Dios. Nabasa tayo ditan so tungkol ed debosyon tan  katooran da. Nanengneng tayo no panon dan impatnag iray balibalin kualidad ya kailangan tayo met pian makaapit ed Dios. Sakey ed saratan ya kualidad et say pananisia. Impaliwawa na Biblia no anto so pananisia tan ibabaga to met no akin ya importante itan pian napaliket so Dios. (Hebreo 11:1, 6) Pero aliwan satan labat so karga na Biblia. Wala met iray alimbawa na totoon angipanengneng na pananisia. Singa bilang, impanengneng nen Abraham so pananisia to nen sinali ton iyapay si Isaac. (Genesis, kapitulo 22; Hebreo 11:17-19) Lapud satan ya alimbawa, mas natalosan tayo no antoy labay ya ibaga na “pananisia.” Talagan marundunong si Jehova ta agto labat imbaga ya kaukolan tayon ipanengneng iray balibalin kualidad noagta angiter met na saray alimbawa pian amta tayo no panon iratan ya ipanengneng!

14, 15. Antoy ibabagad sikatayo na Biblia tungkol ed sakey a biin linmad templo, tan antoy naaralan tayod saya tungkol ed si Jehova?

¹⁴ Ibabangat itayo na saray tuan istoryad Biblia tungkol ed saray totoo tan eksperiensya ra no anton klase na Dios si Jehova. Imanoen tayo pa may sakey a biin inobserbaan nen Jesus diad templo. Legan ya akayurong si Jesus ed abay na pananginan na donasyon, nanenengneng to iray totoo ya mangipepelag na saray kontribusyon da. Dakel iray mayayaman ya mangipepelag na “saray sulok da,” pero say akalay atension nen Jesus et amay pobrin balo. Say impelag to et “duaran angkelag a sinsilyo ya abebbebay balor to.” b Aman labat kalamor  so akeran kuarta to. Si Jesus, ya parehoy panagnonot tan liknaan tod si Jehova, et oniay imbaga to: “Mas dakel ni so impelag na sayan pobrin balo a bii nen say impelag [dan] amin.” Labay ton ibaga, parad si Jehova et mas dakel ni so impelag na bii komparad pinan-iiban kontribusyon na arum.​—Marcos 12:41-44; Lucas 21:1-4; Juan 8:28.

¹⁵ Isip mo pa labat: Diad amin ya totoo ya linma ed templo ed saman ya agew, sayan balon bii so apansin nen Jesus tan sinegurado nen Jehova ya nisulat so alimbawa to diad Biblia. Nanengneng tayod sayan alimbawa ya labay nen Jehova ya naamtaan tayon papablien to so amin ya gagawaen tayo parad sikato. Naliliketan si Jehova no iiter tayoy ‘the best’ tayo ed sikato anggano melag labat itan no ikompara ed sarag ya niiter na arum. Agta balibali so inusar nen Jehova ya paraan pian ibangat ed sikatayo iyan katuaan?

16, 17. Panon ya nanengneng so karunongan nen Jehova anggan diad impanpili to na saray impormasyon ya impaisulat to ed Salita to?

¹⁶ No sika so manggawa na sulat parad kapamilyam, siempre agmo nibaga ya amin. Kanian kailangan mon isipen no anto ray isulat mo. Ontan met, pinili nen Jehova ya impaisulat ed Salita to iray pigaran indibidual tan inkagawa. Pero aliwan naynay ya ipapaisulat to so amin ya detalye. (Juan 21:25) Singa bilang, no ibabaga na Biblia so tungkol ed panangukom na Dios, aliwan amin ya tepet tayo ed satan et naebatan. Pero nanengneng so karunongan nen Jehova anggad diad impanpili to na saray impormasyon ya impila tod Salita to. Panon?

¹⁷ Insulat so Biblia ed paraan ya tulongan to tayon  naamtaan no antoy walad puso tayo. Ibabaga na Hebreo 4:12: “Say salita [o mensahe] na Dios et mabilay tan makapanyari tan mas makdem nen say dinanman a duaray-tarem ya espada tan ontalos anggad pansianen toy kamarerwa tan espiritu . . . tan natebek to ray kanonotan tan intension na puso.” Ontatalos ed puso tayo so mensahe na Biblia tan ipapaamta to no antoy tuan nononoten tan motibo tayo. Saramay manbabasa ed satan, ya say aanapen da et say nabalaw da, et mabetbet ya nadidismaya ed saray salaysay ya anggapo iramay impormasyon ya iilaloan da. Ompan kuestionen da ni ingen no talaga kasin maaro, marunong, tan patas si Jehova.

18, 19. (a) Akin et agtayo mapaga odino naguloan no walay tepet tayo ed sakey a salaysay ed Biblia ya agtayon tampol naanap so ebat? (b) Anto so kailangan pian natalosan tayo so Salita na Dios, tan akin ya prueba itan ya talagan marundunong si Jehova?

¹⁸ Diad kabaliktaran, no aralen tayon maong so Biblia ya walay dugan motibo, nakabat tayo si Jehova, ta say karga na interon Biblia et tungkol ed sikato. Kanian agtayo naguloan no diad sakey a salaysay et walay tepet tayon agtampol naebatan. Bilang ilustrasyon, no manbubuo tayo na baleg ya puzzle, nayarin agtayon tampol naanap imay eksakton piraso odino agtayon tampol nanengneng imay dugan pangikargaan tayo. Pero, ompan duga met la iramay abuo tayon piraso pian nanengneng no antoy magmaliw ya itsura na litrato na puzzle. Ontan met, no aralen tayo so Biblia, kalkalnan onlinew ed sikatayo no anton klase na Dios si Jehova. Kanian no walay nabasam ya agmo natalosan ya tampol odino agmo nanengneng so koneksion to ed personalidad nen Jehova, makatulong iramay naaralan tayo la tungkol ed sikato pian nanengneng ya sikatoy naynay a maaro, patas, tan maptek ya Dios.

 ¹⁹ Kanian pian natalosan tayo so Salita na Dios, kailangan tayon basaen tan aralen itan ya walay dugan motibo. Agta prueba iya ya talagan marundunong si Jehova? Akin ey? Wala ray matatalinon totoo ya makapansulat na saray libro ya natalosan labat na “saray marunong tan mautek.” Pero kasin sarag day mansulat na libro ya natalosan labat na saray walaan na dugan motibo? Andi! Say marundunong ya Dios tayo labat so makagawa ed satan.​—Mateo 11:25.

20. Akin ya si Jehova labat so makapangibaga ed sikatayo no antoy sankaabigan ya paraan na pambilay, tan anto ray walad Biblia ya makatulong ed sikatayo?

²⁰ Panamegley na Salita nen Jehova, ibabaga tod sikatayo so sankaabigan ya paraan na pambilay. Bilang Manamalsa tayo, mas amta to no anto ray kailangan tayo nen say sikatayo. Amin ya totoo et walay manunan pankaukolan da​—labay tayoy naaro, magmaliw ya maliket, nawalaan na maong ya kakaaro tan maliket ya pamilya. Tan siansian agni ’tan anguman manlapu la nensaman. Dakel so nabasa tayod Biblia ya mausar odino praktikal iran karunongan ya makatulong ed sikatayo pian magmaliw a maliket tan matalona ed bilay. (Proverbio 2:7) Diad kada seksion na sayan publikasyon et walay sakey a kapitulo ya mangipapanengneng no panon tayon niyaplika iray marundunong ya bilin na Biblia, pero pantongtongan tayo pa diay sakey labat ya alimbawa.

21-23. Anton marunong ya bilin so makatulong ed sikatayo pian agtayo mamasnok tan manem-em na sakit na linawa?

²¹ Apansin mo ya no saray totoo et agmamerdona tan  manem-em ira na sakit a linawa, sikara laingen so nasakitan tan ag-ira maliket? No manem-em tayo na sakit na linawa, sikatayo lanlamang so nairapan. Ta kasi no pinunuyan tayo ’tan, atan lan lanang so sankanonot tayo, anggapoy deen na isip tayo, tan agtayo naliketan. Adiskobre na saray doktor ya no say sakey et agto kontroley pasnok to, baleg so posibilidad ya mansakit ed puso tan arum ni ran seryoson sakit. Pero abayag ni antis dan adiskobre itan, oniay marundunong ya imbaga na Biblia: “Tundaan moy manpasnok tan paliisan moy onsanok.” (Salmo 37:8) Panon tayon nagawaan itan?

²² Oniay marundunong ya bilin na Salita na Dios: “Say aralem a pakatalos na too so mamakepa ed pasnok to, tan karakpan ed sikato so pamalabas na kasalanan.” (Proverbio 19:11) Say aralem a pakatalos et say abilidad ya nanengneng no anto so walad benegan. Say sakey a walaan na ontan ya pakatalos et natetebek to no akin ya ontan so ginawa o imbaga na arum. No natatalosan tayo so motibo, nalilikna, tan situasyon na arum, ontulong itan ed sikatayo pian agtayo tampol nasakitan, mamasnok, tan mannonot na makapuy tungkol ed arum.

²³ Onia ni marundunong ya bilin na Biblia ed sikatayo: “Itultuloy yon itepel so sakey tan sakey tan mabulos a perdonaen so sakey tan sakey.” (Colosas 3:13) Say labay ya ibaga na “itultuloy yon itepel so sakey tan sakey” et anosan so arum odino pampasensiaan iray makapasyodot ya kagagawa da. Makatulong itan pian agtayo bastabasta ombarong odino iwasan imay toon akasakit ed sikatayo. Say salitan “perdonaen” et ipapasabi toy ideyan agti la manem-em na sakit na linawa odino tundaan ti lan isipen imay aliwliwan ginawa ed sikatayo. Amta na marundunong ya Dios tayo ya kailangan tayon perdonaen so arum no walay maabig ya rason  pian gawaen itan. Aliwa labat iyan parad pankaabigan da noagta parad pankaabigan tayo met ta nawalaan itayo na kalmadon puso tan deen na isip. (Lucas 17:3, 4) Talagan makapabilib so karunongan ya walad Salita na Dios!

24. Antoy nagawa no iyaplika tayo iray marundunong ya bilin nen Jehova?

²⁴ Lapud kabaleg na panangaro nen Jehova ed sikatayo, labay toy mitalosan o mitongtong ed sikatayo. Pinili to so ‘the best’ ya paraan. Inusar to iray totoo pian isulat so mensahe to legan iran igigiya na masanton espiritu. Kanian, say mismon karunongan nen Jehova so nabasa ed sayan sulat to. Satan ya karunongan et “napanmatalkan a maong.” (Salmo 93:5) No iyaplika tayo itan ed bilay tayo tan ibaga tayo met itan ed arum, lalo tayon napaapit ed sankarunongan ya Dios tayo. Diad onsublay ya kapitulo, pantongtongan tayo so sakey nin makapadinayew ya alimbawa na araldalem ya karunongan nen Jehova: say abilidad ton ipaamta so nagawad arapen tan sumpalen so gagala to.