De Schreft haft äa Läwen veendat

WUAHÄA hieed eene Fru en äare 60ja Joaren opp met Jetta aunbäden? Woo kjeem daut, daut een Schinto-Priesta siene Oabeit em Tempel opphieed un een Christ wort? Woo kunn eene Fru, waut bie kjlien wort von eene aundre Famielje hanjenomen, doamet foadich woaren, daut see sikj veloten feeld? Horch wie mol, waut dee ons vetalen.

“Ekj sie nich mea aun de Jetta jebungen” (ABA DANSOU)

WANEA JEBUAREN: 1938

VON WOON LAUNT: BENIN

WAUT EKJ EA WIA: EKJ DEED JETTA AUNBÄDEN

MIENE VEGONENHEIT: Ekj woss en So-Tchahoué opp. Daut es een natet Darp dicht bie eene Likj, wua daut emma sea naut es. De Menschen doa feschen, haben Vee, Kosen, Schop, Schwien un Väajel. Daut jeft doa nich Wäaj un doawäajen foaren de Menschen emma met Boots ooda kjliene Lommen. Un de Hiesa doa sent von Holt un Grauss un eenje uk noch von Tieejlen. De Menschen sent doa auljemeen oam. Oba daut jeft doa nich soo väl schlajchtet aus enne groote Städa.

Aus ekj een Kjint wia, dan schekjt mien Voda mie un miene Sesta no eene Städ, wua wie von onsen Gloowen lieeden. Daut wia eene Städ, wua nich aundre Menschen hankunnen un wie uk nich doa rut. Aus ekj oppwoss, funk ekj aun, dän Gott Dudua (Oduduwa) auntobäden. Daut es een Gott von daut Joruba-Volkj. Ekj bud eenen Aultoa fa disen Gott un opfad dän seete Ieedschocken, Kokonät-Eelj, Schnigjen, Heena, Duwen un veschiedne aundre Tieren. Dise Opfa kjeemen sea dia un ekj vebrukt meist aules, waut ekj haud fa dee.

WOO MIEN LÄWEN SIKJ DERCH DE SCHREFT JEENDAT HAFT: Aus ekj aunfunk de Bibel to studieren, dan lieed ekj, daut Jehova de eensich woara Gott es. Ekj wort uk en, daut hee daut nich fa rajcht tald, wan eena to Aufjetta bäden deed (2. Mose 20:4-5; 1. Korinta 10:14). Dan wia mie daut kloa, waut ekj doonen must. Ekj schmeet aul de Bilda wajch un ekj muak mien Hus gaunz rein von aules, waut met Aufjettarie to doonen haud. Ekj jinkj uk nich mea no de Woasaja toom dee befroagen un muak uk nich mea bie Gloowessitten met.

Mie wia daut nich leicht, aul dit to endren, wäajen ekj wia aul enne 60 Joa. Miene Frind un daut Frintschoft un de Nobasch, dee wieren jäajen mie un hauden sikj domm äwa mie. Oba ekj bäd to Jehova, daut hee mie sull Krauft jäwen, daut ekj daut rajchte doonen kunn. Mie treest daut uk sea, waut Spricha 18:10 (PB) sajcht: “Däm HARN sien Nomen es een stoakja Torm; de jerajchte ranen doahan un sent secha.”

Daut wia fa mie uk eene groote Help, daut ekj no Jehova siene Zeijen äare Toopkomes wankt. Ekj kunn seenen, woo dee sikj unjarenaunda Leew weesen un uk daut deeden, waut de Schreft säd. Un wäajen daut wia ekj mie gaunz secha, daut Jehova siene Zeijen dän woaren Gloowen haben.

WOO MIE DAUT TOGOOD KJEEM: Wiels ekj mie aun de biblische Gruntsauzen hool, räakjen ekj un miene Kjinja ons väl mea, un mie späat sikj daut uk soo, mie es eene groote Laust wajchjenomen worden. Ea must ekj emma väl Jelt utjäwen fa doodje Jetta, waut verheipts nich halpen kunnen, oba nu deen ekj Jehova un hee woat aul onse Trubbels fa emma wajchnämen (Openboarunk 21:3-4). Ekj sie nich mea aun de Jetta jebungen, nu sie ekj aun Jehova jebungen un daut moakt mie schaftich! Bie am hab ekj woare Sechaheit un Schutz jefungen.

“Ekj socht aul von Kjint aun no Gott” (SHINJI SATO)

WANEA JEBUAREN: 1951

VON WOON LAUNT: JAUPAUN

WAUT EKJ EA WIA: PRIESTA VON DÄN SCHINTO-GLOOWEN

MIENE VEGONENHEIT: Ekj woss en eene nate Staut en Jaupaun opp. Miene Elren wia äa Gloowen sea wichtich un dee lieeden ons, daut wie uk sullen de Schinto-Jetta aunbäden. Bie kjlien docht ekj foaken äwa miene Radunk no un ekj wull jieren soone Menschen halpen, waut daut schwoa hauden. Ekj weet noch, eemol fruach de Schoolliera ons, waut wie wullen doonen, wan wie ieescht groot wieren. Dee aundre Schoolkjinja, dee säden aula krakjt, waut see wullen, soo aus Wissenschoftla woaren. Ekj säd dan, waut ekj wudd jleichen to doonen. Ekj säd, ekj wudd noch mol jleichen, Gott to deenen. Un aule lachten äwa mie.

Aus ekj met de Huachschool derch wia, jinkj ekj no eene School, wua Gloowesleidasch utjelieet wort. Un aus ekj doa en de School wia, lieed ekj eenen Schinto-Priesta kjanen, waut bieaun mol een Buak läsd, waut eenen schwoaten Omschlach haud. Eenen Dach fruach dee mie: “Sato, weetst du, waut dit fa een Buak es?” Ekj haud daut aul jeseenen, waut doa oppem Omschlach jeschräwen wia, un dan säd ekj: “De Bibel.” Hee säd dan: “Jieda eena, waut doa well een Schinto-Priesta woaren, wudd sellen dit Buak läsen.”

Dan koft ekj mie uk rein fuaz eene Bibel. Ekj deed dee opp eene feine Städ oppem Schaup oppbewoaren un paust sea no dee opp. Oba ekj neem mie niemols de Tiet toom dee läsen, wiels ekj wia soo drock enne School. Aus ekj dan ieescht met miene School derch wia, dan wia ekj een Schinto-Priesta un deend en eenen Tempel. Entlich wia daut soo wiet jekomen, aus ekj mie daut von kjlien aun jewenscht haud!

Daut dieed goanich lang, dan wort ekj en, daut een Schinto-Priesta sennen, nich soo wia, aus ekj emma jedocht haud. De mieeschte Priestasch weesen nich Leew un jeewen uk nich väl waut om aundre rom. Väle hauden uk nich Gloowen. Eena von de väaschte Priestasch doa säd: “Wan du hia west wiedakomen, dan doascht du hia nich von Gloowes räden, bloos von auljemeene Sachen. Äwa dän Gloowen räden es veboden.”

Wan ekj soont hieed, dan feeld ekj mie noch dolla aunjeschmäat äwa dän Schinto-Gloowen. Ekj schauft noch wieda doa en dän Tempel, oba ekj intressieed mie aul fa aundre Gloowes. Oba ekj kunn noanich wua waut bätret finjen. Un fa mea Gloowes ekj mie intressieed, je ommootja wort ekj bloos. Mie wia soo, de Woarheit es en kjeene Jemeent to finjen.

WOO MIEN LÄWEN SIKJ DERCH DE SCHREFT JEENDAT HAFT: Aune 1988 troff ekj dan eenen Maun von dän Buddhisten-Gloowen un dee rod mie too, de Schreft to läsen. Dan foll mie daut bie, daut de Schinto-Priesta mie Joaren trigj uk haud toojerot, de Schreft to läsen. Un daut deed ekj dan. Ekj funk aun to läsen un ekj wort sea hinjaraun doano. Eenjemol läsd ekj de gaunze Nacht äwa, bat de Sonn oppjinkj.

Daut, waut ekj en de Schreft läsd, brocht mie bat doa, daut ekj to dän Gott bäd, von dän de Bibel kjemt. Ekj funk met daut “Unser-Vater”-Jebäd aun, waut en Matäus 6:9-13 oppjeschräwen es. Daut Jebäd säd ekj jieda Dach aule twee Stund äwa. Mau rajcht dan, aus ekj miene Oabeit doa en dän Schinto-Tempel deed.

Un aus ekj de Schreft läsd, kjeem doa väl Twiewel opp. Entweschen haud ekj mie dan aul befriet. Jehova siene Zeijen hauden en de Vegonenheit mol met miene Fru jerät un doawäajen wist ekj daut, daut dee aundre von de Schreft lieeden. Dan socht ekj mie eent von Jehova siene Zeijen opp un stald ar grulich väl Froagen. Ekj wia soo vewundat, daut see de Schreft brukt toom aules beauntwuaten, waut ekj fruach. Lota studieed ekj dan met Jehova siene Zeijen toop de Bibel.

Een Stootje lota wankt ekj dan no de Toopkomes von Jehova siene Zeijen. Oba waut ekj nich wist, daut doa noch eenje mank wieren, waut ekj ea nich sea leeftolich behaundelt haud. Oba dee wieren doawäajen noch leeftolich un sea oppnäment.

Bie de Toopkomes lieed ekj, daut Gott von Ehemana velangt, daut dee äare Frues un de Famielje sellen Leew wiesen. Verhäa haud ekj emma bloos doano jekjikjt, daut ekj miene Oabeit aus Priesta doonen kunn un haud mie doa kjeenmol om jekjemmat, woo miene Fru un Kjinja daut jinkj. Un dan wort mie daut kloa, daut ekj de Menschen, waut doa nom Tempel kjeemen, emma haud toojehorcht, oba daut ekj miene Fru kjeenmol haud toojehorcht.

Aus ekj dan wieda studieed, dan lieed ekj emma mea von Jehova, un doawäajen räakjend ekj am uk emma mea. Soone Bibelvarzhen aus Reema 10:13 (PB) jinjen mie besonda to Hoaten. Doa sajcht daut: “Wäaemma dän Harn en sien Nomen aunroopt, woat seelich woaren”. Ekj socht aul von Kjint aun no Gott, un nu entlich haud ekj dän jefungen!

Mie späad sikj daut emma dolla soo, daut ekj nich no dän Tempel jehieed. Ieeschtlich wia ekj beduat doaräwa, waut aundre wudden denkjen, wan ekj dän Schinto-Gloowen veleet. Oba ekj haud daut emma en mie kloa jehaut, daut wan ekj dän woaren Gott aundatwäajen wudd finjen, dan wudd ekj disen Gloowen veloten. Dan em Farjoa aune 1989 deed ekj daut, waut mien Jewessen mie säd. Ekj veleet dän Tempel un vetrud doaropp, daut Jehova mie halpen wudd.

Mienen Gloowen veloten wia mie nich leicht. De väaschte Priestasch beschuljden mie un wullen mie bemotten doa to bliewen. Waut mie noch schwanda wia, wia miene Elren daut to sajen. Aus ekj oppem Wajch doahan wia, wia daut schia too väl fa mie un ekj haud sea Angst. Ekj haud soo Angst, daut mie de Brost aunfunk weetodoonen un ekj wort gaunz schwak. Ekj hilt hinjawäajes mieremol stell un bäd Jehova om Krauft.

Aus ekj bie miene Elren aunkjeem, wuach ekj mie daut ieeschtlich goanich, doavon to räden – doa vejinjen Stunden. Aus ekj ieescht väl jebät haud, säd ekj mienen Voda daut schlieslich. Ekj säd am, daut ekj dän woaren Gott jefungen haud un wan ekj dän deenen wull, dan must ekj dän Schinto-Gloowen veloten. Mien Voda wia gaunz vebleft un truarich. Daut aundre Frintschoft kjeem uk noch doahan un dee proowden mie to beräden, daut ekj nich sull. Na jo, ekj wull je miene Famielje nich truarich moaken, oba ekj wist uk, daut daut daut rajchte wia, Jehova to deenen. Met de Tiet acht miene Famielje miene Entscheidunk.

Wan ekj dän Tempel uk veloten haud, must ekj doa doch noch väl aun denkjen, wäajens ekj doa soo sea met en jewast wia. Ekj wull doa jieren von vejäten, oba krakjt endoont, wua eena sikj handreid, aules holp eenem bloos noch doaraun denkjen, waut von Läwen eena ieescht jehaut haud.

Tweeatlei holp mie, doavon to vejäten. Daut ieeschte wia, daut ekj aule Sachen, waut ekj tus haud un met dän Gloowen to doonen hauden, vebrennen deed. Soo aus de Bieekja, Bilda un aundre diere Sachen, waut ekj haud. Un daut tweede wia, daut ekj soo väl aus mäajlich met Jehova siene Zeijen toop wia. Met dee Frind to sennen holp mie sea. Un soo bie sacht kunn ekj aules vejäten von verhäa.

WOO MIE DAUT TOGOOD KJEEM: Ea kjemmad ekj mie nich sea om miene Fru un miene Kjinja un doawäajen feelden dee sikj sea auleen. Oba de Schreft sajcht, daut de Ehemana sellen met de Famielje toop Tiet vebrinjen un wäajens ekj daut jedonen hab, sent wie nu väl dolla veeent. Un met de Tiet haft miene Fru uk aunjefongen, met mie toop Jehova to deenen. Wie un ons Sän un onse Dochta un dee äa Ehemaun sent nu aula en dän woaren Gloowen veeent.

Wan ekj trigjdenkj aun miene Kjintheit, aus mie jankad, Gott to deenen un de Menschen to halpen, dan weet ekj nu krakjt, daut ekj aules hab, waut ekj wull un noch väl mea. Daut jeit goanich uttospräakjen, woo dankboa ekj Jehova sie.

“Ekj haud nich aules, waut mie fäld” (LYNETTE HOUGHTING)

WANEA JEBUAREN: 1958

VON WOON LAUNT: SIED-AFRIKA

WAUT EKJ EA WIA: EKJ FEELD MIE VELOTEN

MIENE VEGONENHEIT: Ekj sie en Germiston jebuaren. Daut es eene Staut, wua met Mienen jeschauft woat, wua daut soo haulwäaj frädlich toojeit. Miene Elren dochten, daut see nich wudden kjennen fa mie oppkomen un doawäajen jeewen dee mie wajch, aus ekj noch mau 14 Doag oolt wia. Eene leeftolje Lied neemen mie han un ekj tald dee fa miene Mame un Pape. Oba aus ekj enwort, daut ekj hanjenomen wia, feeld ekj mie veloten. Un dan docht ekj soo, daut ekj nich to dee Famielje jehieed, waut mie hanjenomen haud. Un mie späad sikj uk soo, dee kunnen daut nich werkjlich vestonen, woo mie daut jinkj.

Aus ekj soo bie 16 Joa wia, funk ekj aun, no soone Städen to wanken, wua se drinkjen kunnen un ekj deed met de Frind toop daunzen un Spell horchen. Aus ekj 17 Joa wia, funk ekj aun to schmieekjen. Ekj wull uk soo denn sennen aus de schmocke Frues, waut se met Zegoaren aufbilden. Un aus ekj ieescht 19 Joa wia, dan funk ekj aun, en Johannesburg to schaufen un daut dieed goanich lang, dan wia ekj uk met eene Grupp schlajchte Frind toop. Ekj funk aun, schlajchte Räd to haben, ekj schmieekjt sea un utgangs Wäakj drunk ekj uk sea.

Ekj wia sea väl oppe Been un ekj deed veschiedne Sorten Sport. Bie miene Oabeit schauft ekj met Komputasch un ekj schauft sea doaropp, mie eenen gooden Nomen to moaken. Un doawäajen haud ekj daut uk riew un de Menschen dochten, daut ekj een goodet Wiedakomen haud. Oba rajcht jesajcht wia ekj vedrislich met mien Läwen un nich schaftich; ekj feeld mie auleen. Ennalich wist ekj daut: Ekj haud nich aules, waut mie fäld.

WOO MIEN LÄWEN SIKJ DERCH DE SCHREFT JEENDAT HAFT: Aus ekj aunfunk, de Bibel to studieren, dan lieed ekj, daut Jehova een leeftolja Gott es. Ekj lieed daut uk, daut hee ons siene Leew doaderch wees, daut hee ons sien Wuat de Bibel jeef. Daut es soo, aus wudd hee jiedrem eenen von ons oppoat eenen Breef jeschräwen haben toom ons wiesen, waut wie doonen sellen (Jesaja 48:17-18). Wan Jehova sien leeftolja Rot mie sull togood komen, dan wudd ekj motten välet en mien Läwen endren.

Eenatlei, waut ekj must endren wia, miene Frind. Ekj docht sea äwa Spricha 13:20 (PB) no, wua daut sajcht: “Wäa daut met weise Menschen helt, woat weis, oba wäa met Noaren vekjieet, woat Schoden lieden.” Dis Varsch holp mie, daut ekj miene oole Frind veleet un mie fresche socht mank Jehova siene Zeijen.

Waut mie sea schwoa wia, wia opphieren met schmieekjen, wiels ekj sea aufhenjich doavon wia. Oba met de Tiet kunn ekj doavon looskomen. Un dan kjeem een aundra Trubbel opp. Wiels ekj opphieed met schmieekjen, bätad ekj mie sea. Ekj neem 13,6 Kilo opp (30 Punt)! Daut muak mie sea truarich. Un daut dieed soo bie tieen Joa, bat ekj dee Kilo wada velieren kunn. Oba ekj wist, daut daut daut rajchte wia, daut ekj opphieed met schmieekjen. Un ekj bäd Jehova emma wada, daut hee mie sull Krauft jäwen, daut ekj doamet delenjdkjeem.

WOO MIE DAUT TOGOOD KJEEM: Ekj sie nu jesunda un schaftja un uk tofrädna. Ekj proow uk nich mea, miene Freid to kjrieen met eene goode Oabeit to haben ooda väl Jelt to vedeenen. Enne Städ daut jeit mie daut nu scheen, wan ekj aundre kaun von de biblische Woarheit vetalen. Un derch daut sent mau rajcht dree von miene väaje Oabeitspoatna enne Woarheit jekomen un uk mien Ehemaun. Un ea dee Elren, waut mie hanjenomen hauden, storwen, kunn ekj dee noch beid von daut Vespräakjen vetalen, daut de Doodes woaren oppstonen toom em Paradies oppe Ieed läwen.

Dicht bie Jehova to sennen haft mie jeholpen, doamet foadich to woaren, daut ekj mie nich soo veloten feel. Nu sie ekj Poat von eene Famielje oppe gaunze Welt; eene Famielje von Gloowesbreeda. Nu hab ekj een deel Mitta, Vodasch, Breeda un Sestren (Markus10:29-30).

[Bilt]

Ekj kunn seenen, woo Jehova siene Zeijen sikj unjarenaunda Leew weesen

[Bilt]

De Schinto-Tempel, wua ekj ieeschtemma deend