1-3. (a) Antoy makapataktakot ya naeksperiensya na saray disipulo diad Dayat na Galilea, tan antoy ginawa nen Jesus? (b) Akin et duga so imbaga nen apostol Pablo ya “si Kristo so pakapanyari na Dios”?

 ATAKTAKOT iray disipulo. Nen bebeltangen day Dayat na Galilea, biglan binmagyo. Seguradon asali da lay abagyo ed sayan dayat ta abayag lan managsigay so arum ed sikara. a (Mateo 4:18, 19) Pero duma iya ta “makmaksil [so] dagem,” tan angkakabaleg iray daluyon. Anggano natatakot ira, ginawa day anggaay nayarian dan kontrolen so baloto. Pero talagan maksil imay bagyo. “Onsisipwak ed baloto iray daluyon,” kanian kalkalnan napapano itan na danum. Anggano manungol so dagem tan daluyon tan mankakagulo la ray disipulo, naugip si Jesus ed beneg na baloto, naksawan ta sanagew ya nambangat ed dakel ya totoo. Lapud takot ya ompan ompatey ira, binangon na saray disipulo si Jesus, tan imbaga ra: “Katawan, iliktar mo kami, ompatey ti la!”​—Marcos 4:35-38; Mateo 8:23-25.

² Ag-ataktakot si Jesus ta amta to ya walay pakapanyari ton patundaen so bagyo. Kanian binano toy dagem  tan inkuan tod dayat: “Tunda ka! Deen ka!” Tampol ya inmunor so dagem tan dayat, tinmunda so bagyo tan “nagmaliw a marendeen.” Akalikna na nikadkaduman takot iray disipulo to. Tan imbaga dad sakey tan sakey: “Siopa kasi iya?” Abigbigla ira ta sarag ton banoen so dagem tan dayat ya singa labat manbabano na magulon ugaw.​—Marcos 4:39-41; Mateo 8:26, 27.

³ Aliwan ordinaryon too si Jesus. Inikdan nen Jehova na pakapanyari si Jesus pian natulongan toy arum. Kanian duga labat so imbaga nen apostol Pablo: “Si Kristo so pakapanyari na Dios.” (1 Corinto 1:24) Panon ya impanengneng na Dios so pakapanyari to panamegley nen Jesus? Tan antoy epekto ed sikatayo na pangusar nen Jesus ed pakapanyari to?

4, 5. (a) Anton pakapanyari tan autoridad so inter nen Jehova ed saksakey ya Anak to? (b) Antoy inter nen Jehova ed si Jesus pian magmaliw a Marundunong a Komikimey to?

⁴ Isip mo pay pakapanyari nen Jesus antis ya linma diad dalin. Inusar nen Jehova so mismon “andi-anggaan a pakapanyari” to nen pinalsa to so saksakey ya Anak to, ya akabat bilang si Jesu-Kristo. (Roma 1:20; Colosas 1:15) Kayari na satan, inikdan nen Jehova na baleg ya pakapanyari tan autoridad so Anak to, pian nakaiba to ya manggawa ed amin a bengatla. Oniay ibabaga na Biblia tungkol ed si Jesus: “Amin a bengatla et apalsa diad panamegley to, tan ag-apalsa so anggan sakey a bengatla no aliwan diad panamegley to.”​—Juan 1:3.

⁵ Agtayo naimadyin no panon kabaleg ya pakapanyari  so kailangan pian nagawaan to iyan asainmin. Isip mo pa labat so pakapanyarin kailangan pian napawala iray minilyon a mabibiskeg ya anghel, say uniberso ya binilyon so galaxy to, tan say dalin ya walaan na nanduruman klase na mabilay ya pinalsa. Pian nasarag iratan na saksakey ya Anak, niwalad sikato so sankabiskegan ya puersa ed interon uniberso, say masanton espiritu na Dios. Panliketan na sayan Anak so papel to bilang say Marundunong a Komikimey nen Jehova, tan sikatoy inusar pian napalsa so arum ni ran bengatla.​—Proverbio 8:22-31.

6. Kayari impatey nen Jesus diad dalin tan pinaoli, anton pakapanyari tan autoridad so niiter ed sikato?

⁶ Kasin ikdan ni nen Jehova so saksakey ya Anak to na kaaruman ya pakapanyari tan autoridad? Kayari impatey nen Jesus diad dalin tan pinaoli, imbaga to: “Amin a pakauley ed tawen tan diad dalin et niiter lad siak.” (Mateo 28:18) On, inikdan si Jesus na abilidad tan karapatan ya manuley ed interon uniberso. Bilang say “Ari na saray arari tan Katawan na saray katawan,” inikdan si Jesus na autoridad ya ‘paandien so amin a gobierno tan amin ya autoridad tan pakayari’​—balanglan too o espiritu—​ya onkokontra ed Ama to. (Apocalipsis 19:16; 1 Corinto 15:24-26) Likud labat ed si Jehova, anggapo lay anggan anto ya ag-impasakop ed si Jesus.​—Hebreo 2:8; 1 Corinto 15:27.

7. Akin et segurado tayo ya agbalot usaren nen Jesus ed mauges so pakapanyarin inter nen Jehova ed sikato?

⁷ Kasin mapaga tayo ya ompan abusoen nen Jesus so pakapanyari to? Siempre andi! Inar-aron maong nen Jesus so Ama to kanian agbalot manggawa na anggan anton mamaermen ed Sikato. (Juan 8:29; 14:31) Amta nen  Jesus ya agbalot uusaren nen Jehova ed mauges so sankabiskegan ya pakapanyari to. Aminpigan anengneng ya mismo nen Jesus ya manaanap na pankanawnawa si Jehova “pian ipatnag toy biskeg to parad saramay matoor so puso rad sikato.” (2 Awaran 16:9) Tan singa say Ama to, inar-aro met nen Jesus iray totoo, kanian segurado tayo ya lanang ton usarey pakapanyari to parad pankaabigan tayo. (Juan 13:1) Makapantiwala tayo ed satan! Nengnengen tayo no panon ton inusar so pakapanyari to nen wadiad dalin tan no akin ya ginawa to itan.

8. Kayarin alanaan si Jesus, anto ray ginawa to, tan panon ton inusar so pakapanyari to?

⁸ Mapatnag ya agnanggawa na milagro si Jesus nen ombabaleg ni labat diad Nazaret. Pero anguman itan kayari ton abautismoan nen 29 C.E., nen manga 30 so taon to. (Lucas 3:21-23) Ibabaga na Biblia: “Sikatoy nilanaan na Dios ed panamegley na masanton espiritu tan pakayari, tan nanliber ed nanduruman pasen, a nanggaway maong tan pinaabig ton amin iramay papairapen na Diablo.” (Gawa 10:38) Ipapanengneng na saray salitan “nanggaway maong” ya dugay impangusar nen Jesus ed pakapanyari to. Kayari ton alanaan, pinatunayan to ya sikatoy “sakey a propetan makapanyari ed gawa tan salita.”—Lucas 24:19.

9-11. (a) Iner so lanang ya pambabangatan nen Jesus, tan antoy sarasarag ton gawaen? (b) Akin ya mandinayew iray totoo ed paraan na panagbangat nen Jesus?

⁹ Panon tayon amta ya si Jesus et ‘makapanyari ed salita’? Sikatoy lanang ya manbabangat diad gilig na dayat o palandey, karsada, tan tindaan. (Marcos 6:53-56;  Lucas 5:1-3; 13:26) No aliwan maong ya mansalita tan manbangat si Jesus, seguradon tinaynan la na totoo. Diad saman et anggapo ni ray niimprintan libro, kanian no labay day makaaral, kailangan dan tandaan so ibabaga to. No ontan sirin, dapat say panagbangat nen Jesus et amay naalay interes na saray ondedengel, mainomay ya talosan tan tandaan. Pero aliwa itan ya mairap ed si Jesus. Say sakey ya alimbawa et amay Sermon to ed Palandey.

¹⁰ Sakey ya kabuasan diad bandad gapo na 31 C.E., wala ray totoon nantitipon ed gilig na palandey ya asingger ed Dayat na Galilea. Nanlapu so arum ed sikara diad Judea tan Jerusalem, ya 100 anggad 110 kilometro so kaarawi to. Wala met iray nanlapu ed Tiro tan Sidon diad norte. Dakel ya mansasakit so inmasingger ed si Jesus pian nadiwit da, tan pinaabig to ran amin. Nen apaabig to la ra, ginmapo lan nambangat. (Lucas 6:17-19) Nen asumpal lan nansalita, mandinayew iray totoo ed nadngel da. Akin ey?

¹¹ Kayari na pigaran taon, oniay insulat na sakey ya akarengel ed satan ya sermon: “Mandinayew iray totoo ed paraan na panagbangat to, ta binangatan to ra a singa panagbangat na sakey a toon walaay autoridad.” (Mateo 7:28, 29) Nansalita si Jesus diad paraan ya nalikas da so pakapanyari ya walad sikato. Imbangat tod sikara so labay ya ipaamta na Dios tan lanang ton ibabase iray ibabaga to ed Salita na Dios. (Juan 7:16) Malinew, makakombinse, tan agnakuestion iray bangat nen Jesus. Tinulongan to ran natalosan so sengegan na problema tan nausisa so inkatoo da. Imbangat to ra no  panon iran magmaliw ya maliket, no panon so manpikasi, no panon dan naanap so Panarian na Dios, tan no panon iran nawalaan na marakep ya arapen. (Mateo 5:3–7:27) Asabi toy puso na saramay naeerasan ed katuaan tan inkatunong, tan tinulongan to ran onkiwas. Kanian ‘imburi’ day sarili da tan “tinaynan da so amin a bengatla tan tinmumbok irad sikato.” (Mateo 16:24; Lucas 5:10, 11) Prueba itan ya si Jesus et ‘makapanyari ed salita’!

12, 13. Panon tayon amta ya “makapanyari ed gawa” si Jesus, tan anto ran nanduruman milagro so ginawa to?

¹² Si Jesus met et “makapanyari ed gawa.” (Lucas 24:19) Nabasa ed Ebanghelyo so masulok ya 30 ya espisipikon milagro ya ginawa to diad tulong na “pakayari nen Jehova.” b (Lucas 5:17) Nilibon totoo so agunggonaan lapud saratan ya milagro. Singa bilang, ibabaga na Biblia ya pinakan nen Jesus so 5,000 ya lalaki tan kayari na satan et 4,000 ni ya lalaki. Agni kaiba iray bibii tan ugugaw. Kanian nayarin libo-libo so pinakan to!​—Mateo 14:13-21; 15:32-38.

¹³ Nanduruma so milagron ginawa nen Jesus. Walay autoridad to ed saray demonyo, tan sarasarag to ran papawayen ed saramay aselepan. (Lucas 9:37-43) Ginawa to met ya alak so danum. (Juan 2:1-11) Seguradon manbilib iray disipulo nen “anengneng day Jesus a manaakar ed tapew na dayat.” (Juan 6:18, 19) Sarasarag ton paabigen  iray kapansanan tan amin ya klase na grabe tan makapatey ya sakit. (Marcos 3:1-5; Juan 4:46-54) Nanduruma so paraan na panagpaabig to. Wala iramay pinaabig to anggano arawi kawalaan da, tan wala met iramay inmabig nen diniwit to ra. (Mateo 8:2, 3, 5-13) Saray arum et inmabig ya tampol, tan saray arum et kalkalna.​—Marcos 8:22-25; Lucas 8:43, 44.

14. Panon ya impanengneng nen Jesus ya walay pakapanyari ton bilayen iray inaatey?

¹⁴ Say makapadinayew ed amin, sarag ya bilayen nen Jesus iray inaatey. Nabasa ed Biblia so taloran inkagawa na impamaoli nen Jesus: Binilay to lamet so 12 taon ya ugaw a bii, say alenleneg ya anak a laki na balon bii, tan say inad-aron agi na duaran bibii. (Lucas 7:11-15; 8:49-56; Juan 11:38-44) Anggapoy kairap-irap ya ginawa iratan nen Jesus. Amay 12 taon ya ugaw et pinaoli To kayari labat na impatey to. Amay anak a laki na balon bii et pinaoli To nen itutulor la, diad samay mismon agew na impatey to. Tan si Lazaro et pinaoli To diad angiponponan ed sikato kayari apat agew na impatey to.

15, 16. Antoy prueba ya agmakasarilin inusar nen Jesus so pakapanyari to?

¹⁵ Anto kasi nagawa no niiter so pakapanyari nen Jesus ed saray aliwan perpekton manuley? Ompan abusoen da itan ta walay tendensia na aliwan perpekton manuley ya magmaliw ya makasarili, malastog, tan kurakot. Tan uusaren day pakapanyari da pian sakitan so arum. Pero aliwan ontan si Jesus ta sikatoy agmankakasalanan.​—1 Pedro 2:22.

 ¹⁶ Inusar nen Jesus so pakapanyari to parad pankaabigan na arum, aliwan parad sarili to. Anggano nen narasan, agto ginawan tinapay iramay bato pian walay naakan to. (Mateo 4:1-4) Nanengneng ed simplin bilay nen Jesus ya agto inusar so pakapanyari to pian onyaman. (Mateo 8:20) Wala ni pakanengnengan ya dugay motibo nen Jesus no uusaren toy pakapanyari to. Sikatoy mansasakripisyo no manggagaway milagro. No papaabigen nen Jesus iray mansasakit, walay ompapaway ed sikato ya pakapanyari. Alikas to itan anggan nen walay sakey labat ya inmabig. (Marcos 5:25-34) Pero, pinaulyanan to so dakel ya totoo ya sikatoy nadiwit da, tan inmabig ira. (Lucas 6:19) Talagan agmakasarili si Jesus!

17. Panon ya impanengneng nen Jesus ya sikatoy responsable diad impangusar tod pakapanyari to?

¹⁷ Responsable met si Jesus diad impangusar tod pakapanyari to. Agton balot inusar so pakapanyari to pian pabiliben so arum tan onsikat. (Mateo 4:5-7) Singa bilang, agnanggawa na saray milagro pian labat pagustoan so kerew nen Herodes. (Lucas 23:8, 9) Imbes ya ilastog toy pakapanyari to, mabetbet ya bibilinen nen Jesus iramay pinaabig to ya agda ibabaga ed arum. (Marcos 5:43; 7:36) Agto labay ya nakombinse iray totoo ya sikato so Mesias lapu labat ed saray nababalitaan dan istorya tungkol ed makapakelaw iran milagro to.​—Mateo 12:15-19.

18-20. (a) Akin ya inusar nen Jesus so pakapanyari to pian manggaway maong? (b) Antoy nibagam ed samay impamaabig nen Jesus ed lakin telek?

¹⁸ Makapanyari si Jesus, pero duma ed saray manuley ya anggapoy malasakit tan pibabali da ed arum. Inar-aro  nen Jesus iray totoo. Nanenengneng to labat iran nanairapan, nakakasian to la ra tan labalabay to ran tulongan. (Mateo 14:14) Makonsidera met si Jesus ed nalilikna tan pankaukolan na arum, kanian inusar toy pakapanyari to pian tulongan tan nalemewan ira. Say sakey ya balibalin alimbawa et amay walad Marcos 7:31-37.

¹⁹ Diad saman, aromog na totoo si Jesus tan inawit dad sikato so dakel ya mansasakit tan pinaabig to ran amin. (Mateo 15:29, 30) Pero anengneng nen Jesus ya walay lakin mankakkaukolan na konsiderasyon. Sikatoy telek tan ngalngali aga makasalita. Nayarin alikas nen Jesus ya mannerbiyos tan nababaingan iyan laki. Kanian inyarawi nen Jesus ed saray totoo tan inyakar tod lugar ya bukbukor da labat. Insan nansinyas si Jesus pian ipaamta no antoy gawaen to. “Inyan to iray gamet to ed saray layag na laki tan kayari ton linmutda, diniwit toy dila na laki.” c (Marcos 7:33) Insan tinmangay si Jesus ed tawen tan nampikasi. Singa to ibabaga ed laki ya, ‘Say gawaen kod sika et nanlapud pakapanyari na Dios.’ Insan imbaga nen Jesus: “Nalukasan ka.” (Marcos 7:34) Diad saman et akarengel imay laki, tan normal lay panagsalita to.

²⁰ Balibalin isipen ya no uusaren nen Jesus so inter na Dios ya pakapanyari ton mamaabig ed totoo, ikokonsidera to met so nalilikna da. Makapabiskeg ya naamtaan ya say pinili nen Jehova ya manuley ed Panarian to et maar-aro tan makonsideran Ari.

21, 22. (a) Anto ran milagro so gawaen nen Jesus diad arapen? (b) Lapud kontrolado nen Jesus so puersa na kalikasan, antoy ilaloan tayo diad uley to?

²¹ Ipapanengneng na saray milagron ginawa nen Jesus diad dalin no anto ni ray balibalin gawaen to diad arapen no manuley la bilang Ari. Diad balon mundo na Dios, manggawa lamet si Jesus na saray milagro pero diad mas malaknab ya paraan, diad interon mundo! Anto ray talaranan tayo diad arapen?

²² Ayosen nen Jesus so aderal ya kalikasan na planetan Dalin. Tandaan, pinatunda to nensaman so makmaksil ya bagyo. Kontrolado to so puersa na kalikasan. Kanian diad uley nen Kristo ed Panarian na Dios, seguradon agla natatakot iray totoo ya ompan nasalanta ira na saray bagyo, yegyeg, isabog na bulkan, odino arum nin kalamidad. Lapud si Jesus so Marundunong a Komikimey ya inusar nen Jehova pian napalsa so dalin tan amin ya mabilay a pinalsan wadia, kabkabisado to so dalin. Amta to no panon ya napanayaman so dalin diad paraan ya agnaderal. Diad uley to, gawaen ton Paraiso so interon dalin.​—Lucas 23:43.

23. Bilang Ari, panon ya iter nen Jesus so nakaukolan na totoo?

²³ Panon to balet iray pankaukolan na totoo? Tandaan ya diad daiset labat ya naakan et apakan nen Jesus so nilibon totoo. Kanian segurado tayo ya anggapoy naerasan no sikato lay manuley ed dalin. On, diad satan et dakdakel lay naakan na amin, anggapo lan balot so naerasan. (Salmo 72:16) Sarasarag to met ya paabigen so amin ya klase na sakit tan kapansanan. Saray bulag, telek, baldado, tan piley et permanente lan onabig. (Isaias  33:24; 35:5, 6) Binilay to met iray inaatey, kanian bilang makapanyarin Ari ed tawen, bilayen to met so minilyon ya totoon walad memorya nen Ama to.​—Juan 5:28, 29.

24. No dadalepdepen tayoy pakapanyari nen Jesus, antoy tandaan tayo, tan akin?

²⁴ No dadalepdepen tayoy pakapanyari nen Jesus, tandaan tayo ya perpekton aaligen na sayan Anak so Ama to. (Juan 14:9) Kanian say panguusar nen Jesus na pakapanyari to so mangipanengneng no panon ya uusaren nen Jehova so pakapanyari to. Singa bilang, isip mo pa may maaron impamaabig nen Jesus ed samay lakin akating. Lapud akasian to, diniwit to imay laki insan to imbaga: “Labay ko!” (Marcos 1:40-42) Panamegley na sarayan salaysay, singa ibabagad sikatayo nen Jehova ya, ‘Ontan so panguusar kod pakapanyarik!’ Seguradon labalabay mon idayew tan pisalamatan so makapanyarin-amin a Dios tayo lapud uusaren toy pakapanyari to diad maaron paraan.