Waut Läsa weeten wellen

Daut es kloa, waut de Schreft äwa daut Bloot sajcht. Oba waut jleewen Jehova siene Zeijen äwa äa ieejnet Bloot enne Doktarie brucken?

Een Christ mott siene Entscheidungen äwa daut Bloot nich opp daut stetten, waut hee selfst wudd wellen uk nich opp daut, waut de Doktasch sajen, oba opp daut, waut de Schreft sajcht. Daut es eene Sach tweschen am un Jehova.

Jehova haft ons daut Läwen jejäft un hee sajcht, daut wie nich sellen Bloot äten (1. Mose 9:3-4). En daut Jesaz, waut Gott de Israeliten jeef, muak hee daut dietlich, waut met daut Bloot jedonen sull, wäajen daut daut Läwen väastalt. Hee säd: “Em Bloot es daut kjarpaliche Läwen, un ekj hab junt daut fa dän Aultoa jejäft, daut jie doamet veseent woaren.” Oba waut, wan een Mensch een Tia dootmuak toom äten? Dan säd Gott, daut dee daut Bloot sull “utranen loten un met Ieed unjaschoawen” (3. Mose 17:11, 13, PB). * Un dit säd Jehova emma wada (5. Mose 12:16, 24; 15:23). Een judischet Buak äwa daut Jesaz Moses sajcht: “Daut Bloot mott nich oppbewoat, daut saul oppe Ieed jegoten, om daut kjeena daut brucken kaun.” Kjeen Israelit sull daut Bloot von eenen Mensch ooda Tia nämen, oppbewoaren un brucken, wiels daut Läwen Gott jehieed.

Aus de Messias ieescht jestorwen wia, wia daut nich mea needich, sikj aun daut Jesaz Moses to hoolen. Oba fa Gott es daut Bloot noch emma heilich. Derch Gott sienen heiljen Jeist schreewen de Apostel aun de Christen, daut dee sullen von Bloot wajchbliewen. Dit Jeboot wia sea wichtich. Daut wia krakjt soo wichtich, aus von Huararie ooda Aufjettarie wajchbliewen (Aposteljeschicht 15:28-29; 21:25). Aus daut no dän Tweeden Weltkjrich Mood wort, Bloot to jäwen un entolakjen, kunnen Jehova siene Zeijen daut oba vestonen, daut dit jäajen Gott sien Wuat jinkj. *

Eenjemol sajcht een Dokta veleicht to wäm, daut dee sien Bloot saul een poa Wäakj ea jäwen, ea dee een Oppereeschen haft, om daut de Dokta daut bie daut Oppereeschen brucken kaun, wan daut fälen sull. Oba Bloot oppsaumlen, oppbewoaren un wada enlakjen, jeit jäajen daut Jesaz en 3. Mose un 5. Mose. Bloot saul nich oppbewoat, daut saul utjegoten, wiels daut bediet, Gott daut trigjtojäwen. Vondoag dän Dach bruck wie nich Moses sien Jesaz jehuarsom sennen. Oba doawäajen es daut fa Jehova siene Zeijen wichtich, woo Gott äwa daut Bloot denkjt, un dee sent sikj gaunz eenich, von Bloot wajchtobliewen. Doawäajen doo wie nich Bloot jäwen ooda ons ieejnet Bloot oppbewoaren toom lota enlakjen, wäajens soont es jäajen Gott sien Jesaz. Daut saul oppe Ieed jegoten woaren.

Daut jeft eenje Sachen, waut de Doktasch met Bloot doonen, wua daut en Gott sien Wuat nich von rät. Biejlikj loten een deel Christen daut, daut de Doktasch von an Bloottests moaken. Oba lota woat dit Bloot dan wajchjeschmäten. Oba daut jeft noch aundre Doktarieen, wua wie entscheiden motten, aus wie dee aunnämen wellen.

Biejlikj jeft daut waut, waut se hemodilution (enjlisch) ooda hemodilución (spaunisch) nanen: Bie een Oppereeschen, woat waut von dän Mensch sien Bloot veleicht en eene Maschien jeleit un to deeselwje Tiet kjricht dee waut flissendet enjelakjt toom sien Bloot denna moaken. Un dan woat daut Bloot, waut ieescht en de Maschien nenjepompt wort, wada trigj en dän Mensch nenjeleit. Daut jeft noch eene Doktarie, waut cell salvage (enjlisch) ooda recuperación de células (spaunisch) heet: Bie een Oppereeschen woat daut Bloot, waut een Mensch velist, en eene Maschien nenjeleit, reinjemoakt un wada trigj em Kjarpa jeleit. Un bie noch eene aundre Doktarie, woat daut Bloot von eenen Mensch derch eene Maschien jeleit, waut de Oabeit von daut Hoat, de Lungen ooda Nieren deit. Un dan woat daut Bloot von de Maschien wada trigj en dän Mensch jeleit. Daut jeft noch eene aundre Doktarie, wua se daut Bloot von dän Mensch en eene Maschien leiden, wua daut bosich jeschliesat woat un doaderch woat daut schlajchte ut daut Bloot von daut goode jedeelt. Un daut schlajchte kjemt dan wajch. Ooda daut Bloot woat jedeelt un eenje Poats von daut woat jebrukt toom sestwua aum Kjarpa unjaspretzen. Eenjemol deit de Dokta veleicht uk een beskje Bloot nämen un doa een bät waut mankrieren un dan deit dee daut wada trigj en dän Mensch nenn toom jewesse Tests moaken. Ooda de Dokta kaun uk Medizien doa mankrieren un daut wada trigj en dän Mensch nendoonen.

Daut jeft soo väl veschiedne Doktarieen un de Doktasch komen uk emma wada met waut nieet opp. Daut es nich onse Veauntwuatunk, aundre to sajen, waut dee bie jieda Loag doonen motten. Wan eenen Christ daut aun Doktarie fält, mott dee selfst entscheiden, waut vonne Doktarie dee aunnämen well un waut vonne nich. Eena mott de Doktasch froagen, waut dee aules krakjt bie eene jewesse Doktarie woaren doonen, ea eena sikj dee enjeit. Un dan mott eena no sien Jewessen no entscheiden, waut eena doonen well. (See dän Kausten.)

Christen motten doaraun denkjen, daut see haben Gott vesproaken, am to deenen un am met äa gaunzet Hoat, äare gaunze Seel, äare gaunze Krauft un aul äare Jedanken to leewen (Lukas 10:27). Fa Jehova siene Zeijen es daut sea wichtich, daut to doonen, waut Gott well haben, un met am Frind to bliewen. Ons Schepfa sajcht, daut wie sellen Gloowen haben aun Jesus sien Bloot, waut dee fa ons vegoten haft. En de Schreft sajcht daut: “Derch Jesus, dee sien Bloot fa ons jejäft haft, sent wie loosjekoft” (Efeesa 1:7, PB).

[Footnooten]

[Kausten/Bilt]

DENKJ MOL ÄWA DIT NO

Waut, wan se mien Bloot utem Kjarpa wudden rutleiden un daut dan veleicht fa eene jewesse Tiet stell stunt? Wudd mien Jewessen daut Bloot dan noch Poat von mienen Kjarpa talen? Ooda wudd ekj velangen, daut et dan aul sull “oppe Ieed [jegoten]”?

Waut, wan se mien ieejnet Bloot bie eene Doktarie wudden utem Kjarpa rutleiden, doa waut aun doonen un trigj nenpompen ooda daut fa waut aundret aum Kjarpa brucken toom doktren? Von daut, waut ekj ut de Schreft jelieet hab, wudd mien Jewessen daut baudren ooda wudd ekj daut aunnämen?