1-3. (a) Antoy ginawa na saray Ehipsio ed saray Israelita? (b) Panon ya indepensa nen Jehova iray totoo to?

 ANGGAPO lay nabatikan na saray Israelita​—diad biek tan biek da et saray ataragey ya palandey, diad arapan da et say Ambalangan Dayat, tan diad benegan da et nitan la ray onuusil ya Ehipsion sundalo. Marukruksa tan determinado ran mamatey ed saray Israelita. a Pero, pinakasil nen Moises so liknaan na totoo na Dios. Imbaga tod sikara: “Si Jehova a mismo so milaban parad sikayo.”—Exodo 14:14.

² Kinmerew na tulong si Moises ed si Jehova, tan oniay ebat To: “Akin et siansia nin ontatawag ka ed siak? . . . Itagey moy baston mo tan iyunat moy limam ed dayat tan belsay mo itan.” (Exodo 14:15, 16) Imadyin mo pa man ya eksena. Imbakin tampol nen Jehova so sakey ya anghel to, tan amay lusek ya lurem et inmalis ed benegan da, nayarin binmuskag itan tan nagmaliw ya pinagka-harang da pian ag-ira nalusob na saray Ehipsio. (Exodo 14:19, 20; Salmo 105:39) Inyunat nen Moises so lima to, tan binelsay na makmaksil  ya dagem so dayat. Atipon so danum ed biek tan biek tan nagmaliw ya singa padir, kanian wala lay maawa-awang ya nadalanan na interon bansa!​—Exodo 14:21; 15:8.

³ Nen anengneng na Faraon iyan mabisbiskeg ya pakapanyari, ingganggan to la komon iray sundalo to ya onatras. Pero lapud malastog, ingganggan to nin siansia ray sundalo to ya onusil. (Exodo 14:23) Manapuran linmusob iray Ehipsio diad dayat, pero ataranta ra ta naknakal iray dalig na karwahe ra. Nen akasabi lad biek so amin ya Israelita, ingganggan nen Jehova si Moises: “Iyunat moy limam ed dayat pian ontabon so danum ed saray Ehipsio, saray karwahe ran pan-guerra, tan saray sundalo ran akakabayo.” Tinmabon so singa padir ya danum ed si Faraon tan saray sundalo to!​—Exodo 14:24-28; Salmo 136:15.

4. (a) Antoy pinatunayan nen Jehova diad Ambalangan Dayat? (b) Antoy nayarin reaksion na arum no nababasa day tungkol ed saray impilaban nen Jehova?

⁴ Nikadkaduma may impangiligtas nen Jehova ed bansan Israel diad Ambalangan Dayat. Dakel so naaralan tayo ed satan tungkol ed sikato. Pinatunayan to ya sikatoy “makapanyarin sundalo.” (Exodo 15:3) Pero, antoy reaksion mo ey ed saman ya impilaban nen Jehova? Diad tua, saray guerra so lapuan na ermen tan irap na totoo. Kanian, onarawi la kasi liknaan mo ed Dios tan agka la mikaaro ed sikato lapud pakapanyari ton maneral?

5, 6. (a) Akin et duga labat ya natawag so Dios ya “Jehova na saray armada”? (b) Antoy pandumaan na guerra na Dios tan guerra na too?

⁵ Diad Hebreon Kasulatan, ngalngali 250 ya beses ya tinawag so Dios ya “Jehova na saray armada” tan diad Kristianon Griegon Kasulatan et amidua. (1 Samuel 1:11) Bilang Soberanon Manuley, kontrolado tan oorganisaen nen Jehova so amayamay ya mabibiskeg ya anghel. (Josue 5:13-15; 1 Arari 22:19) Sarasarag na sayan armada ya deralen iray mangakalaban ed Dios. (Isaias 37:36) Siempre, aliwliwan isipen ya naderal iray totoo. Pero tandaan, say guerra na Dios et duma ed guerra na too. Papapawayen na saray militar tan politiko ya maong so motibo ra no migi-guerra ira. Pero diad tua, mabetbet ya milalaban ira lapud agum tan inkamakasarili.

⁶ Duma balet si Jehova ta aliwan puros emosyon so paiiralen to. Ibabaga na Deuteronomio 32:4: “Say Bato, ayadyari so kimey to, ta amin a dalan to et inkahustisya. Sakey a matoor a Dios ya agbalot manggaway ag-inkahustisya; sikatoy matunong tan maptek.” Ibabaga na Biblia ya kabusol na Dios so agnakontrol ya pasnok, panagmaltrato, tan inkaruksa. (Genesis 49:7; Salmo 11:5) Kanian agbalot milalaban si Jehova ya anggapoy rason. Mataltalag ton usaren so pakapanyari ton maneral tan uusaren to labat itan no atan labat lay ultimon solusyon. Oniay imbaga to panamegley nen propeta Ezequiel: “‘Kasin panliketan koy ipatey na sakey ya mauges?’ so imbaga na Soberanon Katawan a Jehova. ‘Agta mas labay ko nin sikatoy magbabawi ed saray dalan to tan mantultuloy a manbilay?’”—Ezequiel 18:23.

7, 8. (a) Antoy abaloan nen Job tungkol ed paniirap to? (b) Panon ya impetek nen Elihu so panagnonot nen Job? (c) Antoy naaralan tayo ed samay agawad si Job?

 ⁷ Kanian akin et kailangan ya usaren nen Jehova so pakapanyari ton maneral? Pian natalosan tayo, pantongtongan tayoy tungkol ed matunong ya too ya si Job. Imbaga nen Satanas ya no nasubok si Job​—odino anggan siopan too—​agla manmatoor. Kanian inabuloyan nen Jehova si Satanas ya suboken so katooran nen Job. Say resulta, nansakit si Job, nanirap, abalang so amin ya kayamanan to, tan inatey so amin ya anak to. (Job 1:1–2:8) Ag-amta nen Job no akin ya nagagawa iraman ed sikato. Say abaloan to, sikatoy agmakatunongan ya dudusaen na Dios. Tinepet tod Dios no akin ya sikatoy ‘pupuntiryaen’ tan ‘bubusolen’ To.​—Job 7:20; 13:24.

⁸ Maong labat ta impetek na kabataan ya si Elihu so aliwan nononoten nen Job. Say kuan to: ‘Kasin kokkombinsido ka ya duga ka, kanian ibabagam ya, “Mas matunong ak nen say Dios”?’ (Job 35:2) On, aliwan duga no isipen tayo ya mas marunong itayo ni nen say Dios, odino ipasen ya sikatoy aliwan patas. “Agbalot manggaway mauges so tuan Dios, agbalot manggaway aliwa so Makapanyarin-amin!” so imbaga nen Elihu. Insan inyarum to: “Say pakatalos ed Makapanyarin-amin et agtayo narandan [odino nasarag ya talosan]; abalbaleg so pakayari to, tan agto susumlangen so hustisya to tan say daakan ya inkatunong to.” (Job 34:10; 36:22, 23; 37:23) Segurado tayo ya no milaban so Dios, walan-walay makatunongan ya rason. Tandaan tayo itan legan tayon aamtaen iray rason no akin ya no maminsan et milalaban so Dios na kareenan.​—1 Corinto 14:33.

9. Akin et milalaban so Dios ya masanto?

⁹ Nen imbaga nen Moises ya “makapanyarin sundalo” so Dios, inyarum to: “Siopad saray dirios so mipara ed sika, O Jehova? Siopay mipara ed sika ed agaylan inkasantom?” (Exodo 15:11) Singa ontan met may insulat nen propeta Habacuc, say kuan to: “Malinlinis iray matam pian onnengneng ed mauges, tan agmo abuloyan so kaugsan.” (Habacuc 1:13) Anggano maar-aron Dios si Jehova, sikato met so Dios ya masanto, matunong, tan patas. No maminsan, lapud saratan ya kualidad to, kailangan ton usaren so pakapanyarin ton maneral. (Isaias 59:15-19; Lucas 18:7) Kanian no milalaban so Dios, agto labay ya ibagan sikatoy aliwan masanto. Imbes, sikatoy milalaban lapud masanto.​—Exodo 39:30.

10. Panon ya manampot imay busolan ya impasakbay ed Genesis 3:15, tan anto ray bendisyon na satan ed saray matunong ya totoo?

¹⁰ Imanom pa may agawa nen nanrebelde ed Dios so unonan sanasawa, si Adan tan Eva. (Genesis 3:1-6) No kinonsenti ira nen Jehova ed mauges ya ginawa da, papakapuyen toy autoridad to bilang Soberano ed interon Uniberso. Lapud matunong so Dios, kailangan to ran sentensiaan na patey. (Roma 6:23) Diad sankaunaan ya propesiya na Biblia, impasakbay to ya manbusolan iray lingkor to tan saray papatumbok na “uleg,” si Satanas. (Apocalipsis 12:9; Genesis 3:15) Manampot labat iyan busolan no namekmek lay Satanas. (Roma 16:20) Lapud satan ya panangukom, dakdakel so bendisyon ed saray totoo​—agla naimpluensyaan nen  Satanas iray totoo tan magmaliw lan Paraiso so interon dalin. (Mateo 19:28) Anggad agni ’tan agawa, agtundaan na saray onkakampi ed si Satanas ya pairapen tan deralen so espiritualidad na totoo na Dios. Kanian wala ray situasyon ya kailangan ya onkiwas si Jehova pian iyagel so totoo to.

11. Akin et kailangan ya delapen nen Jehova so interon dalin?

¹¹ Say sakey ya alimbawa et amay Delap nen panaon nen Noe. Oniay ibabaga na Genesis 6:11, 12: “Say dalin et mauge-uges ed pakanengneng na tuan Dios, tan say dalin et napnoy inkaruksa. On, ninmengneng so Dios ed dalin, tan aderaderal iya; dineral na amin a laman so dalan to diad dalin.” Paulyan labat kasi nen Jehova ya upoten na mauges ya totoo iray pigpigaran maong ya totoo diad dalin? Andi. Kailangan ya delapen nen Jehova so interon dalin pian naderal iray mauges tan imoral ya totoo.

12. (a) Antoy impasakbay nen Jehova tungkol ed “ilalak” nen Abraham? (b) Akin et nandesisyon si Jehova ya deralen iray Amoreo?

¹² Inukom met na Dios iray Canaanita. Impaamta nen Jehova ed si Abraham ya panamegley na ilalak to et nabendisyonan so amin ya pamilya diad dalin. Pian nasumpal itan ya promisa, nandesisyon so Dios ya iter ed ananak nen Abraham so dalin na Canaan, say dalin ya panaayaman na saray Amoreo. Makatunongan kasin deralen na Dios irayan totoo tan iter so dalin da ed saray ilalak nen Abraham? Impasakbay nen Jehova ya onlabas ni so manga 400 ya taon antis ya “nadusa” iray Amoreo, sano “saray kasalanan da” et alablabas  la. b (Genesis 12:1-3; 13:14, 15; 15:13, 16; 22:18) Legan na saman, inmuges lan inmuges iray Amoreo. Nandayew irad saray idolo, dakel so pinapatey da, tan imoral so kabibilay da. (Exodo 23:24; 34:12, 13; Numeros 33:52) Pinopoolan da ni ingen iray anak da pian ibagat ed dirios da. Paulyan labat kasi na masanton Dios ya miayam iray lingkor to ed ontan kauges ya totoo? Andi! Oniay imbaga to: “Arutakan so dalin, tan dusaen ko itan lapud kasalanan to, tan iyula na dalin iray manaayam ditan.” (Levitico 18:21-25) Pero ag-impilanor ya dineral nen Jehova iray matunong ya Canaanita, singa si Rahab tan saray Gibeonita.​—Josue 6:25; 9:3-27.

13, 14. (a) Akin et kailangan ya pasantoen nen Jehova so ngaran to? (b) Panon ya nilinisan nen Jehova so ngaran odino reputasyon to?

¹³ Lapud masanto si Jehova, masanto met so ngaran to. (Levitico 22:32) Oniay imbangat nen Jesus ya ipikasi na saray disipulo to: “Napasanto komon so ngaran mo.” (Mateo 6:9) Lapud samay rebelyon ed Eden, apauges so ngaran na Dios, aderal so reputasyon to, tan akuestion so paraan na pananguley to. Agbalot konsintien nen Jehova itan ya panagpauges tan panagrebelde. Kanian kailangan ya linisan toy reputasyon to.​—Isaias 48:11.

¹⁴ Pawilen tayo pa iray Israelita. Anggad naaripen ni rad Ehipto, agnasumpal imay promisa na Dios ed si Abraham ya panamegley na ilalak to et nabendisyonan so amin ya pamilya diad dalin. Pero no iligtas to ra  tan gawaen to ran sakey ya bansa, nalinisan so aderal ya ngaran odino reputasyon to. Kanian oniay impikasi nen propetan Daniel ed Dios: “O Jehova a Dios mi, sika ya angipaway ed saray totoom manlapud dalin na Ehipto diad panamegley na mabiskeg a limam, tan sika a nanggaway ngaran parad sarilim.”—Daniel 9:15.

15. Akin et inliktar nen Jehova iray Judio ya naaripen ed Babilonia?

¹⁵ Makapainteres ta nen ipipikasi itan nen Daniel, kakkaukolan lamet na saray Judio ya onkiwas si Jehova nisengeg ed ngaran To. Ta diad saman, lapud awet na ulo na saray Judio inabuloyan nen Jehova ya naaripen irad Babilonia. Say mismon syudad da, say Jerusalem, et aderal. Amta nen Daniel ya no makapawil iray Judio ed dalin da, napasanto so ngaran nen Jehova. Kanian oniay impikasi to: “O Jehova, mamerdona ka. O Jehova, imanom pa tan kiwas ka! Agka manpapaleen, parad mismon ngaran mo, O Dios ko, lapud say syudad mo tan saray totoom et atawag ed mismon ngaran mo.”—Daniel 9:18, 19.

16. Akin ya no idedepensa nen Jehova so sarili to et agto labay ya ibagan anggapoy pibabali to tan sarili to labat so iisipen to?

¹⁶ No idedepensa nen Jehova so ngaran to, labay to kasin ibaga, anggapoy pibabali to tan sarili to labat so iisipen to? Andi, imbes, pakapatnagan itan ya sikatoy masanto tan importante ed sikato so hustisya, tan gagawaen to itan pian iyagel iray totoo to. Say sakey ya alimbawa et amay walad Genesis kapitulo 14. Nabasa tayo ditan ya kinidnap na apatiran arari so kaanakan nen Abraham ya si Lot tan say pamilya to. Diad tulong na Dios, atalo nen Abraham so dakdakel tan  mabisbiskeg ya kalaban! Nayarin sayan impanalo so sankaunaan ed saray akalista diad “libro na Saray Guerra nen Jehova,” ya posiblin sakey ya libron akasulatan na arum ni ran impilaban nen Jehova ya agla aka-rekord ed Biblia. (Numeros 21:14) Tan dakel ni ray sinmusublay ya impanalo.

17. Anto ray ebidensya ya akilaban si Jehova parad saray Israelita nen akaloob la rad dalin na Canaan? Mangiter na saray alimbawa.

¹⁷ Ag-abayag nen akaloob lad dalin na Canaan iray Israelita, pinabiskeg ira nen Moises, inkuan to: “Si Jehova a Dios yo so onlad unaan yo tan milaban parad sikayo, a singa ginawa tod Ehipto diad mismon pakanengneng yo.” (Deuteronomio 1:30; 20:1) Manlapud si Josue, ya sinmalat ed si Moises, anggad panaon na saray Ukom tan uley na saray matoor ya arari ed Juda, talagan tinulongan nen Jehova ya milaban iray totoo to. Makapadinayew so impanalo ra ed saray guerra.​—Josue 10:1-14; Ukom 4:12-17; 2 Samuel 5:17-21.

18. (a) Akin et misatsalamat tayo ya agmanguuman si Jehova? (b) Antoy nagawa sano onggrabe ni imay busolan ya ibabaga na Genesis 3:15?

¹⁸ Agmanguuman si Jehova; tan agmet manguuman so panlabayan to ya gawaen a mareen tan paraiso iyan planetan Dalin. (Genesis 1:27, 28) Kabusol nin siansia na Dios so kaugsan. Tan inar-aro to ray totoo to. Agla manbayag, sikatoy onkiwas pian protektaan ira. (Salmo 11:7) Diad tua, amay busolan ya ibabaga na Genesis 3:15 et onggrabe ni ya anggad punton maruksan atakien na saray kalaban so totoo na Dios. Pian napasanto toy ngaran to tan nidepensa to ray totoo to, magmaliw lamet ya “makapanyarin sundalo” si Jehova!​—Zacarias 14:3; Apocalipsis 16:14, 16.

19. (a) Akin et onapit so liknaan tayo ed Dios no uusaren toy pakapanyari ton maneral? Mangiter na ilustrasyon. (b) Lapud akaparaan so Dios ya mangidepensa ed sikatayo, antoy epekto na satan ed sikatayo?

 ¹⁹ Bilang ilustrasyon, kunwari et walay sakey ya ama ya aatakien na masibesibeg ya ayep so pamilya to, kanian akilaban ed samay ayep tan pinatey to. Anto kasi reaksion na asawa tan saray anak to? Kasin arawian da la tan natatakot la rad sikato? Siempre andi. Seguradon misatsalamat ira tan lalo dan aroen ta inyagel to ra. Mipadpara, no uusaren na Dios so pakapanyari to ya maneral, ag-itayo dapat onarawi ed sikato. Imbes, mas naar-aro tayo ta akaparaan ya mangidepensa ed sikatayo. Lalo tayo ni ingen ya respetoen lapud anggapoy limitasyon na pakapanyari to. No ontan so gawaen tayo, ‘abobonan na Dios so sagradon panaglingkor tayo ya atekepay takot tan respeto.’​—Hebreo 12:28.

20. No wala ray nababasa tayod Biblia tungkol ed impilaban nen Jehova ya agtayo masyadon natatalosan, antoy gawaen tayo, tan akin?

²⁰ Siempre, wala ray detalye na impilaban nen Jehova ya agto la impaisulat ed Biblia. Pero nia so lanang ya segurado tayo: Agbalot uusaren nen Jehova so pakapanyari ton maneral diad maruksa, anggapoy panangasi, odino aliwan patas ya paraan. Mabetbet ya makakatulong so arum ya bersikulo na Biblia tan arum ni ran impormasyon pian natalosan tayo so sakey ya salaysay. (Proverbio 18:13) Tan anggano no bilang ta wala ray agmo natatalosan ya ginawa nen Jehova, marakep no tuloytuloy mon amtaen tan dalepdepen iray balibalin kualidad to. No gawaen mo ’tan, agka manduda, imbes mas ombiskeg so tiwalam ed Dios tayo, si Jehova.—Job 34:12.

21. Anggano no maminsan et “makapanyarin sundalo” si Jehova, anton talagay personalidad to?

²¹ Anggano wala ray situasyon ya kailangan ya magmaliw ya “makapanyarin sundalo” si Jehova, agto labay ya ibagan labalabay toy milaban. Diad samay pasingawey ed si Ezequiel tungkol ed karwahe ed tawen, mapatnag ya akaparaan si Jehova ya milaban ed saray mamubusol ed sikato. Pero, anengneng nen Ezequiel ya akapaliber ed Dios so bunlalakaw odino rainbow, ya mangisisimbolo ed kareenan. (Genesis 9:13; Ezequiel 1:28; Apocalipsis 4:3) Malinew ya kalmado tan mareen si Jehova. “Say Dios et aro,” so insulat nen apostol Juan. (1 Juan 4:8) Amin ya kualidad nen Jehova et balanse tan perpekto ton ipapanengneng. Talagan balbaleg ya pribilehyo sirin so onapit ed makapanyari balet maar-aron Dios tayo!