Waut Läsa weeten wellen

Von wäm rät Paulus en 2. Korinta 6:14 (PB), wan hee sajcht “soone waut nich jleewen”?

En 2. Korinta 6:14 (PB) läs wie: “Lot junt nich toopspaunen met soone waut nich jleewen.” Wan wie de Varzhen doaver un doahinja läsen, kjenn wie seenen, daut Paulus von soone rät, waut nich Poat von de Christenvesaumlunk sent. Dit kjenn wie uk kloa seenen, von aundre Varzhen, wua Paulus de Wieed brukt “een nich jleewenda” ooda de “Onjleewende”.

Toom Biespel säd Paulus, daut Christen sullen nich verem Jerecht komen “ver onjleewende” Menschen (1. Korinta 6:6, PB). Hia meent de “Onjleewende” de Rechtasch, waut en de Staut Korint em Jerecht schauften. En sienen tweeden Breef sajcht Paulus, daut de Soton “de Onjleewende, veblend haft”. Daut meent, de Uagen von soone, waut nich jleewen, sent toojedakjt, daut see de goode Norecht nich seenen kjennen. Soone Onjleewende wellen nich Jehova deenen, wäajen Paulus säd ea aul: “Wan sikj oba wäa trigj nom Harn dreit, woat dee Dakj wajch jenomen” (2. Korinta 3:16, PB; 4:4, JHF).

Eenje von soone, waut nich jleewen, haben kjeenen Respakjt fa daut Jesaz ooda doonen faulsche Jetta deenen (2. Korinta 6:15-16). Oba nich aule von dee sent jäajen Jehova siene Deena. Eenje von dee intressieet de Woarheit. Een deel von dee sent met Christen befriet un dee wellen uk met dee toopbliewen (1. Korinta 7:12-14; 10:27; 14:22-25; 1. Petrus 3:1-2). Soo aus wie ieescht aul säden, wan Paulus von soone rät, “waut nich jleewen”, meent hee emma Menschen, waut nich Poat von de Christenvesaumlunk sent. Wäajens enne Christenvesaumlunk sent soone, waut “aun dän Harn” jleewen (Aposteljeschicht 2:41; 5:14, PB; 8:12-13).

De Rot ut 2. Korinta 6:14 es fa aule Christen, oba besonda fa dee, waut sikj wellen befrieen (Matäus 19:4-6). Een Christ, waut sikj haft Gott hanjejäft un deepen loten, woat sikj nich eenen Poatna sieekjen mank soone, waut nich jleewen. Wäajens, waut fa soone Menschen wichtich es un wua dee no sträwen un waut dee jleewen, es gaunz aundasch aus bie woare Christen.

Waut es met soone, waut de Schreft studieren un no onse Toopkomes komen? Waut es met dee, waut ojjedeepte Vekjindja sent? Sent daut soone, waut nich jleewen? Nä. Soone, waut de Woarheit haben aunjenomen von de goode Norecht, un doaropp schaufen, sikj deepen to loten, sell wie nich “Onjleewende” nanen (Reema 10:10; 2. Korinta 4:13). Ea Kornelius sikj haud deepen loten, wia hee bekaunt doafäa, daut hee “fromm un gottesferchtich” wia (Aposteljeschicht 10:2, PB).

Nu hab wie jeseenen, daut 2. Korinta 6:14 nich ojjedeepte Vekjindja meent. Wudd daut dan oba kluak sennen, soone Persoon uttowälen toom befrieen? Nä, daut wudd nich kluak sennen. Wuarom nich? Wäajen dän Rot, waut Paulus äwa Wätfrues jeef. Paulus schreef: “See [es] frie, sikj to befrieen, met wäm see well; bloos de Maun saul uk däm Harn aunjehieren” (1. Korinta 7:39, PB; von ons dunkel jemoakt). Soo aus daut hia wiest, woat jedeepte Christen toojerot, sikj bloos mank soone eenen Poatna to sieekjen, waut “däm Harn aunjehieren”.

Waut meent daut, dee sellen “däm Harn aunjehieren” ooda wan daut sajcht “en Christus”? En Reema 16:8-10 (PB) un Kolossa 4:7 (PB) rät Paulus von soone, waut “en Christus” ooda “em Harn” wieren. Wan wie dise Varzhen läsen, kjenn wie seenen, daut hee soone Menschen uk “Metoabeida” nand, ooda eena, “dee sikj aus Christ bewäsen haft”, een “leewa Brooda”, een “trua Deena” ooda een “Metkjnajcht”.

Wanea woat eena een “Metkjnajcht em Harn”? Daut es, wan eena wellich deit, waut een Kjnajcht mott doonen un von sikj selfst vejat. Jesus muak daut dietlich, hee säd: “Wan wäa met mie metkomen well, mott hee von sikj selfst vejäten un dan sien Kjriez opp sikj nämen un metkomen” (Matäus 16:24, PB). Eena deit met Christus metgonen, wan eena Gott sienen Wellen deit un sikj am hanjeft. Dan lat dee sikj deepen un doaderch kaun dee een gooda Frint sennen met Jehova Gott. * Soo, sikj met wäm to befrieen, waut däm Harn aunjehieet, meent, sikj bloos met soonen to befrieen, waut daut bewäsen haft, daut dee werkjlich jleeft un sikj hanjejäft haft aus “Gott un däm Harn Jesus Christus sien Kjnajcht” (Jakobus 1:1, PB).

Eena, waut met Jehova siene Zeijen studieet un fein em jeisteljen wiedakjemt, es to lowen. Oba dee haft sikj noch nich Jehova hanjejäft un vesproaken, sien Läwen to brucken toom am deenen. Dee schauft secha noch aun Sachen, daut dee daut kaun doonen. Dee mott aules doonen, waut doatoo needich es, om daut dee sikj kaun Jehova hanjäwen un deepen loten, ea dee aunfangt, aun befrieen to denkjen.

Oba waut, wan een Christ wäm jleicht, waut en sien Bibelstudium goot veraunkjemt? Veleicht denkjt de Christ, daut dee sikj dan aul kjennen kjanen lieren, un wan deejanja sikj ieescht haft deepen loten, dan woaren dee sikj kjennen befrieen. Wudd daut kluak sennen, soo to denkjen? Nä. Wuarom nich? Wäajen dee, waut de Bibel studieet, wudd dan veleicht utem orrajchten Grunt studieren. Veleicht wudd dee sikj dan bloos wellen haustich deepen loten, daut dee beid sikj kjennen befrieen.

Jeweenlich es eena bloos fa eene korte Tiet een ojjedeepta Vekjindja ea eena sikj kaun deepen loten. Doawäajen es de Rot, wua wie ieescht von räden, sikj bloos em Harn to befrieen, nich too schwoa. Oba waut, wan eena aul oolt jenuach es toom sikj befrieen, un en eene christelje Famielje oppjewossen es un aul fa Joaren fein enne Vesaumlunk metschauft un uk aul een ojjedeepta Vekjindja es? Waut haft am bat nu trigjehoolen, sikj Jehova hantojäwen? Wuarom deit dee daut nich? Haft dee Twiewel? Wie kjennen nich sajen, daut daut een Onjleewenda es, oba wie kjennen uk nich sajen, daut dee mank dee es, “dee däm Harn aunjehieren”.

Paulus sien Rot äwa dän Ehestaunt es ons toom gooden (Jesaja 48:17). Wan sikj twee wellen befrieen, dan sullen dee sikj aul beid Jehova hanjejäft haben. Wan dee beid Frind sent met Jehova, woat dee daut halpen, eenen gooden Ehestaunt to haben. Dee talen deeselwje Sachen fa wichtich un dee sträwen no dautselwje. Un dit woat an sea halpen, daut dee toop kjennen schaftich sennen. Sikj bloos em Harn to befrieen haft uk noch mea goodet: Doaderch kaun eena wiesen, daut eena Jehova tru es un Jehova woat eenem doafäa fa emma säajnen. De Schreft sajcht:“Du [Jehova] best tru to dee, dee die tru sent” (Psalm 18:26, PB).

[Footnoot]

[Bilt]

“Du [Jehova] best tru to dee, dee die tru sent”