Ak mlechell er a 1948 er a kekerei el beluu el ngar er a dimesngebard er a Nigeria. Ngar tiakid el taem e a angko er ngak er a Moustapha el ochellel a demak me a kot el klou el obekuk er a Wahabi a miltecholb el ta er a Resioning er a Jehovah. Sera le etiu a rekik e ngmlad a demak. Ngmera el miltemall a renguk. A Wahabi a dilu er ngak el kmo aki lmuut el mo mesa demmam er a temel okiis. Tia milengelaod er ngak e rirellak el mo omuchel el mesuub a Biblia. Ak miltecholb er a 1963. A reteru el obekuk me a ochellek a dirrek el miltecholb.

A 1965 ak mlora Lagos el mo obengkel a obekuk er a Wilson, e mera el mle dmeu a renguk lobengterir a re regular pioneer er a ongdibel er a Igbobi. A deurreng me a blakerreng er tir a uldbechak el mo soak el mo pioneer me ak mlo teloi er tir er a January 1968.

A Albert Olugbebi el odam el mesiou er a Bethel a kiltmeklii a ileakl el miting lobengterir a rengeasek el mesaod er a klungel a usbechel a re special pioneer er a beluu er a diluches er a Nigeria. Ak dirk remember er a lolekoi a Brother Olugbebi el kmo: “Kom dirk mekekerei el chad, ngsebechiu lousbech a temiu me a klisichel a bedengiu el kirel a Jehovah. Ngkmal dirk klou a ureor el medechel  el kiriu!” Ngkmal mle soak loukerebai er a reng er a profet Isaia me ak mle submit er a application er ngak.—Isa. 6:8.

A May 1968 e te mle assign er ngak el mo special pioneer er a Kano, el ngar er a diluches er a beluu er a Nigeria. Tia mle temel a Biafran War (1967-1970), el ngii a mle uchul a klou el klaudechelakl me ngkmal mle klou a ringel me a koadelchad er a diluches er a Nigeria e mirrael el mora ongos er a Nigeria. A odam el kmal millatk er ngak a millasem el meruul er ngak me lak bong. Engdi ak dilu er ngii el kmo: “Ke kmal mesulang el melatk er ngak. Engdi kmal ulterekokl a renguk el kmo a lsekum a Jehovah a soal tia el assignment el kirek, e ak medengei el kmo ngmo obengkek.”

Ngkmal mekngit a rengud er a tekoi el dilubech er a Kano. Ngkmal mle klou a klaumekemad er a delongelir a rechad er a beluu. Sel ki moldingel e a lebebil e aki omes a bedengir a rechad el mlad er a klaumekemad. E alta ngmla er ngii a bebil er a ongdibel er a Kano, a oumesingd er a rudam a chiliis. E te mle bekord el 15 er a rudam me a rudos a di mle kiei e kmal mle medakt e mechitechut a rengrir. Ngkmal mlo dmeu a rengrir er aki bong el telolem el special pioneer. Te kilengei omelisiich el ki mulmesterir. Aki ngilsuterir el lmuut el mo meruul a miting e omerk er a klumech, e oldurokl a temir el mora branch e order a babier.

Me kemam el special pioneer a ulemuchel el mesuub a tekoi er a Hausa. A rebetok a mlo kongei el orrenges er a klumech er a Renged er a ki momerk lousbech a tekingir. Me nguaisei, a rechedal a klechelid er a rechad er a Kano a dimlak el sorir aki momerk me ngmle kiram el mo kerekikl. A ta el taem e ngak me a partner er ngak a mlodekedek er a chad loba oles. Engdi aki mle bekerurt er ngii me ngmle sebecham el chemiis. Alta ngmla er ngii a kengaol el blekeradel engdi a Jehovah a uchul me aki mle “selebechakl” me a re publisher a mirrael el mo betok. (Psa. 4:8) Chelecha el taem e te betok er a 500 a re publisher er a Kano el mesiou el ngar er a 11 el ongdibel.

Aki mlara Kano el sesei el buil e te odureklak er a August 1968, ngak me a relmuut el teru er a special  pioneer el mora Niamey, el capital er a Republic of Niger. Aki miltik el kmo a Niger el ngar er a West Africa a ta er a kot el mekeald el beluu er a beluulechad. Ngmle kiram loutekangel er a kleald e dirrek el mesuub a tekoi er a French el tekingir a rechad er tia el beluu. Alta ngmle meringel engdi aki uluumerang el ulsirs er a Jehovah e ulemuchel lomerk er a klumech er a capital lobengterir a remekesai el publisher el kiliei er ngii. Ngdi mle kedeb el taem e a rokui el chad er a Niamey el sebechir el menguiu a ngiluu a copy er a A Klemerang el Choitikikid el Mora Klengar, el sel book el dousbech er ngii el mesuub lobengterir a rechad. Mo lmuut er a rechad me te mle osiik er kemam el sorir a copy er ngii!

Ngdi mle telkib e aki mlo mtebengii el kmo a rullab a klisiich er a beluu a dimlak el sorir a Resioning er a Jehovah. Aki mlo kldibel el meruul er sel kot el assembly el mo er ngii er tia el beluu er a July 1969, lobengterir a rebekord el 20 el chad. Aki kmal lulemes el beduluchei el mora techolb el kirir a reteru el odam. Engdi sel kot el sils er a assembly a rebulis a mlei el stob er a prokuram. Te ngilikemam el special pioneer me a circuit overseer el mora blil a bulis. Te uleker er kemam a betok el ker e dilu el kmo ngkiram el lmuut el mong er a klukuk. Aki mlo mtebengii el kmo a rebulis a locha mo omuchel a mondai me aki kiltmeklii el mo oltobed er a cheldecheduch er a techolb er a blil a chad e mertemam e tochelbeterir a remo metecholb.

Sesei el sandei er uriul e a kabelment a dilu er ngak me tirke el teim el dirrek el special pioneer me ki mtobed er a Niger. Te milskemam a 48 el hours el tuobed er tia el beluu, e mle kirel el di kemam losiik a rolam el merael. Aki ullengesenges e mlora branch office er a Nigeria, e ngilai a beches el assignment er kemam.

Te mle assign er ngak el mora Orisunbare, el kekerei el beluu el ngar er a Nigeria. Ngkmal mle dmeu a renguk el omerk er a klumech e mesuub a Biblia el teloi er a kekerei el group er a publisher el kiliei er ngii. Engdi uriul er a elolem el buil e a branch office ullengit er ngak me kluut el mora Niger el di ngak el tang. A uchelel ngkmal mlo mechas a renguk e kora bekikl engdi ngmlo dmeu a renguk el lmuut el mo omes er a rudam el ngar er a Niger!

Ak liluut el mora Niamey. Sel sils er uriul er a kbong e a chad er a Nigeria el chad er a siobai a miltebengii el kmo ngak a Sioning me nguleker er ngak a betok el ker el kirel a Biblia. Ak milsuub el lobengkel. Uriul er a lestob el meloko e bo lak el imis el melim a rrom, e ngmiltecholb. Ngkmal mle dmeu a renguk el omerk er a klumech lobengterir a rudam me a rudos el ngar er a kakerous el beluu er a Niger e mesterir a rechad el kongei er a klemerang er aika el mereko el rak. Sera kkot el kbong e te di mle 31 a Resioning er ngii el beluu, engdi sera kurael e te mle 69 a Resioning.

Ngar er a mo ulebongel er a rak er a 1977 e a kliluut el mora Nigeria el mo melai a training. Ngar er  a ulebengelel tia el edei el sandei el omelai el training e a Malcolm Vigo el coordinator er a Branch Committee a dilu er ngak me kchiuii a letter el mlara branch er a Sierra Leone. Rudam ulsiik er a kekerei el chad el mesobil e mesisiich a bedengel, e millekoi a tekoi er a Merikel me a French el sebechel mo circuit overseer er a Guinea. A Brother Vigo a dilu er ngak el kmo te train er ngak el kirel tia el ngerachel. Ngdilu el kmo tia kmal diak el beot el assignment. Ngmle advise er ngak el kmo, “Momdasu er ngii er a uchei er a omkengei.” Ak di mle mereched el kmo, “Jehovah oldurech er ngak, me ak mong.”

Ak silebek el mora Sierra Leone e mle meet er a rudam er a branch office. A ta er a chedal a Branch Committee a dilu er ngak el kmo, “Ngdiak ki modengei el kmo te uangerang a rudam me a rudos er a Guinea.” Alta rudam uluungerachel er a ureor er a berkel a klumech er a Guinea, engdi ngdimlak el sebechir el mengedecheduch el mo er tir e le ngmla er ngii a ultok er a chelsel a kabelment. E alta te mla melasem el oldurokl er a rechad el mong engdi ngdiak el sebechir a rudam el soiseb. Me te ullengit er ngak el mora Conakry el capital er a Guinea el mo melai er a kengei er a kabelment me lsebechek el kiei er a beluu.

Sera kbora Conakry e ak mlora embassy er a Nigeira el mo omes er a ambassador. Ak kuluuchais er ngii er a urungulek el mo omerk er a Guinea. Ngmilengelechel er ngak me lak bo kkiei er tia el beluu le te mo el kulebsengak me a lechub e te tomellak. Ngdilu el kmo, “Mluut el mora Nigeria e momerk er sei.” Me ak dilu er ngii el kmo, “Ak mo osiik a rolel e kiei.” Me nglilechesii a babier el mora Minister of the Interior er a Guinea lolengit er ngii me lengesukak, me a minister a ngilsukak.

Kedeb el taem er uriul e ak liluut el mora branch office er a Sierra Leone el mo ouchais er tir er a decision er a minister. A rudam a kmal mle dmeu a rengrir er a bo lodengei el kmo a Jehovah ulemekngeltengat er a omerollek. A kabelment a kilengei er ngak me ak kiei er a Guinea.

Me a 1978 el mora 1989, e ak milsiou loldingel ongdibel er a Guinea me a Sierra Leone, e substitute circuit overseer er a Liberia. A uchelel e ak mle blechoel el mo smecher. A lebebil e ak mlo smecher er aike el cheroid er a chelsel a beluu. Engdi rudam a millasem er a tkurrebab el sebechir el ngoikak el mora osbitar.

A ta el taem e ak kmal mlo smecher er a malaria e mla er ngii a lot er a delek. Sera bo kungil e ak mlo medengei el kmo a rudam er ak secher e te milsaod el kmo ak mo medakl er ker. Me alta ak mlo chobangel a blekeradel el mle sebechel mo uchul a klengar er ngak engdi ngdimlak a ta el kumdasu a mengoit a assignment er ngak. E kmal dirk ulterekokl a renguk el kmo a mera el osebechakl el ngii a diak a ulebengelel a ngar er a Dios el mei, el ngike el sebechel lolekiis er kid er a kodall.

A 1988 e ak mle meet er a Dorcas, el ngariou a rengul el odos el pioneer e kmal betik a rengul er a Jehovah. Aki mlo bechiil me ngmle teloi er ngak er a assignment er ngak el loldingel ongdibel. A Dorcas a kmal mle meringel loureor lobengkek e kilengei el mengoit a betok el tekoi el kirel a Jehovah.  Aki dilak el merael el 15 el mael el cheltekill a telechellam el loldingel ongdibel. Aike el kmal cheroid el ongdibel e aki ulsiik a ngii di el olidiuul el sebecham el metik el soro el merael a rael el kmal meklou a delluchel er ngii.

A Dorcas a kmal bekeu a rengul. El ua tiang, a lebebil e ngkiram el merael a omoachel el betok a ius er ngii. A ta el taem e ngmle kiram el ngar omerael el eim el klebesei, e mlo kiram el mo imuul er a omoachel el ngar er a bos le ngtelemall a did el rruul er a kerrekar. A Dorcas a mlo dechor el leko ngmo metengel er a bos, e bai rirebet er a omoachel. Aki di diul el metitur el mengikai me a omoachel a mle mui er a ius. Ngungil a rengmam e le te mla er ngii a remekekerei el chad el silechesokl e osebelii. Ngmle mekngit a berrusam el kirel tiang el kemanget el taem engdi aki di millemolem er a ngerechelam.

Uchelel a rak er a 1992 e aki silubii el kmo a Dorcas a dioll. Tiang ngmo ulebengelel a klengar er kemam el ngar er a mui el taem el omesiou? Aki mlo melatk, “A Jehovah mla meskid a sengk!” Me aki milengeklii a ngelekam el redil el Jahgift. Eua el rak er uriul e ngmlo er ngii a ochedal er a Eric. Tirka el teru el ngelekam a mera el sengk el mlara Jehovah. A Jahgift a milsiou el telkib el taem er a blil oliuid el ngar er a Conakry, e a Eric a ministerial servant.

Alta Dorcas a mlo kirel el stob el special pioneer, engdi ngmillemolem el regular pioneer el mo lmuut er aki momekeroul er a rengelekam. Ngoeak a ngelsuil a Jehovah e ak millemolem el ngar er a ileakl el mui el taem el omesiou. Sera bo lemeklou a rengelekam e a Dorcas a mlo sebechel el lmuut el mo special pioneer. Chelecha e aki missionari er a Conakry.

Ngak a mla mora ike el rokui el lengilikak a Jehovah el mo er ngii. Ngak me a bechik a blechoel lomelechesiu er a klengeltengat me a osebechakl er ngii. Klaumerang er kemam er a Jehovah a uchul me ngdimlak ki bo mchebangel a mondai el lechebangel tirke el ulsirs a klalo er tia el beluulechad. Ngak me a Dorcas a mla suubii er a experience er kemam el kmo ngike el Uchul a mera el osebechakl a Jehovah el “Dios el osebelam.” (1 Kr. 16:35) Ngulterekokl a renguk el kmo a klengar er tirke el rokui el oumerang el ulsirs er a Jehovah, “a RUBAK el Dios . . . mo [osebelterir], el ua chad el klekar er a mekreos el klalo.”—1 Sa. 25:29.