Makaonla Ka Met Kasi ed “Macedonia”?

DIAD Troas, sakey a daongan a syudad ed Asia Minor, akaawat si apostol Pablo na pasingawey. Walay sakey a lakin taga Macedonia a mikakasi ed sikato: “Gala ed Macedonia [tan] tulongan mo kami.” Sanen anengneng nen Pablo iyan pasingawey, sikato tan saray kaiba to et tampol dan ‘inisip a tinawag ira na Dios pian ipulong so ebanghelyo’ ed saray taga Macedonia. Antoy resulta? Diad Filipos, a prominentin syudad ed Macedonia, si Lidia tan say sankaabungan to et nagmaliw a Kristiano. Tan diad saginonor, diad satan a probinsya na Roma a Macedonia et wala met ni ray nagmaliw a Kristiano.​—Gawa16:9-15.

Ontan met so inkaseseg a naoobserbaan ed saray Tasi nen Jehova natan. Diad sarili dan gastos, dakel so mabulos a linma ed arum a lugar a baleg so pankaukolan parad manangipulong na Panarian. Alimbawa, si Lisa a taga Canada et labay ton mas nisentroy bilay to ed ministeryo kanian sikatoy linma’d Kenya. Si Trevor tan Emily, a taga met ed Canada, et linma’d Malawi pian napalaknab day ministeryo ra. Ontan met di Paul tan Maggie a taga England, a minoria ran say impanretiro ra et alay abig a pankanawnawa pian mas makapanlingkor ni ed si Jehova kanian linma ra ed East Africa. Kasin ipapatnag mo so ontan ya inkamasakripisyo? Nononoten mo met kasi manlingkor ed arum a bansa? No ontan, antoran prinsipyo ed Biblia tan praktikal a suhestion so makatulong ed sika?

Usisam so Inkasika

Say sakey a nepeg mon usisaen et say motibom. Unong ed si Jesus, say sankamanunaan a ganggan et: “Aroen mo so Katawan a Dios mo ed masimoon a pusom, tan dia ed masimoon a kamarerwam, tan dia ed masimoon a nonot mo.”  Kanian, nepeg a say rason mo’d panlingkor diad arum a bansa et lapud inarom so Dios tan labay mon sumpalen so kimey a panaggaway babangatan. Intuloy ni nen Jesus: “Say komadua a mipadpara ed sikato saya, Aroen mo so kaparam a too unong ed sikan dili.” Sayan panangaro ed kaparan too et nipatnag diad masimoon ya itulong ed arum. (Mat. 22:36-39; 28:19, 20) Diad kaslakan, kaukolan so pansagpot tan inkamasakripisyo no manlingkor ed arum a bansa. Say iyakar ditan et aliwan pian ompasyar odino manbakasyon. Kaukolan a say aro so mamakiwas ed sika. Oniay inkomento di Remco tan Suzanne a taga Netherlands a natan et manlilingkor ed Namibia: “Wadia kami ni anggad natan lapud aro.”

Si Willie, sakey a manangasikaso na sirkito ed Namibia so nankuan: “Saramay akapambayag ed panaglingkor ed arum a bansa et agnanisip ya asikasoen ira na saray agagin sabien da. Noagta say gagala ra et say panlingkor a kaibay agagi, a tulongan ira ed panagpulong a kimey.”

Kayarim ya usisaey motibom, tepetay inkasika: ‘Antoran dunong tan panangipasal so agamoran ko a makatulong ed panlingkor ed arum a bansa? Epektibo ak kasi ed panagpulong? Antoray kabisadok a lenguahe? Mabulos ak kasin manaral na sananey ni?’ Pantongtongan iyan maong bilang pamilya. Ipanon iya ed saray mamatatken ed kongregasyon. Tan agmo lilingwanan ya ipikasi iya ed si Jehova. No gawaen mo iraya, naamtaan mo no talagan desidido ka tan sarag moy manlingkor ed arum a bansa.​—Nengnengen so kahon a  “Kabaten Moy Inkasika.”

 No Iner so Napanboluntaryoan

Si Pablo et inggiyan onla ed Macedonia panamegley na pasingawey. Natan et agla manguusar si Jehova na ontan iran paraan pian igiya itayo. Balet, panamegley na sayan magasin tan arum nin publikasyon, naaamtaan na saray totoo na Dios iray teritoryan walaay baleg a pankaukolan. Kanian ilista iray ontan a teritorya. No agka ni akaparaan a manaral na sananey a lenguahe odino agka makapanpermanente ed arum a bansa, nayarin pilien moy manlingkor ed bansan kabisadom lay lenguahen uusaren na maslak a totoo. Insan amtaen so nipaakar ed panag-alay visa, transportasyon, seguridad, ekonomya, tan klima ed satan a bansa. Maabig no makapitongtong ka ed saramay asali da lay akapanboluntaryo ditan. Ipikasim a makapanggawa kay sankaabigan a desisyon. Tandaan a si Pablo tan saray kakaiba to et ‘ag-inabuloyan na masanton espiritu ya ipulong so salita ed Asia.’ Anggaman ninonot day onla’d Bitinia, “say espiritu nen Jesus agto ra inabuloyan.” Ontan met natan, nakaukolan so magenap a panaon pian naamtaan no iner kan talaga makatulong.​—Gawa 16:6-10.

Sano nikonsideram la iraya, nayarin wala la ray bansan nononoten mon napanboluntaryoan. No bilang ontan, mansulat ka ed sangan opisina na saray Tasi nen Jehova ed saratan a bansa. Diad satan a sulat, ipaamtam iray teokratikon pribilehyom tan antokaman a tepet mo, a singa say nipaakar ed bili na sasaliwen, lugar a napanayaman, ospital odino klinika, tan no antoy posiblin magmaliw a trabahom ditan. Insan iter moy sulat mo ed komite parad serbisyo na kongregasyon yo. Ilaktip day rekomendasyon da insan da itan direktan ipawit ed sangan opisina na saray bansan pampipilian mo. Say bales na sarayan sangan opisina so makatulong ed sikan makapandesisyon no iner so sankaabigan a laen mo.

Si Willie, ya abitla niman et oniay naobserbaan to: “Saramay binmisita nin unona ed bansa a plano dan laen tan nananap na praktikal a lugar a napanayaman ya ag-ira tanton nairapan et nanliketan day impanboluntaryo ra. Singa bilang, amoria na sakey a sanasawa a mairap no diad nisulinek a lugar ira manayam. Kanian nandesisyon iran manayam ed sakey a melag a baley a wala met so pankaukolan ingen ta sarag day manbilay ed paraan a napansiansia day liket da ed panaglingkor.”

Talonaan Iray Onlesan Angat

On, talagan aliwan mainomay so itaynan ed abung tan onla ed sakey a nidumaduman pasen. “Talagan mairap a labanan so ermen,” so kuan nen Lisa, ya asalambit niman. Antoy tinmulong ed sikato? Say pansiansian maapit ed saray agagi ed balon kongregasyon to. Nansagpotan ton kabisadoen so kangaranan dan amin. Pian nagawaan iya, sikatoy masakbay ya onsasabi’d aral tan ag-onaalis a tampol pian napitongtongan to ray agagi. Nandurumay kaulop to ed panagpulong,  inimbitaan to ray agagi ed abung to, tan akikaaro ed sikara. Inkuan to: “Agko pagbabawian iray sakripisyok. Talagan benendisyonan ak nen Jehova.”

Sanen angkakabaleg la ray anak di Paul tan Maggie, tinaynan day abung da a 30 taon dan nanayaman. Insalaysay nen Paul: “Mainomay manayan taynan so kaykayarian. Say talagan mairap et say isian ed pamilya. Agmi inilaloan ya onman manaya kairap. Manak-akis kami sanen wala kami la’d eroplano. Main-inomay la komoy onsuko tan ibagay, ‘Agmi ya sarag.’ Balet ta nanmatalek kami’d si Jehova. Makatulong met so pakawalaan na balon kakaaro pian makapantultuloy kayo.”

Si Greg tan Crystal a taga Canada et nandesisyon ya onla’d Namibia lapud amta ray mansalita na Ingles, say opisyal a lenguahe ditan. Balet diad saginonor, amoria ran makanakana so panaral na lenguahen sasalitaen ed panboboluntaryoan dan lugar. Oniay komento ra: “No maminsan et nadidismaya kami. Ingen sanen naaral mi lay lenguahe ra, mas atalosan mi kultura da. Akatulong so maapit a pipiulop mi’d saray agagi pian mas mainomay kamin makaadapta ed balon kaliberliber mi.”

Say ontan ya inkamabulos tan inkamapaabeba et walaan na positibon epekto ed saray agagi. Nanonotan ni nen Jenny iramay pamilyan namboluntaryo’d Ireland, say bansan binalegan to. Inkuan to: “Sikara ni ingen so mas maparawes. Talagan linma ra diman pian manserbi, aliwan pian paserbian. Ontan lay liket tan inkaseseg da kanian apakiwas ak met a manboluntaryo ed arum a bansa.” Natan, si Jenny tan say asawa to et misionero la diad Gambia.

“Say Bendisyon nen Jehova Makapayaman”

Talagan makapnek so eksperiensya nen Pablo diman ed Macedonia! Kayari manga samploy taon et oniay insulat to ed saray agagi ed Filipos: “Misalamat ak ed Dios ko ed amin a pakanonot ko ed sikayo.”​—Fil. 1:3.

Mipara’d satan so nalilikna di Trevor tan Emily, a nanlingkor ed Malawi antis iran nanaral ed Watchtower Bible School of Gilead. Inkuan da: “No maminsan et nononoten mi no kasin dugay gagawaen mi. Balet ta nibaga min maliket kami lapud inmapit kami ed sakey tan sakey tan alikna mi bendisyon nen Jehova.” Onia met so imbaga di Greg tan Crystal, ya asalambit niman: “Anggapo lay arum a naisip min mas maabig nin gawaen.”

Tua, aliwan amin et makasarag a manlingkor ed arum a bansa. Ompan mas baleg so nagawaan na arum no manboluntaryo ira ed lugar a baleg so pankaukolan diad mismon bansa ra. Say arum balet et nayarin ontulong ed saray kongregasyon ya asingger ed lugar da. Say importante et gawaen moy anggaay nayarian mon panlingkoran si Jehova. (Col. 3:23) Diad ontan et naeksperiensyam a mismo irayan salita: “Say bendisyon nen Jehova makapayaman; tan agmangarum na ermen.”​—Uli. 10:22.

[Kahon/Litrato ed pahina 5]

 Kabaten Moy Inkasika

Pian nausisam no kasin sarag moy manboluntaryo ed arum a bansa, nonot mon maong irayan tepet. Magmaliw kan realistiko tan manpikasi ka pian naamtaan mo no antoy sankaabigan a desisyon. Makatulong ed sika irayan apalabas ya isyu na Say Panag-Bantayan tan The Watchtower.

• Kasin maespiritual ak a too?​—“Saray Kundang a Mamaarap ed Liket” (Oktubre 15, 1997, pahina 6)

• Kasin epektibo ak ed panagpulong?​—“How to Succeed in  the Pioneer Ministry” (Mayo 15, 1989, pahina 21)

• Kasin sarag kon taynan so pamilyak tan kakaarok?​—“Panalona ed Pakailiw” (Mayo 15, 1994, pahina 28)

• Kasin sarag koy manaral na sananey a lenguahe?​—“Panlingkor ed Kongregasyon a Sananey so Lenguahe” (Marso 15, 2006, pahina 17)

• Kasin nasuportaan koy inkasiak ed pinansyal?​—“Makapanlingkor Ka Ta ed Biek-Taew a Lawak?” (Oktubre 15, 1999, pahina 23)

[Litrato ed pahina 6]

Say inkamabulos tan inkamapaabeba et walaan na positibon epekto ed saray agagi

[Litrato ed pahina 7]

Tinmalona iramay say gagala ra et pian manserbi