Beibel no ta un buki médiko. Pero e tin konseho ku por yuda un persona ku ta lucha ku problema di salú mental. Wak algun ehèmpel.

“Hende bon di salú no tin mester di dòkter, ma hende malu sí.”—MATEO 9:12.

Beibel ta rekonosé ku kisas nos mester buska tratamentu médiko. Hopi hende a haña alivio ora nan a buska informashon tokante nan problema di salú mental for di fuente konfiabel i ora nan a haña yudansa for di dòkter.

“Entrenamentu físiko ta yuda.”—1 TIMOTEO 4:8.

Ora nos hasi kos pa mehorá nos salú físiko, esei por mehorá nos salú mental tambe. Esei ta inkluí hasi ehersisio regularmente, sigui un dieta saludabel i drumi sufisiente.

“Alegria ta un bon remedi; ferdrit ta kaba ku hende.”—PROVERBIONAN 17:22.

Ora nos lesa relato animante di Beibel i pone meta ku nos por logra, esei por yuda nos sinti nos felis. Un punto di bista positivo di futuro por yuda bo trata ku bo emoshonnan segun ku bo ta lucha ku problema di salú mental.

 “Sabiduria ta kompañero di un persona modesto.”—PROVERBIONAN 11:2.

Kisas bo ta ripará ku bo no por hasi tur loke bo ke riba bo mes, pues sea dispuesto pa aseptá yudansa di otro hende. Muy probablemente bo famia- i amigunan ke yuda bo. Pero kisas nan no sa kon pa yuda bo. Laga nan sa kiko nan por hasi pa yuda bo. Sea realístiko den loke bo ta ferwagt di nan i mustra apresio pa kualke yudansa ku nan duna bo.

“Mi a sinti ku algu no tabata bon ku mi, pues mi a bai dòkter. El a logra diagnostiká mi. Esei a yuda mi komprondé e situashon ku mi tabata aden i ki tratamentu médiko tabatin disponibel pa yuda mi.”—Nicole, a kende ta sufri di trastorno bipolar.

“Mi a ripará ku ora mi lesa Beibel regularmente ku mi esposa, esei ta yuda mi kuminsá kada dia ku pensamentu positivo i animante. Hopi bes, riba dia ku mi ta lucha ku mi emoshonnan, mi ta haña un versíkulo spesífiko ku ta animá mi.”—Peter, kende ta sufri di depreshon.

“Tabata difísil pa mi konta otro hende tokante mi malesa, pasobra mi tabatin bèrgwensa. Pero un bon amiga di mi a skucha mi, i el a hasi tur su esfuerso pa komprondé kon mi tabata sinti. El a ègt yuda mi sinti mihó, i el a laga mi komprondé ku mi no ta mi so.”—Ji-yoo, kende ta lucha ku problema di komementu (eating disorder).

“Beibel a yuda mi ta balansá i rasonabel ora ta trata di trabou i deskanso. Su sabiduria a yuda mi trata ku e lucha konstante ku mi tin ku mi emoshonnan.”—Timothy, kende ta sufri di trastorno di komportashon opsesivo i kompulsivo (obsessive-compulsive disorder).