Wan doa waut schlemmet passieet, dan see wie fuaz doano, woo wie onse Breeda halpen kjennen, wiels wie feelen ons en Leew met dee vebungen (Johanes 13:34-35; 1. Johanes 3:17-18). Woo halp wie dee?

Wie jäwen Jelt. Aus daut en de Aposteltiet en Judäa eene groote Hungaschnoot jeef, jeewen de Christen von Antiochia äare Gloowesbreeda Gowen (Aposteljeschicht 11:27-30). Biejlikj soo doo wie daut vondoag dän Dach uk, wan onse Breeda opp veschiedne Städen en Noot sent. Om dee to halpen, woat waut von de Gowen jebrukt, waut wie em Vesaumlungshus enlajen (2. Korinta 8:13-15).

Wie doonen waut fa dee. Wan doa waut grootet jeworden es, seenen de Eltestasch doano, woo daut met jieda eenem von de Vesaumlunk steit. Veleicht woat doa uk een Kommitee aunjestalt, waut fa aulet needje sorcht, biejlikj fa Wota, Äten, Kjleeda, Doktarie ooda een Dak äwarem Kopp. Wan doa Hiesa ooda Vesaumlungshiesa Schoden jekjräajen haben ooda sest Help fält, reisen Breeda un Sestren, waut sikj met soont weeten, doa han, om to halpen. Dee betolen äare Reis selfst. Wie aus Jehova siene Zeijen haben Eenichkjeit mank ons un sent daut jewant, tooptoschaufen. Doawäajen kjenn wie fuaz halpen, wan doa waut schlemmet passieet. Daut ieeschte sent wie doarom todoonen, dee to halpen, “dee met ons toop em Gloowen stonen.” Oba wan wie kjennen, dan halp wie uk aundre, endoont waut fa eenen Gloowen dee haben (Galata 6:10).

Wie doonen aundre treesten un met de Schreft Moot toospräakjen. Waut de Menschen daut mieeschte brucken, wan doa waut schlemmet jeworden es, es Troost. Jehova, de “Gott, dee onen Enj treesten deit”, jeft ons de Krauft, aundre bietostonen (2. Korinta 1:3-4). Soo kjenn wie dee, waut truarich sent, wiesen, waut Gott vesproaken haft, biejlikj daut sien Kjennichrikj boolt met aul daut Lieden un Weedoag woat een Enj moaken (Openboarunk 21:4).

• Wuahäa kjenn wie fuaz halpen, wan doa waut schlemmet passieet es?

• Woo kjenn wie dee treesten, waut doa schlemmet beläft haben?