KRISTIANNAN a haña e mandamentu pa konmemorá e morto di Kristu. E Memorial aki ta ser yamá tambe “e Sena di Señor.” (1 Korintionan 11:20) Kiko ta hasié asina importante? Ki tempu i kon mester konmemor’é?

Hesukristu a instituí e konmemorashon aki riba e anochi di e Pasku Hudiu na aña 33 di nos era. E hudiunan tabata selebrá e Pasku un biaha pa aña so, riba e di 14 dia di e luna hudiu nisan. Pa kalkulá e fecha, nan evidentemente tabata warda pa e dia den lènte (yamá equinox) ora ku tin aproksimadamente 12 ora di lus di dia i 12 ora di skuridat. E promé luna nobo ku nan por a mira mas serka di e dia aki a marka prinsipio di e luna di nisan. Pasku tabata despues di 14 dia, i a kuminsá despues ku solo baha.

Hesus a selebrá e Pasku huntu ku su apòstelnan, kaba el a manda Hudas Iskariot bai, pa despues e instituí e Sena di Señor. E sena aki a remplasá e Pasku Hudiu i p’esei mester konmemor’é un biaha pa aña so.

E Evangelio di Mateo ta informá: “Hesus a kohe pan, i despues di a bendishon’é, el a kibr’é i a duna su disipelnan i a bisa: ‘Tuma, kome; esaki ta mi kurpa.’ I despues ku el a kohe un kopa i a duna gradisimentu,  el a duna nan esei, bisando: ‘Boso tur bebe for di dje; pasobra esaki ta mi sanger di e aliansa, ku ta wòrdu dramá pa hopi pa pordon di piká.’”—Mateo 26:26-28.

Tin hende ta kere ku Hesus a kombertí e pan den su karni literal i e biña den su sanger. Sin embargo, Hesus su kurpa karnal tabata intakto ainda ora ku el a ofresé e pan aki. Akaso Hesus su apòstelnan di bèrdat a kome su karni literal i bebe su sanger? Nò, pasobra esei lo tabata kanibalismo i un violashon di e lei di Dios. (Génesis 9:3, 4; Levítiko 17:10) Segun Lukas 22:20, Hesus a bisa: “E kopa aki, ku a wòrdu dramá pa boso, ta e aliansa nobo den mi sanger.” E kopa literalmente a bira “e aliansa nobo”? Esei lo ta imposibel, pasobra un aliansa ta un akuerdo, no un opheto material.

Pues, tantu e pan komo e biña ta simplemente símbolo. E pan ta simbolisá Kristu su kurpa perfekto. Hesus a usa pan ku a sobra di e sena di Pasku. E pan ei tabata trahá sin zürdeg òf ist. (Eksodo 12:8) Beibel ta usa zürdeg hopi biaha komo un símbolo di piká òf korupshon. P’esei e pan ta representá e kurpa perfekto ku Hesus a sakrifiká. E tabata sin piká.—Mateo 16:11, 12; 1 Korintionan 5:6, 7; 1 Pedro 2:22; 1 Juan 2:1, 2.

E biña kòrá ta representá Hesus su sanger. E sanger ei ta hasi e aliansa nobo válido. Hesus a bisa ku su sanger lo ser dramá pa “pordon di piká.” Di e manera ei hende por bira limpi den bista di Dios i por drenta den e aliansa nobo ku Yehova. (Hebreonan 9:14; 10:16, 17) E aliansa aki òf kontrakt, ta hasi posibel pa 144.000 kristian fiel bai shelu. Den shelu nan lo sirbi komo rei i saserdote pa e bendishon di henter humanidat.—Génesis 22:18; Jeremias 31:31-33; 1 Pedro 2:9; Revelashon 5:9, 10; 14:1-3.

Ken lo mester kome di e símbolonan òf emblemanan aki di e Konmemorashon? Lógikamente ta solamente esnan den e aliansa nobo—esta, esnan ku tin e speransa di bai shelu—mester kome di e pan i bebe di e biña. Dios su spiritu santu ta konvensé e personanan ei ku nan a ser skohé pa bira rei selestial. (Romanonan 8:16) Nan ta tambe den e aliansa ku Hesus a sera ku nan pa haña e Reino.—Lukas 22:29.

 Kiko di e hendenan ku tin e speransa di biba pa semper den Paradeis riba tera? Nan ta obedesé Hesus su mandamentu i ta asistí na e Sena di Señor, pero nan ta bin komo opservadó respetuoso, no komo partisipante di e sena. Un biaha pa aña, despues ku solo baha riba 14 di nisan, Testigunan di Yehova ta konmemorá e Sena di Señor. Ounke ta apénas algun mil hende rònt mundu ta deklará di tin e speransa selestial, e konmemorashon aki ta presioso pa tur kristian. E ta un okashon ku tur kristian por reflekshoná riba e amor sublime di Yehova Dios i Hesukristu.—Juan 3:16.