ASTROLOGIA: Algun hende ta kere cu e posicion di e streanan na momento cu un hende nace ta loke ta determina un hende su futuro. Nan ta lesa horoscop pa haya sa kico e ta bisa tocante nan futuro y pa tuma decision basa riba esey.

FENG SHUI: Otro hende ta kere cu e manera cu nan ta diseña nan cas of otro luga lo trece exito y felicidad. Lo Wing, * cu ta biba na Hong Kong, a bisa: “Un experto di feng shui a bisa mi cu si mi pone un cristal special na un luga specifico den mi tienda lo mi gana mas placa.”

ADORACION DI ANTEPASADO: Otro hende ta kere cu nan mester agrada nan antepasadonan of varios dios pa haya nan proteccion y bendicion. Van, cu ta biba na Vietnam, a bisa: “Mi tabata kere cu si mi mustra honor na mi antepasadonan, lo mi tin un mihor bida awor y un futuro sigur pa mi y pa mi yiunan.”

REENCARNACION: Hopi hende ta kere cu ora un persona muri e ta nace di nobo y cu esey ta sigui pasa bes tras bes. Nan ta kere cu e cosnan bon y malo cu nan ta experencia awor ta pa motibo di loke nan a haci den nan bida anterior.

Sinembargo, hopi hende ta kere cu e creencianan ey ta supersticion. Pero asina mes, nan ta practica lesamento di plant’i man, wak horoscop, hunga wega pa haya mensahe sobrenatural, uza baraha di carta tarot y cos similar. Nan ta pensa cu kisas e practicanan ey por yuda nan haya sa nan futuro.

Hende cu a pone tur nan confianza den e creencia- y practicanan ey a logra haya un bon bida y un futuro sigur?

Wak e ehempel di Hào, un homber cu ta biba na Vietnam. E tabata laga astrologia, feng shui, y adoracion di antepasado guia su bida. E tabatin exito? Hào a bisa: “Mi negoshi a perde hopi placa, mi a cay den debe, mi tabatin yen di problema den famia y mi a bira hopi deprimi.”

Qiuming, un homber di Taiwan, tambe tabata kere den astrologia, reencarnacion, destino, feng shui y adoracion di antepasado. Despues di a tuma tempo pa analisa e creencianan ey bon, el a bisa: “Mi a realisa cu e siñansa- y custumbernan ey ta den conflicto cu otro y nan ta confundi hende. Mi a ripara cu hopi bes e pronosticonan di astrologia tabata incorecto. Y loke ta trata di reencarnacion, si bo no por corda loke bo a haci den bo bida anterior, con bo por haci cambio y biba mihor den bo siguiente bida?”

Mescos cu Hào y Qiuming, hopi otro hende tambe a realisa cu nos futuro no ta ser determina pa destino, strea, adoracion di antepasado ni reencarnacion. Esey kiermen cu nos no por mehora nos futuro?

Hopi hende ta pensa cu e manera pa garantisa un mihor futuro ta di bay tras di enseñanza superior y rikesa. Kico tabata e resultado pa algun hende cu a tuma e decision ey?