Fält ons fa aules een Jeboot ut de Schreft?

AUS du noch junk wieescht, haben diene Elren die veleicht een deel Räajlen oppjejäft. Un aus du ella wortst, wortst du en, daut see daut jedonen hauden, wäajen see die leewden un daut baste fa die wullen. Un wan du nu uk aul jrata best un nich mea brukst no diene Elren horchen, helst du die veleicht doawäajen noch aun daut, waut du bie kjlien jelieet hast.

Ons himlischa Voda Jehova jeft ons derch sien Wuat, de Schreft, miere Jebooten, waut ons jlikjtoo sajen, waut wie doonen sellen un waut nich. De Schreft sajcht ons daut biejlikj gaunz kloa auf, Aufjettarie to driewen, de Ehe to bräakjen, Huararie to driewen un to stälen (2. Mose 20:1-17; Aposteljeschicht 15:28-29). Wan wie em jeisteljen “en aules oppwaussen”, woa wie en, daut Jehova daut baste fa ons well un daut siene Jebooten nich too strenj sent (Efeesa 4:15, PB; Jesaja 48:17-18; 54:13).

Oba de Bibel haft nich fa aules een Jesaz, waut jlikjtoo sajcht, waut wie doonen sellen un waut nich. Un doawäajen jleewen eenje, wäajen doa nich een Jesaz fäa es, kjennen see doonen, waut see wellen. Dee sajen, daut wan Gott daut nich wudd wellen haben, dan wudd hee ons daut jlikjtoo aufjesajcht haben.

Dee, waut soo denkjen, moaken foaken orrajchte Entscheidungen un beschoden daut lota sea. Dee kjennen daut nich enseenen, daut de Bibel ons wiest, waut wie doonen sellen, wan doa uk nich krakjt een Jesaz fäa es. Wan wie de Schreft studieren, dan lia wie, waut Jehova fa goot un schlajcht talt. Soo kjenn wie ons Jewessen oppschoapen un daut woat ons halpen, goode Entscheidungen to moaken. Wan wie daut doonen, dan sent wie schaftich, wiels wie weeten, daut wie daut rajchte jedonen haben (Efeesa 5:1).

Besondre Väabilda ut de Schreft

De Schreft rät von väl Deena von Jehova, waut rajchte Entscheidungen muaken, wan doa uk nich krakjt een Jesaz fäa wia. Räd wie nu mol von Josef. Aus Potifar siene Fru met Josef wull Sex haben, wist Josef, daut de Ehe bräakjen eene Sind jäajen sien Jewessen wia un uk “jäajen Gott”, wan daut to dee Tiet uk noch nich een kloaret Jesaz doafäa jeef (1. Mose 39:9, PB). Josef mott daut jewist haben, daut Jehova to Adam un Eva säd, daut Befriede sikj unjarenaunda sullen tru sennen (1. Mose 2:24).

Räd wie mol noch von een Biespel. En Aposteljeschicht 16:3 (PB) kjenn wie seenen, daut Paulus Timotäus ieescht beschnieden leet, ea hee sikj dän opp siene Reis metneem. Lota reisden Paulus un Timotäus no veschiedne Städa un säden an doa, “waut de Apostel un Eltestasch en Jerusalem beschloten hauden”, soo aus wie en Varsch 4 läsen kjennen. Un mank daut, waut de Apostel un Eltestasch en Jerusalem beschloten hauden, wia, daut de Christen nich mea unja daut Jesaz wieren, sikj beschnieden to loten (Aposteljeschicht 15:5-6, 28-29). Wuarom docht Paulus, daut et needich wia, daut Timotäus sikj beschnieden leet? “Hee beschneet am om de Juden äat haulwen; wiels en dee Jäajent wisten see aula, daut sien Voda een Griech wia.” Paulus wull nich onneedich wäm beleidjen, ooda wäm tofaul brinjen. Hee wia doarom to doonen, daut aule Christen kunnen ver Gott een goodet Jewessen haben (2. Korinta 4:2; 1. Korinta 9:19-23).

Paulus un Timotäus muaken foaken soone Entscheidungen, wua see aun aundre äa Jewessen dochten. Daut kjenn wie seenen, wan wie Bibelvarzhen läsen, soone aus Reema 14:15, 20-21 un 1. Korinta 8:9-13; 10:23-33. Doa kjenn wie seenen, daut Paulus reed wia, Dinja opptojäwen, wan dee uk nich mol orrajcht wieren. Woosoo? Hee wull aundre nich stieren un beleidjen un dee daut nich schwanda moaken, Jehova to deenen. Paulus schreef von Timotäus: “Ekj hab sest kjeenem aus am, dee soo opprechtich om jun gootgonen besorcht es. De aundre sieekjen äaren ieejnen nutzen, un nich Jesus Christus siene Sach. Oba jie weeten, woo Timotäus sikj hanjestalt haft, un woo hee aus een Sän met däm Voda met mie toop aum Evangelium jedeent haft” (Filippa 2:20-22, PB). Waut fa een goodet Biespel Paulus un Timotäus nich sent! Enne Städ daut see bloos daut deeden, waut see wullen, muaken see äare Entscheidungen soo, daut aundre daut halpen wudd, Jehova to deenen, wan doa uk nich een Jesaz fäa wia.

Denkj mol aun Jesus Christus, ons bastet Väabilt. En siene Boajchprädicht säd hee, wie sullen mea doonen, aus bloos no Jehova siene Jesazen horchen. Wie sullen uk doaräwa nodenkjen, wuarom daut Jesaz jejäft wia, soo daut wie kjennen goode Entscheidungen moaken (Matäus 5:21-22, 27-28). Waut kunn wie bie Jesus, Paulus, Timotäus un Josef aula seenen? Wie kunnen seenen, daut dee daut nich soo tohoolen hauden, daut see kunnen doonen, waut see wullen, wan doa eemol nich krakjt een Jesaz fäa wia. Dee wisten daut, woont de twee wichtichste Jebooten wieren: Gott leewen un aundre Menschen leewen. Dee äare Entscheidungen weesen, daut see dise Jebooten jehuarsom wieren (Matäus 22:36-40).

Woo kjenn wie goode Entscheidungen moaken?

De Bibel es nich soo aus een Papia vom Jesaz, wua aules krakjt bowen steit, waut een Mensch doonen kaun un waut nich. Jehova freit sikj sea, wan wie daut doonen, waut hee well haben, wan doa uk nich een Jesaz fäa es. De Schreft sajcht, wie sellen utfinjen, ooda bejriepen, waut Gott von ons haben well, enne Städ velangen, daut Gott emma fa aules saul een Jesaz oppmoaken (Efeesa 5:17; Reema 12:2). Wuarom jleicht Jehova daut, wan wie daut proowen to vestonen un daut uk doonen, waut hee haben well? Wäajen daut wiest, daut wie väl dolla doarom todoonen sent, am to jefaulen, enne Städ bloos onsen ieejnen Kopp notogonen. Daut wiest uk, daut wie fa siene Leew dankboa sent un daut wie aundre uk wellen soone Leew wiesen, aus hee haft (Spricha 23:15; 27:11). Wan wie de Bibel brucken toom vestonen, waut Jehova von ons well haben, dan woa wie ons dichta bie am feelen un wie woaren äwajens veleicht uk jesunda sennen.

Well wie nu noch seenen, woo wie daut en ons ieejnet Läwen kjennen doonen.

Waut von Tietvedrief wie ons wälen

Denkj wie mol aun eenen jungen Maun, waut doa well Spell horchen. Waut hee von daut Spell jehieet haft, jleicht hee sea, oba aus hee kjikjt, dan sitt hee opp daut Bilt, daut et doa om Sex jeit un om schwiensche Räd, un daut besorcht am. Un hee woat uk en, daut de mieeschte Leeda von de Sinja sikj emma doll un hunjsch hieren. Wiels de junga Maun Jehova leeft, es am daut wichtich, woo Jehova doaräwa denkjt un feelt. Soo, woo kaun dee daut nu weeten, woo Gott äwa dit denkjt?

En dän Breef, waut de Apostel Paulus de Galata schreef, haft hee miere Sachen oppjerieecht von de Woakjen von daut Fleesch un uk von de Frucht von Gott sienen Jeist. Veleicht weetst du daut noch, waut mank de Frucht von Gott sienen Jeist es? Doa es Leew, Freid, Fräd, Jedult, Frintlichkjeit, gootjesonnen sennen, Gloowen, Jelindichkjeit un Selfstbeharschunk. Un waut sent dan de Woakjen von daut Fleesch? Paulus schreef: “Waut daut Fleesch fa Woakjen haft es kloa: doa es Ehebruch, Huararie, Onreinheit, onbandjet Läwen, Aufjettarie, Zaubarie, Fientschoft, Striet, Habsucht, Wutt, nosikj sennen, Zank, Spoolarie, Aufgonst, Mort, supen, un fräten un soowaut mea. Ekj hab junt daut aul eemol jesajcht, oba ekj saj daut noch eemol: Dee, dee soowaut doonen woaren en Gott sien Rikj nich nenkomen” (Galata 5:19-23, PB).

Kjikj wie mol, waut Paulus doa tolatst säd: “Un soowaut mea.” Paulus jeef hia nich eene groote List, wua aules bennen wia, waut Poat es von de Woakjen von daut Fleesch. Doawäajen kaun een Mensch nich sajen: “Daut, waut ekj doo, es no de Schreft no nich orrajcht, wiels daut steit nich opp de List, wua daut von de Woakjen von daut Fleesch rät.” Wan daut doa uk nich oppe List es, wudd een Mensch oba sellen doaräwa nodenkjen, aus daut “soowaut” es, aus doa oppe List steit. Dee, waut met Fliet soont doonen, waut “soowaut” es, aus doa oppe List steit un sikj nich endren, dee woaren nich daut goode kjrieen, waut Gott sien Kjennichrikj brinjen woat.

Doawäajen mott wie utfinjen, ooda daut vestonen, waut Jehova fa rajcht talt. Es daut schwoa? Saj wie mol, een Dokta rot die too, daut du mea Frucht un Jreens äten saust un nich soo väl Pei ooda Eiskriem ooda soowaut mea. Wudd daut dan schwoa sennen to weeten, to woone List Kjieekj jehieed? Nu denkj wie noch eemol aun de Frucht von Gott sienen Jeist un aun de Woakjen von daut Fleesch. To woone List wudd daut Spell jehieren, wua wie ieescht aul von räden? Daut Spell wudd gaunz secha nich Poat sennen von Leew, gootjesonnen sennen ooda Selfstbeharschunk un daut wudd uk nich met de aundre Frucht von Gott sienen Jeist tooppaussen. Wie wudden aulsoo nich een Jesaz brucken, waut daut gaunz dietlich säd, daut daut Spell nich met daut tooppaust, waut Gott fa rajcht talt. Un krakjt dautselwje kaun eena uk sajen met Bieekja, waut eena läst, de Films, waut eena kjikjt, Tellewizhen, Komputaspäls, Websieden un soo wieda.

Woo saul eena sikj auntrakjen?

De Rot ut de Schreft halp ons to entscheiden, woo wie ons kjleeden un oppfiksen sellen. Dee Rot halpt ons, daut wie ons kjennen veninftich kjleeden. Un hia es daut wada krakjt soo, daut wäa Jehova leeft, dee woat nich bloos proowen, daut to doonen, waut hee selfst jleicht, oba dee woat doano seenen, daut hee sienen Voda em Himmel schaftich moaken kaun. Soo aus wie aul ea jeseenen haben, haft Jehova nich eene Räajel oppjestalt, woo wie ons krakjt kjleeden sellen, oba daut meent doawäajen nich, daut am daut krakjt endoont es. Daut kaun von eene Städ no de aundre veschieden sennen, woo de Menschen sikj kjleeden, un de Mooden endren sikj emma wada. Oba de Rot, waut Gott ons jeft, halpt ons, krakjt endoont wua wie wonen ooda wua wie sent.

Denkj wie bloos mol aun 1. Timotäus 2:9-10 (PB). Doa sajcht daut: “Un de Frues sellen sikj aunstendich un schmock kjleeden. Äa Straums saul nich em Hoa flajchten ooda Golt un Kralen omhenjen sennen, oba en goode Woakjen, soo aus daut eene Gottesferchtje Fru tookjemt.” Doawäajen sellen christelje Frues, un uk de Mana, doaräwa nodenkjen, waut de Menschen en äare Jäajent von gottesferchtje Menschen velangen. Daut es besonda wichtich, daut een Christ doaräwa nodenkjt: Waut woaren aundre äwa de Bibel denkjen, wan dee mie seenen? (2. Korinta 6:3). Een Christ, waut väabiltlich es, woat nich too sea doaräwa beduat sennen, waut am selfst jankat, oba enne Städ daut woat hee doano seenen, daut aundre nich aufjelenkjt woaren wäajen am ooda verheipts nich wellen no de Woarheit horchen (Matäus 18:6; Filippa 1:10).

Wan een Christ enwoat, daut aundre daut stieet, woo hee sikj kjleet ooda oppfikst, dan wudd dee sikj kjennen dän Apostel Paulus toom Väabilt nämen. Dee wia dolla doarom todoonen, daut aundre Jehova deenen kunnen, aus daut hee sienen ieejnen Kopp nojinkj. Paulus säd: “Nämt mie toom Biespel, soo aus ekj Christus toom Biespel näm” (1. Korinta 11:1, PB). Un Paulus säd uk: “Soogoa Christus läwd sikj nich selfst toom Jefaulen”. Paulus muak daut fa aule Christen kloa: “Wie, dee doa stoakj sent, sellen de schwake äare Schwakheit droagen halpen, un nich ons selfst toom Jefaulen läwen. Well wie aula onsen näakjsten toom Jefaulen läwen, daut am daut toom gooden un toom oppbuen deenen kaun” (Reema 15:1-3, PB).

Woo kjenn wie lieren, bätre Entscheidungen to moaken?

Woo kjenn wie daut lieren, soo to entscheiden, daut Jehova sikj freit, wan doa uk nich eene Räajel es, waut doa krakjt sajcht, waut wie doonen sellen? Wie motten Gott sien Wuat jieda Dach läsen, pinkjlich studieren un doaräwa nojreblen, waut wie läsen. Wan wie daut doonen, dan woa wie daut bäta lieren, goode Entscheidungen to moaken. Oba wie motten doaraun denkjen, daut et kaun siene Tiet dieren. Krakjt soo aus daut bie een Kjint siene Tiet dieet, bat daut groot es, soo lia wie daut uk soo bie sacht, waut daut rajchte es to doonen. Wie motten doabie jeduldich sennen un nich vedrislich woaren, wan wie daut nich fuaz moakjen, woo wie ons vebätat haben. Oba eent es kloa: Daut rieekjt nich too, wan wie bloos loten Tiet vegonen, daut wie ons dan aul veselfst woaren vebätren. Wie motten de Tiet utnutzen un Gott sien Wuat studieren un uk doano läwen soo goot, aus wie kjennen (Hebräa 5:14).

Wan Jehova ons een Jesaz jeft un wie daut nokomen, dan wies wie, daut wie am jehuarsom sent. Oba wan doa nich een Jesaz es un wie doawäajen noch proowen, daut to doonen, waut hee jleicht, dan wies wie, daut wie am opp iernst leewen un am schaftich moaken wellen. Je lenja wie Jehova deenen un je dichta bie wie am komen, je dolla woa wie wellen soo sennen aus Jehova un Jesus. Dan woa wie jieren wellen aules soo doonen, aus Gott daut fa rajcht talt, soo aus hee daut haft enne Schreft loten oppschriewen. Wan wie daut doonen, dan woat ons himlischa Voda sikj freien un wie selfst woaren uk mea Freid haben.

[Bilt]

De Menschen trakjen sikj veschieden aun von eene Städ no de aundre, oba de Rot enne Schreft halpt ons, goode Entscheidungen to moaken