1. Ipaliwawa no akin ya importantin imanoen so oras tan say nagagawad kaliberliber tayo. (Nengnengen so litratod gapo na artikulo.)

ISIPEN pan wala tayo ed kombension. No nanengneng tayo lad video screen so relo ya manbibilang lay segundo, sinyales itan ya onyurong tayo la ta onggapo lay sesyon. Oras la pian ondeen tan ondengel ed balibalin musika na Watchtower orchestra, tan sankaimportantian, iparaan so nonot tan puso tayo ed saray narengel tayon paliwawa. Balet panon to no say arum et agni ondeen, akar-akar odino miiistoryaan ni ed kakaaro da, agda amta ya onggagapo lay programa? Mapatnag ya agda naiimano so oras tan say nagagawad kaliberliber da​—wala lad stage so chairman, ginmapo lay musika, tan akayurong lay audience. Satan ya eksena so ontulong ed sikatayon natalosan ya antiktikey lay oras ya nakekeraan parad mas baleg ya ebento, ya kaukolan et akaparaan tayon maong ed magano lan nagawa. Anto itan?

2. Akin ya binilin nen Jesus iray disipulo to ya ‘mantultuloy iran manbantay’?

² Nen ipapaliwawa nen Jesu-Kristo so nipaakar ed “kaunoran a parte na sistema na mundo,” binilin to ray disipulo to: “Mantultuloy kayon manlikas, mansiansia kayon aliing, ta agyo amta no kapigan  so aturon panaon.” Kayari na satan, oniay aminpigan imbilin nen Jesus ed sikara: “Mantultuloy kayon manbantay.” (Mat. 24:3; basaen so Marcos 13:32-37.) Diad salaysay nen Mateo nipaakar ed satan, nanengneng tayo met ya aminpigan binilin nen Jesus iray papatumbok to ya mansiansia ran alerto: “Kanian mantultuloy kayon manbantay, ta agyo amta no anton agew so isabi na Katawan yo. . . . Paneknekan yo met ya akaparaan kayo, lapud diad oras ya agyo iisipen et onsabi so Anak na too.” Imbaga to lamet: “Mantultuloy kayo sirin a manbantay, lapud agyo amta so agew odino say oras.”​—Mat. 24:42-44; 25:13.

3. Akin ya nepeg tayon imanoen so pasakbay nen Jesus?

³ Talagan seseryosoen tayo ran Tasi nen Jehova so pasakbay nen Jesus. Amta tayo ya manbibilay tayo lad bandad sampot na “panaon na anggaan” tan dagdaiset lay panaon ya nakekeraan antis ya onggapo so “baleg a kairapan”! (Dan. 12:4; Mat. 24:21) Wala ray makapataktakot ya guerra, onloloor so imoralidad tan kaugsan, ondadakel so relihyon, kulang so suplay na naakan, dakel so onlelesan sakit, tan wala ray yegyeg diad nanduruman pasen na mundo. Susumpalen na totoo nen Jehova so agnaparaan a kimey ya panagpulong diad interon dalin. (Mat. 24:7, 11, 12, 14; Luc. 21:11) Tatalaranan tayo no antoy nagawa diad isabi na Katawan tan no panon ya nasumpal so gagala na Dios.—Mar. 13:26, 27.

4. (a) Akin ya nibaga tayon amta la nen Jesus no kapigan nagawa so Armagedon? (b) Anggano agtayo amta no kapigan onggapo so baleg a kairapan, antoy naseguro tayo?

⁴ Diad kombension, amta tayo so eksakton oras na igapoy sesyon. Balet no nipaakar ed igapo na baleg a kairapan, agtayon balot nibaga so eksakton taon, lalo la no anton agew tan oras. Nen wadiad dalin si Jesus, kuan to: “Nipaakar ed satan ya agew tan oras et anggapoy siopaman a makaamta, anggan saray anghel ed tawen odino say Anak, noag say Ama labat.” (Mat. 24:36) Balet si Kristo et inikdan la na autoridad ya labanan so mundo nen Satanas. (Apo. 19:11-16) Kanian nibaga tayon amta la nen Jesus natan no kapigan nagawa so Armagedon. Balet sikatayo, agtayo amta. Nepeg sirin ya mansiansia itayon akabantay anggad isabi na kairapan. Say eksakton panaon na pakagawa na satan et sipor lan amta nen Jehova. Sikatoy angigeter na eksakton panaon na isabi anggaan. Amta to ya antiktikey lay panaon ya nakekeraan pian onggapo so baleg ya kairapan, tan ‘agla itan manbayag!’ (Basaen so Habacuc 2:1-3.) Panon tayon naseguro itan?

5. Mangiter na alimbawa no panon ya naynay a nasusumpal ed eksakton panaon iray propesiya nen Jehova.

⁵ Naynay ya nasusumpal ed eksakton panaon iray propesiya nen Jehova! Imanoen pa ya agawa ed mismon panaon ya inggeter to so impangiliktar tod saray Israelita manlapud Ehipto. Nisan 14, 1513 B.C.E. so tutukoyen nen Moises nen inkuan ton: “Diad pansampot na 430 taon, diad saman a mismon agew, et pinmaway ed dalin na Ehipto so amin a dakerakel a totoo nen Jehova.” (Exo. 12:40-42) Say “430 taon” et ginmapo nen 1943 B.C.E. nen inmepekto so sipanan nen Jehova ed si Abraham. (Gal. 3:17, 18) Linmabas so panaon, inkuan nen Jehova ed si Abraham: “Nepeg mon naamtaan a say ilalak mo et magmaliw a dayo diad dalin ya agda kayarian, tan aripenen tan pairapen ira na saray totoo ditan ed loob na 400 a taon.” (Gen. 15:13; Gawa 7:6) Mapatnag ya ginmapo so “400 a taon” na panamairap nen 1913 B.C.E. nen binalaw nen Ismael si Isaac sanen sikatoy apakso, tan anampot iratan nen pinmaway ed Ehipto iray Israelita nen 1513 B.C.E.  (Gen. 21:8-10; Gal. 4:22-29) On, apat a lasus taon ni antis ya nagawa, imbaga la nen Jehova so eksakton panaon na pangiliktar tod totoo to!

6. Akin ya makaseguro tayon iliktar nen Jehova iray totoo to?

⁶ Si Josue, ya sakey ed saray niliktar ed Ehipto, et pinanonotan toy amin ya Israelita: “Amta yo ed interon puso yo tan interon kamarerwa yo ya anggapoy anggan sakey a salita ed amin ya insipan nen Jehova a Dios yo ya agtinmua. Tinmua iratan ya amin ed sikayo. Anggapoy anggan sakey a salita ya agtinmua.” (Jos. 23:2, 14) Makaseguro tayo met ya talagan nagawa so sipan nen Jehova ya iliktar to itayod baleg a kairapan. Balet no labay tayoy makaliktar ed kaderal na sayan sistema na mundo, nepeg ya mantultuloy tayon manbantay.

7, 8. (a) Antoy responsabilidad na managbantay nensaman, tan anton leksion so naaralan tayo? (b) Mangiter na alimbawa ed no antoy nayarin nagawa no akaugip iray managbantay.

⁷ Makaaral tayod saray managbantay nensaman no panon kaimportante so pantultuloy ya akabantay. Dakel ya angkakabaleg a syudad nensaman—singa say Jerusalem—so apaliberan na ataragey ya padir. Lapud saratan ya padir, agbasta makaloob iray onaatakin kalaban, tan manlapud toktok na saratan et nabantayan so kaliberliber. Agew labi ya wala ray akapueston managbantay diad saray padir tan puerta. Pasakbayan da iray manaayam ed syudad no walay onsasabin peligro. (Isa. 62:6) Importante ya mansiansian aliing tan alerto iray managbantay lapud bilay so nalalanor.—Eze. 33:6.

⁸ Insalaysay na Judion historian ya si Josephus ya nen 70 C.E., alooban na saray sundalo na Roma so Tori na Antonia, ya akasuldong ed padir na Jerusalem, lapud akaugip iray manbabantay ed puerta! Manlapud man, nilooban na saray Romano so templo tan pinoolan da, tan diman la anampot so sankabalegan ya irap ya agawad Jerusalem tan ed saray Judio.

9. Antoy ag-amta na maslak a totoo natan?

⁹ Maslak ya bansa natan et walaan na saray “managbantay”—saray pulis ya manpapatrol diad saray ketegan tan saray high-tech ya surveillance camera. Babantayan da iray onloob ed teritorya da ya anggapoy permiso tan saray kalaban ya nayarin mameligro ed bansa da. Balet say nalikas labat na saratan ya “managbantay” et saray peligron manlapud gobierno na too odino mismon totoo. Agda amta ya walay gobierno na Dios ed tawen ya uuleyan nen Kristo tan magano lan mangukom ed amin ya bansa. (Isa. 9:6, 7, paimanod leksab; 56:10; Dan. 2:44) Balet sikatayo, no mansiansia tayon alerto tan aliing ed espiritual, akaparaan tayo kapiganman so isabi na agew na panangukom.—Sal. 130:6.

10, 11. (a) Antoy nepeg tayon panalwaran, tan akin? (b) Akin ya nibagam ya iimpluensyaan na Diablo so totoo pian agda panisiaan so propesiya ed Biblia?

¹⁰ Isipen pay sakey ya managbantay ya sanlabin aliing lapud pambabantay to. Mas nalikna toy pakakaugip ya maong tan nayarin makateglep no magano lan nasumpal so pambabantay to. Mipadpara, no diman ya asingsingger tayo lad anggaan na sayan sistema na mundo, mas mairap tayoy mansiansian aliing. Agaylan makapaermen no ag-itayo mantultuloy ya akabantay! Aralen tayo so taloran makapuy ya impluensya ya makaapektod pansiasiansia tayon alerto tan akabantay no agtayo manalwar.

¹¹ Iimpluensyaan na Diablo so totoo pian agda panisiaan so ibabaga na Biblia. Nen  magano lan ompatey si Jesus, amitlo ton pinasakbayan iray disipulo to nipaakar ed “manuley na sayan mundo.” (Juan 12:31; 14:30; 16:11) Amta nen Jesus ya itultuloy na Diablo ya palingoen so totoo pian agda natebek ya maganggano lan nasumpal iray propesiya na Dios nipaakar ed arapen. (Sof. 1:14) Uusaren nen Satanas iray palson relihyon ed mundo pian bulagen so kanonotan na totoo. Antoy naiimanom no mitotongtong kad saray totoo? Agta ‘binulag la na Diablo so kanonotan na saray agmananisia’ kanian agda nanenengneng ya asingger lan mangangga iyan sistema na mundo tan manuuley lay Kristo ed Panarian na Dios? (2 Cor. 4:3-6) Aminpigam lan arengel ya ibabaga na totoon, “Agak interesado”? Maslak ed sikara et ag-ondengel no ibabaga tayoy pansumpalan na sayan mundo.

12. Akin ya agtayo nepeg ya abuloyan ya palingoen itayo na Diablo?

¹² Anggano wala ray ag-ondengel, agmo aabuloyan ya satan so mandismaya o mamatundad sika ed pantultuloy mon akabantay. Sikay mas makaamta. Insulat nen Pablo ed saray kapananisiaan to: “Kabkabat yo a say agew nen Jehova et onsabin singa matakew ed labi.” (Basaen so 1 Tesalonica 5:1-6.) Pinasakbayan itayo nen Jesus: “Mansiansia kayon akaparaan, ta diad oras ya agyo iisipen et onsabi so Anak na too.” (Luc. 12:39, 40) Agla manbayag, panisiaen nen Satanas so karaklan ya totoo ya sarag ya iter na sayan mundo so “kareenan tan kaligenan.” Panisiaen to met ira ya ayos labat so situasyon ed mundo. Sikatayo ey? No ‘mansiansia tayon aliing tan mantultuloy ya manlikas,’ ag-itayo ‘nasabian na satan ya agew na panangukom a singa ed saray matakew ya nasasabian na liwaway agew.’ Kanian nepeg ya basaen tayon inagew-agew so Salita na Dios tan dalepdepen no antoy ibabaga nen Jehova ed sikatayo.

13. Panon ya iimpluensyaan na espiritu na mundo so totoo, tan panon tayon napaliisan itan ya mapeligron impluensya?

¹³ Isasagyat na espiritu na mundo so iyugip ed espiritual. Dakel so masyadon okupado ed inagew-agew ya bilay da kanian agda la ‘nononoten so espiritual ya pankaukolan da.’ (Mat. 5:3) Nasasagyat iran maong ed saray materyal a bengatla ed mundo ya mamepenek ed “pilalek na laman tan say pilalek na mata.” (1 Juan 2:16) Ontan met, dakdakel  iray palabas tan pelikula ya mangisasagyat ed totoo ya ‘aroen so panliliket,’ tan kada taon et mas ondadakel iray pakatuksoan. (2 Tim. 3:4) Kanian binilin nen Pablo iray Kristiano ya ‘ag-ira manplaplano no panon dan peneken iray pilalek na laman da,’ ya mangisagyat na iyugip ed espiritual.—Roma 13:11-14.

14. Antoy ipapasakbay ed sikatayo na Lucas 21:34, 35?

¹⁴ Imbes ya paimpluensyaan ed espiritu na mundo, labay tayon say espiritu na Dios so mangimpluensyad bilay tayo. Diad panamegley na satan et iikdan itayo nen Jehova na malinew ya pakatalos ed no antoy nagawa ed arapen. ^[1] (1 Cor. 2:12) Balet amta tayo ya anggan saray ordinaryon bengatla et nayarin mamaugip ed sikatayo diad espiritual no abuloyan tayon tabonan na saratan iray aktibidad tayo ran Kristiano. (Basaen so Lucas 21:34, 35.) Nayarin balawen itayo na arum diad pantutultuloy tayon akabantay, balet aliwan satan so rason pian isipen tayon mabayag ni anggaan. (2 Ped. 3:3-7) Imbes, kaukolan tayoy regular ya miulop ed saray agagi diad saray pantitipon ed kongregasyon, ta wadtan so espiritu na Dios.

15. Antoy agawa ed si Pedro, Santiago, tan Juan, tan panon ya nayarin nagawa met itan ed sikatayo?

¹⁵ Say kakapuyan na laman so nayarin makaapekto ed pansiansia tayon alerto. Amta nen Jesus ya saray agperpekton totoo et mainomay ya nadaeg na kakapuyan na laman. Imanoen pay agawa ed samay labi antis ya pateyen si Jesus. Pian napansiansia toy katooran to, kinaukolan toy onkerew na biskeg ed Ama tod tawen. Imbaga nen Jesus ed si Pedro, Santiago, tan Juan ya ‘mantultuloy iran manbantay’ legan ya sikatoy manpipikasi. Balet, agda atebek ya seryoson maong so nagawa. Imbes ya ibaan dan manbantay so Katawan da, agda alabanan so kakapuyan na laman da tan naugip ira. Balet si Jesus, anggano naksawan et nansiansian aliing, ya masimoon ya manpipikasi ed Ama to. Ontan met komon so nepeg ya gagawaen na saray kakaiba to.—Mar. 14:32-41.

16. Base ed Lucas 21:36, panon itayon binilin nen Jesus ya ‘mansiansian aliing’?

¹⁶ Say labay ya ibaga na ‘pansiansian aliing’ ed espiritual et aliwa labat ya walaan kay maong ya intension. Pigaran agew antis na samay agawa ed hardin na Getsemani, imbaga nen Jesus ed saratan met lanlamang ya disipulo ya masimoon iran manpikasi ed si Jehova. (Basaen so Lucas 21:36.) Pian mansiansia tayo sirin ya akabantay, nepeg ya agtayo papaulyanan so panagpikasi.—1 Ped. 4:7.

17. Panon tayon naseguro ya akaparaan tayo ed magano lan isabi na Katawan?

¹⁷ Imbaga nen Jesus ya onsabi anggaan “diad oras ya [agtayo] iisipen,” kanian aliwa yan panaon pian onteglep tayod espiritual, pian panisiaan iray ilusyon tan pantasya ya iyoopresi nen Satanas tan say mundo to anggano pipilaleken iratan na laman tayo. (Mat. 24:44) Panamegley na Biblia, ipapaamta na Dios tan nen Kristo no anto ray ipaparaan da parad sikatayo diad magano lan arapen tan no panon tayon mantultuloy ya manbantay. Kaukolan tayon imanoen so espiritualidad tayo, relasyon tayod si Jehova, tan no panon tayon niyuna so Panarian. Nepeg ya alerto tayo nipaakar ed panaon tan saray nagagawa pian akaparaan tayo ed isabi na Katawan. (Apo. 22:20) Bilay tayo so nalalanor!