“Een jiedra woat siene ieejne Laust droagen”

“Doawäajen mott een jiedra von sikj selfst ver Gott Räakjenschoft jäwen” (REEMA 14:12, PB)

1. Waut fa eene Entscheidunk musten de dree Hebräa moaken?

 DREE junge Hebräa, waut en Babel wonden, musten mol eene sea schwoare Entscheidunk moaken. Dee musten sikj eenich woaren, aus see wudden dän Kjennich von Babel jehorchen un sikj ver eene goldne Jestault bekjen ooda daut nich doonen un en eenen sea heeten Fiaowen nenjeschmäten woaren. Schadrach, Meschach un Abed Nego hauden nich de Tiet toom wäm froagen, waut see doonen sullen, oba dee wisten, waut see to doonen hauden. Un dee wieren sikj gaunz eenich un säden: “Doawäajen saust du, ons Kjennich, weeten, daut wie nich woaren dienen Aufgott deenen ooda de goldne Jestault aunbäden” (Daniel 3:1-18, PB). Jieda eena von de dree Hebräa wort sikj selfst eenich, waut dee doonen wull.

2. Wäa brocht Pilatus bat doa, siene Entscheidunk äwa Jesus Christus to moaken, un wia hee doawäajen frie von Schult?

² Rom 600 Joa lota wort Jesus Christus vekloacht bie dän Laundeskommandaunt Pilatus. Dee unjastunt sikj de gaunze Sach un wort en, daut Jesus nich schuldich wia. Oba doa wia eene Häad Menschen, waut velangden, daut Jesus sull omjebrocht. Pilatus wull nich, daut Jesus sull dootjemoakt, oba hee haud nich dän Moot sikj jäajen de Häad Menschen to stalen, un doawäajen jeef hee bie. Hee wosch sikj de Henj un säd: “Ekj sie nich Schult aun disen Mensch sien Bloot.” Un dan leet hee daut too, daut Jesus omjebrocht wort. Pilatus haud sult dän Moot haben, siene ieejne Entscheidunk äwa Jesus Christus to moaken. Oba hee haud dän nich un leet aundre fa sikj entscheiden. Daut jeft nich jenuach Wota, waut am kunn von dise Schult reinwauschen (Matäus 27:11-26, PB; Lukas 23:13-25).

3. Wuarom sell wie nich aundre loten Entscheidungen moaken fa ons?

³ Woo es daut bie die? Best du soo aus de dree Hebräa, wan du motst eene Entscheidunk moaken, ooda latst du aundre fa die entscheiden? Daut es nich emma leicht un eena mott wesse Erfoarunk haben toom de rajchte Entscheidungen moaken. Biejlikj motten Elren fa äare Kjinja entscheiden, wan dee noch junk sent. Secha es daut uk schwoa, Entscheidungen to moaken, wan doa väl Sachen sent, wua wie ieescht motten äwa nodenkjen. Wan de Eltestasch un Deenstaumthelpa ons uk kjennen halpen onse “Laust droagen”, kjennen dee oba nich fa ons entscheiden. Daut es nich opp to an (Galata 6:1-2, PB). Daut es eene Sach, wua “een jiedra von sikj selfst ver Gott Räakjenschoft jäwen” mott (Reema 14:12, PB). De Schreft sajcht: “Een jiedra woat siene ieejne Laust droagen motten” (Galata 6:5, PB). Woo kjenn wie daut doonen? Ieeschtens mott wie vestonen, daut ons daut aun Help fält, un dan lieren, woo wie kjennen weise Entscheidungen moaken.

Waut wie doonen motten

4. Adam un Eva muaken eene faulsche Entscheidunk un worden ojjehuarsom. Waut sull ons daut lieren?

⁴ Een Stootje nodäm aus Gott Adam un Eva jemoakt haud, muaken dee eene Entscheidunk, waut sea schlajcht utkjeem. Dee wälden sikj, von de Frucht von dän Boom to äten, waut Vestentnis jeef äwa goot un schlajcht (1. Mose 2:16-17). Oba wuarom deeden dee soont aus dit? De Schreft sajcht: “De Fru sach, daut de Frucht goot leet, un daut dee goot to äten wia, un daut dee eenem kunn waut Vestentnis jäwen. Dan neem see von de Frucht un eet, un jeef äaren Maun uk, un dee eet” (1. Mose 3:6, PB). Eva docht bloos aun sikj selfst un eet. Un lota wort Adam sikj eenich, uk dautselwje to doonen. Un doawäajen wort Sind un Doot “äwa aule Menschen jespreet” (Reema 5:12, PB). Daut et bie Adam un Eva soo wiet kjeem, daut dee ojjehuarsom worden, lieet ons waut wichtjet: Wan wie nich no Gott sienen Rot horchen, dan woat daut leicht sennen, daut wie orrajchte Entscheidungen moaken.

5. Waut vonne Help haft Jehova ons jejäft, un waut mott wie doonen, daut dee ons toom gooden es?

⁵ Jehova Gott haft ons nich onen Help jeloten. De Schreft sajcht: “Un jiedatsmol, wan jie eenen Wajch ooda dän aundren aufdreien wellen, woa jie von hinja junt hieren: ‘Daut es de Wajch. Go doa’” (Jesaja 30:21, PB). Jehova rät to ons derch sien Wuat, de Bibel. Wie motten de Schreft studieren un jeneiw rutfinjen, waut de Woarheit es. Toom rajcht entscheiden es uk noch waut needich. De Schreft sajcht: “Stoakje Kost es fa utjewosne Menschen, dee sikj doarenn jeeeft haben, tweschen goot un schlajcht to unjascheeden” (Hebräa 5:14, PB). Wan wie daut nokomen, waut Gott sien Wuat ons lieet, dan doo wie ons doarenn eewen to weeten, waut rajcht un orrajcht es.

6. Waut es doa needich, daut ons Jewessen rajcht schauft?

⁶ Ons fält daut aun ons Jewessen toom goode Entscheidungen moaken. Waut deit daut Jewessen? De Schreft sajcht, de “Jedanken vekloagen sikj unjarenaunda ooda heeten goot, waut see doonen” (Reema 2:14-15, PB). Oba daut ons Jewessen kaun rajcht schaufen, mott wie daut met Gott sien Wuat oppschoapen un daut uk doonen, waut wie lieren. Wan wie nich ons Jewessen oppschoapen, dan woa wie veleicht doano entscheiden, waut rom ons Mood es ooda woo de mieeschte Menschen denkjen. Oba waut passieet, wan wie nich no ons Jewessen horchen un Gott emma wada ojjehuarsom sent? Met de Tiet woat ons Jewessen dan soo to sajen “een Brenntieekjen” kjrieen un soo woaren aus eene Noaw, waut kjeen Jefeel haft. Un dan woat ons daut Jewessen nich mea ploagen, wan wie waut orrajchtet doonen (1. Timotäus 4:2, PB). Oba wan wie ons Jewessen met Gott sien Wuat oppschoapen, dan woat daut emma een gooda Rotjäwa sennen.

7. Waut mott wie doonen toom rajchte Entscheidungen moaken?

⁷ Wan wie wellen rajchte Entscheidungen moaken, dan mott wie de Schreft goot kjanen un daut, waut wie lieren uk vestonen notokomen. Enne Städ sea haustich Entscheidungen moaken, sell wie ieescht goot doaräwa nodenkjen un en de Schreft no Rot sieekjen. Wan wie de Schreft goot kjanen un ons Jewessen met dee oppjeschoapt haben, dan woa wie uk kjennen goode Entscheidungen moaken, wan daut mol haustich fält, soo aus Schadrach, Meschach un Abed Nego. Well wie mol twee Biespels seenen.

Waut fa Frind sull wie haben?

8-9. (a) Waut von Rot ut de Schreft wiest ons, daut et needich es, schlajchte Jesalschoft utem Stich to gonen? (b) Meent schlajchte Jesalschoft bloos soone Menschen, waut een schlajchtet Läwen fieren? Laj daut ut.

⁸ De Apostel Paulus schreef: “Lot junt nich aunschmäaren. Schlajchte Jesalschoft vedoaft goode Aunjewanheiten” (1. Korinta 15:33, PB). Jesus Christus säd to siene Jinja: “Nu sent jie oba nich von dise Welt” (Johanes 15:19, PB). Von dit kjenn wie seenen, daut wie nich sellen met soone Menschen Frind sennen, waut biejlikj Huara, Ehebräakja, Stäla ooda Supa sent (1. Korinta 6:9-10). Je mea wie von de Schreft lieren, je bäta kjenn wie vestonen, daut doa oba noch mea met en es. Wie motten uk oppaussen, waut vonne Films wie kjikjen, waut wie em Internet doonen ooda waut wie ons aunhorchen ooda läsen. Un wie motten uk oppaussen, wan wie ons em Internet met wäm unjahoolen, wiels daut kunnen “hinjalestje” Menschen sennen (Psalm 26:4, JHF).

⁹ Woo es daut met soone, waut veleicht nich een schlajchtet Läwen fieren, oba nich aun Jehova jleewen? Sull wie goode Frind woaren met dee? De Schreft sajcht, “daut de gaunze Welt vom beesen beharscht woat” (1. Johanes 5:19, PB). Dis Varsch halpt ons vestonen, daut nich bloos soone Menschen schlajchte Jesalschoft sent, waut een schlajchtet Läwen fieren. Doawäajen es daut bäta, wan wie bloos met soone goode Frind woaren, waut uk Jehova leewen.

10. Waut halpt ons, goode Entscheidungen to moaken, wan daut doarom jeit, met Menschen toop to sennen, waut nich Jehova deenen?

¹⁰ Wie kjennen nich gaunz von soone Menschen wajchbliewen, waut nich Jehova deenen, un de Schreft sajcht uk nich, daut wie sellen (Johanes 17:15). Biejlikj em Prädichtdeenst ooda enne School ooda opp onse Oabeit traf wie Menschen, waut nich Jehova deenen. Een Christ, waut met wäm befriet es, waut nich Jehova deent, haft veleicht noch mea met de Welt to doonen aus aundre. Oba wan wie doarenn jeeeft sent, tweschen goot un schlajcht to unjascheeden, dan weet wie, daut et nich dautselwje es, waut met soone Menschen to doonen to haben, aus goode Frind met dee to sennen (Jakobus 4:4). Un daut woat ons halpen to entscheiden, aus wie biejlikj wudden sellen no de School met onse Schoolpoatna toop waut doonen ooda met onse Oabeitspoatna no de Oabeit noch toop sennen.

Waut vonne Oabeit wie aunnämen

11. Äwa waut mott wie daut ieeschte nodenkjen, wan wie wellen eene Oabeit aunnämen?

¹¹ De Schreft kaun ons halpen, goode Entscheidungen to moaken, wan daut doarom jeit, fa onse Famielje to sorjen (1. Timotäus 5:8). Daut ieeschte mott wie äwalajen, waut wie bie irjenteene Oabeit woaren motten doonen. Gaunz kloa wudd wie nich soone Oabeit aunnämen, waut met Sachen to doonen haft, waut jäajen de Schreft sent, soo aus Aufjettarie, stälen ooda daut Bloot orrajcht brucken. Un wie wudden uk nich soone Oabeit aunnämen wua wie wudden motten lieejen ooda Menschen unjagonen (Aposteljeschicht 15:29; Openboarunk 21:8).

12-13. Aun waut mott wie noch denkjen, ea wie entscheiden, aus wie eene Oabeit aunnämen?

¹² Äwa waut mott wie nodenkjen, wan de Oabeit, waut se ons aunbeeden, nich jlikjtoo jäajen de Schreft jeit? Je bäta wie de Schreft kjanen, je dietelja woat ons daut, daut et noch aundre Sachen jeft, wua wie motten äwa nodenkjen, ea wie eene Entscheidunk moaken. Saj wie mol onse Oabeit wudd sennen, bloos daut Fon to beauntwuaten. Oba wudd daut goot sennen, dise Oabeit auntonämen opp soone Städ, wua se opp Jelt spälen? Wie motten uk doaräwa nodenkjen, wäa ons betolen woat un wua wie de Oabeit doonen woaren. Wudd een Christ, waut sien ieejna Wieet es un fa aundre foawen deit, sikj daut äwanämen, eene Kjoakj to foawen? (2. Korinta 6:14-16).

¹³ Waut oba, wan dien Wieet to die säd, du sust eene Kjoakj foawen? Wurscht du kjennen nä sajen? Waut krakjt wurscht du doa doonen motten? Ooda saj wie mol, diene Oabeit es Breew utfieren un die traft daut bieaun opp soone Städen, wua se schlajchtet doonen? Dan wudd die veleicht daut kjennen halpen, waut de Schreft en Matäus 5:45 sajcht. Un eena mott uk emma äwalajen, aus eena sikj wudd schuldich feelen, wan eena eene jewesse Oabeit aunneem (Hebräa 13:18). Soo, wie kjennen seenen, daut wie ons Jewessen motten goot oppschoapen, daut wie kjennen goode Entscheidungen moaken äwa de Oabeit.

“Denkj aun am en aules waut du deist”

14. Waut mott wie emma em Denkj hoolen, wan wie Entscheidungen moaken?

¹⁴ Wie motten uk bie aundre Entscheidungen ieescht seenen, waut de Schreft sajcht un doaräwa nodenkjen, woo wie daut kjennen nokomen. Biejlikj aus wie ons wellen loten utlieren ooda waut vonne Doktarie wie wellen aunnämen. De weisa Kjennich Salomo von ieeschtemma en Israel säd: “Velot die opp däm HARN met dien gaunzet Hoat, un velot die nich opp dien ieejnet Vestaunt. Denkj aun am en aules waut du deist, un hee woat die dän rajchten Wajch wiesen” (Spricha 3:5-6, PB).

15. Waut lia wie von de ieeschte Christen äwa Entscheidungen moaken?

¹⁵ Wie motten uk doaräwa nodenkjen, waut onse Entscheidungen aun aundre doonen. Biejlikj brukten de ieeschte Christen de mieeschte Jesazen äwa daut Äten, waut Gott de Israeliten jejäft haud, nich mea nokomen. Wan dee wullen, kunnen dee wesset äten, waut ieescht en daut Jesaz veboden wia. To dee Tiet jinkj Fleesch to kjeepen, waut ea wia faulsche Jetta jeopfat worden. De Apostel Paulus säd doaräwa: “Wan mien äten mienen Brooda toom faulen brinjen sull, well ekj niemols mea Fleesch äten, daut ekj mienen Brooda nich toom stolpren brinj” (1. Korinta 8:11-13, PB). Paulus rod de ieeschte Christen too, daut see sullen äwalajen, waut äare Entscheidungen aun aundre wudden doonen. Onse Entscheidungen sellen kjeenem de Uasoak jäwen, sikj “to steeten” (1. Korinta 10:29, 32, PB).

Froag Gott no Weisheit

16. Woo halpt bäden ons biem Entscheidungen moaken?

¹⁶ Daut es sea wichtich to bäden, ea wie waut entscheiden. De Jinja Jakobus säd: “Wan daut bie irjentwäm von junt aun Weisheit fält, dan saul hee Gott doano froagen. Wiels Gott jiedrem jieren jeft un kjeenen schelt, woat am de Weisheit jejäft woaren” (Jakobus 1:5, PB). Wie kjennen ons secha sennen, daut Jehova no onse Jebäda woat horchen un ons dee Weisheit jäwen woat, waut ons fält, toom goode Entscheidungen moaken. Wan wie Jehova onse Sorjen vetalen un am no Help froagen, dan woat de heilja Jeist ons halpen, de Schreft bäta to vestonen, un uk aun soone Bibelvarzhen to denkjen, waut wie veleicht aul vejäten haben.

17. Woo kjennen aundre ons halpen, Entscheidungen to moaken?

¹⁷ Kjennen aundre ons halpen, wan wie Entscheidungen moaken? Jo. Jehova haft fa weise Breeda un Sestren enne Vesaumlunk jesorcht, waut ons kjennen biestonen (Efeesa 4:11-12). Wie kjennen dee om Help froagen, besonda wan wie motten eene wichtje Entscheidunk moaken. Dise Breeda un Sestren haben väl Erfoarunk em Läwen un kjanen de Schreft goot. Dee kjennen eenem halpen, de rajchte Entscheidunk to moaken un “fauststalen lieren, waut daut aulabaste es” (Filippa 1:9-10, PB). Oba wie motten em Denkj hoolen, daut kjeena kaun fa ons de Entscheidunk moaken. Daut es eene Veauntwuatunk, waut wie selfst droagen motten.

Kjemt daut emma goot ut?

18. Woo woat daut utkomen, wan wie goode Entscheidungen moaken?

¹⁸ Woat daut emma goot utkomen, wan wie ons oppe Schreft stetten toom Entscheidungen moaken? Jo, oppe Lenjd jo, wan sikj daut veleicht uk mol soo späat, daut et nich deit. Biejlikj Schadrach, Meschach un Abed Nego wisten, daut wan see sikj nich wudden ver de goldne Jestault bekjen, kunnen se an dootmoaken (Daniel 3:16-19). Biejlikj soo jinkj daut uk mol de Apostel, aus see ver dän judischen Rot wieren, aus see säden, daut see musten Gott aus Harscha leewa jehorchen aus de Menschen. Dan wort dee vepitscht, ea dee dee frieleeten (Aposteljeschicht 5:27-29, 40). Un wie motten uk aun dit denkjen: Wan wie uk goode Entscheidungen moaken, kaun daut doawäajen eenjemol wäajen “Tiet un Jlekj” faulsch ranen (Liera 9:11, PB). Wan wie rajchte Entscheidungen moaken un doawäajen mol lieden motten, kjenn wie doaropp vetruen, daut Jehova ons halpen woat uttohoolen un tolatst woat hee ons säajnen (2. Korinta 4:7).

19. Woo kjenn wie Moot haben un fa ons selfst Entscheidungen moaken?

¹⁹ Wan wie Entscheidungen moaken, dan mott wie emma seenen, waut de Schreft sajcht un ons sea aunstrenjen, daut uk notokomen, waut wie lieren. Wie kjennen sea dankboa sennen, daut Jehova ons sienen heiljen Jeist jeft un uk de Help von weise Breeda un Sestren en de Vesaumlunk. Derch aul dit kjenn wie Moot haben un fa ons selfst goode Entscheidungen moaken.

Waut hab wie jelieet?

• Waut mott wie doonen toom rajchte Entscheidungen moaken?

• Woo halpt ons daut, de Schreft emma bäta to vestonen, wan wie ons Frind wälen?

• Äwa waut mott wie aules nodenkjen, wan daut doarom jeit, waut vonne Oabeit wie aunnämen?

• Waut fa Help hab wie toom Entscheidungen moaken?

[Froagen]

[Bilt]

Daut et bie Adam un Eva soo wiet kjeem, daut dee ojjehuarsom worden, lieet ons waut wichtjet

[Bilt]

Sieekj en de Schreft no Rot ea du wichtje Entscheidungen moakst