1, 2. Unda nos por haña un refugio sigur awe?

IMAGINÁ ku bo ta kanando riba un dia ku tin mal wer. Shelu ta bira mas i mas skur. Werlek ta kuminsá kòrta, bos ta klap, anto áwaseru ta kuminsá kai masha duru mes. Bo ta kuminsá kore, buskando desesperadamente un kaminda di skonde. Ata bo ta mira un refugio kantu di kaminda. E ta sólido, seku i ta atraé bo pa drenta. Esta gradisidu bo ta pa e lugá di siguridat ei!

² Nos ta bibando den tempu turbulento. Kondishonnan mundial ta bayendo di malu pa pió. Pero tin un lugá di siguridat, un refugio ku por protehá nos di daño permanente. Kiko e ta? Tuma nota di loke Beibel ta siña: “Lo mi bisa [Yehova]: ‘Mi refugio i mi fòrti, mi Dios, den kende mi ta konfia!’”—Salmo 91:2.

3. Kon nos por hasi Yehova nos refugio?

³ Imaginá bo! Yehova, e Kreadó i Soberano di universo, por ta nos refugio protektivo. E por protehá nos pasobra e ta hopi mas poderoso ku ken òf kiko ku lo por bin kontra  nos. Asta si nos risibí daño, Yehova por drecha tur su mal efektonan. Kon nos por hasi Yehova nos refugio? Nos tin ku konfia den dje. Ademas, e Palabra di Dios ta urgi nos: “Konserbá boso mes den e amor di Dios.” (Hudas 21) Sí, nos tin ku keda den e amor di Dios, manteniendo un banchi òf laso amoroso ku nos Tata selestial. E ora ei nos por tin e konfiansa ku e ta nos refugio. Pero kon nos por forma un laso asina?

4, 5. Menshoná algun manera ku Yehova a ekspresá amor pa nos.

⁴ Pa keda den e amor di Dios, nos tin ku komprondé kon Yehova a demostrá su amor pa nos. Pensa riba algun di e siñansanan di Beibel ku bo a siña ku yudansa di e buki aki. Komo e Kreadó, Yehova a duna nos planeta Tera komo nos dushi hogar. El a yena e tera ku un abundansia di kuminda i awa, rekursonan natural, bida animal fasinante i paisahe bunita. Komo Outor di Beibel, Dios a revelá su nòmber i su kualidatnan na nos. Ademas, su Palabra ta revelá ku el a manda su propio Yu stimá na tera, i a permití Hesus sufri i muri pa nos. (Juan 3:16) I kon nos ta benefisiá di e regalo aki? E ta duna nos speransa pa un futuro maravioso.

⁵ Nos speransa pa futuro ta dependé tambe di un otro kos ku Dios a hasi. Yehova a establesé un gobièrnu selestial, e Reino Mesiániko. Pronto e gobièrnu aki lo pone un fin na tur sufrimentu i lo hasi e tera un paradeis. Djis pensa! Nos por biba den un paradeis den pas i felisidat pa semper. (Salmo 37:29) Miéntras tantu, Dios a duna nos guia kon pa biba di e mihó manera posibel aworakí. El a duna nos e regalo di orashon i di e manera ei nos por komuniká kuné ki ora ku ta i na unda ku ta. Esakinan ta djis algun di e maneranan ku Yehova a demostrá amor pa humanidat en general i pa abo komo persona.

6. Kon lo bo por reakshoná riba e amor ku Yehova a mustra na bo?

 ⁶ E pregunta sumamente importante pa bo konsiderá ta esaki: Kon lo mi reakshoná riba Yehova su amor? Hopi hende lo bisa: “Wèl, a kambio ta ami tin ku stima Yehova.” Ta asina abo ta sinti? Hesus a bisa ku esaki ta e mandamentu di mas grandi di tur: “Stima SEÑOR bo Dios ku henter bo kurason, i ku henter bo alma, i ku henter bo mente.” (Mateo 22:37) Un kos ta sigur, bo tin hopi motibu pa stima Yehova Dios. Pero djis sinti ku bo tin e amor ei ta tur loke bo mester pa bisa ku bo ta stima Yehova ku henter bo kurason, alma i mente?

7. Stima Dios ta simplemente sinti un sierto emoshon? Splika.

⁷ Manera Beibel ta splika, stima Dios ta enserá muchu mas ku djis un sintimentu. De echo, ounke ta esensial pa nos sinti amor pa Yehova, e sintimentu ei ta djis e komienso di berdadero amor p’e. Por ehèmpel: Un simia di apel ta esensial pa bo haña un palu di apel ku ta produsí fruta, pero e ta djis e komienso di un palu asina. Si bo tabata ke un apel, lo bo keda kontentu si un hende duna bo djis un simia di apel? Nò! Asina tambe, un sintimentu di amor pa Yehova Dios ta apénas e komienso. Beibel ta siña: “Esaki ta e amor di Dios, ku nos ta warda su mandamentunan; i su mandamentunan no ta pisá.” (1 Juan 5:3) Berdadero amor pa Dios mester duna bon fruta. E mester keda ekspresá den akshon.—Mateo 7:16-20.

8, 9. Kon nos por ekspresá nos amor i apresio pa Dios?

⁸ Nos ta demostrá nos amor pa Dios ora ku nos ta warda su mandamentunan i apliká su prinsipionan. Esei no ta un kos muchu duru pa hasi. En bes di ta un karga pisá, e leinan di Yehova ta diseñá pa yuda nos hiba un bida plasentero, felis i ku ta duna satisfakshon. (Isaias 48:17, 18) Dor di biba na armonia ku e guia di Yehova, nos ta mustra nos Tata selestial  ku en bèrdat nos ta apresiá tur loke el a hasi pa nos. Lamentablemente, masha tiki hende den e mundu djawe ta mustra tal apresio. Nos no ke ta malagradesí manera algun hende ku a biba tempu ku Hesus tabata riba tera. Hesus a kura dies leproso, pero ta un so a bolbe bèk pa gradisié. (Lukas 17:12-17) Nos definitivamente ke ta manera esun gradisidu ei, no manera e nuebenan malagradesí!

⁹ Kiko anto ta e mandamentunan di Yehova ku nos tin ku warda? Nos a konsiderá vários di nan den e buki aki, pero laga nos repasá un par. Warda Dios su mandamentunan lo yuda nos keda den e amor di Dios.

10. Splika dikon ta importante pa sigui gana konosementu di Yehova Dios.

¹⁰ Siña tokante Yehova ta un paso sumamente importante pa hala mas serka di dje. Esei ta un proseso ku no mester stòp nunka. Si un anochi hopi-hopi friu bo ta pafó den aire liber ta keinta bo mes banda di un kandela, lo bo laga e kandela paga? Nò. Bo ta sigui buta palu pa e  kandela keda bon kayente i briante. Bo bida lo por ta dependé di esei! Meskos ku palu ta laga e kandela sigui kima, asina “e konosementu di Dios” ta mantené nos amor pa Yehova ferviente.—Proverbionan 2:1-5.

11. Ki efekto Hesus su siñansa tabatin riba su siguidónan?

¹¹ Hesus tabata ke pa su siguidónan mantené nan amor pa Yehova i pa Su Palabra presioso di e bèrdat, bibu i ferviente. Despues di Hesus su resurekshon, el a siña dos di su disipelnan tokante algun di e profesianan den e Skritura Hebreo ku a kumpli riba dje. Kiko tabata e efekto? Despues e disipelnan a bisa: “Nos kurason no tabata kima den nos miéntras ku e tabata papia ku nos na kaminda, miéntras ku e tabata splika nos e Skrituranan?”—Lukas 24:32.

12, 13. (a) Kiko a pasa ku amor pa Dios i pa Beibel serka mayoria di hende djawe? (b) Kon nos por evitá ku nos amor ta fria?

¹² Ora ku abo a haña sa pa promé bes loke Beibel realmente ta siña, bo a ripará ku den bo kurason a lanta un sintimentu ferviente di goso, entusiasmo i amor pa Dios? Sin duda bo a sinti esei. Hopi hende a sinti meskos. Pero awor e reto ta pa mantené e amor intenso ei bibu i yud’é krese. Nos no ke sigui e tendensia di e mundu djawe. Hesus a predisí: “Amor di hopi hende lo fria.” (Mateo 24:12) Kon bo por evitá ku bo amor pa Yehova i pa bèrdatnan bíbliko ta fria?

¹³ Sigui gana konosementu di Yehova Dios i Hesukristu. (Juan 17:3) Meditá, es desir, pensa profundamente riba loke bo ta siña for di e Palabra di Dios, dor di puntra bo mes: ‘Kiko esaki ta siña mi tokante Yehova Dios? Ki motibu adishonal e ta duna mi pa stim’é ku henter mi kurason, mente i alma?’ (Salmo 77:12) Dor di meditá asina bo amor pa Yehova lo keda bibu i ferviente.

14. Kon orashon por yuda nos mantené nos amor pa Yehova bibu?

¹⁴ Un otro manera pa laga bo amor pa Yehova keda bibu i ferviente ta dor di hasi orashon ku regularidat. (1 Tesalonisensenan 5:17) Den Kapítulo 17 di e buki aki, nos a siña ku  orashon ta un regalo presioso di Dios. Meskos ku relashonnan humano ta prosperá ora ku tin komunikashon habrí i regular, asina tambe nos relashon ku Yehova ta keda bibu i kaluroso ora ku nos ta hasi orashon na dje ku regularidat. Ta sumamente importante pa nos nunka laga nos orashonnan bira mekániko, esta, djis un rutina di palabranan ku nos ta ripití bes tras bes sin berdadero sintimentu òf nifikashon. Nos tin ku papia ku Yehova manera un yu lo a papia ku su tata stimá. Klaru ku nos ke papia ku rèspèt, pero abiertamente, onestamente i di kurason. (Salmo 62:8) Sí, estudio personal di Beibel i orashon di kurason ta aspektonan sumamente importante di nos adorashon, i nan ta yuda nos keda den e amor di Dios.

15, 16. Dikon korektamente nos por mira e trabou di prediká e Reino komo un onor i un tesoro?

¹⁵ Estudio personal di Beibel i orashon ta aktonan di adorashon ku nos kisas ta hasi den privá. Sin embargo, laga nos konsiderá awor un aspekto di adorashon ku nos ta hasi públikamente: papia ku otro hende tokante nos kreensianan. Bo a kompartí kaba algun bèrdat bíbliko ku otro hende? Esaki ta un oportunidat maravioso di sirbi Yehova ku el a konsedé nos. (Lukas 1:74) Ora nos ta kompartí ku otro hende e bèrdatnan ku nos a siña tokante Yehova Dios, nos ta kumpliendo ku un asignashon masha importante duná na tur kristian berdadero: e tarea di prediká e bon notisia di e Reino di Dios.—Mateo 24:14; 28:19, 20.

¹⁶ Apòstel Pablo a mira su sirbishi komo algu presioso i a yam’é un tesoro. (2 Korintionan 4:7) Papia ku hende tokante Yehova Dios i su propósito ta e mihó trabou ku lo bo por hasi. Pasobra asina nos ta sirbi òf traha pa e mihó Shon ku tin, i tambe e ta produsí e mihó benefisionan ku ta posibel. Dor di partisipá den e aktividat di prediká aki, bo ta yuda hende di kurason onrado hala serka nos Tata selestial  i kuminsá kana riba e kaminda ku ta hiba na bida eterno! Kua otro trabou por duna bo mas satisfakshon? Ademas, dunando testimonio tokante Yehova i su Palabra ta oumentá bo propio fe i ta fortalesé bo amor pa Yehova. Anto Yehova ta apresiá bo esfuerso. (Hebreonan 6:10) Kedando okupá  den e trabou ei ta yuda bo keda den e amor di Dios.—1 Korintionan 15:58.

17. Dikon e sirbishi kristian ta urgente awe?

¹⁷ Ta importante pa nos kòrda ku e trabou di prediká e Reino ta urgente. Beibel ta bisa: “Prediká e palabra, okupá bo den dje urgentemente.” (2 Timoteo 4:2, NW) Dikon ta asina urgente pa hasi esei awe? E Palabra di Dios ta bisa nos: “E gran dia di [Yehova] ta serka; e ta serka i e ta bin masha lihé mes.” (Sofonias 1:14) Sí, e tempu ku Yehova lo trese henter e sistema di kosnan aki na su fin ta aserkando rápidamente. Pues, mester spièrta e hendenan! Nan tin ku sa ku awor ta tempu pa skohe Yehova komo nan Soberano. E fin “lo no tarda.”​—⁠Habakuk 2:3.

18. Dikon nos mester adorá Yehova públikamente den asosiashon ku kristiannan berdadero?

¹⁸ Yehova ke pa nos ador’é públikamente den asosiashon ku kristiannan berdadero. Ta p’esei su Palabra ta bisa: “Laga nos konsiderá kon pa stimulá otro pa stima i hasi bon obra, i no laga di asistí na nos mes reunionnan, manera ta kustumber di algun, ma enkurashá otro; i muchu mas ainda, ora boso ta mira ku e dia ta yegando serka.” (Hebreonan 10:24, 25) Ora nos ta reuní huntu ku rumannan den fe na reunionnan kristian, nos tin un oportunidat maravioso pa alabá i adorá nos Dios stimá. Tambe nos un ta edifiká i animá otro.

19. Kon nos por traha pa fortalesé e lasonan di amor den e kongregashon kristian?

¹⁹ Segun ku nos ta asosiá ku otro adoradónan di Yehova, nos ta fortalesé e lasonan di amor i amistat den kongregashon. Ta importante pa nos buska pa mira e bon kualidatnan den otro, meskos ku Yehova ta buska e bon kualidatnan ku tin den nos. No ferwagt perfekshon for di bo rumannan den fe. Kòrda ku nan tur ta na diferente etapa di kresementu spiritual i ku nos tur ta kometé eror. (Kolosensenan 3:13) Trata na kultivá amistat será ku esnan ku ta  stima Yehova intensamente, i lo bo ripará ku bo mes lo krese spiritualmente. Sí, adorá Yehova huntu ku bo rumannan spiritual lo yuda bo keda den e amor di Dios. Kon Yehova ta rekompensá esnan ku ta ador’é fielmente i asina ta keda den su amor?

20, 21. Kiko ta e “bida berdadero,” i dikon e ta un speransa maravioso?

²⁰ Yehova ta rekompensá su fiel sirbidónan ku bida, pero ki klase di bida? Wèl, bo ta realmente na bida aworakí? Mayoria di nos lo bisa ku ta mas ku klaru ku nos ta na bida. Ata nos ta hala rosea, ta kome i ta bebe. Definitivamente nos mester ta na bida. I ora nos ta pasa den momentunan mas felis, kisas asta nos ta bisa: “Esaki sí ta bida!” Sin embargo, Beibel ta indiká ku den un sentido importante, ningun hende awe realmente ta na bida.

²¹ E Palabra di Dios ta urgi nos pa “gara loke ta bida berdadero.” (1 Timoteo 6:19) E palabranan ei ta indiká ku e “bida berdadero” ta algu ku nos ta spera di alkansá den futuro. Sí, ora nos bira perfekto, nos lo ta na bida den e pleno sentido di palabra, pasobra e ora ei nos lo ta bibando manera tabata originalmente Dios su intenshon pa nos biba. Den futuro ora nos ta biba den un tera transformá den un paradeis ku pleno salú, pas i felisidat, nos lo disfrutá porfin di e “bida berdadero,” esta, bida eterno. (1 Timoteo 6:12) Esei no ta un speransa maravioso?

22. Kon bo por ‘gara loke ta e bida berdadero’?

²² Kon nos por ‘gara loke ta e bida berdadero’? Den e mesun konteksto, Pablo a urgi kristiannan “pa hasi bon” i “pa nan ta riku den bon obra.” (1 Timoteo 6:18) Ta bisto anto ku esei ta dependé pa gran parti di e manera ku nos ta apliká e bèrdatnan ku nos a siña for di Beibel. Pero akaso Pablo tabata ke men ku nos lo meresé e “bida berdadero” dor di hasi bon obra? Nò, pasobra e perspektivanan maravioso ei  en realidat ta dependé di si nos ta haña “grasia,” esta bondat inmeresí, for di Dios. (Romanonan 5:15) Sin embargo, Yehova tin delisia den rekompensá esnan ku ta sirbié fielmente. E ke mira bo biba e “bida berdadero.” Tal bida eterno den felisidat i pas ta spera esnan ku keda den e amor di Dios.

23. Dikon ta esensial pa keda den e amor di Dios?

²³ Kada un di nos ta hasi bon di puntra su mes: ‘Mi ta adorando Dios den e manera ku el a deskribí den Beibel?’ Si tur dia nos ta hasi sigur di ku e kontesta ta sí, e ora ei nos ta riba e kaminda korekto. Nos por tin e konfiansa ku Yehova ta nos refugio. Lo e protehá su pueblo fiel durante e último dianan turbulento di e sistema bieu di kosnan aki. Yehova lo laga nos drenta sano i salvo den e glorioso sistema nobo ku awor ta asina serka. Lo ta masha emoshonante pa nos di por eksperensiá e tempu ei! I ki kontentu nos lo ta ku nos a tuma e desishonnan korekto durante e último dianan aki! Si bo skohe bon aworakí, lo bo disfrutá di e “bida berdadero” pa tur eternidat, bida manera tabata Yehova Dios su propósito for di prinsipio!