Vetal ons mol von diene Kjintheit.

Ekj wort en Italien aune 1943 jebuaren. Ekj un miene Breeda un Sestren wossen en een natet Darp opp, un mien Voda wia een Foarma un een Descha. Onse Elren lieeden ons, daut wie sullen feine Katoolsche sennen.

Woosoo wortst du een Priesta?

Aus ekj nat wia, jleicht ekj daut emma, de Priestasch en de Kjoakj tootohorchen. Ekj jleicht daut uk, woo dee räden un aule Sitten, waut et doa jeef. Doawäajen wull ekj uk een Priesta woaren. Aus ekj dan 13 Joa wia, schekjt miene Mame mie no eene School, wua ekj kunn wieda utjelieet woaren toom Priesta sennen.

Wia doa de Bibel studieren met en, aus du die utlieezhd?

Rajcht jesajcht nich. Aus ekj 15 Joa wia, jeef eena von miene Schoollierasch mie een Buak, wua de vea Evangelien bennen sent von Jesus sien Läwen un sienen Deenst. Daut Buak hab ekj mieremol derchjeläst. Aus ekj dan 18 Joa wia, wankt ekj no de Staut Room un studieed doa en de Uniwersität, wua de Popst äwa aunjestalt wia. Ekj studieed Latiensch, Griechisch, ekj studieed uk de Menschheits-Jeschicht, ekj studieed äwa Menschen-Iedeeen, ekj studieed äwa daut Vestaunt un uk äwa Gott. Wan doa uk Bibelvarzhen jebrukt worden un aum Sindach enne Kjoakj de Bibel väajeläst wort, deed wie oba nich werkjlich de Schreft studieren.

Du wortst de Väaschta von eene School. Must du dan uk aundre lieren?

Miene Oabeit wia mieeschtens bloos plonen. Oba bie eenje Klaussen deed ekj noch aundre lieren.

Wuarom fungst du aun, äwa de Kjoakj to twiewlen?

Dreeatlei wia mie von dee Kjoakj em Wäaj. De Menschen von dee Kjoakj menjden sikj mank de Politikj. Doa wia uk soon schlajchtet Vehoolen mank de Gloowesleidasch un dee, waut no de Kjoakj kjeemen. Un mie späad sikj uk soo, eenje Lieren von de katoolsche Kjoakj wieren nich rajcht. Ekj docht soo: Woo kunn een Gott, waut Leew es, Menschen nom Doot emma kjwälen. Un dan noch, woo wudd Gott wellen haben, daut wie de Jebäda emma un emma wada sullen äwasajen. *

Waut deetst du dan?

Met Tronen enne Uagen bäd ekj Gott om Help. Ekj koft mie uk eene katoolsche Bibel. Daut wia de Jerusalem Bible, waut korz opp Italieenisch rutjekomen wia, un dee läsd ekj dan. Een Sindach zemorjes, aus ekj jroz miene Kjoakjenkjleeda wajchjelajcht haud, wieren doa twee Mana bie de School. Dee säden, daut see Jehova siene Zeijen wieren. Wie räden dan lenja aus eene Stund von de Schreft un waut de Schreft sajcht, aun waut de woara Gloowen saul to kjanen sennen.

Waut hilst du von dee Vetal met de Mana?

Ekj wia sea vewundat, woo secha dee sikj wieren un woo leicht dee de Bibelvarzhen fungen en de katoolsche Bibel. Lota kjeem een aundra von Jehova siene Zeijen emma no mie; dee heet Mario. Hee wia sea jeduldich un hee neem daut sea iernst. Hee wia jieda Sinowent zemorjes doa aune Däa, aus daut räajend ooda aus doa Sonneschien wia.

Waut dochten de aundre Priestasch doaräwa, daut du studieezhd?

Ekj loot dee en, daut dee uk mol kunnen doa bie sennen, wan wie vetalden. Fa dee wia de Bibel studieren nich sea wichtich. Oba ekj jleicht daut emma, ekj lieed je soo väl goodet. Soo aus, wuarom Gott daut schlajchte toolat ooda daut Lieden. Daut wia mie ea werkjlich nienich kloa jewast, woo daut doamet stunt.

Proowden de aundre Kjoakjenleidasch die doavon auftohoolen, de Bibel to studieren?

Aune 1975 wia ekj en de Staut Room, wiels ekj daut wull utlajen, woo ekj docht. De Väaschte wullen mien denkjen proowen to endren, oba dee brukten nich mol de Bibel. Dan dän 9. Jaunewoa, 1976 schreef ekj no de Kjoakj en de Staut Room un säd, daut ekj nich mea wull katoolsch sennen. Twee Doag lota veleet ekj von de School, wua ekj wia, un fua met eenen Zuach met no mien ieeschtet Toopkomen von Jehova siene Zeijen. Daut wia een Kongress, wua veschiedne Vesaumlungen toop wieren. Daut wia doa aula soo gaunz aundasch, aus ekj daut jewant wia. Jieda eena von dee, waut doa wia, haud siene ieejne Bibel un kjikjt met, waut de Rädna doa derchjinkj.

Waut docht diene Famielje von aul dit?

De mieeschte wieren sea doll äwa mie. Oba dan wort ekj en, daut mien een Brooda uk met Jehova siene Zeijen toop de Bibel studieren deed. Dee wond en Lombardy. Daut es eene Jäajent en Nuad-Italien. Ekj reisd dan no dän un de Zeijen holpen mie doa, daut ekj eene Oabeit funk un uk eene Woninj. Lota, noch dautselwje Joa, leet ekj mie dan aus eent von Jehova siene Zeijen deepen.

Hast du irjentwaut beschot?

Nich mol veleicht! Entlich feel ekj mie Gott opp iernst no aun, wiels ekj weet: Daut, waut ekj lia, kjemt von de Schreft un nich von Menschen-Iedeeen ooda von Kjoakjen-Sitten. Un nu kaun ekj aundre lieren un sie mie secha, daut et de Woarheit es.