Pinablin Manbabasa:

Kasin kaarom so Dios? Parad dakel, singa imposiblin nakaaro da so Dios. Iisipen na arum ya arawrawi liknaan na Dios ed sikara. Pakalikna na arum balet et anggapoy karapatan dan onasingger ed sikato. Pero maar-aro so bilin na Biblia: “Onapit kayo ed Dios, tan sikatoy onapit ed sikayo.” (Santiago 4:8) Ipropromisa ni ingen na Dios ed sikatayo: “Siak, si Jehova a Dios mo, so mamemben ed kawanan a liman, say mangibabaga ed sika na, ‘Agka ontatakot. Tulongan ta ka.’”—Isaias 41:13.

Panon tayon nakaaro so Dios? Pian nakaaro tayo so sakey, dapat kabat tayo tan labalabay tayo ray balibalin kualidad tan ugali to. Ontan met so pikakaaro ed Dios, kailangan tayon amtaen iray kualidad tan say personalidad to ya walad Biblia. Onapit so liknaan tayod Dios no nodnonoten tayo no panon ton ipapanengneng so kada sakey ed saray kualidad to, no panon irayan perpekton inalig nen Jesus, tan no panon tayo irayan naalig. Nanengneng tayo ya si Jehova labat so walay karapatan tan sankaabigan ya Manuley ed interon uniberso. Sikato met so sankamaongan ya Ama ya kailangan tayon amin. Sikatoy mabisbiskeg, patas, marundunong, tan maar-aro. Agton balot taynanan iray matoor ya anak to.

Komon ta natulongan ka na sayan libro ya lalon onapit ed si Jehova a Dios, tuloytuloy ya makapikaaro ed sikato, tan nidayew mo ed andi-angga.