TEEMA VON DE TIETSCHREFT
Woo du diene Tiet goot utnutzen kaust
Woo foaken hast du daut aul jesajcht: “Wan ekj bloos mea Tiet haud!”? Daut jeit aule Menschen soo. Kjeen Mensch haft mea Tiet aus de aundra. Daut es endoont aus wie väl Macht haben un rikj sent ooda läach aunjeseenen un oam. Kjeena kaun de Tiet oppsaumlen, nich de Oame uk nich de Rikje. Wan de Tiet wajch es, dan es dee fa emma wajch. Soo daut es weis, wan wie onse Tiet goot utnutzen. Woo kjenn wie daut doonen? Well wie mol veatlei seenen, waut väl Menschen sea jeholpen haft, äare Tiet goot to brucken.
1. Hab eenen gooden Plon
Doo daut wichtichste daut ieeschte. De Schreft rot ons too, daut wie sellen “fauststalen lieren, waut daut aulabaste es” (Filippa 1:10, PB). Moak die eene List von Sachen, waut doa wichtich un drinjent sent. Hool em Denkj: Daut, waut opp diene List wichtich es, biejlikj Äten kjeepen fa zeowes, es veleicht nich drinjent. Un daut, waut opp diene List drinjent es, biejlikj dien bastet Program em Tellewizhen to kjikjen, daut es veleicht goanich soo wichtich. *
Plon em verut. Liera 10:10 (PB) sajcht: “Wan eene Akjs stomp woat un nich jeschoapt woat, mott eena mea Krauft brucken; oba Weisheit halpt eenem de Oabeit foadich to moaken”. Waut lia wie doavon? Wan wie onse Tiet daut baste brucken wellen, dan mott wie onse Akjs em verut schoapen. Daut bediet, daut wie onse Tiet em verut plonen, om dee daut baste uttonutzen. Wan doa Sachen sent, waut nich soo wichtich sent, brukst du dee veleicht verheipts nich doonen ooda du kaust dee oppschuwen. Wan du ieescht aule wichtje Sachen von diene List jedonen hast, dan kaust du veleicht noch waut doonen, waut du fa lota jeplont hautst. Krakjt soo aus een Mensch, waut siene Akjs em verut schoapt, soo woascht du mea jedonen kjrieen, wan du em verut plonst.
Moak dien Läwen eefacha. Du motst daut lieren, Sachen auftosajen, waut nich wichtich sent ooda een deel Tiet vesiemen. Wan du die too väl fa eenen Dach väanemst, dan kaust du äwafoddat un mootloos woaren.
2. Doo nich diene Tiet vesiemen
Oppschuwen un sikj nich eenich sennen. “Wäa too sea nom Wada oppaust, woat nich toom seien komen; un wäa bloos no de Wolkjen kjikjt, woat nich siene Arnt nenbrinjen” (Liera 11:4, PB). Waut lia wie doavon? Wan wie de Sachen emma oppschuwen, dan doo wie de Tiet vesiemen un kjrieen weinja jedonen. Wan een Foarma wacht, bat aules krakjt soo es, aus hee sikj daut wenscht, dan woat dee woomäajlich kjeenmol siene Sot utstreien un uk nich arnten. Soo es daut uk bie ons. Wan wie wachten, bat aules krakjt soo es aus wie ons daut wenschen, dan woa wie nuscht jedonen kjrieen. Ooda wie denkjen veleicht, daut wie motten rein aules äwa eene Sach weeten, ea wie eene Entscheidunk moaken. Secha es daut wichtich, daut wie ons daut krakjt unjastonen, ea wie eene wichtje Entscheidunk moaken. Wäajen Spricha 14:15 (PB) sajcht: “Een vestendja Maun bedenkjt sikj siene Wäaj”. Oba eenjemol mott wie eene Entscheidunk moaken, wan wie uk nich aules doaräwa weeten, waut wie wudden jleichen (Liera 11:6).
Nich too neiw sennen. Jakobus 3:17 (PB) sajcht: “De Weisheit von bowen [ooda von Gott] es … jelind”. Daut meent, dee es nich too strenj. Secha es daut fein, wan wie de Sachen wellen goot doonen. Oba eenjemol es daut nich mäajlich de Sachen soo to doonen, aus wie wudden wellen. Un doaderch kjenn wie dan mootloos woaren. Biejlikj een Mensch, waut well eene fresche Sproak lieren, mott sikj doafäa enstalen, daut hee woat Fäla moaken. Oba wan hee Angst haft, Fäla to moaken un sikj doawäajen nich woacht, waut to sajen, woat dee nich wiedakomen. Doawäajen es daut bäta, wan wie nich too strenj ooda too neiw met ons selfst sent! Spricha 11:2 (PB) sajcht: “Met Deemoot kjemt uk Weisheit”. Soone Menschen, waut uk deemootich sent, dee sorjen sikj nich too sea äwa sikj selfst un kjennen äwa äare Fäla lachen.
“Eena betolt de Sachen nich werkjlich met Jelt. Eena betolt dee met Tiet.” (What to Do Between Birth and Death)
3. Nemm die nich soo väl väa, waut du nich nokomen kaust
Oabeit un Tietvedrief. “Daut es bäta, wan eena eene Hauntvoll haft, un sikj utreiwen kaun, aus wan eena twee Henj voll haft, un sikj kjwält, un vesieekjt dän Wint to jriepen” (Liera 4:6, PB). Menschen, waut too sea schaufen, kjennen foaken nich Freid aun daut haben, waut see sikj toopjeschauft haben. Dee fält dan eefach de Tiet un de Krauft. Oba von de aundre Sied: De fule Menschen wellen bloos vereiwen un vesiemen doaderch uk wichtje Tiet. De Schreft rot ons too, eenen Meddelsträakj to haben. Wie sellen flietich schaufen un uk Freid doaraun haben, waut wie ons toopjeschauft haben. Wäajen soone Freid es daut, “waut Gott ons jeft” (Liera 5:18, PB).
Jenuach Schlop. Een Bibelschriewa schreef: “Ekj woa mie dol lajen un em Fräd schlopen” (Psalm 4:9, PB). De mieeschte utjewosne Menschen brucken acht Stund Schlop de Nacht, om daut dee sikj fein vereiwen kjennen. Wan wie jenuach Schlop haben, dan bruck wie onse Tiet goot, wiels daut halpt ons äwajens dan, bäta bie de Sach to bliewen un bäta denkjen to kjennen un niee Sachen to lieren. Wan wie nich jenuach schlopen, dan es daut schwanda, niee Sachen to lieren, wie kjennen leichta een Ojjlekj haben ooda Fäla moaken, un wie woaren uk leichta vedrislich.
Sträw nich no soont, waut du aulmols nich haben kaust. “Daut waut du ver diene Uagen hast, stalt dolla tofräd, aus waut du die wenschst” (Liera 6:9, PB). Waut lia wie doavon? Een weisa Mensch es en sien Läwen nich bloos no daut hinjaraun, waut dee sikj wenscht, besonda wan daut soont es, waut dee rajcht jesajcht nich haben kaun ooda waut ommäajlich es to kjrieen. Doawäajen lat dee sikj nich aunschmäaren von soone Aunjebots, waut sikj bloos scheen hieren ooda daut eena sikj kaun leicht Jelt lieen. Enne Städ daut es dee tofräd met daut, waut dee ver de Uagen haft, daut meent, met daut, waut dee werkjlich haben kaun.
4. Hool die aun daut, waut rajcht es
Äwalaj, waut du fa rajcht talst. Denkj doaräwa no, waut fa die daut wichtichste sennen saul. Wan de rajchte Sachen fa die daut wichtichste sent, woat die daut halpen, goode Entscheidungen to moaken un diene Tiet daut baste to brucken. Waut kaun die halpen to entscheiden, waut werkjlich wichtich es? Väl Menschen haben jeseenen, daut de Schreft dän basten Rot haft (Spricha 2:6-7).
Doo aules ut Leew. Kolossa 3:14 (PB) sajcht, Leew wiesen halpt, “daut aules to eene volkomne Eenichkjeit vebungen woat”. Onen Leew, kjenn wie nich werkjlich schaftich sennen un ons nich secha feelen un daut talt besonda enne Famielje. De Menschen, bie dee daut Jelt un de Oabeit daut wichtichste es, woaren nich schaftich sennen em Läwen. Doawäajen wiest de Schreft, daut de Leew daut wichtichste es un dee rät doa hundade Mol von (1. Korinta 13:1-3; 1. Johanes 4:8).
Nemm die Tiet toom Gott kjanen lieren. Een Maun, waut Geoff heet, haud eene feine Fru, twee schaftje Kjinja, goode Frind un eene goode Oabeit aus Dokta. Oba bie siene Oabeit sach hee foaken Menschen lieden un stoawen. Hee docht soo: “Es dit, woo daut Läwen sull sennen?” Un dan eenen Dach läsd hee biblische Bieekja von Jehova siene Zeijen un funk doa Sachen, waut sienen Twiewel oppem kloaren brocht.
Dan räd Geoff uk met siene Fru un siene Kjinja äwa daut, waut hee lieed un dee intressieed daut uk. Dee fungen aula aun, de Schreft to studieren un doaderch hauden see een scheenret Läwen un an holp daut, äare Tiet bäta to brucken. Un daut see de Schreft studieeden jeef an uk eene scheene Hopninj, daut see wudden kjennen eewich läwen, en eene Welt, wua daut nich mea schlajchtet un Lieden jäwen woat (Openboarunk 21:3-4).
Daut, waut Geoff beläwd, halpt ons aun Jesus siene Wieed denkjen, aus hee säd: “Jlekjlich sent dee, dee sikj doaräwa em kloaren sent, daut an daut jeistelje fält” (Matäus 5:3, NW). Wurscht du die uk wellen Tiet nämen toom Gott bäta kjanen lieren? Daut wudd secha de basta Wajch sennen, woo du diene Tiet brucken kust.
^ Varsch 5 See dän Artikjel en daut Erwachet! von Aprell 2010 “20 Tipps, Zeit zu sparen”.
