Noticia di Reino Num. 37

Un Mensahe Pa Henter Mundo

Fin Di Religion Falso Ta Serca!

▪ Kico ta religion falso?

▪ Con lo e yega na su fin?

▪ Con esei lo afecta abo?

 Kico ta religion falso?

E crimennan cometi den nomber di religion ta haci bo tristo? Guera, terorismo y corupcion cu personanan cu ta pretende di sirbi Dios ta comete, ta molestia bo sentido di husticia? Dicon ta manera cos cu religion ta e causa di asina tanto problema?

No ta tur religion, sino religion falso so, ta responsabel pa e tantisimo problemanan aki. Hesucristo, un personahe religioso hopi respeta, a indica cu religion falso ta pone hende haci loke ta malo, mescos cu un “palo malo ta duna mal fruta.” (Mateo 7:15-17) Ki fruta religion falso ta produci?

Religion Falso . . .

◼ TA SIÑA DOCTRINA FALSO: “Na Asia y tambe na otro luganan, lidernan [religioso] hambra pa poder cu un aire di desprecio ta manipula e sintimentonan religioso di hende pa satisface nan propio necesidadnan”, segun e revista Asiaweek. Pesei, e revista ei a spierta: “Mundo ta serca di bira loco.” Un lider religioso prominente na Merca a declara: “Bo tin cu mata e teroristanan pa nan stop di mata.” Ki solucion el a sugeri? “Tira nan tur mata den nomber di Señor.” Na contraste, Bijbel ta bisa: “Si un hende bisa: ‘Mi ta stima Dios’, y ta odia su ruman, e ta un gañado.” (1 Huan 4:20) Asta Hesus a bisa: “Stima boso enemigonan.” (Mateo 5:44) Cuanto religion bo conoce cu nan miembronan ta participa den guera?

◼ TA SIÑA DOCTRINA FALSO: Mayoria religion ta siña cu hende tin un parti invisibel, un alma of spirito, cu ta sigui biba ora cu e curpa fisico muri. Mediante e siñansa aki, hopi di e religionnan ei ta saca probecho di nan miembronan door di cobra nan pa resa pa alma di e defuntonan. Sinembargo, Bijbel ta siña un otro doctrina: “E alma cu peca lo muri.” (Ezekiel 18:4) “E bibonan sa cu nan lo muri, ma e mortonan no sa nada.” (Eclesiastes 9:5) Hesus a siña hende cu e mortonan lo ser resusita. Pues, si hende tawatin un alma inmortal resureccion lo no tawata necesario. (Huan 11:11-25) Bo religion ta siña cu alma no ta muri?

◼ TA TOLERA RELACION SEXUAL INMORAL: Den hopi pais, gruponan religioso ta permiti personanan homosexual y lesbiana bira pasto y nan ta urgi gobierno pa reconoce matrimonio di personanan di mesun sexo. Asta iglesianan cu ta condena inmoralidad ta tolera lidernan religioso cu a abusa sexualmente di mucha. Pero kico Bijbel ta siña? Bijbel ta declara bon cla: “No laga nan gaña boso; ni fornicado, ni adorado di dios falso, ni adultero, ni sodomita, ni homosexual . . . lo no hereda e reino di Dios.” (1 Corintionan 6:9, 10) Bo conoce religionnan cu ta acepta y permiti relacion sexual inmoral?

 Kico tin den futuro pa religionnan cu ta produci mal fruta? Hesus a spierta: “Tur palo cu no ta duna bon fruta ta wordo gekap y tira den candela.” (Mateo 7:19) Si, religion falso lo wordo gekap y destrui! Pero con y na ki tempo esaki lo sosode? Un vision profetico cu ta para skirbi den e buki biblico di Revelacion, capitulo 17 y 18, ta duna e contesta.

Con religion falso lo yega na su fin?

Imagina bo e esena. Un prostituta sinta riba lomba di un bestia spantoso. E bestia tin shete cabes y dies cacho. (Revelacion 17:1-4) Ken e prostituta aki ta representa? E tin influencia “riba e reinan di tera.” E ta bisti na purpura, ta uza sencia y ta masha rico mes. Ademas, pa medio di su practicanan spiritista of di bruheria, ‘tur e nacionnan ta wordo gaña.’ (Revelacion 17:18; 18:12, 13, 23) Bijbel ta yuda nos compronde cu e prostituta aki ta un organisacion mundial religioso. E no ta representa un solo religion, sino tur religion cu ta produci mal fruta.

E bestia cu e prostituta ta sinta riba dje ta representa e podernan politico di mundo. * (Revelacion 17:10-13) Religion falso ta core riba lomba di e bestia politico aki, tratando di influencia e bestia su decisionnan y di controla e direccion cu e ta bai.

Sinembargo, pronto un suseso asombroso lo tuma luga. “E dies cachonan cu bo a mira, y e bestia, esakinan lo odia e prostituta y lo hacie desola y sunu, y lo come su carni y lo kim’e completamente cu candela.” (Revelacion 17:16) Cu un accion repentino y spantoso, e podernan politico di mundo lo ataca religion falso y destru’e completamente! Kico lo motiva e accion aki? E buki biblico di Revelacion ta contesta: “Dios a pone den nan curason pa ehecuta su proposito.” (Revelacion 17:17) Si, Dios lo pidi cuenta for di religion falso pa tur e actonan sumamente baho cu el a comete den nomber di Dios. Actuando cu husticia perfecto, Dios lo uza e amantenan politico di religion falso como su instrumento pa caba cu religion falso.

Kico abo tin cu haci si bo no kier haya e mesun fin cu religion falso? Dios su mensahero ta urgi nos: “Sali for di dje, mi pueblo.” (Revelacion 18:4) Si, awor ta e tempo pa sali for di religion falso! Pero acaso esei kiermen cu bo mester stop di kere den Dios? No, keda sin kere den Dios tampoco no tin futuro. (2 Tesalonicensenan 1:6-9) E unico refugio ta religion berdadero. Con bo por identifica religion berdadero?

 Con pa identifica religion berdadero

Ki bon fruta religion berdadero lo mester produci?​—Mateo 7:17.

Religion Berdadero . . .

◼ TA PRACTICA AMOR: Adoradonan berdadero ‘no ta parti di mundo’, no tin desunion den nan pa motibo di rasa of cultura, y nan ta mustra “amor un pa otro.” (Huan 13:35; 17:16; Echonan 10:34, 35) En bes di mata otro, nan ta stima otro asina tanto cu nan ta dispuesto pa muri pa otro si ta necesario.​—1 Huan 3:16.

◼ TA CONFIA E PALABRA DI DIOS: Religion berdadero no ta siña “tradicion” ni “preceptonan di hende como doctrina”, sino mas bien su doctrina ta basa riba e Palabra di Dios, Bijbel. (Mateo 15:6-9) Dicon? Pasobra “tur Scritura ta inspira pa Dios y ta util pa siñansa, pa reprendemento, pa coreccion.”​—2 Timoteo 3:16.

◼ TA FORTALECE FAMIANAN Y TA PRACTICA Y ENCURASHA NORMANAN MORAL HALTO: Religion berdadero ta siña esposonan “stima nan esposa manera nan mes curpa.” E ta yuda esposanan cultiva ‘respet profundo pa nan esposo.’ Y e ta siña yiunan ‘obedece nan mayornan.’ (Efesionan 5:28, 33; 6:1) Ademas, e personanan confia cu puesto di responsabilidad mester tin un moralidad ehemplar.​—1 Timoteo 3:1-10.

Tin un religion cu ta cumpli cu e normanan aki? E buki Holocaust Politics (Politica di Holocausto), publica na 2001, ta bisa: “Si tawatin mas hende cu ta practica versionnan di loke Testigonan di Yehova ta predica y practica, hende lo por a preveni e Holocausto, y genocidio lo no a causa sufrimento mas na mundo.”

En berdad, den 235 pais, Testigonan di Yehova no ta djis predica e normanan moral di Bijbel, nan ta biba di acuerdo cu nan. Nos ta curasha bo pa pidi Testigonan di Yehova yuda bo siña loke Dios ta rekeri di bo, ya asina bo por ador’e na un manera aceptabel. Awor ta e tempo pa actua. No tarda. E fin di religion falso ta serca!​—Sofonias 2:2, 3.

Si bo ta desea mas informacion tocante e mensahe biblico cu Testigonan di Yehova ta predica, sinti bo liber pa tuma contacto cu nan na e adres akibou.

□ Mi ta desea di haya sin ningun obligacion un ehemplar di e foyeto Keda Vigila!

□ Por fabor, tuma contacto cu mi pa un estudio di Bijbel gratis na cas.

[Nota]

[Komentario di e plachi na página 3]

Religion falso tin influencia “riba e reinan di tera”

[Komentario di e plachi na página 3]

“Sali for di dje, mi pueblo”