1, 2. Anto ray nayarin naandi ed sikatayo, tan antoy nalilikna tayo lapud satan?

 AKANENGNENG ka lay ugaw ya manakis ta abalang o aderal so paborito ton gakgalaw? Seguro nakakasian mo. Insan nen kien, nalmo tan naapiger na Papa to may gakgalaw. Kanian tinmunda lay akis to tan akaimis la. Parad si Papa to, mainomay labat ya anapen tan apigeren may gakgalaw. Pero amay ugaw, manbilib ta aluto-lutod isip to ya abalang la tan agla naapiger may gakgalaw to.

² Si Jehova, say sankamaongan ya Ateng, et walay pakapanyari ton ipawil iramay ipapasen na ananak ton imposible lan nipawil. Siempre, aliwan gakgalaw so pantotongtongan tayon ipawil to. Diad sarayan “mapeligro tan mair-irap a panaon,” wala ray mas importante ya naaandi ed sikatayo. (2 Timoteo 3:1-5) Singa bilang, say abung, gamit, trabaho, anggan say kasil na laman. Nadidismaya tayo met no nanenengneng tayon nadederal so kalikasan tan nauupot iray nanduruman klase na ayayep tan tanaman. Pero say sankasakitan ed amin et no naandi so inar-aro tayo ed bilay. Mair-irap ed liknaan may anggapoy nagawaan mo pian nipawil so naandi.—2 Samuel 18:33.

3. Antoy balibalin ibabaga na Gawa 3:21, tan panon itan ya tooren nen Jehova?

³ Kanian no naamtaan tayo ya walay pakapanyari nen  Jehova a mangipawil, seguradon naliligliwa tayo! Diad sayan kapitulo, aralen tayo no anto ray sarasarag tan labalabay nen Jehova ya ipawil ed ananak to diad dalin. Diad tua, ibabaga na Biblia ya linawa nen Jehova ya ‘ipawil so amin a bengatla.’ (Gawa 3:21) Pian nagawaan iya, usaren nen Jehova so Mesianikon Panarian, ya uleyan na Anak to, si Jesu-Kristo. Ipapanengneng na saray ebidensya ya sayan Panarian et manuuley la ed tawen manlapu nen 1914. a (Mateo 24:3-14) Anto ray pigara ed saray makapadinayew ya ipawil nen Jehova? Sakey ed saratan et nanenengneng tan nai-eksperiensya tayo la. Say arum balet et nagawa ni labat diad arapen tan mas malaknab.

4, 5. Antoy agawa ed totoo na Dios nen 607 B.C.E., tan anton pag-asa so inter nen Jehova ed sikara?

⁴ Say sakey ed saray impawil la nen Jehova et say dugan panagdayew. Pawilen tayo pan magano imay agawad panarian na Juda pian mas nalinewan tayo no panon kabiskeg so pakapanyari nen Jehova ya mangipawil.​—Roma 15:4.

⁵ Imadyin mo pay ermen na saray matoor ya Judio nen aderal so Jerusalem nen 607 B.C.E. Aderal so pinabpabli  dan syudad tan ageba iray padir. Say sankagrabian nin agawa, amay balibalin templo ya impaalagey nen Solomon, say saksakey ya sentro na dugan panagdayew diad interon dalin, et aderal. (Salmo 79:1) Inawit ed Babilonia iramay akaligtas, anggapoy atilak ed dalin da kanian nanayaman itan na masesebeg ya ayayep. (Jeremias 9:11) Nayarin parad saray Judio et anggapo lay pag-asa dan makapawil ed dalin da. (Salmo 137:1) Pero si Jehova, say angipasakbay ed satan ya kadederal, et angiter na pag-asa ya makapawil ira.

6-8. (a) Anto ran promisa so insulat na dakel ya Hebreon propeta, tan panon iratan ya asumpal ed saray Judio? (b) Panon ya asumpal iratan ya promisa diad panaon tayo?

⁶ Diad tua, dakel so Hebreon propeta ya angisulat na tungkol ed panangipawil. b Panamegley da et impromisa nen Jehova ya nipawil tan napanayaman lamet na saray Judio so dalin da. Magmaliw lamet itan ya mabuna, naprotektaan ira ed masesebeg ya ayayep tan ed saray kalaban da. Imbaga nen Jehova ya say dalin da et magmaliw a singa paraiso! (Isaias 65:25; Ezequiel 34:25; 36:35) Say sankaimportantian ed amin, nipawil so dugan panagdayew tan nipaalagey lamet so templo. (Miqueas 4:1-5) Lapud sarayan propesiya, agnaandian na pag-asa iray Judio, tan naanosan day 70 taon ya impakaaripen dad Babilonia.

⁷ Asabin siansia so panaon na panangipawil. Nibulos iray Judio ed Babilonia, tan pinmawil ira ed Jerusalem pian ipaalagey lamet so templo nen Jehova. (Esdras 1:1, 2) Basta manmatoor ira ed si Jehova, bendisyonan  to ra, mansiansian mabuna so dalin da tan mainaway bilay da. Prinotektaan to ra ed saray kalaban da tan ed saray masesebeg ya ayayep ya dakel lan taon ya manliliberliber ed dalin da. Seguradon malikeliket ira nen anengneng da no panon ya inusar nen Jehova so pakapanyari ton mangipawil! Pero gapo ni labat iratan, tan melag ya kasumpalan na saray promisa nen Jehova. Say baleg ya kasumpalan et nagawa “diad kasampotan a parte na saray agew,” diad mismon panaon tayo, sanen nitrono so abayag lan impromisan Tomatawir nen Arin David.—Isaias 2:2-4; 9:6, 7.

⁸ Ag-abayag kayarin nagmaliw ya Ari si Jesus diad Panarian ed tawen nen 1914, inasikaso toy espiritual ya pankaukolan na saray totoon matoor ed Dios. Singa say Persianon managsakop ya si Ciro ya imbulos to ray nakekeran Judio ed Babilonia nen 537 B.C.E., imbulos met nen Jesus iray nakekeran espiritual ya Judio​—saray patumbok to—​ed impluensya na “Makapanyarin Babilonia,” say empiryo na palson relihyon. (Apocalipsis 18:1-5; Roma 2:29) Manlapu la nen 1919, idadayew na saray tuan Kristiano si Jehova diad paraan ya labay to. (Malaquias 3:1-5) Manlapu lad saman, mandadayew la rad sikato diad alinisan ya espiritual a templo to​—say uksoyan to parad dugan panagdayew. Akin et importante itan ed sikatayo natan?

9. Antoy agawa ed dugan panagdayew nen inatey la ray apostol, pero antoy ginawa nen Jehova diad panaon tayo?

⁹ Isip mo pa iramay agawa. Indayew na saray inmunan siglon Kristiano si Jehova diad dugan paraan. Pero  impasakbay nen Jesus tan saray apostol to ya say dugan panagdayew et narutakan tan naandi. (Mateo 13:24-30; Gawa 20:29, 30) Nen inatey la ray apostol, ginmapon dinmakel iray palson Kristiano. Inawat na saray pari iray paganon bangat tan kagagawa. Imbes ya tulongan da ray totoo ya onapit ed Dios, inyarawi da ra laingen ed sikato. Imbangat da ya say Dios et kabiangan na agnatalosan ya Trinidad. Imbangat da met iray totoo ya kailangan dan ikumpisal iray kasalanan da ed saray pari pian naperdona ra. Tan kailangan kunon manpikasi ira ed si Maria tan ed nanduruman “santo” imbes ya diad si Jehova. Kayari na nilasus a taon ya dinutakan so dugan panagdayew, antoy ginawa nen Jehova? Diad panaon tayo ya dakdakel lay katilaan tungkol ed relihyon tan totoon manggagaway mauges, kinmiwas si Jehova tan impawil to so dugan panagdayew! Nibaga tayo ya atan so sakey ed saray sankaimportantian ya agawa ed panaon tayo.

10, 11. (a) Antoy duaran kabiangan na espiritual ya paraiso, tan panon kan nakaibad satan? (b) Anton klase na totoo so titiponen nen Jehova ed espiritual ya paraiso, tan anton makapadinayew ya nagawa so nanengneng da?

¹⁰ Lapud ginawa nen Jehova, panliliketan na saray tuan Kristiano natan so espiritual ya paraiso ya tuloytuloy ton pararakepen. Sayan paraiso et walay duaran importantin kabiangan to. Say unona et say dugan panagdayew ed tuan Dios, si Jehova. Sinegurado to ya agnalaokan na katilaan so paraan na panagdayew ed sikato. Tataryaan to tayo na espiritual ya naakan. Kanian nanaaralan tayoy tungkol ed Ama tayod tawen, napapaliket tayo, tan onaapit tayod sikato. (Juan 4:24) Say komaduan kabiangan na espiritual ya paraiso et saray  totoo. Singa impasakbay nen Isaias, “diad kasampotan a parte na saray agew,” ibangat nen Jehova iray mandadayew ed sikato no panon so manbilay ya mareen. Imbangat to tayo ya agmibiang ed saray guerra. Anggano aliwa tayon perpekto, tutulongan to tayon isulong so “balon personalidad.” Bebendisyonan toy pansasagpot tayo diad pangiiter tod masanton espiritu to pian nawalaan tayo na balibali iran kualidad. (Efeso 4:22-24; Galacia 5:22, 23) No manpapaigiya ka ed espiritu na Dios, parte ka na espiritual ya paraiso.

¹¹ Titiponen nen Jehova ed espiritual ya paraiso iray totoo ya inaro to​—saramay mangaaro ed sikato, mangaaro ed kareenan, tan “manonot ed espiritual a pankaukolan da.” (Mateo 5:3) Sikara so makanengneng ed mas makapadinayew ya panangipawil ya gawaen nen Jehova parad totoo tan ed interon dalin.

12, 13. (a) Akin et segurado tayo ya literal met ya nasumpal iray impromisa nen Jehova ya ipawil to? (b) Diad hardin na Eden, antoy imbaga nen Jehova ya gagala to parad dalin, tan akin et mangiiter iya na pag-asa ed sikatayo?

¹² Aliwa labat ya espiritual ya panangipawil so impromisa nen Jehova, dakel met iray literal ya nasumpal. Singa bilang, insulat nen Isaias ya nasabi panaon, onabig la ray mansasakit, piley, bulag, tan telek tan anggan say patey et naandi la diad andi-angga. (Isaias 25:8; 35:1-7) Sarayan promisa et agliteral ya asumpal diad Israel nensaman. Tan anggano anengneng tayo la so espiritual ya kasumpalan na saratan ya promisa ed panaon tayo, segurado tayo ya diad arapen, literal ya  nasumpal iratan ya promisa diad interon mundo. Panon tayon amta?

¹³ Diad hardin na Eden, malinew ya imbaga nen Jehova no antoy labay ton nagawa ed dalin: Panayaman iya na saray maliket, healthy, tan nankakasakey ya pamilya na totoo. Asikasoen na totoo so dalin tan ayayep tan gawaen dan paraiso so interon dalin. (Genesis 1:28) Say nanenengneng tayod mundo natan et duman maong ed samay labay nen Jehova ya nagawa. Pero segurado tayo ya anggapon balot so makapatunda ed panlabayan nen Jehova. (Isaias 55:10, 11) Si Jesus, say tinuro nen Jehova ya Mesianikon Ari, et pagmaliwen ton Paraiso iyan dalin.​—Lucas 23:43.

14, 15. (a) Panon ya gawaen nen Jehova ya “balo so amin a bengatla”? (b) Antoy magmaliw ya bilay diad Paraiso, tan dinan ed saratan so labalabay mo lan nagawa?

¹⁴ Imadyin mo pay naliknam no Paraiso la so interon dalin! Oniay imbaga nen Jehova tungkol ed satan ya panaon: “Gagawaen kon balo so amin a bengatla.” (Apocalipsis 21:5) Antoy labay ya ibaga na satan? No deralen la nen Jehova iyan mauges ya sistema na mundo, walay “balon tawen tan balon dalin” ya mansiansia diad andi-angga. On, walay balon gobierno ed tawen ya uleyan toy balon dalin odino saray totoo ya mangaaro ed si Jehova tan manggagawa ed panlabayan to. (2 Pedro 3:13) Si Satanas tan saray demonyo to et ibantak ed kaaralman. (Apocalipsis 20:3) Diad loob na nilibon taon, first time ya anggapo lay mauges, makaderal, tan negatibon impluensya. Talagan nainawaan tayo lad satan.

¹⁵ Sa wakas, naasikaso ti la yan balibalin planeta tayo! Atan may labay nen Jehova ya gawaen tayo manlapu  lad gapo. Say dalin et sipor lan walay kapasidad ton ompawil ed datin dakep to. Sarag na saray ilog tan dayat ya linisan so sarili da no naekal la ray panlalapuan na saray dutak tan polusyon. Ompawil met ed dati iramay lugar ya ageraygeray no ontunda lay guerra. Seguradon makapalikliket so mitulongan ya gawaen a balibalin paraiso iyan dalin, ya singa samay hardin na Eden nensaman ya amayamay so nanduruman ayayep tan tanaman. Anggapo lay maruksan mamatey na ayayep odino maneral ed saray tanaman tan kakiewan. Imbes, niwala lay kareenan ed saray totoo tan ed amin a mabilay ya pinalsa diad dalin. Anggan saray ugugaw et agla ontakot ed saray masesebeg ya ayayep.—Isaias 9:6, 7; 11:1-9.

16. Diad Paraiso, antoy ipawil nen Jehova ed sika?

¹⁶ Wala met so ipawil nen Jehova ed kada sakey ed sikatayo. Kayari Armagedon, diad interon mundo et mamilagron onabig iramay makaligtas. Singa ginawa nen Jesus nen wadiad dalin, usaren to so inter na Dios ya pakapanyari pian ipawil so pakanengneng na saray bulag, pakadngel na saray telek, tan kasil na laman na saray lupoy tan baldado. (Mateo 15:30) Ompawil lad satan so biskeg na saray maedad, ya singa nen kabataan ni ra. (Job 33:25) Anggapo lay kumanet, onkasil lamet iray taklay, pueg, sikla, tan muscle. Nalikas na amin a matoor ya totoo ya kalkalnan naekal so epekto na kasalanan tan ag-inkaperpekto. Diad satan ya panaon, seguradon misatsalamat tayod si Aman Jehova lapud makapadinayew ya pangusar to ed pakapanyari ton mangipawil! Pantongtongan tayo natan so sakey ed saray makapalikliket ya pangusaran nen Jehova ed pakayari ton mangipawil.

17, 18. (a) Akin ya binagaan nen Jesus iray Saduceo? (b) Akin et kinerew nen Elias ed si Jehova ya paolien To komon so sakey ya ugaw?

¹⁷ Nen inmunan siglo C.E., agmanisia ed kioli so arum ya lider na relihyon ya tatawagen ya Saduceo. Binagaan ira nen Jesus: “Nalilingo kayo, lapud agyo amta so Kasulatan odino say pakapanyari na Dios.” (Mateo 22:29) On, ipapaamta na Kasulatan ya walay mabisbiskeg ya pakapanyari nen Jehova ya ipawil so bilay na inaatey. Nia ray pigaran alimbawa.

¹⁸ Imadyin mo pa may agawa nen panaon nen Elias. Walay sakey a balo ya sankalakap toy makulkulaney lan laman na alenleneg ya anak to. Inatey so ugaw. Seguradon abigbigla si propeta Elias. Diad apalabas, aminpigan pinarawes na balo si Elias. Tinmulong met si Elias pian ag-ompatey ed eras so ugaw, kanian nayarin aka-close to la. Ayan ugaw labat kalamor so pakanodnonotan na ina to ed samay inatey lan asawa to. Singa bebetagen so puso na ina. Nayarin iilaloan to ya ayan ugaw komon so mangasikasod sikato no ontatken la. Diad ermen to, inisip to ya sikatoy dudusaen na Dios lapud saray apalabas ya kasalanan to. Kaskasian nen Elias, tan agto nitepel so dadalanen na ina. Kanian inas-asikaso ton inala so bangkay na ugaw ya lakap na ina, inawit tod kuarto to tan impikasi to ya ipawil komon nen Jehova a Dios so bilay na ugaw.—1 Arari 17:8-21.

19, 20. (a) Panon ya impanengneng nen Abraham so pananisia ed pakapanyari nen Jehova ya mangipawil, tan akin et ontan la kabiskeg so pananisia to? (b) Panon ya benendisyonan nen Jehova so pananisia nen Elias?

¹⁹ Aliwan si Elias so unonan too ya manisia ed kioli.  Nilasus a taon antis nen Elias, mabiskeg so pananisia nen Abraham ya walay pakapanyari nen Jehova ya mangipawil. Akin ey? On ta nen mantaon na 100 si Abraham tan si Sara et 90, impawil nen Jehova so pakayari dan nawalaan na anak. Mamilagron awalaan na anak a laki si Sara. (Genesis 17:17; 21:2, 3) Nen baleg la so ugaw, kinerew nen Jehova ed si Abraham ya ibagat to. Anisia tan nantiwala si Abraham ya sarag nen Jehova ya ipawil so bilay na inad-aro ton anak ya si Isaac. (Hebreo 11:17-19) Nayarin atan ya mabiskeg a pananisia nen Abraham so rason no akin ya antis iran onsapat ed palandey pian ibagat si Isaac et imbaga tod saray lingkor to ya ompawil iran dua.—Genesis 22:5.

²⁰ Inligtas nen Jehova si Isaac, kanian agkailangan so pamaoli ed saman. Diad situasyon balet nen Elias, amay anak na balon bii et inatey la, pero agano labat. Lapud mabiskeg so pananisia na propeta, binilay lamet nen Jehova so ugaw! Impawil nen Elias so ugaw ed ina to, legan ton ibabaga irayan agnalinglingwanan ya salita: “Nengneng mo, mabilay so anak mo”!​—1 Arari 17:22-24.

21, 22. (a) Akin ya inrekord ed Biblia iray agawan kioli nensaman? (b) Diad Paraiso, panon kalaknab so nagawan kioli, tan siopa so manggawa ed satan?

²¹ Aya so sankaunaan ya rekord ed Biblia ya inusar nen Jehova so pakapanyari ton mangipawil na bilay na inatey. Ag-abayag inikdan met nen Jehova na pakayari si Eliseo, Jesus, Pablo, tan Pedro ya bilayen iray inatey. Pero inatey lanlamang iramay pinaoli da. Anggaman ontan, sarayan rekord ed Biblia so mangiiter ed  sikatayo na ideya no anto ray balibalin gawaen nen Jehova diad arapen.

²² Diad Paraiso, gawaen nen Jesus so betang to bilang say “kioli tan say bilay.” (Juan 11:25) Paolien to so minilyon ya totoo, tan ikdan to ray tsansa ya manbilay ya anggapoy anggaan diad Paraison dalin. (Juan 5:28, 29) Imadyin mo pay liket no saray kakaaro tan kapamilya tayo et napaoli tan nalakap tayo ra lamet! Seguradon idayew na amin ya totoo si Jehova lapud pakapanyari ton mangipawil.

23. Antoy sankabalegan ya angusaran nen Jehova na pakapanyari to, tan akin ya mangiiter itan na pag-asa ed sikatayo ed arapen?

²³ Walay inter nen Jehova ya malet ya garantiya pian talagan manisia tayo ya sarasarag ton ipawil so bilay na saray inaatey. Binilay to so Anak ton si Jesus, tan ginawa ton makapanyarin espiritun pinalsa ya onkokomadua ed sikato. Aya so sankabalegan ya angusaran nen Jehova na pakapanyari to! Nen pinaoli si Jesus, sikatoy  nampanengneng ed nilasus ya totoo. (1 Corinto 15:5, 6) Kanian anggan saramay agmanisia ed kioli et akombinse ed sayan mabisbiskeg ya ebidensya. On, walay pakapanyari nen Jehova ya mangipawil na bilay.

24. Akin ya segurado tayon bilayen nen Jehova iray inatey, tan anton pag-asa so tandaan tayo?

²⁴ Aglabat sarag nen Jehova ya ipawil so bilay na totoo, noagta labalabay to met ya gawaen itan. Pinuyanan so matoor ya lakin si Job pian ibagan pipirawaten nen Jehova ya bilayen lamet iray inaatey. (Job 14:15) Agta napapaapit so liknaan mo ed Dios tayo ya labalabay ton usaren so pakapanyari ton mangipawil ed ontan ya maar-aron paraan? Balet singa naaralan tayo ed sayan kapitulo, say kioli et sakey labat ed saray panangipawil ya gawaen nen Jehova. Legan kan tuloytuloy ya onaapit ed sikato, tandaan mo so balibalin pag-asam ya nanengneng ya “gawaen [ton] balo so amin a bengatla.”​—Apocalipsis 21:5.