E BÈRDAT tokante kiko? Tokante algun di e preguntanan di mas importante ku hende a yega di hasi. Kisas bo mes tambe a yega di puntra bo mes kosnan manera:

• Dios ta interesá den nos di bèrdat?

• Guera i sufrimentu lo kaba un dia?

• Kiko ta pasa ku nos ora nos muri?

• Tin speransa pa hende ku a muri?

• Kon mi mester hasi orashon pa Dios skucha mi?

• Kon mi por logra haña felisidat den bida?

Unda abo lo buska kontesta pa e preguntanan aki? Si bo bai kualke biblioteka òf libreria, bo ta topa míles di buki ku ta pretendé di tin kontesta. Pero mayoria bes, e bukinan ei mes ta kontradisí otro. I tin ora por parse ku un buki tin un bon kontesta, pero promé ku bo ke sa e ta bira ouderwets, òf mester revis’é, òf otro buki ta bin na su lugá.

Apesar di esei, tin un buki ku sí ta duna kontesta ku bo por konfia, un buki ku ta kontené e bèrdat. Den orashon na Dios, Hesukristu a yega di bisa: “Bo palabra ta bèrdat.” (Juan 17:17) E Palabra ei ta loke awendia nos konosé komo Beibel Santu. Riba e páginanan ku ta sigui, bo ta bai haña un idea kon Beibel ta duna kontestanan kla i konfiabel pa e preguntanan menshoná aki riba.

DIKON HENDE SA PUNTRA NAN MES ESAKI: Nos ta biba den un mundu yen di krueldat i inhustisia. Hopi religion ta siña hende ku e sufrimentunan ku nos ta pasa aden ta boluntat di Dios.

LOKE BEIBEL TA SIÑA: Nunka Dios no ta kousa maldat. Jòb 34:⁠10 ta bisa: “Leu sea di Dios di hasi maldat, i di e Todopoderoso di kometé inikidat.” Dios ta stima hende, i e tin un bon futuro na mente pa nos. Ta p’esei Hesus a siña nos pa pidi asin’aki den orashon: “Nos Tata ku ta den shelu, . . . Ku bo reino bin. Ku bo boluntat sosodé na tera meskos ku den shelu.” (Mateo 6:9, 10) Dios su interes den nos ta asina profundo, ku el a hasi sakrifisio grandi pa e garantisá ku e futuro ei lo bira realidat.—Juan 3:⁠16.

Mira tambe Génesis 1:26-28; Santiago 1:13 i 1 Pedro 5:6, 7.

DIKON HENDE SA PUNTRA NAN MES ESAKI: Mas i mas hende ta sigui muri pa motibu di guera. Nos niun no ta skapa sufrimentu den bida.

LOKE BEIBEL TA SIÑA: Dios a primintí ku un dia e lo pone pas reina tur kaminda riba tera. Durante gobernashon di su Reino, ku ta un gobièrnu selestial, hende lo no ‘train pa guera mas.’ Na lugá di esei, nan ta bai “bati nan spadanan traha plug ku nan.” (Isaias 2:⁠4) Dios lo pone un fin na tur inhustisia i sufrimentu. Esaki ta loke Beibel ta primintí: “[Dios] lo seka tur lágrima kita for di nan wowo; i lo no tin morto mas; lo no tin lamento mas, ni yoramentu, ni doló; e promé kosnan [inkluso e inhustisia- i sufrimentunan di awendia] a pasa.”—Revelashon 21:3, 4.

Mira tambe Salmo 37:10 i 11; 46:9 i Mikeas 4:1-4.

DIKON HENDE SA PUNTRA NAN MES ESAKI: Kasi tur religion na mundu ta siña ku tin algu den hende ku ta sigui biba despues ku nan muri. Tin hende ta bisa ku hende morto por hasi hende bibu daño, òf ku Dios ta kastigá mal hende ku tormento eterno den kandela di fièrnu.

LOKE BEIBEL TA SIÑA: Ora hende muri, nan ta stòp di eksistí. Segun Eklesiastés 9:5, “Mortonan no sa nada.” Komo ku mortonan no por sa, ni sinti, ni eksperimentá nada, nan no por hasi hende bibu daño. I nan no por yuda hende tampoko.—Salmo 146:3, 4.

Mira tambe Génesis 3:19 i Eklesiastés 9:6 i 10.

DIKON HENDE SA PUNTRA NAN MES ESAKI: Nos tin deseo di biba, i nos ke disfrutá di bida huntu ku esnan ku nos ta stima. Ta natural ku nos ke bolbe mira nos sernan kerí ku a muri.

LOKE BEIBEL TA SIÑA: Mayoria di hende ku a muri lo resusitá. Hesus a primintí ku “tur ku ta den graf . . . lo sali.” (Juan 5:28, 29) Esnan ku resusitá lo haña oportunidat di biba den paradeis riba tera, manera tabata Dios su propósito for di kuminsamentu. (Lukas 23:43) Tambe Dios ta primintí ku, e tempu ei, hende ku obedes’é lo tin salú perfekto i bida eterno. Beibel ta bisa: “E hustunan lo heredá e tera, i lo biba den dje pa semper.”—Salmo 37:29.

Mira tambe Jòb 14:14 i 15; Lukas 7:11-17 i Echonan 24:15.

DIKON HENDE SA PUNTRA NAN MES ESAKI: Hende di kasi tur religion ta resa. Pero, hopi di nan ta sinti ku nan no ta haña kontesta pa nan orashonnan.

LOKE BEIBEL TA SIÑA: Hesus a siña nos pa no ripití kos for di kabes ora nos ta resa. El a bisa: “Ora bo ta hasi orashon, no keda ripití palabranan bano.” (Mateo 6:7) Si nos ke pa Dios skucha nos orashonnan, nos mester resa na e manera ku é ta aprobá. I pa hasi esei, nos tin ku siña kiko ta Dios su boluntat pa ora nos hasi orashon nos por pidi kosnan ku ta kuadra ku su boluntat. Promé Juan 5:14 ta splika ku “si nos pidi kualke kos konforme [Dios] su boluntat, e ta tende nos.”

Mira tambe Salmo 65:2; Juan 14:6, 14 i 1 Juan 3:22.

DIKON HENDE SA PUNTRA NAN MES ESAKI: Hopi hende ta pensa ku plaka, fama òf bunitesa por hasi nan felis. P’esei, nan ta kore tras di e tipo di kosnan ei, ma ta deskubrí ku tòg nan no ta haña e felisidat ku nan ta buska.

LOKE BEIBEL TA SIÑA: Hesus a mustra kiko ta e klave pa haña felisidat ora el a bisa: “Felis esnan ku ta rekonosé ku nan tin mester di Dios.” (Mateo 5:3, BPK ) Nos por haña berdadero felisidat solamente si nos dal paso pa satisfasé nos nesesidat di mas grandi, esta, nos hamber pa bèrdatnan spiritual tokante Dios i e propósito ku e tin pa nos. Ta den Beibel nos ta haña e bèrdatnan ei. Nan por yuda nos mira kiko ta berdaderamente importante, i kiko nò. Si nos permití e bèrdat di Beibel guia nos desishonnan i nos akshonnan, nos bida lo tin mas sentido.—Lukas 11:28.

Mira tambe Proverbionan 3:5, 6 i 13-18 i 1 Timoteo 6:9, 10.

 Loke nos a kaba di haña aki ta djis un idea breve di e manera ku Beibel ta kontestá apénas seis pregunta. Lo bo ke sa mas? Si bo ta un di e hendenan ku ta ‘rekonosé ku e tin mester di Dios,’ sin duda bo kontesta lo ta sí. Kisas tin mas pregunta ku bo ke haña kontesta p’e, por ehèmpel: ‘Si Dios ta interesá den nos, pakiko el a permití asina tantu maldat i sufrimentu tuma lugá durante henter historia? Kon mi por mehorá mi bida di famia?’ Pa e preguntanan aki i hopi otro mas, Beibel ta duna kontesta ku ta laga bo satisfecho.

Sin embargo, awendia hopi hende ta vasilá pa habri Beibel. Den nan bista e ta un buki diki i tin biaha difísil pa komprondé. Abo lo ke yudansa pa haña sa e kontestanan ku Beibel ta duna? Testigunan di Yehova ta ofresé dos kos ku por yuda bo.

Esun promé ta e buki Kiko Beibel Ta Siña Realmente? E ta skirbí pa yuda hende okupá studia e kontestanan kla ku Beibel ta duna riba diferente pregunta krusial. E di dos ta un kurso di Beibel grátis na kas. Un Testigu di Yehova den bo bisindario, kapasitá pa duna lès di Beibel, por bin bo kas òf kualke otro lugá kumbiniente i dediká un tiki tempu tur siman pa trata temanan di Beibel ku bo, kompletamente grátis. Miónes di hende rònt mundu ta benefisiá di un kurso asina. Hopi di nan a yega na e konklushon emoshonante aki: “Mi a haña e bèrdat!”

Esei ta e tesoro di mas grandi ku bo por haña. E bèrdat di Beibel ta libra nos for di superstishon, konfushon i miedu. E ta duna nos speransa, propósito den bida i alegria. Hesus a bisa: “Boso lo konosé e bèrdat i e bèrdat lo hasi boso liber.”—Juan 8:32.