Es dien Tietvedrief toom gooden?
Es dien Tietvedrief toom gooden?
“Prooft daut to lieren un to doonen, waut däm Harn jefelt” (EFS. 5:10, PB)
1-2. (a) Woo wiest de Schreft, daut Jehova well haben, daut wie sellen een scheenet Läwen haben? (b) Wan wie dän Tietvedrief aus waut seenen, waut doa “von Gott” kjemt, waut woa wie dan doonen?
ENDE Bibel kjenn wie emma wada läsen, daut Jehova haben well, daut wie nich bloos läwen sellen, oba een scheenet Läwen haben. Soo kjenn wie daut em Psalm 104:14-15 (PB) läsen, wua daut sajcht, Jehova jeft “dän Mensch Sot, daut hee de Ieed beoabeiden un Broot arnten kaun, Wien, dee am daut Hoat froo moakt, un Eelj, wuaderch een Jesecht scheen woat, un Broot, daut de Menschen daut Hoat stoakj helt”. Soo, daut es kloa, daut Jehova de Plaunten em waussen moakt, wäajens hee ons to äten jäwen well, soo daut wie läwen kjennen. De Schreft sajcht uk: “Wien moakt däm Mensch lostich”. Oba Wien es nich opp iernst needich fa daut Läwen. Un doch haft Jehova ons dän Wien jejäft, wiels dee ons schaftich moakt (Liera 9:7; 10:19, PB). Soo es daut, Jehova well fa ons een scheenet Läwen haben un hee moakt ons “daut Hoat froo” (Aposteljeschicht 14:16-17, PB).
2 Doawäajen es doa nuscht met orrajcht, wan wie ons mol Tiet nämen toom “no de Väajel enne Loft” kjikjen un no “dee Lelje opp de Stap” ooda aundret doonen, waut ons scheen jeit un fresch Krauft jeft (Mat. 6:26, 28, PB; Psa. 8:4-5). Daut scheene em Läwen “kjemt … von Gott”, sajcht de Schreft (Liera 3:12-13, PB). Soo, wan wie de Tiet, waut wie haben, woaren soo seenen, aus wan dee von Jehova kjemt, dan woa wie dee Tiet soo brucken, daut dän daut jefelt, waut ons dee jeft.
Pauss opp, waut von Tietvedrief du hast
3. Wuarom sell wie nich neiw sennen un denkjen, daut aule motten dänselwjen Tietvedrief jleichen aus wie?
3 Soone, waut rajcht äwa Tietvedrief denkjen, es daut dietlich, daut de Christen sikj veschieden Tietvedrief wälen kjennen, un dee weeten uk, daut nich jieda Tietvedrief fa an goot es. Woosoo kjenn wie daut sajen? Well wie Tietvedrief mol met Äten vejlikjen. De Menschen jleichen en veschiedne Lenda uk veschiednet Äten. Waut se opp eene Städ sea jleichen, daut jleichen se oppe aundre Städ nich. Krakjt soo es daut uk met Tietvedrief: Opp eene Städ oppe Welt jleichen se eene Sort Tietvedrief un oppe aundre Städ jleichen se aundren dolla. Mau rajcht en dautselwje Launt kaun daut veschieden sennen, waut jieda eena jleicht. Eena well veleicht een Buak läsen toom sikj vereiwen un dän aundren es soont fuaz enoolent. Fa eenen es daut veleicht scheen, met eenen Beisikjel foaren un sikj waut beseenen un toom sikj veholen. Un fa dän aundren es soont bloos noch toom meed woaren. Un doch kjenn wie vestonen, daut de Menschen sikj aul dit wälen kjennen un daut es uk goot un doa es nuscht met orrajcht (Reem. 14:2-4).
4. Woosoo mott wie oppaussen, waut von Tietvedrief wie haben? Met waut jeit daut to vejlikjen?
4 Wan wie uk daut Rajcht haben, veschiednet to doonen fa Scheengonen, meent daut oba nich, daut wie aules doonen kjennen, waut ons enkjemt. Denkj wie noch eemol aun daut Jlikjnis von daut Äten. Wan wie uk reed sent, veschiednet to äten, wudd wie oba nich met Fliet irjentwaut äten, waut schlajcht wia. Daut wudd nich kluak sennen un daut wudd mau rajcht onse Jesuntheit opp Spell saten. Krakjt soo es daut uk met Tietvedrief: Wan wie uk meatlei doonen kjennen, wudd wie oba nich soont doonen, waut jefäadlich es un uk nich soont, waut hunjsch ooda fa Christen schwiensch es. Wan wie daut deenen, dan wudd wie jäajen de Schreft gonen un daut wudd kjennen onse Jesuntheit ooda onsen Gloowen toom schoden sennen. Soo, ea wie dan entscheiden, waut wie woaren fa Scheengonen doonen, mott wie ieescht mol jescheit doaräwa jreblen, aus Gott daut woat jefaulen ooda nich (Efs. 5:10). Woo kjenn wie daut krakjt doonen?
5. Woo kjenn wie weeten, aus ons Tietvedrief met daut tooppaust, waut de Schreft sajcht?
5 Wan ons Tietvedrief saul toom gooden sennen un Jehova daut saul jefaulen, dan mott daut met daut paussen, waut de Schreft sajcht (Psa. 86:11). Waut ons halpen kaun to entscheiden, aus ons Tietvedrief soo es, sent dise dree Froagen: Waut es daut fa Tietvedrief? Woo väl Tiet nemt mie daut? Wanea es daut un met wäm toop es daut.
Waut es daut fa Tietvedrief?
6. Met waut von Tietvedrief well wie nuscht to doonen haben, un wuarom nich?
6 Ea wie bie irjent Tietvedrief metmoaken, wudd wie ieescht mol sellen äwa dise Froag nodenkjen: Om waut jeit daut en dän Tietvedrief, wua ekj no ut sie? Toom dise Froag beauntwuaten, mott ons daut ieescht mol dietlich sennen, daut et en dise Welt väl Tietvedrief jeft, waut gaunz kloa jäajen de Schreft es (1. Johanes 5:19). Woare Christen sent sikj gaunz eenich, daut see nuscht wellen met soonen Tietvedrief to doonen haben. Doa es soont met en, wua aundre schlajcht behaundelt woaren, Zaubarie, wua Mana met Mana ooda Frues met Frues doonen, wan daut om schwiensche Bilda jeit (ooda Pornografie), wua Jewault jebrukt woat ooda aundre schlajchte Sachen jedonen woat un fa goot jetalt woat (1. Kor. 6:9-10; läs Openboarunk 21:8). Krakjt endoont, aus wie auleen sent ooda nich, wie wiesen Jehova, daut wie eenen “Aufschu [haben] fa daut, waut schlajcht es”. Un daut doo wie doaderch, daut wie nuscht met soonen Tietvedrief to doonen haben (Reem. 12:9, PB; 1. Johanes 1:5-6).
7-8. Woo kjenn wie weeten, aus een jewessa Tietvedrief goot es ooda nich? Saj, met waut daut to vejlikjen jeit.
7 Daut jeft oba noch eene aundre Sort Tietvedrief, wua daut nich emma gaunz kloa es, aus dee jäajen de Schreft es ooda nich. Wan daut soo es, dan mott wie vestonen, waut Jehova jleicht un waut nich (Spr. 4:10-11). Un dan kaun jieda eena selfst soo entscheiden, daut dee lota woat een goodet Jewessen haben (Gal. 6:5; 1. Tim. 1:19). Woo kaun eena daut soo doonen? Na, denkj wie mol aun dit: Wan eena wudd wellen waut äten, waut eena noch kjeenmol jejäten haft, dan wudd eena ieescht mol wellen weeten, waut daut soo rajcht es. Krakjt soo es daut met Tietvedrief: Eena mott sikj daut ieescht mol unjastonen, om waut daut doa jeit un aus daut fa eenen Christ uk goot es (Efs. 5:17).
8 Toom Biespel jleichst du veleicht uk Sport, soo aus väle doonen. Väle jleichen Sport, wäajens see doa kjennen lostich sennen un wäajens daut scheen jeit. Oba woo wudd daut sennen, wan daut doa hunjsch toojinkj ooda jefäadlich wia ooda wan se een Fast hauden, wäajens äa Launt jewonnen haud, un daut doa sea uthoakt? Woo wurscht du die feelen, wan du aundre wurscht prädjen äwa Fräd un Leew un du daut oba jleichst, soon Sport to kjikjen, waut Jehova nuscht jefelt? Dan wurscht du die veleicht eenich woaren, daut doch nich to kjikjen (Jes. 61:1; Gal. 5:19-21). Oba wan du die kaust secha sennen, daut Jehova dän Tietvedrief jleicht, waut du jleichst, dan kaun daut uk sea goot sennen fa die (Gal. 5:22-23; läs Filippa 4:8).
Woo väl Tiet nemt mie daut?
9. Waut wiest ons de Auntwuat opp de Froag: Wanea un woo lang es mien Tietvedrief?
9 De ieeschte Froag wees ons, aus de Tietvedrief goot ooda schlajcht wia. Un de tweede Froag es nu: Wanea woa ekj Tietvedrief haben un woo lang woat daut sennen? Doano, waut de Auntwuat es, woat wiesen, woo wichtich dee fa ons es. Woo kjenn wie dan nu weeten, aus Tietvedrief fa ons nu opp eenst wichtja es, aus et wudd sellen sennen?
10-11. Woo halpt Matäus 6:33 ons to entscheiden, woo väl Tiet wie ons nämen toom Scheengonen haben?
10 Jesus Christus säd to siene Nofolja: “Du saust dän Harn, dienen Gott, von gaunzem Hoaten, met gaunze Seel, met aule Jedanken un aul diene Krauft goot sennen” (Markus 12:30, PB). Doawäajen kjemt de Leew fa Jehova en ons Läwen daut gaunzet ieeschte. Un wie bewiesen daut, daut et bie ons soo es, wan wie daut doonen, waut Jesus noch säd: “Sieekjt daut ieeschte no Gott sien Rikj un no siene Jerajchtichkjeit. Dan woa jie daut aundre uk aula kjrieen” (Mat. 6:33, PB). Woo halpen dise Wieed ons, daut kloa to haben, woo wichtich Tietvedrief fa ons saul sennen un woo väl Tiet wie ons sellen fa daut nämen?
11 Denkj doa mol äwa no. Jesus säd: “Sieekjt daut ieeschte no Gott sien Rikj”. Hee säd nich: “Sieekjt bloos no Gott sien Rikj”. Fa Jesus wia daut aulsoo kloa, daut eena uk must fa aundre Sachen em Läwen oppkomen soo aus fa een Hus, Äten, Kjleeda, no de School gonen, Oabeit, Tietvedrief un noch aundre Sachen. Oba von aul dit, säd hee, sull wie no eenatlei daut ieeschte sieekjen, un daut es daut Kjennichrikj, ooda Jehova deenen (1. Kor. 7:29-31). Dan mott wie aul de aundre Sachen aulsoo doafäa enstalen, daut wie uk werkjlich woaren kjennen daut ieeschte no daut Kjennichrikj sieekjen. Un wan wie daut soo doonen, dan woat Tietvedrief ons uk toom gooden sennen.
12. Woo kaun Lukas 14:28 ons halpen, wan daut om Tietvedrief jeit?
12 Ea wie entscheiden, waut von Tietvedrief wie woaren haben, mott wie ieescht mol seenen, woo väl Tiet ons daut woat kosten (Lukas 14:28). Un dan kjenn wie ons daut unjastonen, woo väl Tiet wie haben fa Tietvedrief, onen daut ons doa woat waut mankkomen. Wie motten ieescht doano seenen, daut wie jenuach Tiet haben toom fa ons selfst de Bibel studieren, fa daut Famieljenstudium, de Toopkomes ooda dän Prädichtdeenst (Markus 8:36). Oba wan de Tietvedrief ons fresch Krauft jeft un halpt, wieda Jehova to deenen, dan wudd de Tietvedrief toom gooden sennen.
Met wäm toop es daut?
13. Woosoo sell wie sea oppaussen, met wäm toop wie Tietvedrief haben?
13 Onse dredde Froag es: Met wäm toop es daut? Daut es needich, daut wie äwa dit nodenkjen, wäajens Frind kjennen fa ons toom gooden sennen un uk toom schlajchten. Daut es krakjt soo, aus wan wie met feine Menschen toop äten: dan jeit ons daut bäta. Wan wie met feine Poatna toop Tietvedrief haben, dan woat ons daut uk bäta gonen. Daut es to vestonen, daut väle von ons, besonda de junge Menschen, daut jleichen, wan see met aundre toop kjennen Tietvedrief haben. Oba wan wie wellen haben, daut ons de Tietvedrief opp iernst saul toom gooden sennen, dan mott wie ons aul em verut eenich woaren, met wäm toop wie wellen un met wäm toop nich (2. Chr. 19:2; läs Spricha 13:20; Jak. 4:4).
14-15. (a) Waut von Väabilt haft Jesus ons jeloten, woo wie kjennen de rajchte Frind finjen? (b) Äwa waut vonne Froagen wudd wie sellen jreblen, wan daut om Frind jeit?
14 Wie kjennen väl von Jesus lieren, wan daut doarom jeit, ons Frind to sieekjen. Jesus räakjend de Menschen sea väl; von Aunfank aun, aus dee jemoakt wieren (Spr. 8:31). Un aus Jesus oppe Ieed wia, wia hee om aule Menschen bekjemmat (Mat. 15:29-37). Wan Jesus uk to aule Menschen fein un leeftolich wia, wia hee oba sea väasechtich, woont siene groote Frind wieren. Hee säd to siene 11 true Apostel: “Jie sent miene Frind, wan jie doonen, waut ekj junt saj” (Johanes 15:14, PB; see uk Johanes 13:27, 30). Soo, Jesus wia bloos met dee groote Frind, waut am nofoljden un Jehova deenden.
15 Soo, wan du doaräwa jrebbelst, wäm du west toom gooden Frint haben, dan wurscht du sellen aun daut denkjen, waut Jesus säd. Jrebbel mol äwa dise Froagen: Wiest deejanja daut met daut, waut dee sajcht un deit, daut dee Jehova un Jesus jehorcht? Recht dee sikj no daut, waut de Schreft äwa goot un schlajcht sajcht, soo aus ekj doo? Woat dee mie halpen, Jehova tru to deenen un daut ieeschte no sien Kjennichrikj to sieekjen? Wan dee dit nokjemt, dan hast du opp iernst eenen gooden Frint, met dän du kaust toop Tietvedrief haben (läs Psalm 119:63; 2. Kor. 6:14; 2. Tim. 2:22).
Dien Tietvedrief – es dee opp iernst goot fa die?
16. Waut mott wie kloa haben äwa onsen Tietvedrief?
16 Soo aus wie nu jelieet haben, mott wie doano kjikjen, aus de Tietvedrief no de Schreft no rajcht es, wan dee saul fa ons toom gooden sennen. Un wie haben dreeatlei jeseenen; de ieeschte Froag wia: Waut es daut krakjt fa Tietvedrief un woat dee fa mie goot ooda schlajcht sennen? (Spr. 4:20-27). De aundre Froag wia: Woo väl Tiet woa ekj doa nenspenden un woat mie noch jenuach Tiet bliewen fa mienen Deenst fa Jehova? (1. Tim. 4:8). Un de latste Froag wia: Met wäm toop es daut? Woa ekj met goode ooda met schlajchte Frind toop sennen? (Liera 9:18; 1. Kor. 15:33).
17-18. (a) Woo kjennen wie daut weeten, aus ons Tietvedrief met de Bibel stemt? (b) To waut best du die eenich jeworden, wan daut doarom jeit, dienen Tietvedrief to wälen?
17 Wan ons Tietvedrief nich met daut tooppaust, waut de Schreft sajcht en dise dree Stekjen, dan es dee Tietvedrief nich fa ons. Oba wan daut doch deit, dan woat Jehova doaderch jeieet woaren un daut woat dan uk goot sennen fa ons selfst (Psa. 119:33-35).
18 Wan daut om Tietvedrief jeit, well wie aulsoo doano seenen, daut et de rajchta Tietvedrief es, daut wie ons nich too väl Tiet nämen un daut et uk met de rajchte Menschen toop es. Well wie ons aula eenich sennen, dän Rot notokomen, waut de Schreft ons hia jeft: “Auf jie äten ooda drinkjen ooda waut jie doonen, doot aules om Gott to ieren” (1. Kor. 10:31, PB).
Kaust du daut utlajen?
Woo kaust du dise Bibelvarzhen nokomen, wan daut om Tietvedrief jeit?
• Filippa 4:8?
• Matäus 6:33?
• Spricha 13:20?
[Froagen]
[Bilt]
✔Waut es daut fa Tietvedrief?
[Bilt]
✔Woo väl Tiet nemt mie daut?
[Bilt]
✔Met wäm toop es daut?
[Bilt]
Woo kjenn wie ons Jesus toom Väabilt nämen, wan daut doarom jeit, wäm wie ons toom Frint sieekjen un Tietvedrief haben?