1, 2. (a) Anto ray labay mon itepet ed Dios? (b) Antoy intepet nen Moises ed Dios?

 ANTO kasi naliknam no sarag mon nakatongtong so Dios? Anganko iimadyinen mo ni labat, nanenerbiyos ka la! Seguro no nagawa ’tan, diad unaan, ngalngali agka onesel balet manlakas-loob ka. Panon to no dinmengel so Dios, inmebat, tan labay ton mantepet ka? Antoy itepet mo ey?

² Nensaman et asali itan na sakey ya laki, si Moises. Pero ompan nabigla ka ed intepet tod Dios. Agto tinepet so tungkol ed sarili to, no antoy nagawad sikato, odino no antoy pansumpalan na totoo. Imbes, tinepet toy ngaran na Dios. Seguro mankelaw ka no akin ya tinepet nen Moises so ngaran na Dios anta amta to la. Ompan walay labay ton amtaen. Diad tua, aman so sankarakepan lan nitepet to. Say ebat ed satan et baleg so nitulong tod sikatayo pian lalo tayon onapit ed Dios. Akin et ontan so nibaga tayo? Pawilen tayo pa man ya eksena.

3, 4. Anto ni ray agawa antis ya akitongtong so Dios ed si Moises, tan antoy nantongtongan da?

³ Mantaon na 80 si Moises ed saman. Apataplon taon ya agto akaiba iray kapara ton Israelita ya naaripen ed Ehipto. Aminsan, legan ton papastolan iray karnero nen katulangan to, walay anengneng ton nikadkaduma. Walay mandarlang ya masabit a kiew, pero makapakelkelaw ta agnapopoolan. Singa itan silew ya maliwliwawa. Inasinggeran to pian  nengnengen tan abigbigla ta walay nansalita ed pegley na apoy! Say Dios manaya so mitotongtong ed sikato panamegley na sakey ya anghel. Ingganggan toy Moises ya ompawil ed Ehipto pian niligtas iray Israelita ta inaripen da ra diman. Balet ngalngali aglabay nen Moises so onla ta mareen lay bilay to.—Exodo 3:1-12.

⁴ Sarag komon nen Moises so mantepet na anggan anto ed Dios. Pero imanom iyay intepet to: “No bilang ta onla ak ed saray Israelita tan ibagak ed sikaran, ‘Say Dios na saray inmuunan atateng yo et imbaki to ak ed sikayo,’ tan tepeten dad siak ya, ‘Antoy ngaran to?’ Antoy ibagak ed sikara?”—Exodo 3:13.

5, 6. (a) Antoy naaralan tayo ed tepet nen Moises? (b) Antoy mauge-uges ya ginawa na totoo ed ngaran na Dios? (c) Akin et impaamta na Dios so ngaran to ed totoo?

⁵ Naaralan tayod tepet to ya walay ngaran na Dios tan agtayo dapat ibabaliwala itan, ya singa gagawaen na dakel. Inekal day ngaran na Dios diad dakel ya patalos na Biblia tan sinalatan da na titulo ya singa say “Katawan” tan “Dios.” Atan so makapaermen tan sankaugesan lan ginawa na too lapud relihyon. Akin ey? On ta no walay labay tayon kabaten, di ba say sankaunaan ya tepeten tayo say ngaran to? Ontan met no labay tayon kabaten so Dios. Anggano agtayo nanengneng, sikatoy tuan Persona, aliwan mairap ya asinggeran, tan walay ngaran to—Jehova.

⁶ Ipapaamta na Dios so ngaran to ta labay to tayon ikdan na balibalin regalo. Say regalo ya sikatoy nakabat tan nakaaro tayo. Labay ton gawaen tayo itan. Atan so sankarakepan ya nagawaan tayo. Pero aglabat  impaamta nen Jehova so ngaran to, imbes impaamta to met so personalidad to.

7. (a) Antoy nayarin labay ya ibaga na ngaran na Dios? (b) Anton talagay labay ya naamtaan nen Moises nen tinepet toy ngaran na Dios?

⁷ Si Jehova ya mismo so nampili na ngaran to tan dakel so naaralan tayo ed satan ya ngaran. Say ngaran ya “Jehova” et ipapasabi toy ideyan “Pagmamaliwen To.” Anggapoy kapara to ed interon uniberso ta sikato so nanggawa ed amin. Tan amin ya panlabayan to et seguroen to ya nagawan nagawa. Anggan saray aliwan perpekton totoo ya lingkor to et sarag to ni ingen ya pagmaliwen ed no antoy labay to. No nodnonoten tayo ’tan, seguradon napabiskeg tayo. Pero wala ni kasi arum ya labay ya ibaga na ngaran na Dios? Atan may labay ya naamtaan nen Moises. Amta to la ya si Jehova so nanggawa ed amin, amta toy ngaran na Dios. Aliwa la ’tan ya balo ed sikato. Abayag lan uusaren na totoo so ngaran na Dios. Kanian nen tinepet nen Moises no antoy ngaran na Dios, say labay ton amtaen et no antoy personalidad na Dios. Singa onia ay so intepet to: ‘Antoy ibagak ed saray totoom ey pian manisia ra ya talagan iligtas mo ra?’

8, 9. (a) Antoy ebat nen Jehova ed tepet nen Moises, tan akin et aliwan duga so maslak ya impangipatalos ed satan? (b) Antoy labay ya ibaga na “Magmaliw Ak No Antoy Pilien Kon Pagmaliwan”?

⁸ Balibali so imbaga nen Jehova ed si Moises tungkol ed sarili to, tan walay koneksion na satan ed labay ya ibaga na ngaran to. Oniay imbaga tod si Moises:  “Magmaliw Ak No Antoy Pilien Kon Pagmaliwan.” (Exodo 3:14) Diad arum ya patalos na Biblia, oniay nabasa: “Siak si Siak.” Pero nanengneng ed saray maalwar ya impangipatalos ya aglabat labay na Dios ya ipaamta ya sikatoy wala odino mabilay. Imbes, ibabangat nen Jehova si Moises, tan amin tayo, ya sikatoy “magmaliw” ed no antoy kailangan pian nasumpal so panlabayan to. Oniay impangipatalos nen J. B. Rotherham ed satan ya bersikulo: “Magmaliw ak ed no antoy labay ko.” Impaliwawa iyan bersikulo na sakey ya eksperto ed Hebreon lenguahen inusar na Biblia: “Anggan antoy situasyon odino pankaukolan . . . , ‘magmaliw’ ya solusyon so Dios.”

⁹ Antoy labay nen Jehova ya natalosan na saray Israelita tungkol ed ngaran to? Anggan antoy makasbel ed sikara, anggan panon kairap so dalanen da, magmaliw si Jehova ed anggan anton nakaukolan pian iligtas ira ed impakaaripen da tan iyakar ira ed Insipan ya Dalin. Seguradon akaaral iray Israelita ed ngaran na Dios. Tan atulongan iran mantiwala ed sikato. Ontan met so epekto to ed sikatayo natan. (Salmo 9:10) Akin ey?

10, 11. Akin et makatulong ed sikatayo so labay ya ibaga na ngaran nen Jehova pian natalosan ya sikato so sankaabigan ya Ama? Mangiter na alimbawa.

¹⁰ Pian natalosan tayo, niay sakey ya alimbawa. Kada agew, dakdakel so kailangan ya gawaen na atateng pian naasikaso da ray anak da. Kailangan day magmaliw ya nurse, managluto, managbangat, managdisiplina, tan arum ni. Pakalikna na dakel ya ateng et agda nasarag ya pambabansagen iratan ya amin. Nanenengneng da ya mantitiwalan maong iray anak  da ya nasarag dan solusyonan so amin ya pankokolkol, paabigen so asakitan ya liknaan, apigeren iray gakgalaw, tan ebatan iray amayamay ya tepet. Kanian wala ray ateng ya nadidismaya laingen ed limitasyon da tan pakalikna da et agda nasarag iratan ya papel da.

¹¹ Si Jehova et sakey met ya maar-aron ateng. Pero duma ed totoon ateng ta anggapoy agto nasarag ya gawaen pian naasikaso iray anak to diad dalin. Kanian ipapaamta na ngaran to, ya Jehova, ya labay ton sikatoy ituring tayon sankaabigan ya Ama. (Santiago 1:17) Diad si Moises tan ed amin ya matoor ya Israelita, naamtaan da ya totooren nen Jehova so labay ya ibaga na ngaran to. Mandinayew ira nen anengneng dan mismo ya sikatoy nagmaliw ya agnatalon Komander na Militar, sarasarag ton kontrolen so kalikasan, maomaong ya Manangiter na ganggan o batas, Huis, Architect, Manangitarya na naakan, danum, kawes tan sandalyas, tan dakel ni.

12. Antoy impangituring nen Moises ed si Jehova, pero antoy impangituring na Faraon ed si Jehova?

¹² On, impaamta na Dios so ngaran to. Impaamta to met so labay ya ibaga na ngaran to pian sikatoy nakabat tayo. Tan impanengneng to ni ingen ya totooren to no anton talagay labay ya ibaga na ngaran to. Malinew ya labay na Dios ya sikatoy nakabat tayo. Antoy gawaen tayo ey? Aligen tayoy Moises ya labalabay ton nakabat so Dios. Diad amin ya ginawa tan desisyon to, nanengneng ya talagan labay toy onapit ed Ama tod tawen. (Numeros 12:6-8; Hebreo 11:27) Makapaermen ta nen panaon nen Moises, wala ray totoon agda labay so onapit ed Dios. Nen imbaga nen  Moises ed Faraon so tungkol ed si Jehova, oniay ebat na saman ya malaslastog ya Ari na Ehipto: “Siopa ’tay Jehova?” (Exodo 5:2) Aglabay ya kabaten na Faraon si Jehova. Mamaong, imbaliwala to so Dios na Israel. Ontan met so gagawaen na dakel natan. Bulag ira tan agda ituturing si Jehova ya Soberanon Katawan anta atan so sankaimportantian ed amin.

13, 14. (a) Akin et dakel so titulo o deskripsion nen Jehova diad Biblia, tan antoy arum ed saratan? (Nengnengen so  kahon ed pahina 16.) (b) Akin et si Jehova labat so walay karapatan a natawag ya “Soberanon Katawan”?

¹³ Nikadkaduma si Jehova, anggapoy agto sarag ya gawaen. Kanian diad Biblia, amayamay so inusar ya titulo o deskripsion to. Siempre mas importante ni ngaran to nen say saratan ya deskripsion, pero makatulong iratan pian lalo tayon nakabat no antoy labay ya ibaga na ngaran to. Singa bilang, sikatoy tinawag ya “Soberanon Katawan a Jehova.” (2 Samuel 7:22) Nilasus a beses ya binanggit itan ed Biblia tan naamtaan tayod satan so atagtagey ya posisyon to. Sikato labat so walaan na karapatan ya Manuley ed interon uniberso. Akin et nibaga tayo itan?

¹⁴ Anggapoy kapara nen Jehova ta sikato labat so Manamalsa. Ibabaga na Apocalipsis 4:11: “Sika so makanepegan, Jehova a Dios mi, a mangawat na gloria tan galang tan pakayari, lapud pinalsam so amin a bengatla, tan lapud linawam et niwala tan apalsa iratan.” Anggapo lay walaan na karapatan ya mangawat ed satan, noag si Jehova labat ta pinalsa to so amin ya  walad uniberso! Malinew ya si Jehova so makanepegan ed galang, pakayari, tan gloria ta sikato so Soberanon Katawan tan Amalsa ed amin ya bengatla.

15. Akin et tinawag si Jehova ya “andi-anggaan ya Ari”?

¹⁵ Say sakey nin deskripsion ya para labat ed si Jehova et “andi-anggaan ya Ari.” (1 Timoteo 1:17; Apocalipsis 15:3) Antoy labay ton ibaga ’tan? Mairap tin natalosan itan, pero si Jehova et lanang ya wala. Ibabaga na Salmo 90:2: “Manlapud andi-anggaan ya anggad andi-anggaan, sika so Dios.” Kanian anggapoy gapo tan sampot to. Sikatoy tatawagen met ya “Akauna nen Saray Panaon” ta wala lay Jehova antis nin apalsa so amin diad uniberso! (Daniel 7:9, 13, 22) Kanian siopay makpel ya mankuestion ed karapatan ton manuley ed interon uniberso?

16, 17. (a) Akin et agtayo nanengneng si Jehova, tan akin et agtayo itan pankelawan? (b) Akin et mas tudtua si Jehova nen say anggan anton nanengneng o nabembenan tayo?

¹⁶ Pero wala ray arum ya agda natanggap ya sikato so Soberanon Katawan, sakey lad sikara so Faraon. Say problema kasi ed saray aliwan perpekton totoo, manisia ra labat ed no antoy nanenengneng da. Agtayo nanengneng si Jehova ta sikatoy sakey ya espiritu. (Juan 4:24) Sakey ni, no literal ya onasingger si Jehovan Dios, seguradon ompatey so too. Oniay imbaga to ed si Moises: “Agmo nayarian a nengnengen so lupak, ta anggapoy toon makanengneng ed siak tan manbilay.”—Exodo 33:20; Juan 1:18.

¹⁷ Agti la ’tan pankelawan. Nen anengneng nen Moises so melag labat ya parte na gloria nen Jehova panamegley na sakey ya anghel, antoy agawa? ‘Sinminag so lupa’ to tan natatakot iray Israelita ya onasingger  tan nengnengey lupa to. (Exodo 33:21-23; 34:5-7, 29, 30) Kanian segurado tayo ya agnasarag na too ya direktan nengnengen si Jehova. Labay to kasin ibaga, aliwan tudtua si Jehova ta agtayo nanengneng tan nabembenan? Andi. Singa bilang, manisia tayo ya walay dagem tan radio waves, anggano agtayo iratan nanengneng. Pero aliwan singa saray nanenengneng tan nabebembenan tayo, ya ondaan, ontatken, tan nabulok, duma si Jehova ta agbalot manguuman anggan panon karukey so onlabas ya panaon. (Mateo 6:19) Kanian mas tudtua si Jehova tan mas superyor nen say anggan anton nanengneng o nabembenan tayo. Pero dapat tayo kasin ituring si Jehova ya basta labat mabisbiskeg ya puersa ya anggapoy liknaan tan pibabali tod sikatayo? Nengnengen tayo.

18. Antoy anengneng nen Ezequiel ed pasingawey, tan antoy irerepresenta na apatiran lupa na saray “mabilay a pinalsa”?

¹⁸ Anggano agtayo nanengneng so Dios, mangiiter so Biblia na balibali iran deskripsion na tawen. Say sakey ya alimbawa et amay walad Ezequiel Kapitulo 1. Diad pasingawey et anengneng nen Ezequiel so walad tawen ya kabiangan na organisasyon nen Jehova tan naimano toy balbaleg ya karwahe. Pandinayewan to iramay anengneng ton mabibiskeg ya espiritun pinalsa ya akapaliber ed si Jehova. (Ezequiel 1:4-10) Sarayan “mabilay a pinalsa” et maapit ya kakimeyan nen Jehova, tan walay importantin naaralan tayod itsura ra tungkol ed Dios ya panlilingkoran da. Walay apatiran lupa na kada sakey ed sikara​—lupa na baka, leon,  agila, tan too. Irerepresenta na sarayan lupa so apatiran kualidad nen Jehova ya basiyan na balibalin personalidad to.​—Apocalipsis 4:6-8, 10.

19. Anton kualidad so irerepresenta na (a) lupa na baka? (b) lupa na leon? (c) lupa na agila? (d) lupa na too?

¹⁹ Diad Biblia, irerepresenta na baka so pakapanyari, tan duga labat itan ta mabisbiskeg itan ya ayep. Say leon balet et irerepresenta toy hustisya, ta say tuan hustisya et mankaukolay pakpel, tan saray leon et makpel. Say agila et maksil so pakanengneng to, nanengneng to ray angkelag ya bengatla anggano arawrawi. Kanian duga labat ya say lupa na agila et irepresenta toy karunongan na Dios ya nanengneng iray agni agawa. Say lupa na too balet ey? Amta tayo ya say too labat so pinalsa ed indengan na Dios kanian sarag ton aligen so sankaimportantian ya kualidad na Dios—say aro. (Genesis 1:26) Mabetbet ya nabibitla ed Biblia so pakapanyari, hustisya, karunongan, tan panangaro nen Jehova, kanian nibaga ya saraya so manunan kualidad na Dios.

20. Panon tayon amta ya agmanguuman si Jehova?

²⁰ Kasin iisipen tayo ya ompan anguman lay Dios ta nilibon taon la may linmabas manlapu nen impaisulat to ray kualidad to diad Biblia? Andi, agmanguuman so personalidad na Dios. Imbaga to: “Siak si Jehova; agak manguman.” (Malaquias 3:6) Agbastabasta uumanen nen Jehova so isip to. Lanang ya sikato so sankaabigan ya Ama ta anggan antoy situasyon et balanse tan dugaruga iray ipapanengneng ton kualidad. Diad amin ya kualidad na Dios, say manuna tan sankaimportantian et say aro. Napatnagan itan ed amin ya gagawaen to. Ipapanengneng toy  pakapanyari, hustisya, tan karunongan diad maaron paraan. Diad tua, walay ibabaga na Biblia ya nikadkaduma tungkol ed Dios tan ed sayan kualidad, say kuan to: “Say Dios et aro.” (1 Juan 4:8) Apansin mo ya agto imbagan say Dios et walay panangaro to, odino say Dios et maaro? Imbes, say kuan to, say Dios et aro. Kanian sikaton mismo so aro. Amin ya gagawaen to et lapud aro.

21. No mas naaamtaan tayo ray kualidad nen Jehova, antoy pangituring tayod sikato?

²¹ Akanengneng ka lay ugaw ya ituturo toy tatay to ed saray kakaaro to tan pap-proud ton ibabaga: “Atan so tatay ko”? Ontan met iray manlilingkor ed si Jehova, pap-proud irad Sikato. Impasakbay na Biblia ya  ibaga na matoor ya totoo: “Saya so Dios tayo!” (Isaias 25:8, 9) No kapigan mo mas naaamtaan iray kualidad nen Jehova, diman mo met ituring si Jehova ya sankaabigan ya Ama.

22, 23. Antoy ibabaga na Biblia tungkol ed Ama tayod tawen, tan panon tayon amta ya labay ton onapit tayod sikatayo?

²² Say Ama tayo et aliwan arawrawi odino anggapoy pibabali, anggano ontan so ibabangat na arum ya relihyon tan philosopher. Ag-onapit so liknaan tayo ed Dios ya anggapoy pililikna to. Tan ibabaga na Biblia ya aliwan ontan so Ama tayo ed tawen ta sikatoy “maliket a Dios.” (1 Timoteo 1:11) Walay liknaan tan malasakit to. Nen ag-inunor na totoo so ganggan nen Jehova, anta parad pankaabigan da lanlamang, “naermenan so puso to.” (Genesis 6:6; Salmo 78:41) Pero no unoren tayoy Salita to, ‘napaliket tayo so puso to.’—Proverbio 27:11.

²³ Labay na Ama tayo ya onapit so liknaan tayo ed sikato. Ibabaga na Salita to ya ‘sikatoy naromog tayo no sikatoy pansagpotan tayon anapen. Diad tua, sikatoy ag-arawi ed balang sakey ed sikatayo.’ (Gawa 17:27) Pero panon tayon onapit ed Soberanon Katawan na Uniberso, anta totoo tayo labat?