Wuarom saul eene Fru unjadon sennen?
Wuarom saul eene Fru unjadon sennen?
“De Maun es de Kopp von de Fru” (1. KOR. 11:3, PB)
1-2. (a) Waut schreef de Apostel Paulus doaräwa, woo Jehova daut haft enjerecht, wäa daut Haupt es un wäa unjadon es? (b) Waut vonne Froagen woa wie en disen Artikjel derchgonen?
DE Apostel Paulus säd, “daut Christus de Kopp (daut Haupt) es vom Maun” un “Gott es de Kopp von Christus”. Dit es waut, waut Jehova soo enjerecht haft (1. Kor. 11:3, PB). En dän väajen Artikjel hab wie jeseenen, daut et fa Jesus waut besondret wia un uk eene Freid, daut hee kunn sien Haupt, Jehova Gott, unjadon sennen. Un wie sagen uk, daut christelje Mana uk een Haupt haben, daut es Jesus Christus. Jesus wia frintlich un leeftolich un metliedent un hee wia uk om aundre bedocht. Krakjt soo sellen de Mana to aundre enne Vesaumlunk sennen, besonda to äare Frues.
2 Woo es daut dan oba bie Frues? Wäa es dee äa Haupt? Paulus schreef: “De Maun es de Kopp von de Fru”. Waut bediet daut krakjt, waut Gott hia haft loten derch Paulus oppschriewen? Mott de Fru äaren Maun doawäajen noch unjadon sennen, wan äa Maun Jehova uk nich deent? Es doamet jesajcht, daut see bie Entscheidungen bloos emma mott stell sennen? Waut kaun see doonen, daut äa Maun ar respakjten deit?
“Ekj woa wäm moaken toom am halpen”
3-4. Wuarom es daut toom gooden, soo aus Jehova daut enne Ehe enjerecht haft?
3 Daut es Jehova, waut doa väasajcht, wäa enne Famielje saul veraungonen. Aus Jehova Gott Adam ieescht jemoakt haud, säd hee: “Daut es nich goot, daut de Mensch auleen es. Ekj woa wäm moaken toom am halpen, dee am paussen woat.” Un aus Eva dan ieescht jemoakt wia, wia Adam soo schaftich, daut hee eenen Helpa un eenen Poatna haud, daut hee säd: “Dise paust mie. Dit es Knoaken von mienen Knoaken, un Fleesch von mien Fleesch” (1. Mo. 2:18-24, PB). Adam un Eva hauden eene besondre Jeläajenheit: Dee wudden haben kunt de Elren sennen von volkomne Menschen, waut doa wudden haben kunt oppe gaunze Welt fa emma een Scheengonen haben.
4 Wäajens Adam un Eva sikj jäajen Gott stalden, vespälden dee daut eewje Läwen en dän Goaden Eden (läs Reema 5:12). Oba de Maun wia doawäajen noch daut Haupt äwa de Fru. Un wan de Maun siene Oppgow rajcht nokjemt un wan de Fru unjadon es, dan kaun daut enne Ehe fein schaufen un uk scheen gonen. De Ehe kaun daut dan uk scheen gonen, krakjt soo aus daut bie Jesus wia, aus hee Jehova unjadon wia. Ea hee no de Ieed kjeem, säd hee: “Ekj … freid mie bie am [Jehova] to sennen” (Spr. 8:30, PB). Oba wäajen een Maun nich volkomen es, kaun daut uk nich een volkomnet Haupt sennen un wäajen eene Fru nich volkomen es, kaun dee uk nich volkomen unjadon sennen. Wan de Ehemana un de Ehefrues oba äa bastet doonen un sikj aunstrenjen, dan kjennen dee doawäajen noch schaftich sennen, wan dee uk onvolkomen sent.
5. Wuarom sellen de Ehemana un Ehefrues sikj daut to Hoaten nämen, waut et en Reema 12:10 sajcht?
5 Wan Ehelied wellen haben, daut an daut saul scheen gonen, dan es daut sea wichtich, daut dee disen biblischen Rot nokomen, waut aule Christen jejäft woat: “Aus Breeda sell jie junt unjarenaunda von Hoaten goot sennen. Moakt emma Rum fa dän näakjsten siene Iea” (Reem. 12:10, PB, von ons dunkel jemoakt). De Schreft sajcht uk: “Siet leewa von Hoaten leeftolich eena toom aundren. Vejäft junt unjarenaunda”, un dit es een Dinkj, wua de Ehemaun uk de Ehefru beid sellen sea un schaufen (Efs. 4:32, PB).
Wan de Ehepoatna nich Jehova deent
6-7. Woo kunn daut utkomen, wan eene Fru, waut Jehova deent, äaren Maun unjadon es, waut Jehova nich deent?
6 Waut oba, wan de Ehepoatna Jehova nich deent? Foaken es daut soo, daut de Ehemaun nich deit. Woo saul de Fru dan doamet omgonen? De Schreft sajcht: “Jie Frues, siet june Mana unjadon, daut soone dee noch nich no Gott sien Wuat horchen wellen, onen väl to sajen, kjennen jewonnen woaren, wan see äare Frues äaren reinen, aunstendjen Waundel seenen” (1. Pet. 3:1-2, PB).
7 Enne Schreft woat de Ehefrues toojerot, daut dee äare Mana sellen unjadon sennen, wan dee Jehova uk nich deenen. Wan see daut soo aus daut doonen, dan kaun daut sennen, daut de Mana nieschierich woaren un veleicht uk wellen aunfangen to studieren un de Woarheit aunnämen.
8-9. Waut, wan eene christelje Fru aul äa Poat jedonen haft un äa Maun, waut Jehova nich deent, endat sikj doawäajen nich?
8 Waut es oba, wan de Maun, waut Jehova nich deent, sikj nich endat? De Schreft rot soone Frues too, waut Jehova deenen, daut dee emma sellen soo läwen, aus sikj daut fa Christen jehieet, wan daut uk schwoa es. Biejlikj woat en 1. Korinta 13:4 (PB) jesajcht: “Leew es jeduldich.” Doawäajen doonen Frues goot, wan dee de Sach met Leew droagen, soo aus daut sajcht: “Siet bescheiden, frintlich un jeduldich” (Efs. 4:2, PB). Met de Help von Gott sienen heiljen Jeist kjenn wie daut nokomen, waut de Schreft von Christen velangt, mau rajcht wan daut uk schwoa es.
9 “Ekj kaun aules derch däm, dee mie stoakj moakt”, schreef Paulus (Filip. 4:13, JHF). Gott sien Jeist moakt daut mäajlich, daut een Christ väl Dinja kaun uthoolen, waut dee aundasch nich wudd kjennen. Daut kunn biejlikj sennen, daut een Ehepoatna dän aundre sea aune Gaul deit un daut de aundra dän veleicht well trigjtolen. Oba de Schreft sajcht to jieda Christ: “Tolt daut nich met schlajchtet trigj, . . . wiels daut steit jeschräwen: ‘Rach eewen es miene Sach. Ekj woa trigjtolen, sajcht de Har [Jehova]’” (Reem. 12:17-19, PB). Un en 1. Tessalonicha 5:15 (PB) woat ons uk jesajcht: “Seet doano, daut kjeena däm aundren schlajchtet met schlajchtet trigjtolen deit. Sträft emma doano, junt unjarenaunda goodet to doonen, un daut uk aun aule Menschen.” Wan Jehova ons met sienen heiljen Jeist halpt, dan kjenn wie soont doonen, waut ons aundasch wudd too schwoa sennen. Woo wichtich daut dan nich es, daut wie om Gott sienen heiljen Jeist bäden, daut hee ons met daut halpt, waut ons fält!
10. Waut deed Jesus, aus aundre am schlajchte Wieed säden un nich fein wieren to am?
10 Jesus haft ons een feinet Väabilt jeloten, waut wie sellen doonen, wan aundre waut sajen, waut wie nich jleichen, ooda nich fein sent. 1. Petrus 2:23 (PB) sajcht von Jesus: “Hee schull niemols trigj wan see am schullen, hee dreiwd nich Rach to eewen wan hee lieden must, hee jeef Gott daut aun Haunt, dee doa rajcht rechten woat.” Well wie ons aun Jesus een Väabilt nämen. Wie sellen nich oajalich woaren, wan aundre domm to ons sent. Ons Christen woat toojerot, daut wie sellen “von Hoaten deemootich sennen. Tolt orrajcht nich met orrajcht trigj. Schelt nich trigj wan jie jeschullen woaren” (1. Pet. 3:8-9, PB).
Kaun eene Fru äare Meenunk sajen?
11. Aun waut vonne groote Oppgow woaren wesse Frues, waut Jehova deenen, Poat haben?
11 Wan de Fru dän Maun saul unjadon sennen, es doamet dan jemeent, daut see nich kaun äare Meenunk sajen, wan daut om Sachen enne Famielje jeit ooda om waut aundret? Nä, daut meent daut nich. Jehova haft de Frues väl besondre Oppgowen jejäft. Denkj wie bloos mol doaräwa no, woo besonda daut es, daut de 144 000 woaren kjennen em Himmel Kjennichs un Priestasch sennen, wan Jesus ieescht woat äwa de gaunze Welt rejieren. Mank dise 144 000 sent uk Frues (Gal. 3:26-29). Soo, daut es gaunz dietlich, daut Jehova de Frues wichtje Oabeit jejäft haft.
12-13. Jeff een Biespel, waut doa wiest, daut Frues profezeien.
12 De Schreft säd biejlikj, daut Frues wudden profezeien. Joel 3:1-2 (PB) säd verut: “No daut, woa ekj mienen Jeist opp aule Menschen jäwen, un june Säns un Dajchta woaren profezeien. . . . Soogoa opp däm Oabeida un de Kjäakjsche woa ekj dan mienen Jeist jäwen.”
13 Pinjsten aune 33 n. Chr. wieren doa en Jerusalem en eene Bowastow soo bie 120 von Jesus siene Jinja vesaumelt un doa wieren Frues un uk Mana mank. Gott sien heilja Jeist wort opp jieda eenem von dee utjegoten. Doawäajen räd Petrus von de Wieed, waut de Profeet Joel verutjesajcht haud un hee neem daut opp de Mana un uk de Frues. Petrus säd: “Dit es … daut wuavon de Profeet Joel räd: ‘Gott sajcht: Daut woat en de latste Tiet passieren, daut ekj mienen Jeist äwa aule Menschen jeeten woa. June Säns un Dajchta woaren profeetisch räden . . . un äwa Mana un Frues, dee mie deenen, woa ekj en dee Tiet mienen Jeist utjeeten, un dee woaren profeetisch räden’” (Aposteljeschicht 2:16-18, PB).
14. Woo deeden de Frues en de Aposteltiet halpen, dän Christengloowen to vebreeden?
14 En de Aposteltiet wieren doa Frues, waut sea väl deenen toom de goode Norecht prädjen. Un dee holpen uk en aundre Stekjen sea (Lukas 8:1-3). De Apostel Paulus räd biejlikj von Feebe, “dee en de Jemeent en Kenchreä deent”. Un hee leet uk siene Metoabeida jreessen, wua uk true Frues mank wieren soo aus “Trifäna un Trifosa, dee schwoa fa dän Harn oabeiden.” Hee räd uk von “de leewe Persis, dee sea schwoa fa dän Harn jeoabeit haft” (Reem. 16:1, 12, PB).
15. Woo halpen de Frues vondoag dän Dach, dän Christengloowen to vebreeden?
15 En de vondoagsche Tiet jeft daut äwa säwen Million Menschen, waut de goode Norecht von daut Kjennichrikj oppe gaunze Welt prädjen. Un een grootet Poat von dee sent Frues von veschiednet Ella (Mat. 24:14). Väle von dee brucken aul äare Tiet em Deenst, eenje sent uk Missionoaren ooda dee sent Poat von de Betelfamieljes. David säd en eenen Psalm: “Jehova sajcht, waut doa jedonen saul. De Frues, waut de goode Norecht bekauntmoaken, sent een grootet Häa” (Psa. 68:11, NW). Dit passieet werkjlich! Jehova räakjent daut sea väl, woo de Frues methalpen, de goode Norecht to vebreeden un sien Woakj uttofieren. Daut de christelje Frues sellen unjadon sennen, meent sea lang nich, daut dee nuscht doonen kjennen ooda bloos motten stell sennen.
Twee Frues, waut nich stell bleewen
16-17. Woo wiest Sara äa Biespel, daut eene Fru nich bloos doaf stell sennen enne Ehe?
16 Wan Jehova daut väl räakjent, waut de Frues doonen, wudden dan nich de Mana uk sellen met äare Frues räden, wan dee waut wichtjet entscheiden? Daut wudd werkjlich fein sennen, wan dee daut soo deeden. De Schreft rät von Frues, waut nich stell bleewen, wan äare Mana an uk nich no äare Meenunk fruagen. Räd wie mol von twee.
17 Dän Staumvoda Abraham siene Fru Sara säd am emma wada, daut hee siene tweede Fru un äaren Sän sull wajchschekjen, wiels dee nich Respakjt hauden. “Dit baudad Abraham sea,” oba Gott nich. Jehova säd to Abraham: “Moak die daut nich schwoa wäajen disen Jung un de Kjäakjsche. Doawäajen doo waut Sara sajcht” (1. Mo. 21:8-12, PB). Abraham jehorcht Jehova, hee horcht uk no Sara un deed daut, no waut see fruach.
18. Waut deed Abigajil, aus doa mol waut oppkjeem?
18 Denkj wie mol aun Abigajil, Nabal siene Fru. Aus David fa dän aufjenstjen Kjennich Saul must utstäakjen, wia hee dicht bie de Häaden von Nabal. Enne Städ daut hee sikj von dän rikjen Maun siene Sachen stool, deeden David un siene Mana daut beschitzen. Oba Nabal “wia schwoa to lieden un goaschtrich” un “hee schempt dee [David siene Mana] bloos ut”. Hee wia to nuscht to brucken un hee haud bloos dommet hinja de Uaren. Aus David siene Mana Nabal leeftolich no Help fruagen, säd dee daut bloos auf. Waut dee Abigajil dan, aus see doavon hieed, waut doa passieet wia? See säd nuscht to Nabal un daut sajcht: “Dan spood Abigajil sikj, un lod 200 Brootkjes un twee Ladasch voll Wien, fief jereede Schop un fief Pinjel jereeschte Jeträajd Kjieena, 100 Pungels Rasienen un 200 Stekja jepraste jedrieejde Fiejen”, un daut brocht see dan no David un siene Mana. Wia daut rajcht, waut Abigajil deed? De Schreft sajcht: “Dan … jeef de HAR Nabal noch eenen Schlach un hee storf doavon”. Lota befried David sikj met Abigajil (1. Sam. 25:3, 14-19, 23-25, 38-42, PB).
De Fru, waut jeloft woat
19-20. Woo mott eene Fru sennen, daut dee to lowen es?
19 En de Schreft woat soone Fru jeloft, waut de Sachen soo deit, aus Jehova daut haben well. Daut Bibelbuak Spricha loft “eene goode Fru” un sajcht, daut dee “väl mea wieet es aus diere Steena. Äa Maun sien Hoat kaun sikj ruich opp ar veloten. See woat daut aun nuscht fälen loten. See deit am goodet un nuscht schlajchtet soo lang aus see läft.” Un daut sajcht doa uk: “See moakt äa Mul weislich op, un kaun truhoatich un leeftolich belieren. See woakt äwa aulem em Hus, un sitt waut doa väajeit; see at nich een Fulenza Broot. Äare Kjinja stonen opp un säajnen ar, un soo uk äa Maun; hee loft ar” (Spr. 31:10-12, 26-28, PB).
20 Woo mott eene Fru sennen, daut dee to lowen es? Spricha 31:30 (PB) sajcht: “Schmock loten es nuscht un daut straume vejeit, oba eene Fru, dee dän HARN fercht, saul jeloft woaren.” Eene Fru, waut Jehova fercht, es daut dietlich, daut see deejanje mott unjadon sennen, waut Jehova aunjestalt haft toom enne Famielje un enne Vesaumlunk veraungonen. De Schreft sajcht: “De Maun es de Kopp von de Fru,” krakjt soo aus “Christus de Kopp (daut Haupt) es vom Maun,” un “Gott es de Kopp von Christus” (1. Kor. 11:3, PB).
Sie dankboa fa Gott sien Jeschenkj
21-22. (a) Wuarom kjennen christelje Lied dankboa sennen fa dän Ehestaunt? (b) Woosoo sell wie daut achten, woo Jehova daut enjerecht haft, wäa äwa ons aunjestalt es? (See dän Kausten.)
21 Christelje Ehelied haben väl Uasoak, Gott dankboa to sennen. Dee kjennen toop een scheenet Läwen haben un besonda kjennen dee dankboa sennen, daut see toop Jehova deenen kjennen! (Rut 1:9; Micha 6:8). Wiels Jehova mol met de Ehe aunjefongen haft, weet hee daut baste, waut dee fält, daut dee daut kaun scheen gonen. Doot aulsoo emma aules soo, aus Jehova daut haben well, un dan woat de Freid von am junt stoakj moaken, mau rajcht en dise schlajchte Welt (Neh. 8:10).
22 Een christelja Ehemaun, waut siene Fru krakjt soo sea leeft aus sikj selfst, dee woat een feinet, leeftoljet Haupt sennen. Un dän Maun woat daut uk leicht sennen, siene Fru to leewen, wiels see Jehova leeft un am biesteit un respakjt. Un waut daut wichtichste es, daut dee äare Ehe dan woat Jehova Gott ieren.
Weetst du daut noch?
• Woo haft Jehova daut enjerecht, wäa daut Haupt es un wäa unjadon es?
• Wuarom sellen Lied sikj unjarenaunda ieren?
• Woo saul eene christelje Fru äaren Maun behaundlen, waut Jehova nich deent?
• Wuarom saul een Maun ieescht met siene Fru räden, ea dee iernste Entscheidungen moakt?
[Study Questions]
[Kausten]
Wuarom sell wie wiesen, daut wie unjadon sent?
Jehova haft daut entschieden, wäa äwa wäm aunjestalt es un woo deejanja siene Oppgow saul utfieren. Dit es jedonen woaren, soo daut et fa Menschen un uk fa Enjel toom gooden es. Soo kjennen dee entscheiden, aus see Jehova en Fräd un Eenichkjeit deenen wellen (Psa. 133:1).
De jesaulwde Christen respakjten daut, daut Jesus Christus äwa an aunjestalt es (Efs. 1:22-23). Wiels Jesus daut respakjten deit, daut Jehova äwa am es, woat lota “uk de Sän selfst däm unjadon sennen, dee am aules unjadon jemoakt haft, daut Gott aules en aulem es” (1. Kor. 15:27-28, PB). Woo goot es daut dan nich, daut aul dee, waut sikj Gott hanjejäft haben, deejanje respakjten, waut en de Vesaumlunk un uk en de Famielje äwa an aunjestalt sent! (1. Kor. 11:3; Heb. 13:17). Wan wie daut soo doonen, dan woat Jehova met ons tofräd sennen un ons säajnen (Jes. 48:17).
[Bilt]
Bäden kaun eene christelje Fru halpen, soone Natua to kjrieen, waut Gott jefelt
[Bilt]
Jehova räakjent daut väl, waut de Frues fa daut Kjennichrikj doonen